وائٹ ہاؤس میں ٹرمپ اور زیلنسکی میں تکرار: ’امن کے لیے تیار ہوں، تب واپس آئیں‘ ٹرمپ

لائیو کوریج

1. 27 فروری 2025پوتن امریکہ روس رابطے پر پرامید مگر مغربی طاقتوں سے نالاں

   

   ،تصویر کا ذریعہReuters

   روسی صدر ولادیمیر پوتن کا کہنا ہے کہ امریکہ اور روس کے ساتھ ہونے والی ملاقات سے انھیں امید ہوئی ہے کہ مسائل کو حل کیا جا سکتا ہے۔

   خبر رساں ادارے اے ایف پی اور روئٹرز کی رپورٹس کے مطابق روسی صدر نے روسی سکیورٹی ایجنسی ایف ایس بی کے ساتھ ملاقات میں کہا ہے کہ امریکہ کی نئی انتظامیہ کے ساتھ ہونے والے پہلے رابطے سے امید پیدا ہوئی ہے۔

   ’دونوں جانب تعلقات کو بحال کرنے کی خواہش ہے۔‘

   تاہم صدر پوتن نے یہ بھی دعویٰ کیا ہے کہ کچھ ’مغربی طاقتیں‘ واشنگٹن اور ماسکو کے درمیان نئے مذاکرات میں خلل ڈالنے کی کوشش کر رہی ہیں۔

   انھوں نے کہا کہ ’ہم سمجھتے ہیں کہ ہر کوئی روسی اور امریکی رابطوں کی بحالی سے خوش نہیں ہے۔

   انھوں نے کہا کہ ’ہمیں اس کو مدنظر رکھنے اور اس طرح کی کوششوں کو روکنے کے لیے سفارت کاری اور خصوصی خدمات کے تمام امکانات کو استعمال کرنے کی ضرورت ہے۔

   روسی صدر کا یہ بھی دعویٰ تھا کہ مغرب ’اندر سے‘ زوال پذیر ہونا شروع ہو گیا ہے۔

   وہ کہتے ہیں کہ اس کا ثبوت ’بہت سے مغربی ممالک کی معیشت کے مسائل‘ ہیں۔

   دوسری جانب روسی وفد امریکی حکام سے مذاکرات کے لیے استنبول پہنچ چکا ہے۔

   مذاکرات کا مقصد واشنگٹن اور ماسکو میں ان کے سفارت خانوں کے کام سے متعلق تنازعات کو حل کرنا ہے۔

   ترکی کے وزیر خارجہ ہاکان فدان نے بھی کہا ہے کہ ترکی یوکرین جنگ کے خاتمے میں 'اہم کردار' ادا کرے گا۔

   2022 میں روس کے مکمل پیمانے پر حملے کے آغاز کے بعد سے ، ترکی نے ثالث کا کردار ادا کرنے کی کوشش کی اور یوکرین اور روس دونوں کے ساتھ قریبی تعلقات برقرار رکھے ہیں۔

   اس سے قبل فن لینڈ کی وزیر خارجہ ایلینا والٹونن نے کہا تھا کہ ان کے خیال میں یہ 'بہت اچھا' ہے کہ سٹارمر ٹرمپ سے مل رہے ہیں تاکہ برطانیہ اور یورپ کو یہ پیغام دیا جا سکے کہ وہ ایک دوسرے کے ساتھ ہیں۔

   والٹونن نے بی بی سی ورلڈ سروس کے نیوز ڈے پروگرام کو بتایا کہ فن لینڈ پہلے بھی ہمسایہ ملک روس کی جارحیت سے اپنا دفاع کر چکا ہے اور جانتا ہے کہ 'یوکرین کے ساتھ جو کچھ بھی ہو رہا ہے اس سے آزادانہ طور پر طویل مدتی خطرہ موجود ہے۔'

   ان کا کہنا تھا کہ 'یہ یورپی مفاد میں ہے کہ وہ یوکرین کی مدد کرے اور روس کو بھی کمزور کرے' جبکہ وہ دیرپا امن کے معاہدے پر بات چیت کر رہا ہے کیونکہ 'پوری دنیا دیکھ رہی ہے۔'

2. 27 فروری 2025ابو ظہبی کے ولی عہد شیخ خالد بن محمد بن زید النہیان کی پاکستان آمد

   

   ،تصویر کا ذریعہPM HOUSE

   پاکستان کے سرکاری دورے پر آئے ہوئے ابو ظہبی کے ولی عہد شیخ خالد بن محمد بن زید النہیان کو وزیراعظم ہاؤس اسلام آباد میں پاکستان کی مسلح افواج کی جانب سے گارڈ آف آنر پیش کیا گیا۔

   وزیراعظم ہاؤس سے جاری بیان کے مطابق وزیراعظم پاکستان اور ابو ظہبی کے ولی عہد کے درمیان دو طرفہ ملاقات ہو گی۔

   وفود کہ سطح پر بات چیت میں دونوں رہنما اپنے اپنے وفود کی قیادت کریں گے۔

   پاکستان اور ابو ظہبی کے درمیان مفاہمتی یادداشتوں اور معاہدوں پر دستخط کی تقریب بھی منعقد ہو گی۔

