’اس وقت بھی ملک میں بہترین جمہوریت نہیں،‘ آصف زرداری، وزیراعظم کا انتخاب براہ راست ہونا چاہیے: تحریک انصاف

لائیو کوریج

1. 25 جنوری 2024سپریم کورٹ نے بھکر سے ثنااللہ مستی خیل کو الیکشن لڑنے کی اجازت دے دی, شہزاد ملک، بی بی سی اردو

   سپریم کورٹ نے این اے 91 بھکر سے آزاد امیدوار ثنااللہ مستی خیل کو الیکشن لڑنے کی اجازت دے دی ہے۔

   سپریم کورٹ میں این اے 91 بھکر سے آزاد امیدوار ثنااللہ مستی خیل کے کاغذات نامزدگی مسترد کرنے کے خلاف اپیل پر سماعت کے دوران چیف جسٹس قاضی فائز عیسیٰ نے استفسار کیا کہ کاغذات نامزدگی کیوں مسترد ہوئے ہیں؟

   وکیل درخواست گزار نے کہا کہ الیکشن ٹربیونل نے کاغذات منظور کیے، ہائی کورٹ نے مسترد کر دیے، ہائی کورٹ نے نوٹس جاری کیا نہ ہی موقف سنا، بس یکطرفہ فیصلہ ہو گیا۔

   جسٹس محمد علی مظہر نے کہا کہ ثنااللہ مستی خیل اشتہاری ہیں، پیش کیوں نہیں ہوتے؟

   وکیل درخواست گزار نے کہا کہ ثنااللہ مستی خیل سرنڈر کر چکے ہیں اور ضمانت پر ہیں۔ ثنااللہ مستی خیل پر الزام دفعہ 144 کی خلاف ورزی کا ہے۔

   عدالت نے مخالف فریق کے وکیل سے سوال کیا کہ کیا یہ درست ہے کہ ہائی کورٹ نے نوٹس جاری کیے بغیر فیصلہ کیا؟

   وکیل نے بتایا کہ درست ہے کہ ہائی کورٹ نے نوٹس جاری نہیں کیا تھا۔ چیف جسٹس نے استفسار کیا کہ بیلٹ پیپرز کی پرنٹنگ کی کیا پوزیشن ہے؟ انھوں نے الیکشن کمیشن کے حکام سے استفسار کیا کہ کیا بیلٹ پیپرز چھپ چکے ہیں؟

   الیکشن کمیشن حکام نے بتایا کہ بیلٹ پیپرز پرنٹنگ کے لیے تیار ہیں۔

   وکیل درخواست گزار نے بتایا کہ ثنااللہ مستی خیل کا نام ابتدائی لسٹ میں شامل تھا، انتخابی نشان بھی مل چکا ہے۔

   عدالت نے دلائل سننے کے بعد لاہور ہائیکورٹ کا کاغذات نامزدگی مسترد کرنے کا فیصلہ کالعدم قرار دیتے ہوئے الیکشن ٹربیونل کا 5 جنوری کا فیصلہ برقرار رکھا اور ثنااللہ مستی خیل کو الیکشن لڑنے کی اجازت دے دی۔

   سپریم کورٹ نے الیکشن کمیشن کو ثنااللہ مستی خیل کا نام بیلٹ پیپرز میں شامل کرنے کا حکم بھی دے دیا۔

2. 25 جنوری 2024تحریک انصاف کی صنم جاوید نے کاغذات نامزدگی مسترد کیے جانے کے خلاف سپریم کورٹ سے رجوع کر لیا

   پی ٹی آئی کی نامزد امیدوار صنم جاوید نے الیکشن میں حصہ لینے کے لیے سپریم کورٹ سے رجوع کر لیا ہے۔

   صنم جاوید نے کاغذات مسترد ہونے کے خلاف اپیلیں دائر کر دیں۔

   صنم جاوید کے این اے 119، این اے 120 اور پی پی 150 سے کاغذات مسترد ہوئے تھے۔ این اے 163 سے شوکت بسرا نے بھی اپیل دائر کر دی ہے۔

   اپیلوں میں ٹریبونلز کے فیصلے کالعدم قرار دینے کی استدعا کی گئی ہے۔

3. 25 جنوری 2024بلوچستان کے ضلع آواران سے پنجاب سے تعلق رکھنے والے پانچ افراد اغوا، سرچ آپریشن جاری, محمد کاظم بی بی سی اردو، کوئٹہ

