معاشی ترقی اور اصلاحات کیلئے سیاسی استحکام ضروری ہے، شہباز شریف
وزیر اعظم شہباز شریف نے کہا ہے کہ معاشی ترقی اور ضروری اصلاحات کے لیے سیاسی استحکام ضروری ہے۔
سوشل میڈیا پر جاری ایک بیان میں انھوں نے کہا کہ معیشت کو اصلاحات کی ضرورت ہے جو سیاسی طور پر مستحکم ماحول میں ہی کی جا سکتی ہیں کیوں کہ معاشی ترقی سیاسی استحکام سے جڑی ہے۔
ان کا کہنا تھا کہ ترقی کرنے کے لیے سیاسی جماعتوں کو چارٹر آف اکانومی طے کرنا ہو گا۔
وفاقی بجٹ کے بارے میں بات کرتے ہوئے شہباز شریف کا کہنا تھا کہ حالیہ مشکلات کے پیش نظر، جن میں سیلاب، عالمی رسد کی فراہمی میں رکاوٹیں اور جیو سٹریٹیجک مسائل شامل تھے، بجٹ کی تیاری کافی مشکل کام تھا۔
انھوں نے کہا کہ یہ بجٹ ملک کی معیشت کو درپیش مسائل کے حل کی جانب آغاز ہے۔
مہنگائی کے بارے میں ان کا کہنا تھا کہ اسی وجہ سے تنخواہوں اور پینشن میں اضافہ کیا گیا۔
شہباز شریف نے کہا کہ موجودہ حالات میں اس سے بہتر بجٹ پیش کرنا ناممکن تھا جس میں کوئی نیا ٹیکس لاگو نہیں کیا گیا۔
