فیصلوں پر سیاسی جماعتوں کے سخت ردعمل کے باوجود عدالت نے تحمل کا مظاہرہ کیا: چیف جسٹس عمر عطا بندیال

لائیو کوریج

1. 9 ستمبر 2022بریکنگ, لاپتہ افراد کیس: وزیراعظم شہبام شریف کی ہائی کورٹ آمد, شہزاد ملک، بی بی سی اردو

   پاکستان کے وزیراعظم شہبازشریف لاپتہ افراد کیس میں اسلام آباد ہائیکورٹ میں پیش ہوئے ہیں۔

   چیف جسٹس اسلام آباد ہائی کورٹ اطہر من اللہ نے سماعت کے موقع پر کہا کہ بہت مہینوں سے لاپتہ افراد کے کیسز عدالت میں زیر سماعت ہیں، اس اہم مسئلے پر ریاست کا وہ رویہ نظر نہیں آتا جو نظر آنا چاہیے۔

   انھوں نے اپنے ریمارکس میں کہا کہ لگتا ہے کہ لوگوں کو لاپتہ کرنا ریاست کی غیر اعلانیہ پالیسی ہے۔

   چیف جسٹس نے کہا کہ `اس عدالت نے آپ کو تکلیف اسی لیے دی کیوں کہ ایک بہت بڑا مسئلہ ہے۔ آپ منتخب وزیر اعظم ہیں، آپ پہلی بار اس عدالت آئے، سٹیٹ کے اندر سٹیٹ نہیں ہوسکتی، اس عدالت نے اس معاملے کو کئی بار وفاقی کابینہ کو بھیجا، عدالت نے آپ کو معاملہ بھیجا آپ نے کمیٹی بنائی۔

   تاہم چیف جسٹس نے کہا کہ وزیر اعظم صاحب یہ معاملہ کمیٹی کا نہیں ہے۔

   عدالت نے وزیراعظم سے کہا کہ آئین اور قانون کے مطابق تمام ذمہ داری چیف ایگزیکٹو پر آتی ہے، آپ کا لاپتہ افراد کیسز میں کمیٹی بنانا خوش آئند ہے۔ لاپتہ افراد کمیشن میں لواحقین کی تکالیف مزید بڑھائی گئی۔

   چیف جسٹس نے وزیراعظم کو مخاطب ہو کر کہا `یا تو آپ کو کہنا پڑے گا کہ آئین اپنی حالت میں بحال نہیں، اگر یہ بات ہے کہ تو پھر اس عدالت کو کسی اور کو بلانا پڑے گا، اس عدالت کو اچھا نہیں لگتا کہ منتخب وزیراعظم کو بلائے، آپ سیلاب کی تباہ کاریوں کے بعد بحالی سے متعلق کاموں میں مصروف ہوں گے۔`

2. 8 ستمبر 2022بریکنگ, عمران خان کا جواب تسلی بخش نہیں تھا: عدالت کا تحریری حکم

   اسلام آباد ہائیکورٹ میں عمران خان کے خلاف توہین عدالت کیس میں عدالت نے تحریری حکمنامہ جاری کر دیا ہے۔

   تحریری حکم میں کہا گیا ہے کہ ’عمران خان کا جواب تسلی بخش نہیں تھا‘

   ’ہم مطمئن نہیں کہ عمران خان خود پر لگا توہین کا الزام ہٹانے میں کامیاب رہے،عدالت بائیس ستمبر کو دن ڈھائی بجے فرد جرم عائد کی جائے گی۔‘

   حکمنامہ فریقین کے وکلا، اٹارنی جنرل اور عدالتی معاونین کو سنایا گیا۔

3. 8 ستمبر 2022بریکنگ, عمران خان پر توہین عدالت کی فرد جرم عائد ہونے کے بعد کیا ہوگا؟, شہزاد ملک، بی بی سی اردو ڈاٹ کام

   لاہور ہائی کورٹ کے سابق جج شاہ خاور کا کہنا ہے کہ عمران خان کے خلاف توہین عدالت کے مقدمے میں فرد جرم عائد ہونے کے بعد اس مقدمے کا ٹرائل شروع ہو جائے گا۔

   انھوں نے کہا کہ توہین عدالت کے مقدمے میں جب عدالت ملزم کو نوٹس جاری کرتی ہے تو وہ مرحلہ بڑی اہمیت کا حامل ہوتا ہے۔

   انھوں نے کہا کہ اگر اس مرحلے پر ملزم غیر مشروط معافی مانگ لے تو اس بات کے امکانات زیادہ ہوتے ہیں کہ عدالت ملزم کو معاف کردے۔

