آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
وزیر اعظم شہباز شریف نے سوات کے سیلاب زدہ علاقوں کے دورے کے دوران کہا کہ وفاقی حکومت نے سندھ کے لیے 15 ارب روپے گرانٹ، بلوچستان کے لیے 10 ارب روپے اور اب کے پی کے لیے بھی 10 ارب روپے گرانٹ کا اعلان کیا ہے۔ خیال رہے کہ پاکستان می سیلاب سے 1162 افراد کی ہلاکت کی تصدیق ہوچکی ہے۔
ڈیرہ غازی خان کے ڈپٹی کمشنر کے مطابق بارشوں اور لینڈ سلائیڈنگ سے متاثرہ تونسہ بارتھی روڈ پر سٹیل پل نصب کرکے ٹریفک بحال کردی گئی ہے۔
ڈی سی ڈی جی خان کے مطابق زندہ پیر اور دیگر علاقوں میں بھاری مشینری راستوں کی بحالی میں مصروف ہے۔
فیڈریشن آف پاکستان چیمبرز آف کامرس اینڈ انڈسٹری نے پاکستان میں سیلاب سے ہونے والے نقصانات کے ازالے اور موجودہ بحرانی صورتحال میں قیمتی انسانی جانوں کو بچانے کے لیے امدادی کوششوں کو فوری طور پر شروع کرنے کے لیے فلڈ ڈیزاسٹر مینجمنٹ کمیٹی تشکیل دے دی ہے۔
صدر ایف پی سی سی آئی عرفان اقبال شیخ نے بتایا کہ ابتدائی طور پر پانچ کروڑ روپے جمع کرنے کا ہدف رکھا گیا تھا لیکن ابتدائی ردعمل کے بعد امید ہے کہ ایف پی سی سی آئی اس ہدف سے بھی زیادہ فنڈ اکٹھے کرنے میں کامیاب ہو سکتی ہے۔
ان کے مطابق یہ کمیٹی کم از کم 2000 خیمے فراہم کرنے کی کوشش کرے گی، مختلف فارماسیوٹیکل کمپنیوں کی طرف سے پہلے ہی سے اعلان کردہ دوائیوں و میڈیکل سپلائیز کی تقسیم اور ترسیل کو ایک مربوط انداز میں آگے لے کر بڑھے گی اور پاکستان بھر میں فلڈ ریلیف میں مصروف عمل معتبر سرکاری اور غیر سرکاری امدادی تنظیموں کو عطیات دے گی۔
یہ تصاویر بحرین بازار کی ہیں جہاں دریا کنارے سیاحوں میں مقبول پکنک پوائنٹ اور کھانے پینے کے ریستوران موجود تھے۔
حالیہ سیلاب اس مقام پر موجود دکانوں، ریستورانوں اور پکنک پوائنٹ کو بہا کر لے گیا ہے اور یہاں سے آگے مشہور سیاحتی مقام کالام کا راستہ بھی کٹ گیا ہے۔
پاکستان ٹیلی کمیونکیشن اتھارٹی کا کہنا ہے کہ بلوچستان میں فلیش فلڈز کی وجہ سے پی ٹی سی ایل کی فائبر آپٹک کیبل کو پہنچنے والے نقصان سے پیر کی صبح کوئٹہ میں انٹرنیٹ کی فراہمی کا عمل متاثر ہوا تھا جو اب بحال کر دیا گیا ہے۔
نامہ نگار محمد کاظم کے مطابق آٹھ گھنٹے سے زیادہ دیر بند رہنے کے بعد پیر کی دوپہر انٹرنیٹ سروس بحال ہونا شروع ہوئی۔
درہ بولان میں دو پائپ لائنوں کو پہنچنے والے نقصان کے باعث کوئٹہ، مستونگ، قلات، پشین اور زیارت کو گیس کی فراہمی معطل ہوئی تھی۔
ایک ہفتے سے زائد کا عرصہ گزرنے کے باوجود متاثرہ گیس پائپ لائنوں سے گیس کی فراہمی بحال نہیں ہو سکی ہے۔
سوئی سدرن گیس کمپنی کی جانب سے جاری کردہ ایک پریس ریلیز کے مطابق درہ بولان میں پانی کا بہاﺅ اب بھی زیادہ ہے اور پانی کا بہاﺅ کم ہونے تک متاثرہ مقام تک مشینری لے جانے میں مشکلات کا سامنا ہے۔
دوسری جانب گیس کی بندش سے ایل پی جی کی بھی قلت پیدا ہوگئی ہے۔
گیس نہ ہونے کی وجہ سے کوئٹہ اور دیگر علاقوں میں لوگوں کو گھروں میں کھانا پکانے میں مشکلات کا سامنا ہے۔
