کراچی طیارہ حادثہ: کب کیا ہوا؟

پی آئی اے کا لاہور سے کراچی جانے والا مسافر طیارہ لینڈنگ سے قبل حادثے کا شکار ہوا ہے۔ طیارے پر سوار 99 افراد میں سے 97 کی ہلاکت کی تصدیق کی گئی ہے جبکہ دو مسافر حادثے میں زندہ بچ گئے ہیں۔ پی آئی اے کے چیئرمین کا کہنا ہے کہ طیارہ تکینیکی لحاظ سے محفوظ تھا اور حادثے کی وجوہات کا تعین بلیک باکس اور وائس ریکارڈر کے تجزیے کے بعد ہو گا۔

لائیو کوریج

22 مئ 2020ڈاکٹر سیمی جمالی: ’اب تک آٹھ لاشیں جناح ہسپتال لائی گئی ہیں‘
کراچی کے جناح ہسپتال کی ڈائریکٹر ڈاکٹر سیمی جمالی نے میڈیا سے گفتگو کرتے ہوئے بتایا ہے کہ اب تک ان کے ہسپتال میں آٹھ لاشیں لائی جا چکی ہیں جن میں دو خواتین اور چھ مرد ہیں۔
اس کے علاوہ انھوں نے بتایا کہ اب تک چھ زخمی افراد کو ہسپتال لایا گیا ہے جن میں دو خواتین اور چار مرد ہیں۔
انھوں نے کہا کہ زخمیوں میں زیادہ تعداد جل کر متاثر ہونے والوں کی ہے جنھیں ابتدائی طبی امداد اسی ہسپتال میں دی جائے گی جس کے بعد انھیں کہیں اور منتقل کرنے کا فیصلہ کیا جائے گا۔
انھوں نے کہا کہ ہوسکتا ہے کچھ افراد کو ان کے ہسپتال لانے کے بجائے دوسرے ہسپتالوں تک لے جایا جائے۔
22 مئ 2020کراچی طیارہ حادثہ: جائے وقوعہ کے مناظر
22 مئ 2020چیئرمین پی آئی اے کراچی روانہ، تمام آپریشنل ملازمین ڈیوٹی پر طلب
پاکستان انٹرنیشنل ایئرلائنز کے ترجمان مطابق کمپنی کے چیف ایگزیکٹو آفیسر ایئر مارشل ارشد ملک فوری طور پر فضائیہ کے طیارے سے کراچی روانہ ہو گئے ہیں۔
ترجمان کے مطابق پی آئی اے کے آپریشنل ملازمین کو ڈیوٹی پر طلب کر لیا گیا ہے اور پی آئی اے کا ایمرجنسی کال سینٹر فعال کر دیا گیا ہے۔
22 مئ 2020وزیرِ اعظم عمران خان کا حادثے کی تحقیقات کا حکم
وزیراعظم عمران خان نے کراچی میں پی آئی اے مسافر طیارے کے حادثے کے نتیجے میں قیمتی جانی نقصان پر گہرے رنج و افسوس کا اظہار کرتے ہوئے متعلقہ اداروں کو ریلیف، ریسکیو اور زخمیوں کو فوری طبی امداد کی ہدایت کر دی ہے۔
وزیرِ اعظم عمران خان نے طیارہ حادثے کی فوری تحقیقات کا حکم دیا ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
22 مئ 2020طیارے کی مبینہ ’مے ڈے کال کی آڈیو‘ میں کیا سنا جا سکتا ہے؟
مقامی ذرائع ابلاغ پر نشر ہونے والی ایک آڈیو کلپ کے بارے میں کہا جا رہا ہے کہ یہ طیارے کے پائلٹ اور کنٹرول ٹاور کے درمیان گفتگو کی ہے۔
اس کال میں پائلٹ کو مے ڈے کال دیتے ہوئے سنا جا سکتا ہے۔
کلپ کے شروع میں بظاہر پائلٹ کی آواز آتی ہے کہ ان کے جہاز کے تمام انجن ناکارہ ہو چکے ہیں۔