   شاہ خاور کا کہنا تھا کہ اگر فرد جرم عائد کرنے کا مرحلہ آجائے اور کورٹ مارشل کی طرح کورٹ آف انکوائری بیٹھ جائے تو جرم ثابت ہونے اور مجرم کو سزا سنائے جانے کے امکانات زیادہ ہوتے ہیں۔

   انھوں نے کہا کہ فرد جرم عائد ہونے کے بعد اس مقدمے کا باقاعدہ آغاز ہو جائے گا اور اس حوالے سے پراسیکیوشن کے گواہان کو طلب کیا جائے گا۔

   شاہ خاور کا کہنا تھا کہ عمران خان کے خلاف کوئی گواہ تو پیش نہیں ہوگا البتہ انھیں ان کے بیانات کے ٹرانسکرپٹ دیا جائے گا۔

   انھوں نے کہا کہ اس کے علاوہ ملزم کو بھی یہ حق حاصل ہوتا ہے کہ وہ اپنے بیانات کے حق میں کوئی گواہ بھی پیش کرسکتا ہے۔

   شاہ خاور کا کہنا تھا کہ عمران خان کے پاس اس عدالتی فیصلے کو سپریم کورٹ میں چیلنج کرنے کا حق حاصل ہے۔

4. 8 ستمبر 2022بریکنگ, صوبائی اور قومی اسمبلیوں کی 13 نشستوں پر ضمنی انخابات کے لیے ہونے والی پولنگ ملتوی

   پاکستان کے الیکشن کمیشن کے مطابق صوبائی اور قومی اسمبلیوں کی 13 نشستوں پر ضمنی انخابات کے لیے ہونے والی پولنگ کو ملتوی کر دیا گیا ہے۔

   الیکشن کمیشن کے مطابق یہ فیصلہ ملک میں سیلاب کے باعث پیدا ہونے والی صورتحال کی وجہ سے کیا گیا ہے۔

   الیکشن کمیشن کی جانب سے جاری بیان کے مطابق صوبہ سندھ ، خیبر پختونخوا، اور پجاب میں ضمنی انتخابات کے لیے پولنگ 11ستمبر، 25 ستمبر اور دو اکتوبر کو ہونی تھی۔

   پولنگ کے لیے نئی تاریخوں کا اعلان بعد میں کیا جائے گا۔

5. 8 ستمبر 2022اسلام اباد ہائی کورٹ: توہین عدالت کیس میں اظہار وجوہ کے نوٹس پرعمران خان کا جواب مسترد

   اسلام اباد ہائی کورٹ نے توہین عدالت میں اظہار وجوہ کے نوٹس پر سابق وزیراعظم عمران خان کا جواب مسترد کردیا ہے ۔ فرد جرم 22 ستمبر کو عائد کی جائے گی۔دیکھیے بی بی سی اردو کا فیس بک لائیو۔

6. 8 ستمبر 2022بریکنگ, ’عدالت عمران خان کے جواب سے مطمئن نہیں‘، 22 ستمبر کو فرد جرم عائد کرے گی

   اسلام آباد ہائی کورٹ نے کہا ہے کہ وہ توہین ِعدالت کیس میں عمران خان کی جانب سے جمع کروائے گئے جواب سے مطمئن نہیں ہے۔

   عدالت اب 22 ستمبر کو عمران خان پر فرد جرم عائد کرے گی۔

7. 8 ستمبر 2022بریکنگ, ضمنی جواب میں بھی مشروط معافی تک نہیں مانگی گئی: عدالتی معاون اختر حسین

   اس سے پہلے عدالتی معاون اختر حسین نے دلائل میں کہا کہ ’جس معاشرے میں ہم رہ رہے ہیں وہاں اب بھی جاگیردارانہ نظام چل رہا ہے۔‘

   ’جرگہ سسٹم کے خلاف کئی فیصلے ہیں مگر جرگہ سسٹم آج بھی ہے۔ ضمنی جواب میں بھی مشروط معافی تک نہیں مانگی گئی۔ ‘

   عدالتی معاون اختر حسین کا کہنا تھا کہ ’پارٹی رہنما کو گرفتار کیا گیا اور اس پر ٹارچر کیا گیا، سخت ترین حالات میں غیر ارادی الفاظ کہے گئے۔

   اختر حسین نے شوکاز نوٹس کی حمایت کی۔

   عمران خان نے عدالت سے کہا کہ عدالت نے ان کا موقف نہیں سنا جس ہر چیف جسٹس کا کہنا تھا کہ وکلا کا موقف سن لیا ہے اور اس کے بعد عمران خان کو بولنے کی اجازت نہیں دی۔

8. 8 ستمبر 2022بریکنگ, توہین عدالت کیس میں عمران خان کا جواب تسلیم کیے جانے سے متعلق فیصلہ کچھ دیر میں