   بلوچستان کے ضلع آواران سے پانچ افراد کو اغوا کر لیا گیا ہے۔ اغوا ہونے والے ان افرا د کا تعلق پنجاب سے بتایا جاتا ہے۔

   آواران سے متصل ضلع کیچ میں انتظامیہ کے ایک سینیئر اہلکار نے ان افراد کے اغوا کی تصدیق کرتے ہوئے بتایا کہ اغوا ہونے والے افراد میں ٹیکنیشن اور مزدور شامل ہیں۔

   اہلکار کا کہنا تھا کہ اغوا ہونے والے پانچوں افراد ضلع آواران کے علاقے ساجدی بازار میں ایک موبائل ٹاور نصب کرنے گئے تھے۔

   اہلکار نے بتایا کہ یہ افراد جس گاڑی میں گئے تھے وہ ضلع آواران کی حدود سے اندازاً سات کلومیٹر دور ضلع کیچ کے علاقے ڈانڈار سے ملی۔

   انتظامیہ کے اہلکار نے بتایا کہ اغوا ہونے والے افراد جس کمپنی کا موبائل فون ٹاور لگانے گئے تھے اس کمپنی کے حکام نے بھی ان کے اغوا کی تصدیق کی ہے۔

   اہلکار نے اغوا کے بعد ان افراد کی کیچ منتقلی کے امکان پر بات کرتے ہوئے بتایا کہ ضلع کیچ میں بھی ان کی بازیابی کے لیے کوششیں جاری ہیں۔

   بلوچستان کے ضلع کیچ کے ڈپٹی کمشنر حسین جان نے صحافی محمد زبیر خان کو بتایا کہ تحصیل ہوشاپ سے پنجاب کے پانچ رہائشیوں کی بازیابی کے لیے آپریشن شروع کردیا گیا ہے۔

   ان کے مطابق لیویز کی ٹیم روانہ کردی گئی ہے اور مختلف مقامات پر بازیابی کے لیے کارروائیاں کی جارہی ہیں۔

   خیال رہے کہ ضلع آوران کو بلوچستان کا سب سے زیادہ شورش زدہ ضلع سمجھا جاتا ہے۔ ضلع کیچ پولیس کے مطابق مغویوں نے اپنی نقل و حرکت کے حوالے سے پولیس کو کوئی اطلاع فراہم نہیں کی تھی۔ ان لوگوں کے استعمال میں ایک کرولا گاڑی تھی۔

4. 25 جنوری 2024عمران خان کی جیل ٹرائل کے خلاف درخواستوں پر فیصلہ محفوظ: ’احتساب عدالت کے جج اہم کیسز چھوڑ کر دو کیسوں کی سماعت کے لیے روزانہ اڈیالہ جاتے ہیں‘, شہزاد ملک، بی بی سی اُردو ڈاٹ کام

   

   ،تصویر کا ذریعہGetty Images

   اسلام آباد ہائی کورٹ نے سابق وزیر اعظم اور بانی پاکستان تحریک انصاف عمران خان کی طرف سے 190 ملین پاؤنڈز اور توشہ خانہ نیب ریفرنسز میں جیل ٹرائل کے خلاف دائر کردہ درخواستوں پر فیصلہ محفوظ کر لیا ہے۔

   بدھ کے روز اس کیس کی سماعت اسلام آباد ہائیکورٹ کے چیف جسٹس عامر فاروق کی سربراہی میں ہائیکورٹ کے دو رکنی بینچ نے کی تھی۔ اس بینچ کے دوسرے ممبر جسٹس طارق محمود جہانگیری تھے۔

   بُدھ کے روز ہونے والی سماعت کے دوران عمران خان کے وکیل شعیب شاہین ایڈووکیٹ نے دلائل دیتے ہوئے کہا تھا کہ ’ہم یہ نہیں کہہ رہے کہ جیل ٹرائل نہیں ہو سکتا لیکن اس ضمن میں واضح کیے گئے پیرامیٹرز پر عمل کرنا ضروری ہے۔ جیل ٹرائل غیرمعمولی حالات میں ہوتا ہے جس کے لیے متعلقہ جج کا جوڈیشل آرڈر ہونا لازم ہے جبکہ نیب کے پاس وفاقی حکومت کو جیل ٹرائل کیلئے لکھنے کا کوئی اختیار نہیں تھا۔‘

   اس پر سپیشل پراسیکیوٹر نیب امجد پرویز نے کہا کہ سابق وزیراعظم کی سکیورٹی کے باعث جیل ٹرائل کا فیصلہ کیا گیا تھا۔