اس کے بعد ٹاور ان سے معلوم کرتا ہے کہ آیا وہ بیلی لینڈنگ کرنے والے ہیں، اور پھر انھیں بتاتا ہے کہ ان کے لیے دونوں رن وے دستیاب ہیں۔
اس کے کچھ لمحوں بعد جہاز کا پائلٹ ’مے ڈے‘ کال دیتا ہے، جس کے بعد خاموشی ہو جاتی ہے۔
خیال رہے کہ تاحال حکام نے اس کال کی تصدیق یا تردید نہیں کی ہے
22 مئ 2020وفاقی وزیرِ داخلہ کا کراچی میں طیارہ حادثے پر اظہارِ افسوس
پاکستان کے وفاقی وزیر داخلہ اعجاز احمد شاہ نے لاہور سے کراچی جانے والی پی آئی اے کی پرواز پی کے 8303 کو حادثے پر اظہار افسوس کیا ہے۔
اپنے ایک بیان میں انھوں نے کہا کہ وہ حادثے میں زخمی ہونے والوں کی جلد صحت یابی کے لیے دعا گو ہیں۔ انھوں نے کہا کہ رہائشی علاقے میں بھی نقصان کی اطلاع پریشان کن ہے-
اعجاز شاہ نے امید ظاہر کی کہ امدادی کارروائی بروقت ہوگی-
22 مئ 2020پاکستان فوج کی جانب سے کوئک ری ایکشن فورس اور رینجرز کو جائے مقام پر پہنچنے کی ہدایات
پاکستانی فوجی کے شعبہ تعلقات عامہ کی جانب سے بتایا گیا کہ کراچی میں پی آئی اے کے جہاز گر جانے کے بعد آرمی کے کوئک ری ایکشن فورس اور سندھ رینجرز کے اہلکاروں کو موقع پر پہنچنے کا حکم دیا ہے۔
اس کے علاوہ پاکستانی آرمی کے ایوی ایشن ہیلی کاپٹروں کو بھی امدادی کارروائیوں کے لیے بھیج دیا گیا ہے اور وہ موقع پر موجود عملے کی مدد کر رہے ہیں۔
اس کے علاوہ طیارہ گرنے کے بعد لگنے والی آگ پر قابو پانے کے لیے پاک بحریہ نے چار فائر ٹینڈرزجائے وقوعہ کی طرف روانہ کر دیے ہیں۔
22 مئ 2020کراچی کے ہسپتالوں میں ایمرجنسی نافذ
وزیراعلیٰ سندھ مراد علی شاہ نے پی آئی اے طیارے کے حادثے کے بعد کراچی کے تمام ہسپتالوں میں ایمرجنسی نافذ کر دی ہے۔
ایک سرکاری بیان کے مطابق وزیر اعلی نے ہدایت کی ہے کہ ہسپتالوں میں فوری طور پر خون کا بندوبست کیا جائے اور سینئر ڈاکٹرز کو فوراً ڈیوٹی پر طلب کر لیا گیا ہے۔
وزیراعلیٰ نے حادثے پر گہرے دکھ کا اظہار کرتے ہوئے کمشنر کراچی اور ڈی آئی جی کو حادثے کی جائے وقوعہ پر پہنچنے کا حکم دیا اور متاثرہ افراد کی فوری مدد کرنے کی ہدایت کی۔
سید مراد علی شاہ نے ڈی سی ملیر اور کورنگی کو بھی رہائشی علاقوں میں لوگوں کی مدد کرنے کی ہدایت کی ہے اور ایمبولنس سروس کو ایئرپورٹ اور اسپتال کے درمیان متحرک رہنے کا کہا ہے۔
22 مئ 2020حادثے کی جگہ پر کئی لوگ زخمی حالت میں موجود
کراچی سے ہمارے نامہ نگار ریاض سہیل کے مطابق جس جگہ پر یہ جہاز گرا ہے وہاں کافی تعداد میں لوگ زخمی ہیں جنھیں ایمبولینس میں لے کر جایا جا رہا ہے۔
انھوں نے بتایا کہ وہاں جو لاشیں موجود ہیں ان کی تعداد کافی خستہ ہے، تاہم اب تک ہلاک شدگان کی تعداد معلوم نہیں ہو سکی ہے۔