   عمران خان کے خلاف توہین عدالت کیس میں اسلام آباد ہائی کورٹ میں عدالتی معاونین کے دلائل مکمل ہو گئے ہیں۔

   عدالت کچھ دیر میں فیصلہ سنائے گی کہ عمران خان کا جواب تسلیم کریں گے یا نہیں۔

   عدالت نے کہا ہے کہ فیصلہ سے قبل اگر عمران خان کی جانب سے اب بھی غیر مشروط معافی مانگ لیں تو عدالت اس پر غور کر سکتی ہے۔

9. 8 ستمبر 2022بریکنگ, کیا کسی کی انا عدلیہ کے وقار سے زیادہ اہم ہے؟: چیف جسٹس اطہر من اللہ

   عمران خان کے خلاف توہین عدالت کے کیس چیف جسٹس اطہر من اللہ کا کہنا تھا ’میں یا کسی کی انا عدلیہ کے وقار سے زیادہ اہم ہے؟‘

   ان کا مزید کہنا تھا کہ ’غیر مشروط معافی کی بات بھی نہیں کی گئی۔‘

   اس پر مخدوم علی خان کا کہنا تھا کہ ’پچھتاوے کا اظہار اس کیس میں کیا جا چکا ہے۔‘

   انھوں نے کہا کہ ’عدالت اس اظہار کے لیے کوئی اور ایکسپریشن چاہتی ہو تو بھی بتا سکتی ہے‘۔

   اب پاکستان بار کونسل کے رہنما اور عدالتی معاون اختر حسین دلائل دے رہے ہیں۔

10. 8 ستمبر 2022مخدوم علی خان نے بھی عمران خان کے خلاف توہین عدالت کی کارروائی کی مخالفت کر دی

    عدالتی معاون مخدوم علی خان کا کہنا تھا کہ ’عوامی اجتماع سے جوش و خطابت میں جو کہا گیا اس سے شاید عدالتی انتظام متاثر ہو،عوامی فلاح صرف انصاف کی فراہمی میں ہے۔ آپ نے خود کہا کہ آزادی اظہارِ رائے پر کوئی قدغن نہیں ہونا چاہیے۔‘

    منیر اے ملک کے بعد مخدوم علی خان نے بھی عمران خان کے خلاف توہین عدالت کی کارروائی کی مخالفت کردی۔

    عدالتی معاون مخدوم علی خان کا بھی کہنا تھا کہ ’عدالت بڑے پن کا مظاہرہ کر کے عمران خان کو معاف کردے‘۔

    مخدوم علی خان کا مزید کہنا تھا ’اعلیٰ عدلیہ اور ماتحت عدلیہ کے احترام میں کوئی فرق نہیں ہونا چاہیے۔‘

11. 8 ستمبر 2022بریکنگ, پہلے بھی کہا تھا ڈسٹرکٹ جوڈیشری ریڈ لائن ہے: چیف جسٹس

    عمران خان کے خلاف توہین عداکت کیس میں اسلام آباد ہائی کورٹ کے چیف جسٹس نے کہا ’کیا آپ یقین کریں گے کہ ماتحت عدلیہ کے ساتھ اعلیٰ عدلیہ جیسا سلوک ہوگا، آخری سماعت پر ، ایک خاتون جج کا نام لیا گیا، شیم کیا گیا، کیا آپ چاہتے ہیں کہ اس کو صاف کیا جائے‘۔

    ان کا مزید کہنا تھا کہ ’کیا آپ کو معلوم ہے کہ امریکہ میں ٹرمپ کا ٹوئٹر اکاؤنٹ معطل ہے۔ کیا بیان دینے اور اشتعال دلانے میں فرق نہیں ہے؟

    عدالتی معاون مخدوم علی خان نے دلائل دیتے ہؤئے کہا کہ ’عوامی اجتماع سے جوش و خطابت میں جو کہا گیا اس سے شاید جوڈیشل ایڈمنسٹریشن متاثر ہو، آپ نے خود کہا کہ آزادی اظہارِ رائے پر کوئی قدغن نہیں ہونا چاہیے۔‘

    چیف جسٹس کا کہنا تھا ’لیڈر کا رول معاشرے میں اہم ہے جو معاشرے کو بدل سکتا ہے۔ ‘

    اس پر مخدوم علی خان کا کہنا تھا کہ ’مفاد عامہ انصاف کی فراہمی میں ہے تو اظہار رائے کی آزادی میں بھی، امریکہ میں صدر نے عدالتی فیصلے کو بدترین کہا تھا۔ وہاں عدلیہ نے گریز کا مظاہرہ کیا دوسرا راستہ نکالا وہ نکالتے ہیں۔‘