3. 27 فروری 2025مراکش کے بادشاہ نے عوام کو اس سال قربانی نہ کرنے کی ہدایت کر دی

   

   ،تصویر کا ذریعہSocial Media

   مراکش کے خبر رساں ادارے کی جانب سے جاری ہونے والے ایک بیان کے مطابق مراکش کے بادشاہ محمد ششم نے عوام پر زور دیا ہے کہ وہ مُلک کو درپیش موجودہ مسائل اور چیلنجز کے پیش نظر اس سال عید الاضحیٰ کے کے موقع پر قربانی نہ کی جائے۔

   مراکش کے بادشاہ نے مراکش کے وزیر برائے اوقاف و اسلامی امور احمد توفیق کی جانب سے عوام کے نام اپنے پیغام میں اس بات پر زور دیا کہ وہ عید الاضحی سمیت عوام کو ان کے مذہبی فرائض کی ادائیگی کے لیے ہر وہ چیز فراہم کرنے کے خواہاں ہیں لیکن ’آپ کو بہترین حالات میں اس مذہبی رسم کو پورا کرنے کے قابل بنانے کی ہماری خواہش کے ساتھ ساتھ ہماری ذمہ داری ہے کہ ہم درپیش موسمیاتی اور معاشی چیلنجوں کو مدنظر رکھیں۔ ہمارے ملک کو موسمیاتی اور معاشی طور پر مویشیوں کی تعداد میں کمی کا سامنا ہے۔‘

   بادشاہ نے اپنے پیغام میں مزید کہا کہ ’اس بات کو مدنظر رکھتے ہوئے کہ عید الاضحی ایک اہم فریضہ ہے، تاہم ان موجودہ مُشکل حالات میں اس کو انجام دینے سے ہمارے معاشرے میں موجود محدود آمدنی والے بڑے طبقے کو نقصان کا سامنا کرنا پڑے گا۔‘

   انھوں نے اپنے پیغام کے آخر پر کہا کہ ’ہم اپنے پیارے لوگوں سے اپیل کرتے ہیں کہ وہ اس سال عید پر قربانی نہ کریں۔ ہم اپنے لوگوں کی طرف سے قربانی کریں گے۔‘

   

   ،تصویر کا ذریعہAnadolu Agency

   اس سال مراکش میں لوگوں کو قربانی کرنے سے کیوں روکا جا رہا ہے؟

   مراکش میں اس سال جانوروں کی قیمتوں میں اضافے کی وجہ سے عید الاضحی کے موقع پر قربانی نہ کرنے کا مطالبہ کیا گیا ہے۔ حکومتی مطالبے سے قبل مراکش کے شہریوں کی جانب سے چند ہفتے قبل اس معاملے پر احتجاج کرتے ہوئے یہ مطالبہ کیا تھا کہ مُلک میں جاری خشک سالی کے پیش نظر عید الاضحی کے موقعے پر قربانی نہ کی جائے۔ ایسا کرنے کی ایک وجہ تو مُلک میں خشک سالی اور دوسرا اس وجہ سے جانوروں کی قیمتوں میں ہونے والا اضافہ تھا۔

   مراکش کے وزیر زراعت احمد بواری نے فروری کے اوائل میں کہا تھا کہ مراکش میں مویشیوں اور بھیڑوں کے ریوڑوں میں 38 فیصد کمی آئی ہے۔

   مراکش میں پہلے بھی لوگوں کو قربانی کرنے سے روکا جا چُکا ہے

   یہ پہلا موقع نہیں تھا کہ مراکش کے بادشاہ کی جانب سے یہ ایسا کرنے کے احکامات جاری کیے گئے ہوں کیونکہ ان سے قبل شاہ حسن دوم نے اس طرح کے احکامات جاری کیے تھے اور اس سے قبل بھی تین بار اسی وجہ سے قربانی کے جانوروں کو ذبح کرنے پر پابندی عائد کی گئی تھی۔

   سنہ 1963 میں بادشاہ نے مراکش اور الجزائر کے درمیان نام نہاد ’سینڈ وار‘ کی وجہ سے قربانی کو منسوخ کرنے کا اعلان کیا تھا۔

   سنہ 1981 میں مراکش میں شدید خشک سالی کی وجہ سے دوسری بار یہی فیصلہ سامنے آیا تھا جس کے نتیجے میں بہت سے مویشی ہلاک ہو گئے تھے۔

   مراکش کے بادشاہ نے تیسری بار 1996 میں یہ قربانی نہ کرنے کے احکامات دیے تھے جس کی وجہ 1995 میں شدید قحط تھا، جسے اُس وقت کی حکومت نے قومی آفت قرار دیا تھا۔

   سنہ 2023 میں مراکش میں معاشی بحران اور جانوروں کی قیمتوں میں نمایاں اضافے کی وجہ سے قربانی پر پابندی عائد کرنے کے مطالبات کیے گئے تھے۔

4. 27 فروری 2025لیبیا کشتی حادثے میں ہلاک ہونے والے چھ پاکستانیوں کی میتیں وطن واپس پہنچا دی گئیں

