لانگ مارچ کا دوبارہ آغاز آج وزیر آباد سے ہو گا، عمران خان کا ایک اور فوجی افسر پر بھی قتل کی منصوبہ بندی کا الزام

لائیو کوریج

1. 7 نومبر 2022بریکنگ, بلا اجازت احتجاج کرنیوالوں کے خلاف کارروائی ہو گی: اسلام آباد پولیس کی تنبیہ

   

   ،تصویر کا ذریعہGetty Images

   وفاقی دارالحکومت اسلام آباد کی پولیس نے کہا ہے کہ شہر میں بلا اجازت احتجاج کرنے والوں کے خلاف کارروائی عمل میں لائی جائے گی، جن سیاسی کارکنان کی شناخت اور مقدمات درج ہیں ان کی گرفتاری کے لیے کارروائی کررہے ہیں۔

   اسلام آباد پولیس کی جانب سے جاری بیان میں کہا گیا ہے اسلام آباد انٹرنیشنل ائیرپورٹ سے آنے والے قومی اور بین الاقوامی مہمانوں کے لیے راستے کھلے رکھے جائیں گے، ائیر پورٹ کےلیے بلا رکاوٹ آمد و رفت قومی تشخص کے لیے اہمیت کی حامل ہے۔ وفاقی قانون نافذ کرنے والے ادارے ائیرپورٹ اور موٹروے تک آمد ورفت کے راستوں کی نگرانی کریں گے۔

   سیاسی جماعت ( پی ٹی آئی) کے رہنماؤں نے اسلام آباد کے داخلی و خارجی راستے بند کرنے کا اعلان کیا ہے جس وجہ سے اسلام آباد کے شہریوں، طلبہ اور مریضوں کو مشکلات کا سامنا کرنا پڑ سکتا ہے۔ اس لیے تمام سیاسی کارکنوں سے گزارش ہے کہ انتظامیہ سے اجازت کے ساتھ مختص مقام پر احتجاج کریں۔

2. 7 نومبر 2022تحریک انصاف کا لاہور میں دوبارہ احتجاج کا اعلان

   

   ،تصویر کا ذریعہGetty Images

   پاکستان تحریک انصاف نے آج (پیر) سے لاہور میں دوبارہ احتجاج شروع کرنے کا اعلان کیا ہے۔

   اس سلسلے میں گورنر ہاؤس کے باہر مرکزی مظاہرہ کیا جائے گا جس کی قیادت پی ٹی آئی کے سیکرٹری جنرل اسد عمر کریں گے۔

   گورنر ہاؤس کے علاوہ لاہور کے داخلی اور خارجی راستوںپر بھی احتجاج کی کال دی گئی ہے۔

3. 7 نومبر 2022بریکنگ, کارکن آج رات سے اسلام آباد کے داخلی و خارجی راستے بند کریں گے، پرویز خٹک کا اعلان

   

   پاکستان تحریک انصاف کے رہنما اور سابق وزیر دفاع پرویز خٹک نے اعلان کیا ہے کہ پاکستان تحریک انصاف کے کارکن آج رات سے اسلام آباد کے داخلی و خارجی راستے بند کریں گے۔

   مقامی نیوز چینل جیو نیوز سے گفتگو میں پرویز خٹک کا کہنا تھا کہ منگل سے خیبرپختونخوا کے تمام اضلاع میں لانگ مارچ شروع ہو گا، تمام ارکان اسمبلی اور بلدیاتی نمائندوں کو پارٹی قیادت نے لانگ مارچ کی ہدایت دی ہے۔

   ان کا کہنا تھا کہ خیبر پختونخوا کو چار ریجن میں تقسیم کیا گیا ہے، جنوبی اضلاع میں ڈی آئی خان تک لانگ مارچ کی قیادت علی امین گنڈاپور کریں گے، مالاکنڈ ڈویژن میں مراد سعید اور ہزارہ میں لانگ مارچ کی قیادت اسد قیصر اور شاہ فرمان سمیت میں خود کروں گا۔

   انھوں نے کہا کہ عمران خان روزانہ شام ساڑھے چار بجے ویڈیو لنک سے چاروں صوبوں میں کارکنوں سےخطاب کریں گے۔

   پرویز خٹک نے بتایا کہ لانگ مارچ کے تمام جلوس 11 سے 14 دن تک راولپنڈی پہنچیں گے، راولپنڈی سے اسلام آباد تک لانگ مارچ کی قیادت عمران خان کریں گے۔

   خیال رہے کہ عمران خان نے منگل سے لانگ مارچ وزیرآباد سے ہی شروع کرنے کا اعلان کیا ہے۔

4. 7 نومبر 2022بی بی سی کے لائیو پیچ میں خوش آمدید!

   

   ،تصویر کا ذریعہBBC/Getty Images

   بی بی سی اردو کی لائیو کوریج میں خوش آمدید۔

   ملک کی سیاسی صورتحال اور بدلتے حالات کی تازہ ترین معلومات کے لیے بی بی سی کی خصوصی لائیو پیج کوریج۔

   چھ نومبر تک کی کی نیوز اپ ڈیٹس کے لیےاس لنک پر کلک کریں