    اس پر چیف جسٹس کا کہنا تھا ’امریکہ میں ہی مگر ڈونلڈ ٹرمپ کا ٹوئٹر اکاونٹ معطل ہوا تھا، ڈونلڈ ٹرمپ کا اکاونٹ پیروکاروں کو اشتعال دلانے پر معطل ہوا تھا۔‘

12. 8 ستمبر 2022توہین عدالت کا قانون استعمال کرتے ہوئے ہمیشہ تحمل کا مظاہرہ کیا جاتا ہے: منیر اے ملک

    منیر اے ملک نے دلائل دیتے ہوئے کہا کہ ’عمران خان پر جوڈیشل اور کریمنل توہین عدالت کا الزام ہے، عدالتیں توہین عدالت کیسز میں بہت تحمل کا مظاہرہ کرتی ہیں، شوکاز نوٹس میں تین قسم کے الزامات لگائے گئے۔‘

    منیر اے ملک کا کہنا تھا کہ ’اسلام آباد ہائیکورٹ کا جو معیار ہے کوئی اس پر اثرانداز نہیں ہوسکتا، توہین عدالت کا قانون عدلیہ کو مضبوط کرنے کے لیے استعمال ہوتا ہے، توہین عدالت کا قانون استعمال کرتے ہمیشہ تحمل کا مظاہرہ کیا جاتا ہے۔‘

    ان کا مزید کہنا تھا کہ ’یہ درست ہے کہ توہین عدالت میں سپریم کورٹ کے فیصلے موجود ہیں، یہ بات بھی مگر اپنی جگہ ہے کہ توہین عدالت کا قانون مسلسل نمُو پذیر ہے، عدالت سے باہر کہی گئی کوئی بات اسلام آباد ہائیکورٹ پر اثر انداز نہیں ہوسکتی۔‘

    منیر اے ملک کا کہنا تھا ’میں آخری شخص ہوں گا جو مانوں کہ اسلام آباد ہائیکورٹ پر تقریر کااثر پڑا۔‘

    عدالتی معاون ، سینئر قانون دان منیر اے ملک نے عمران خان کیخلاف توہین عدالت کارروائی کی مخالفت کر دی۔

    ان کا کہنا تھا کہ ’الفاظ افسوسناک مگر انصاف کی فراہمی میں رکاوٹ نہیں بن سکتے۔‘

13. 8 ستمبر 2022عمران خان کے جواب میں اظہار افسوس ہے مگر کوئی پچھتاوا نہیں: اٹارنی جنرل

    عمران خان کے خلاف توہین عدالت کیس میں اٹارنی جنرل کا دلائل دیتے ہوئے کہنا تھا ’ماضی میں بھی اور آج بھی سیاسی جلسے میں جج کے حوالے سے لفظ شرمناک استعمال کیا گیا، جواب میں اظہار افسوس کیا گیا مگر کوئی پچھتاوا نہیں‘۔

    اٹارنی جنرل نے سپریم کورٹ میں جمع کردہ عمران خان کا جواب عدالت کو پڑھ کر سنایا۔

    اٹارنی جنرل کا دلائل میں کہنا تھا ’عمران خان کی تقریر کا مقصد اور اثرات بہت اہم ہیں‘۔

    اٹارنی جنرل نے دلائل مکمل کر لیے ہیں۔ ان کے بعد عدالتی معاون منیر اے ملک نے دلائل شروع کیے ہیں۔

14. 8 ستمبر 2022عدالت بڑے پن کا مظاہرہ کرتے ہوئے کیس ختم کرے: حامد خان

    عدالت نے کچھ گذشتہ مقدمات کا ذکر بھی کیا تاہم چیف جسٹس اطہر من اللہ نے واضح کیا کہ ’ہمارے سامنے جوڈیشل اور کریمنل توہین ہے جو بہت حساس معاملہ ہے۔‘

    حامد خان نے عدالت سے کہا کہ ’عدالت بڑے پن کا مظاہرہ کرتے ہوئے کیس ختم کرے۔‘

    انھوں نے سپریم کورٹ میں عمران خان کے خلاف توہین عدالت کیس کا حوالہ دیتے ہوئے کہا کہ سپریم کورٹ نے بڑے پن کا مظاہرہ کیا تھا اس عدالت سے بھی وہی توقع ہے۔’

    عمران خان کے وکیل حامد خان نے دلائل مکمل کر لیے ہیں۔

    اٹارنی جنرل کی جانب سے دلائل جاری ہیں۔ اٹارنی جنرل کا کہنا تھا ’’سپریم کورٹ نے معاف کیا یہ سمجھتے ہیں بار بار وہی کریں بار بار معافی ہو۔ عمران خان کو اس بار صرف نوٹس نہیں شوکاز نوٹس ہوا تھا۔‘