   امجد پرویز نے کہا کہ بانی پی ٹی آئی کو 9 مئی کو 190 ملین پاؤنڈ نیب ریفرنس میں گرفتار کیا گیا تھا اور گرفتاری کے بعد ریمانڈ سے متعلق سماعت ہونی تھی۔انھوں نے کہا کہ نیب نے وفاقی حکومت کو لکھا تھا کہ یہ وہ کیس ہے جس کی وجہ سے 9 مئی کے واقعات پیش آئے اور وفاقی حکومت سے درخواست کی گئی جیل سماعت کے لیے نوٹیفکیشن جاری کیا جائے۔

   امجد پرویز نےاپنے دلائل کے حق میں بمبئی عدالت کا 1931 کا فیصلہ پیش کرتے ہوئے کہا اس فیصلے کی تین لائنوں میں موجودہ کیس کے تمام سوالات کا جواب ہے، اور جب ایک بار عدالت لگانے کے لیے نوٹیفکیشن جاری کر دیا گیا تو دوسرے کسی آرڈر کی ضرورت ہی نہیں۔

   اس پر چیف جسٹس نے کہا کہ اس میں کوئی شک نہیں کہ قانون کے مطابق جیل ٹرائل غیرمعمولی حالات میں ہوتا ہے۔

   دورانِ سماعت عمران خان کے وکیل شعیب شاہین ایڈووکیٹ نے دلائل دیتے ہوئے کہا کہ ریفرنس دائر نہیں ہوا تھا مگر اس سے پہلے ہی ٹرائل کا نوٹیفکیشن جاری ہو گیا۔ ’نوٹیفیکیشن اور سمری کے عمل کو دیکھیں تو اس پورے پراسیس میں غیرضروری جلد بازی واضح ہے۔ نیب کی درخواست پر ایک ہی دن میں سمری تیار ہوئی اور کابینہ سے منظور بھی ہو گئی۔ ملک میں باقی سارے کام بھی اتنی تیزی سے ہوتے تو کئی مسائل حل ہو جاتے۔‘

   اس پر چیف جسٹس عامر فاروق نے ریمارکس دیے کہ وہ بھی یہی بات نوٹ کر رہے ہیں اور یہی بات کہنے لگے تھے۔ اٹارنی جنرل نے اس موقع پر عدالت کو آگاہ کیا کہ اڈیالہ جیل میں نیب مقدمات کا ٹرائل اوپن کورٹ میں ہو رہا ہے۔

   شعیب شاہین ایڈووکیٹ نے کہا اسلام آباد ہائیکورٹ کو احتساب عدالت کے جج، نیب اور وفاقی حکومت کا کنڈکٹ بھی دیکھنا چاہیے کیونکہ احتساب عدالت کے جج تمام اہم کیسز کو چھوڑ کر دو کیسز کی سماعت کے لیے روزانہ اڈیالہ چلے جاتے ہیں۔

   عدالت نے فریقین کے دلائل سننے کے بعد فیصلہ محفوظ کر لیا۔

5. 25 جنوری 2024تین انتخابی امیدواروں پر حملے میں کوئی جانی نقصان نہیں ہوا، امن و امان کی صورتحال پہلے سے بہتر ہے: نگران وزیرِ اعلیٰ

   بلوچستان کے نگراں وزیر اعلیٰ میر علی مردان ڈومکی نے کہا ہے کہ بلوچستان میں انتخابات میں حصہ لینے والے تین امیدواروں پر حملے ہوئے تاہم کوئی جانی نقصان نہیں ہوا۔

   ان خیالات کا اظہار انھوں نے تربت میں عام انتخابات کے حوالے سے منعقدہ اجلاس کے بعد صحافیوں سے بات چیت کرتے ہوئے کیا۔

   وزیراعلیٰ کا کہنا تھا کہ آٹھ فروری کو پرامن انتخابات کے انعقاد کے لیے انتظامی سطح پر تیاریاں مکمل ہیں۔ انھوں نے کہا کہ تمام ڈویژنز کے دورے کر کے عام انتخابات کے انتظامات کا جائزہ لیا گیا ہے اور انتخابات سے متعلق اٹھائے گئے انتظامات اطمینان بخش ہیں۔