یہ مناظر ڈیرہ عازی خان میں چاہ کبیر والا علاقے کی چند بستیوں کے ہیں۔
ہماری نامہ نگار ترہب اصغر کے مطابق ان بستیوں میں لوگ ابھی تک اپنے ٹوٹے مگر پانی سے بھرے ہوئے گھروں میں ہی مقیم ہیں کیونکہ ان کے پاس خیموں جیسا کوئی متبادل نہیں ہے جہاں وہ جا کر رہ سکیں۔
حالیہ سیلاب سے اس علاقے میں بستیوں کے بیچ ایک بڑا شگاف پڑ گیا ہے جس نے جام پور کی دوسری جانب موجود افراد تک زمینی رسائی منقطع کر دی ہے۔
مقامی افراد دوسری جانب پھنسے افراد کو خوراک اور امدادی سامان کپڑوں میں باندھ کر پھنک رہے ہیں۔
سندھ کے شہر لاڑکانہ میں تین ہفتے گزرنے کے باوجود بارش کا پانی نکالا نہیں جا سکا۔ سرکاری دفاتر سے لے کر کچی آبادیوں تک کی کیا صورتحال ہے اور اس پر شہریوں کا کیا کہنا ہے، دیکھیے اس ویڈیو میں۔۔
پنجاب میں قدرتی آفات سے نمٹنے کے صوبائی ادارے کا کہنا ہے کہ سیلاب سے متاثرہ علاقوں میں نقصانات کا تخمینہ لگانے کا عمل شروع ہو چکا ہے جبکہ سیلابی علاقوں سے پانی کا اخراج جاری ہے۔
پی ڈی ایم اے کے ترجمان کا کہنا ہے کہ اس وقت دریائے سندھ میں تونسہ، چشمہ، گڈو اور سکھر کے مقام پر پانی کی سطح بلند ہے اور دریا سے منسلک تمام اضلاع کو الرٹ رہنے کی ہدایات کی گئی ہیں۔
جوہی برانچ کو کٹ لگانے کے بعد ایم این وی ڈرین میں پانی کی سطح بلند ہو رہی ہے۔
سوشل ایکٹوسٹ معشوق برہمانی کے مطابق کٹ لگانے کے فیصلے کے بعد جوہی شہر میں افراتفری مچ گئی اور آدھا شہر خالی ہو گیا۔
پاکستان مسلم لیگ ن کی نائب صدر مریم نواز شریف جنوبی پنجاب کے سیلاب سے متاثرہ علاقے تونسہ میں متاثرین سے ملنے پہنچی ہیں۔
متاثرین سے ملاقات کے بعد مریم نواز شریف کا کہنا تھا کہ سیلاب سے بہت تباہی ہوئی ہے اور ’ہم اس وقت تک چین سے نہیں بیٹھیں گے جب تک سیلاب سے متاثرہ آخری گھر کی مدد نہیں کر لیتے‘۔
مریم نواز نے یہ بھی کہا کہ ’یہ وقت سیاست کا نہیں سیلاب متاثرین کی مدد کا ہے‘۔
انھوں نے کہا کہ سیلاب متاثرین کے نقصان کا ازالہ جلد از جلد کیا جانا چاہیے۔
ملک میں تباہ کُن بارشوں اور سیلاب کے باعث فصلوں کی تباہی اور راستوں کی بندش کی وجہ سے سبزیوں اور پھلوں کی قیمت میں سو سے دو سو فیصد اضافہ ہو گیا۔
ڈیمانڈ اور سپلائی کے فرق کی وجہ سے قیمتوں میں بے تحاشا اضافہ ریکارڈ کیا گیا ہے تاہم اس کے ساتھ ریٹیلرز کی جانب سے ناجائز منافع خوری بھی قیمتوں میں اضافے کا سبب بنی۔
کراچی ، لاہور اور کوئٹہ سے حاصل کردہ معلومات کے مطابق اس وقت صارفین مہنگی سبزیاں خریدنے پر مجبور ہیں اور اس وقت کوئی سبزی دو سو روپے فی کلو سے کم نہیں مل رہی ۔
کچھ ہفتے پہلے 60 سے 80 روپے والا پیاز 200 سے 300 روپےفی کلو فروخت ہو رہا ہے۔ جبکہ ٹماٹر 240، پالک 300، توری 300، ٹینڈے/بھنڈی 350، لوکی/ کدو/ بینگن/کریلا 200 روپےفی کلو مل رہے ہیں۔
کراچی سبزی منڈی میں ٹریڈرز ایسوسی ایشن کے چیئرمین زاہد اعوان نے اس سلسلے میں بی بی سی کو بتایا سبزی اور فروٹ کی قیمت میں بڑے اضافے کی اصل وجہ تو سیلاب کی وجہ سے فصلوں کی تباہی ہے ۔