    ان کا مزید کہنا تھا ’شوکاز نوٹس کا جواب بیان حلفی کے ساتھ آجانا چاہیے تھا، جواب کے ساتھ کوئی بیان حلفی موجود نہیں ہے۔‘

15. 8 ستمبر 2022سوشل میڈیا پر جھوٹے الزامات کا سب سے بڑا شکارعدلیہ ہوتی ہے: چیف جسٹس اطہر من اللہ

    

    عمران خان کے خلاف توہین عدالت کیس کی سماعت کے موقعے پر جسٹس طارق محمود جہانگیری نے کہا ’شہباز گل کیلئے 6 میڈیکل بورڈز بنائے گئے، 14 ڈاکٹرز نے انہیں چیک کیا، کسی نے نہیں کہا کہ شہباز گل پر تشدد ہوا، کیا آپ نے یہ بات اپنے موکل عمران خان کو نہیں بتائی؟

    چیف جسٹس نے اس موقعے پر کہا کہ ’فی الحال اس کیس کو چھوڑ دیتے ہیں۔‘

    اس موقعے پر عمران خان کے دوسرے وکیل شعیب شاہین ایڈووکیٹ ’آپ اسی عدالت کا آرڈر دیکھ لیں جس میں سپرٹنڈنٹ جیل نے کہا کہ تشدد ہوا۔‘

    شعیب شاہین ایڈووکیٹ روسٹرم پر آ ئے اور کہا ’جیل سپرنٹنڈنٹ کے میڈیکل افسر نے کنفرم کیا تھا کہ جسم پر نشانات تھے۔‘

    اس پر چیف جسٹس نے کہا ’آپ اپنے لیے چیزوں کو مشکل نہ بنائیں، آپ کی پوری لیگل ٹیم سماعت کے موقع پر موجود تھی، اب آپ کا تاثر معنی رکھتا ہے یا جوڈیشل آرڈر؟

    اس پر حامد خان ’میں اس طرف نہیں جا رہا بلکہ کیس ختم کرنے کی بات کر رہا ہوں، خاتون جج کو دھمکی دینے کی کوئی نیت نہیں تھی۔ اگر خاتون جج کو دھمکی لگی تو ہم افسوس کا اظہار کرتے ہیں۔‘

    ان کا مزید کہنا تھا ’ہم نے جلوسوں میں کہا کہ عدلیہ قابل احترام ہیں، کوئی فرق نہیں ہے۔‘

    چیف جسٹس نے اس پر کہا ’سوشل میڈیا کو جھوٹے پروپیگنڈا کے لیے استعمال کیا جا رہا ہے اور عدلیہ اس کا نشانہ ہے، سوشل میڈیا کے غلط استعمال کے ذمہ دار سیاسی جماعتوں کے لیڈرز ہیں۔ کیا کسی لیڈر نے کہا کہ سوشل میڈیا کا غلط استعمال نہ کریں۔ ‘

    ان کا مزید کہنا تھا ’بدقسمتی سے جھوٹے الزامات کا سب سے بڑا شکارعدلیہ ہوتی ہے۔‘

    چیف جسٹس اطہر من اللہ کا کہنا تھا ’یا تو ہم اس نظام پر اعتماد کریں یا سب چیزیں جلسے میں طے کریں۔‘

    حامد خان کا کہنا تھا کہ ’عمران خان کو معلوم نہ تھا کہ اپیل ہائی کورٹ میں زیر التوا ہے، یہ معلوم تھا کہ جوڈیشل مجسٹریٹ کے فیصلے کے خلاف اپیل دائر ہو سکتی ہے۔‘

    اس پر جسٹس بابر ستار کا کہنا تھا کہ ’تو اس کا مطلب ہے کہ وہ اپیل دائر ہونے کی صورت میں کیس پر اثرانداز ہونا چاہ رہے تھے؟‘

16. 8 ستمبر 2022اگر اس پانچ رکنی بینچ کا فیصلہ پسند نہ آیا تو وہ اس کے خلاف بھی کھڑے ہو کر وہی بات کریں گے: عدالت کا استفسار

    چیف جسٹس اسلام آباد ہائیکورٹ کا کہنا تھا ’نہال ہاشمی کیس میں کسی جج کا نام نہیں تھا معافی بھی مانگی گئی لیکن پھر بھی معافی نہیں ملی‘