   انھوں نے کہا کہ عام انتخابات میں حصہ لینے والے امیدواروں کی سکیورٹی کو مزید بہتر بنایا جا رہا ہے۔ نگراں وزیر اعلٰی نے کہا کہ بلوچستان ماضی میں بھی دہشت گردی کا شکار رہا ہے تاہم اب حالات بہتری کی جانب جا رہے ہیں۔ انتظامیہ اور فورسز دہشت گردی کے خاتمے اور بحالی امن کے لیے پوری تندہی سے کام کر رہے ہیں اور پرامن انتخابات کے انعقاد کے لیے تمام دستیاب وسائل بروئے کار لائے جا رہے ہیں۔ قبل ازیں کمشنر آفس تربت میں نگراں وزیر اعلیٰ بلوچستان کی زیر صدارت انتخابات کی تیاریوں کے حوالے سے جائزہ اجلاس منعقد ہوا۔

   کمشنر مکران سعید احمد عمرانی اور مکران ڈویژن کے تینوں اضلاع کے ڈپٹی کمشنروں نے اجلاس میں انتخابات کی تیاریوں کے حوالے سے بریفنگ دی۔

   نگراں وزیر اعلیٰ نے کہا کہ الیکشن کی تیاری مکمل ہے اور حکومت پرامن صاف شفاف اور غیر جانبدارانہ انتخابات کے انعقاد کے لیے پرعزم ہیں۔

   ان کا کہنا تھا کہ الیکشن میں حصہ لینے والے امیدواروں کی سکیورٹی کو یقینی بنایا جا رہا ہے۔ انھوں نے کہا کہ امن و امان کے حوالے سے صورتحال پہلے سے بہتر ہے اور بحالی امن کے لیے مؤثر حکمت عملی مرتب کی گئی ہے۔

6. 25 جنوری 2024بی بی سی اردو کے لائیو پیج پر خوش آمید

   25 جنوری سے پہلے کی خبروں کے لیے اس لنک پر کلک کیجیے۔

7. 25 جنوری 2024’عقیدت کی سیاست‘: پاکستان میں پیروں، گدی نشینوں کی سیاست کا تصور کب آیا اور کیا وقت کے ساتھ اس میں کمی آ رہی ہے؟

8. 24 جنوری 2024شریف خاندان اور بلاول بھٹو کا ’مشن لاہور‘: کیا پنجاب کی سیاست مستقبل کے وزیراعظم کا فیصلہ کرتی ہے؟

9. 23 جنوری 2024’ہم کوئی آزاد ہیں؟‘ عاصمہ شیرازی کا کالم

10. 23 جنوری 2024پیپلز پارٹی اور ن لیگ کی جانب سے تین سو یونٹس تک مفت بجلی فراہم کرنے کے انتخابی وعدے معاشی طور پر قابلِ عمل ہیں؟

11. 22 جنوری 2024’گھر پر پی ٹی آئی کا جھنڈا لگانے پر‘ تلخی: پشاور میں باپ نے قطر پلٹ بیٹے کو گولی مار کر ہلاک کر دیا، پولیس

12. 22 جنوری 2024موروثی سیاست: پاکستان کی سیاست پر چند خاندانوں ہی کا راج کیوں ہے؟

13. 21 جنوری 2024انکل آپ الیکشن میں بیٹھیں گے یا پھر لیٹیں گے؟: وسعت اللہ خان کا کالم

14. 21 جنوری 2024سیاسی نظام پر عدم اعتماد یا سوشل میڈیا پر مہم: پاکستان بھر میں ماضی کے برعکس انتخابی گہما گہمی میں کمی کیوں؟

15. 19 جنوری 2024پاکستان کی فوج میں اختلاف رائے کا تاثر: ’ذہن سازی‘ اور پالیسی میں ’تبدیلی‘ کا ٹکراؤ کیسے ہوا؟

16. 18 جنوری 2024پاکستانی فوج کے حملے سے متاثر ہونے والے ایران کے سرحدی گاؤں میں تباہی کے مناظر

17. 18 جنوری 2024درجنوں انتخابی نشان، سینکڑوں امیدوار: پی ٹی آئی کی امیدواروں کی شناخت سے متعلق حکمت عملی کیا پولنگ کے دن کامیاب ہو پائے گی؟

18. 18 جنوری 2024آپریشن مرگ بر سرمچار: پاکستان کو فوری ردعمل دینے پر کس بات نے مجبور کیا اور یہ معاملہ کہاں جا کر رُکے گا؟

19. 18 جنوری 2024پاکستانی صحافیوں کے ’دو کیمپس‘: وی لاگز کی دنیا جہاں بات ’کھل کر ہوتی ہے‘ اور آمدن ڈالر میں

20. 17 جنوری 2024پاکستان کے الیکشن کی ساکھ پر سوالیہ نشان