22 مئ 2020وزیر اعلی سندھ کا حکام کو جائے مقام پر پہنچنے کا فوری حکم
،تصویر کا ذریعہGoogle Maps
وزیراعلیٰ سندھ سید مراد علی شاہ نے طیارے کے حادثے پر گہرے دکھ کا اظہار کیا اور کمشنر کراچی اور پولیس حکام کو جائے مقام پر فوری پہنچنے کا حکم دیا ہے۔
طیارے میں کل 99 افراد سوار تھے۔
22 مئ 2020’طیارے کا لینڈنگ گیئر نہیں کھل سکا‘
پی آئی اے کے ترجمان کا کہنا ہے کہ بظاہر طیارے کا لینڈنگ گیئر نہیں کھل سکا اور وہ اوپر اٹھتے ہوئے حادثے کا شکار ہوا لیکن حادثے کی حتمی وجہ تحقیقات کے بعد ہی سامنے آ سکے گی۔
22 مئ 2020طیارہ ماڈل کالونی کے قریب جناح گارڈن نامی آبادی پر گرا
پاکستانی ذرائع ابلاغ کے مطابق طیارہ ماڈل کالونی کے قریب جناح گارڈن نامی آبادی پر گرا اور اس حادثے میں متعدد مکانات کو شدید نقصان پہنچا ہے۔
طیارہ گرنے کے بعد اس میں اور اس کی زد میں آنے والی گاڑیوں میں آگ لگ گئی۔
ٹی وی پر دکھائی دینے والی فوٹیج میں بھی جائے حادثہ سے دھوئیں کے کالے بادل اٹھتے دیکھے جا سکتے ہیں۔
حادثے کی اطلاع ملتے ہی امدادی کارروائیاں شروع کر دی گئی ہیں اور حکام نے عوام سے اپیل کی ہے کہ وہ جائے حادثہ سے دور رہیں تاکہ امدادی کارروائیوں میں خلل پیدا نہ ہو۔
22 مئ 2020بریکنگ, 91 مسافر اور عملے کے 8 ارکان طیارے پر سوار تھے
،تصویر کا ذریعہUGC
پاکستان کے سب سے بڑے شہر کراچی میں ہوائی اڈے کے قریب ایک مسافر طیارہ گر کر تباہ ہو گیا ہے اور اس حادثے میں ہلاکتوں کا خدشہ ہے۔
سول ایوی ایشن کے ترجمان کے مطابق یہ ایئر بس اے 320 طیارہ ملک کی قومی ایئر لائن پی آئی اے کا تھا اور لاہور سے کراچی آ رہا تھا کہ لینڈنگ سے قبل حادثے کا شکار ہو گیا۔
ترجمان نے بتایا ہے کہ پی آئی اے کی یہ پرواز پی کے 8303 دوپہر ایک بجے لاہور سے روانہ ہوئی تھی۔
حکام کے مطابق طیارے پر 99 افراد سوار تھے جن میں عملے کے آٹھ ارکان اور 91 مسافر شامل ہیں۔
مسافروں میں 51 مرد، 31 خواتین اور نو بچے شامل ہیں۔
پاکستان میں کوورنا کی وبا پھیلنے کے بعد اندرونِ ملک پروازوں کا سلسلہ دو ماہ تک معطل رہنے کے بعد حال ہی میں شروع ہوا ہے۔
22 مئ 2020پی آئی اے طیارہ حادثہ: بی بی سی اردو کی لائیو کوریج کا آغاز
کراچی میں پاکستان کی قومی ایئر لائن کے مسافر طیارے کو پیش آنے والے حادثے کی حوالے سے بی بی سی اردو کی لائیو کوریج شروع ہوگئی ہے۔
اس صفحے پر آپ کو جمعہ کو پیش آنے والے افسوسناک واقعے سے جڑی تمام خبریں اور لمحہ بہ لمحہ اپ ڈیٹس مل سکیں گی۔
اس حادثے کے بارے میں بی بی سی اردو کی ابتدائی خبر پڑھنے کی لیے کلک کیجیے۔