    اس پر حامد خان کا کہنا تھا ’عمران خان کی تقریر یکسر مختلف ہے۔‘

    چیف جسٹس اطہر من اللہ کا کہنا تھا ’ضلعی عدلیہ کی جج کو دھمکی سپریم کورٹ جج سے بھی زیادہ سنگین جرم ہے۔ آپ توجیہات پیش کرکے مقدمہ لڑنا چاہتے ہیں؟

    اس پر حامد خان کا کہنا تھا ’نہیں ہم توجیہات پیش نہیں کررہے صرف وضاحت کررہے ہیں۔‘

    چیف جسٹس اسلام آباد ہائیکورٹ کا کہنا تھا ’ہمارے بارے میں بہت کچھ کہا جاتا ہے کبھی توہین عدالت کیس نہیں بناتے، ہمارے بارے میں ’شرمناک‘ لفظ کہہ دیتے تو ہم کبھی برا نہ مناتے۔‘

    ان کا مزید کہنا تھا ’یہاں معاملہ مختلف ہے، سپریم کورٹ کے جج کیخلاف توہین سے زیادہ سنگین ہے۔ یہاں خاتون جج کو دھمکی دی گئی اور مقدمہ عدالت میں زیرالتوا تھا۔‘

    اس موقعے پر جسٹس بابر ستار کا کہنا تھا ’ہماری عدالت کسی کے خلاف حکم دے اور وہ باہر کھڑا ہو کر کہے کہ میں جج کو نہیں چھوڑوں گا، کیا یہ ٹھیک ہوگا؟‘

    انھوں نے استفسار کیا کہ ’اگر اس پانچ رکنی بینچ کا فیصلہ پسند نہ آیا تو وہ اس کے خلاف بھی کھڑے ہو کر وہی بات کریں گے؟ کیا جس کو فیصلہ پسند نہ آئے وہ ایسا رویہ اختیار کر سکتا ہے؟‘

    جسٹس بابر ستار کا کہنا تھا ’آپ کہنا چاہ رہے ہیں کہ عمران خان نے جو کہا وہ ٹھیک تھا، دنیا نے غلط مطلب لیا؟ ‘

    اس موقعے پر چیف جسٹس اسلام آباد ہائیکورٹ نے سوال کیا ’مدینہ منورہ میں کیا ہوا تھا ؟ وہاں اشتعال دلوایا گیا ؟‘

    ’سیاسی لیڈر کی بہت بڑی ذمہ داری ہوتی ہے، لوگ فالو کرتے ہیں، حضور پاک صلی اللہ علیہ وسلم کی تعلیمات سے سیکھنا چاہیے، مدینہ منورہ میں جو کچھ ہوا وہ بھی اشتعال دلانے کا نتیجہ تھا‘

    ان کا مزید کہنا تھا ’آپ کو بار بار یہ چیز سمجھا رہے ہیں کہ یہ معاملہ بہت سنگین ہے، پولیٹیکل لیڈر پر بہت بڑی ذمہ داری ہوتی ہے کہ وہ کیا الفاظ استعمال کرے، ہمیں حضور کی ذات اور فتح مکہ سے سیکھنا چاہیے۔ ڈسٹرکٹ جج کے بارے میں جس طرح کی لینگوئج استعمال کی گئی وہ انتہائی نامناسب تھی۔ ‘

    چیف جسٹس نے حامد خان کو ہدایت ’آپ اپنے دلائل مکمل کرلیں‘۔

17. 8 ستمبر 2022عمران خان نے رویے سے بھی ظاہر نہیں کیا کہ انھیں افسوس ہے: عدالت

    سماعت کے دوران جسٹس بابر ستار نے کہا کہ ’عمران خان نے اپنے رویے سے بھی یہ نہیں ظاہر کیا کہ انھیں افسوس ہے، تقریر اور توہین عدالت کیس کے بعد بھی تقریروں میں توجیہات پیش کی جاتی رہی۔‘

    اس موقعے پر اسلام آباد کے چیف جسٹس کا کہنا تھا ’حامد صاحب ججز کی فیلنگز چھوڑ دے آپ، کسی جج کی فیلنگز نہیں ہے‘

    حامد خان کا کہنا تھا ’آپ نے خود کہا کہ خاتون جج کے ساتھ کچھ ہو سکتا ہے، پشاور جلسے میں بھی کہا گیا کہ آزاد اور خود مختیار عدلیہ چاہتے ہیں، تمام پارٹی کارکنان کو منع کیا گیا کہ خاتون جج کے حوالے کوئی سخت الفاظ نہ کہیں‘

    اس موقعے پر جسٹس بابر ستار کا کہنا تھا ’کیا آپ کا موکل اپنے بیان کو جسٹیفائی کرنا چاہتے ہیں؟ جسٹیفائی کرنا بھی تو ایک قسم کی دھمکی ہے،جو الفاظ استعمال کیے گئے وہ دھمکی آمیز تھے‘۔