جن علاقوں میں سبزیاں اور فصلیں بچ بھی گئیں وہاں سے ان کی ترسیل میں اس وقت بڑی مشکلات حائل ہیں۔
انھوں نے بتایا کہ سبزیوں اور فروٹ کی قیمت میں کم از کم اضافہ سو فیصد ہے۔ انھوں نے کہا ریٹیلرز کی جانب سے بھی ناجائز منافع کمایا جا رہا ہے تاہم بلیک مارکیٹ کا کام سبزی اور فروٹ میں بہت کم ہو سکتا ہے۔ آلو اور سیب کے علاوہ، سبزی اور فروٹ کو زیادہ عرصہ گوداموں میں نہیں رکھا جا سکتا۔
لاہور میں مقیم صحافی محمد مظہر اقبال نے بی بی سی کو بتایا کہ لاہور میں بھی اس وقت قیمتوں میں بہت زیادہ اضافہ ہو چکا ہے۔
انھوں نے لاہور میں سبزی کی سپلائی جنوبی پنجاب اور سندھ سے ہوتی ہے اور وہاں سیلاب کی وجہ سے سپلائی شدید متاثر ہوئی ہے۔ اسی طرح پھل سوات اور کوئٹہ کے راستے آتا ہے جو اس وقت سیلاب کی زد میں ہیں
کوئٹہ میں سبزی و پھل کے بیوپاری سلمان نے شہر میں سبزی اور پھل کی قیمت میں اضافے کے بارے بتاتے ہوئے کہا کہ قیمتوں میں پچاس فیصد سے زیادہ اضافہ ہوچکا ہے۔
پاکستان کے صوبہ بلوچستان کے سیلاب سے متاثرہ علاقوں میں فضائی ریلیف آپریشن جاری ہے۔
صوبائی حکومت کی جانب سے جاری اعلامیے کے مطابق پیر کو ہیلی کاپٹر کے ذریعہ 2000 کلو گرام سے زائد امدادی اشیا نوشکی بھجوائی گئی ہیں۔
اس امدادی سامان میں خیمے، راشن، پیکٹ خوراک، پانی کی بوتلیں شامل ہیں۔
وزیر اعلیٰ بلوچستان عبدالقدوس بزنجو کا کہنا ہے کہ فضائی ریلیف آپریشن سے متاثرین تک رسائی اور امدادی سامان کی ترسیل ممکن ہو رہی ہے۔
پاکستان کے صوبہ خیبرپختونخوا کے سیاحتی مقام سوات کے علاقے بحرین میں سیلاب سے مرکزی و رابطہ سڑکیں بری طرح متاثر ہوئی ہیں۔
سیلابی ریلے کے باعث سوات بحرین مرکزی شاہراہ بری طرح تباہ اور ٹوٹ پھوٹ کا شکار ہے۔
بی بی سی کے نامہ نگار عزیز اللہ کے مطابق بحرین کی سڑک سیلاب کی زد میں آ کر مکمل طور پر ٹوٹ گئی ہے۔ اس کی مرمت اور بحالی کی کوششیں کی جا رہی ہے۔
انھوں نے بتایا کہ لینڈ سلائڈنگ کے باعث سڑک متعدد مقامات سے ختم ہو چکی ہے اور انتظامیہ سڑک کا ایک حصہ بند کر کے ٹریفک کو گزار رہے ہیں۔
پاکستان کے صوبے خیبر پختونخوا کے سیاحتی ضلعے سوات میں سیلاب کے بعد بحالی کا کام شروع کر دیا گیا ہے۔
بی بی سی کے نامہ نگار عزیز اللہ کے مطابق سوات میں بجلی کے کھمبے اور تاروں کی بحالی کا کام شروع کر دیا گیا ہے۔
سوات شہر کی داخلی شاہراؤں پر ٹریفک معمول سے کم دیکھنے میں آئی ہے اور علاقے میں سوگ کا ماحول ہے۔
مقامی افراد کے مطابق سیلاب کے باعث سیاحتی سرگرمیاں معطل ہونے کے باعث ٹریفک معمول سے کافی کم ہے۔
سوات اور کالام کا زمینی رابطہ منقطع ہونے کے بعد لوگوں کی ایک بڑی تعداد ہیلی کاپٹروں کے ذریعے کالام منتقلی کی آس لیے سوات کے ہوائی اڈے پر جمع ہو گئی ہے۔
ایئرپورٹ پر موجود ایک اہلکار نے بی بی سی کو بتایا کہ سوات اور کالام کے درمیان صوبائی حکومت کی جانب سے ہیلی کاپٹر سروس شروع کی گئی ہے اور روزانہ دو ہیلی کاپٹر کالام سے تعلق رکھنے والے افراد کو شنختی کارڈ دیکھ کر کالام لے جاتے ہیں جبکہ کالام میں پھنسے سیاحوں کا واہس لایا جاتا ہے۔
