’یہ اب امریکیوں کو کہیں گے کہ ہمیں ڈالر دو ورنہ عمران خان پھر آ جائے گا‘
،تصویر کا ذریعہReuters
کوہاٹ جلسے سے خطاب کرتے ہوئے سابق وزیر اعظم عمران خان نے کہا کہ آئی ایم ایف سے دوحہ میں مذاکرات کے دوران موجودہ حکومت امریکہ سے ڈالر مانگیں گی اور بدلے میں مزید غلامی کا وعدہ کرے گی۔
انھوں نے کہا کہ ’یہ امپورٹڈ حکومت ڈری ہوئی ہے، یہ پھنس گئے ہیں۔ آگے ٹائیگرز ہیں اور پیچھے سمندر۔‘
وہ کہتے ہیں کہ ’شہباز شریف کو وزیر اعظم بننے کا شوق تھا، اس نے بڑی محنت کی۔ اس کے پاس جوتے پالش کرنے کا فن ہے۔ دو قسم کے جوتے پالش کرتا ہے، فوجی بوٹ بڑی اچھی طرح پالش کرتا ہے، امریکی سفارتخانے سے کوئی بوٹ آجائے وہ بھی بڑا اچھا پالش کرتا ہے۔‘
’ن لیگ کے مقابلے آصف زرداری سب پر بھاری ہے، ساری گالیاں شہباز شریف کو پڑ رہی ہیں۔‘
عمران خان نے کہا کہ ’تینوں نے مل کر ہماری حکومت گرائی۔ اب ان کے پاس ایک ہی راستہ ہے۔ آئی ایم ایف سے مذاکرات میں امریکیوں کو کہیں گے ہمیں ڈالر دو ورنہ عمران خان پھر آ جائے گا۔
’امریکی کبھی اپنے ڈالر ایسے نہیں دیتے۔ وہ اگر ڈالر دیں گے تو پہلے مزید غلامی کرائیں گے۔ ان کو حکم دیں گے خارجہ پالیسی ہمارے مطابق بنے گی اور روس سے تیل نہیں منگوا سکتے۔ ہم نے 30 فیصد تیل اور گندم روس سے منگوانے کا معاہدہ کر لیا تھا۔ انھوں نے آتے ساتھ ہی وہ معاہدے ختم کیے۔‘