    ان کا مزید کہنا تھا ’عوامی جلسے میں جو کچھ کہا گیا وہ آپ چاہیں تو ہم اسے یہاں چلا سکتے ہیں۔‘

    اس دوران عمران خان کے روسڑرم پر آنے کی خواہش کا اظہار کیا۔ وہ دوران سماعت تسبیح پڑھ رہے تھے۔

    چیف جسٹس اطہر من اللہ کا کہنا تھا کہ ’سپریم کورٹ نے بھی عمران خان کو توہین عدالت کے حوالے سے تنبیہ کی تھی، آپ اب پھر کہہ رہے ہیں کہ آئندہ نہیں کروں گا، آپ بہت خطرناک موڑ کی ظرف جا رہے ہیں۔‘

    حامد خان نے عدالت کو بتایا کہ عمران خان بیان پر کچھ وضاحت کرنا چاہتے ہیں۔

18. 8 ستمبر 2022عمران خان نے کوئی دھمکی نہیں دی شاید محسوس زیادہ کرلی گئی: حامد خان

    توہین عدالت کے مقدمے کے دوران چیف جسٹس اسلام آباد ہائیکورٹ نے کہا کہ ’یہ صرف خاتون جج کے خلاف بیان نہیں اشتعال دلانے کا کیس ہے۔ اگر خاتون جج لاہور جائیں اور کوئی اس بیان کے بعد انہیں نقصان پہنچائے تو کون ذمہ ہوگا؟‘

    جسٹس بابر ستار نے کہا ’کیا ایک رہنما ایک جج کے خلاف قانونی کارروائی کی بات عوامی جلسے میں کرسکتا ہے؟‘

    اس پر عمران خان کے وکیل حامد خان نے کہا کہ ’قانونی کارروائی کرنا تو ہر کسی کا حق ہے، خاتون جج کے جذبات کو ٹھیس پہنچانے کا مقصد نہیں تھا۔‘

    چیف جسٹس اسلام آباد ہائیکورٹ نے کہا کہ ’جج کے کوئی جذبات نہیں ہوتے، عدالت اور قانون کا احترام ہوتا ہے۔‘

    جسٹس بابر ستار نے اس موقعے پر کہا کہ ’کیا عوام مقام پر کھڑے ہوکر آپ قانونی ایکشن کا اعلان بھی کرسکتے ہیں؟ ‘

    عدالت کا کہنا تھا ’آپ کے جواب کے بعد بھی خاتون جج کے غیر محفوظ ہونے کا تاثر موجود ہے، کل وہ کہیں موٹر وے پر جاتے رکیں گی اور کوئی نقصان ہو سکتا ہے۔ کوئی بھی وہاں ان کے ساتھ نامناسب سلوک کر رہا ہو گا۔‘

    جسٹس بابر ستار کا کہنا تھا ’سیاسی لیڈر پبلک میں کھڑا ہو کر لیگل ایکشن کی دھمکی بھی کیسے دے سکتا ہے؟ سیکشن نائن پڑھیں آپ اس میں لیگل ایکشن کا طریقہ دیا گیا ہے، فورمز قانون میں بتائے گئے ہیں ، فورم پبلک میٹنگ نہیں ہے۔‘

    اس پر حامد خان کا کہنا تھا ’ہم نے قانونی کارروائی قانون کے دائرے سے باہر جا کر تو نہیں کرنا تھی، عمران خان نے کوئی دھمکی نہیں دی شاید محسوس زیادہ کرلی گئی۔‘

19. 8 ستمبر 2022اگر یہی الفاظ ہائی کورٹ یا سپریم کورٹ کے جج کے بارے میں ادا کرتے تو یہی جواب ہوتا آپ کا؟: عدالت کا استفسار

    

    عمران خان کے خلاف توہین عدالت کیس میں جسٹس بابر ستار نے کہا ’ آپ نے کہا کریمنل توہین کا ذکر نہیں، شوکاز میں صاف لکھا ہے عمران خان نے کریمنل اور جوڈیشل توہین کی۔‘

    چیف جسٹس اطہر من اللہ نے کہا ’آپ نے جواب میں شہباز گل پر تشدد کو ’مبینہ‘ نہیں لکھا، معاملہ ابھی بھی عدالت میں ہے،۔ آپ اپنے جوابات میں توہین عدالت کو جسٹیفائی کر رہے ہیں۔‘

    اس پر عمران خان کے وکیل ’جسٹیفائی اور وضاحت دینے میں فرق ہوتا ہے، میں وضاحت دے رہا ہوں۔‘