ایئرپورٹ کے باہر جمع کالام کے مقامی لوگوں میں خواتین اور بچے بھی شامل ہیں۔ ادھر کالام سے مقامی لوگوں نے بتایا ہے کہ بڑی تعداد میں سیاح وہاں پھنسے ہوئے ہیں جنھیں ہیلی کاپٹر کے ذریعے سوات پہنچایا جا رہا ہے۔
پاکستان کے صوبہ خیبر پختونخوا کے وزیر اعلیٰ محمود خان نے سیلاب سے متاثرہ اضلاع کے لیے مزید فنڈز جاری کرنے کی ہدایت کی ہے۔
قدرتی آفات سے نمٹنے کے صوبائی ادارے پی ڈی ایم اے نے وزیر اعلٰی کی ہدایت پر صوبے کے چاراضلاع کے لیے مزید 10 کروڑ روپے جاری کردیے ہیں۔
ڈی جی پی ڈی ایم اے کے مطابقضلع کوہستان لوئر کے لیے تین کروڑ، ضلع ٹانک کے لیے تین کروڑ، نوشہرہ کے لیے دو کروڑ اور ضلع چترال اپر کے لیے دو کروڑ جاری کیے گئے ہیں۔
ڈی جی پی ڈی ایم اے کا کہنا ہے کہ صوبائی ادارے نے جولائی سے اب تک مختلف اضلاع کی انتظامیہ کو ہنگامی صورتحال سے نمٹنے کے لیے 73 کروڑ جاری کیے ہیں۔
ان کے مطابق سیلاب سے متاثرہ اضلاع میں امدادی کاروائیاں جاری ہے
سندھ کا ضلع لاڑکانہ سیلاب سے بری طرح متاثر ہوا ہے تاہم یہاں بھی متاثرین کے لیے کوئی ٹینٹ سٹی قائم نہیں ہو سکا ہے اور لوگ سرکاری تعلیمی اداروں یا پھر ریلوے سٹیشن پر موجود ہیں۔
شہر میں اس وقت بھی پانی موجود ہے۔ صرف ایس پی آفس کے پاس ایک سے ڈیڑھ فٹ پانی موجود تھا۔
شہر کی کچی آبادیوں میں بھی سیلابی صورتحال برقرار ہے اور بعض کالونیوں کے رہائشی چندہ کرکے پانی کی نکاسی کا پمپ لائے ہیں جس سے پانی نکالا جا رہا ہے۔
صرف بیت المال کالونی ، میلاد کالونی، میرو خان چوک کے آس پاس کا ذکر کیا جائے تو لوگ یا باہر سڑک پر بیٹھے ہیں یا اندر گھروں میں سے سامان نکالنے میں مصروف ہیں۔
پاکستان کے صوبہ خیبر پختونخوا کے سیلاب متاثرین نے پشاور اسلام آباد موٹروے کے کنارے پر چارسدہ کے قریب خیمہ بستی بنا لی ہے۔
بی بی سی کے نامہ نگار عزیز اللہ کے مطابق چارسدہ کے قریب موٹروے کنارے اتنی زیادہ تعداد میں سیلاب متاثرین نے خیمے لگا دیے ہیں جیسے ایک خیمہ بستی بن گئی ہو۔
موٹروے کنارے کے ساتھ ساتھ موٹروے کے درمیان میں موجود گرین بیلٹ پر بھی بڑی تعداد میں خیمے نصب کیے گئے ہیں۔
ان خیموں میں قریبی علاقوں میں سیلاب سے متاثر ہونے والے خاندان بڑی تعداد میں پہنچے ہیں جن میں خواتین اور بچے بھی شامل ہیں۔
مختلف امدادی ادارے اور انفرادی سطح پر امداد کرنے والے افراد ان سیلاب متاثرین کی مدد کو پہنچ رہے ہیں لیکن امداد کے مقابلے میں متاثرین کی تعداد بہت زیادہ ہے۔
یہاں خیمے لگانے والے سیلاب متاثرین میں سے چند افراد اپنے ساتھ مویشی بھی لائے ہیں۔
پاکستان کے صوبہ سندھ میں سیلاب سے متاثرہ ضلع جامشورو کے علاقے ٹلٹی میں ایک کشتی الٹنے سے دس افراد ڈوب کر ہلاک ہو گئے ہیں۔
پولیس کے مطابق کشتی پر 20 کے قریب لوگ سوار تھے اور سات لاشیں نکالی جا چکی ہیں۔
حکام کا کہنا ہے کہ بلاول گوٹھ کے رہائشی سیلابی پانی میں گھر جانے کے بعد آمدورفت کے لیے کشتی استعمال کر رہے تھے۔