    چیف جسٹس اطہر من اللہ کا کہنا تھا ’کیا سپریم کورٹ یا ہائیکورٹ کے جج کیخلاف بات کی گئی ہوتی تو کیا آپ کا یہی جواب ہوتا؟ یہ بتائیں کہ یا تو فیصلے جلسوں میں ہوں گے اور یا عدالتوں میں۔‘

    عدالت کا کہنا تھا ’ ستر سالوں میں جو ہوا اچھا نہیں ہوا، یہ عدالت بہت ہی محتاط رہتی ہے، اگر سپریم کورٹ کے جج کے لیے اسی آواز میں وہی الفاظ کا استعمال ہوتا تو یہی جواب آتا۔‘

    حامد خان کا کہنا تھا ’ہمارے لیے سپریم کورٹ، ہائی کورٹ اور ماتحت عدلیہ کے ججز قابل عزت ہے، مجھے نہیں معلوم کہ تب الزام کیا ہوتا۔‘

    چیف جسٹس کا کہنا تھا ’عدالت کے گذشتہ آرڈر کے بعد بھی یہ ریپلائی فائل کیا گیا، آپ یہ کیس لڑنا کرنا چاہتے ہیں؟‘

    چیف جسٹس کا مزید کہنا تھا ’ضلعی عدلیہ کے ججز بہت مشکلات کا شکار ہیں۔ اگر یہی الفاظ ہائی کورٹ یا سپریم کورٹ کے جج کے بارے میں ادا کرتے تو یہی جواب ہوتا آپ کا؟‘

    اس پر عمران خان کے وکیل حامد خان ’ہم نے لکھا کہ جج کے احساسات کو ٹھیس پہنچی تو اس پر شرمندگی ہے۔‘

    اسلام آباد ہائی کورٹ کے چیف جسٹس کا کہنا تھا ’ججز کے کوئی احساسات نہیں ہوتے، جج کے بارے میں اشتعال انگیزی پھیلائی گئی، وہ جج کہیں جا رہی ہوں تو ان کے ساتھ کوئی واقعہ پیش آ سکتا ہے۔‘ اس کورٹ نے آپ کو طریقے سے معاملات کی سنگینی سمجھا دی ہے‘۔

    عدالت نے استفسار کیا ’یہ الفاظ سپریم کورٹ یا ہائی کورٹ کے جج کے لیے استعمال ہوتے تو کیا یہی آپ کا یہ جواب ہوتا‘۔ اس پر حامد خان ایڈووکیٹ کا کہنا تھا ’وہ تو حالات کے مطابق جواب ہوتا‘

20. 8 ستمبر 2022کیا ایک سابق وزیراعظم کا یہ موقف درست ہے کہ قانون کے بارے میں علم نہیں تھا، اسلام آباد ہائیکورٹ, شہزاد ملک، بی بی سی اردو ڈاٹ کام، اسلام آباد

    چیف جسٹس اسلام آباد ہائی کورٹ جسٹس اطہر من اللہ نے ریمارکس دیے ہیں کہ کیا کوئی سابق وزیر اعظم توجیہ پیش کرسکتا ہے کہ مجھے قانون کا پتہ نہیں تھا۔

    خاتون جج کو دھمکی دینے کے توہین عدالت کیس کی سماعت کے دوران چیف جسٹس اطہر من اللہ نے عمران خان کے وکیل حامد خان سے مکالمے کے دوران ریمارکس دیے کہ پچھلی دفعہ بھی آپ کو سمجھایا تھا کہ ایک شخص کا سٹیٹس بھی جرم کی نوعیت کا اندازہ لگانے کیلئے اہم ہوتا ہے۔

    ’آپ بتائیں کہ کیا آپ کا جواب سپریم کورٹ کے فیصلوں کے مطابق درست ہے؟ آپ نے اپنے جواب میں جسٹیفیکیشن دینے کی کوشش کی۔‘

    چیف جسٹس نے ریمارکس دیے کہ کیا ایک سابق وزیراعظم کا یہ موقف درست ہے کہ قانون کے بارے میں علم نہیں تھا۔

    چیف جسٹس نے ریمارکس دیے کہ کسی توہین کرنے والا بیان دینا، موقع و محل بہت اہم ہوتا ہے۔

    انھوں نے ریمارکس دیے کہ بہت بڑا جرم کیا گیا لیکن احساس نہیں ہے۔ ’عوامی مقامات پر کسی کی بھی بے عزتی کردی جاتی ہے۔‘

    بنچ میں شامل جسٹس بابر ستار نے حامد خان سے مخاطب ہوتے ہوئے کہا کہ آپ ایک شوکاز نوٹس کا جواب دے رہے ہیں۔ ’اسی شوکاز نوٹس کا پیرا پانچ پڑھیں۔‘