   

   ،تصویر کا ذریعہReuters

   لیبیا کشتی حادثہ میں جاں بحق 6 پاکستانیوں کی میتیں وطن واپس پہنچ گئیں۔ وفاقی وزیر برائے ہاؤسنگ اینڈ ورکس ریاض حسین پیرزادہ نے اسلام آباد انٹرنیشنل ایئرپورٹ پر میتیں وصول کیں۔

   اس موقع پر وزیر برائے ہاؤسنگ اینڈ ورکس ریاض حسین پیرزادہ نے کہا کہ ’یہ ایک افسوسناک حادثہ تھا کہ جس میں متعدد پاکستانی ہلاک ہوئے ہم ان تمام کے لواحقین کے غم میں شریک ہیں۔ 5 فروری کو پیش آنے والے اس حادثے میں ہلاک ہونے والوں کے لواحقین حکومت متاثرین کے خاندانوں کے ساتھ ہر سطح پر کھڑی ہے۔‘

   انھوں نے مزید کہا کہ ’تمام ضروری انتظامات کیے ہیں کہ ہلاک ہونے والوں کی میتیں ان عزیزوں تک پہنچائی جا سکیں، تاہم باقی رہ جانے والے افراد کی میتیں بھی جلد وطن واپس لائیں گے، زندہ بچ جانے والے 37 پاکستانیوں کی واپسی کے لیے بھی کوششیں جاری ہیں۔‘

   لیبیا کشتی حادثے میں ہلاک ہونے والے جن چھ پاکستانیوں کی میتیں واپس لائی گئی ہیں اُن میں پاڑہ چنار کے مصور حسین، شعیب علی، عابد حسین، مصائب حسین اور ضلع اورکزئی سے تعلق رکھنے والے محمد علی شاہ شامل ہیں۔

   واضح رہے کہ اسی سال فروری کے ابتدائی ایام میں لیبیا کے شہر زاویہ کی بندرگاہ کے قریب 65 مسافروں کو لے جانے والی ایک کشتی حادثے کا شکار ہوئی۔ جس میں 16 پاکستانی شہریوں کی ہلاکت کی تصدیق کی گئی۔

   حادثے کے بعد پاکستانی دفتر خارجہ کی جانب سے جاری ایک بیان میں کہا گیا تھا کہ ایسی اطلاعات بھی سامنے آئی ہیں کہ لیبیا کے شہر زاویہ کی بندرگاہ کے قریب الٹنے والی کشتی میں 63 پاکستانی سوار تھے تاہم اس حادثے میں ہلاک ہونے والوں میں صرف 16 پاکستانی شہریوں کی تصدیق کی جا سکی تھی۔

5. 27 فروری 2025شاہراہِ قراقرم داسو اور سمر نالے کے قریب بارش اور لینڈ سلائیڈنگ کے باعث بند, زبیر خان، صحافی

   

   ،تصویر کا ذریعہsaeed yadoon

   کوہستان میں شاہراہ قراقرم پر داسو سے سمر نالہ سے تقریباً 20 کلو میٹر کے علاقے میں شدید بارشوں کے سبب لینڈ سلائیڈنگ اور سڑک کی تعمیر اور ملبے کی وجہ سے سڑک بند ہونے سے مسافروں کی بڑی تعداد کو مُشکلات کا سامنا ہے۔

   داسو تحصیل چیرمین غلام سعید خان کے مطابق بدھ کی صبح شدید بارش ہوئی تھی جس کے بعد داسو سے سمر نالہ تک لینڈ سلائیڈنگ کے علاوہ تعمیراتی ملبہ روڈ پر آنے سے یہ مصروف شاہراہ ہر قسم کی ٹریفک کے لیے بند ہوگئی ہے۔

   ان کا کہنا تھا کہ ’دو دن سے جاری تیز بارش کی وجہ سے اس ہنگامی صورتحال کا سامنا ہے۔ تاہم جمعرات یعنی آج صبح ہونے والی انتہائی تیز بارش کی وجہ سے خدشہ ہے کہ مزید لینڈ سلائیڈنگ کا امکان ہے۔‘

   غلام سعید خان کا کہنا تھا کہ ’لینڈ سلائیڈنگ والے مقامات پر واپڈا، این ایچ اے، اپر کوہستان انتظامیہ کی جانب سے سڑک کھولنے کے لیے بھاری مشنیری تو متلوبہ مقام پر موجود ہے تاہم تیز بارش کی وجہ سے امدادی کارروائیوں میں مُشکلات کا سامنا ہے۔ تاہم جیسے ہی بارش میں وقفہ ہوتا ہے تو ملبہ ہٹانے کا کام فی الفور شروع کردیا جائے گا۔‘

   ان کا کہنا تھا کہ ’شاہراہ قراقرم پر گلگت بلتستان اور راولپنڈی کے لیے روزانہ تقریباً 70 سے 80 مسافر گاڑیاں چلتی ہیں۔ لینڈ سلائیڈنگ کے بعد کچھ کو تو سفر پر روانہ ہونے کی اجازت نہیں دی گئی تاہم کُچھ راستے میں ہیں جو سڑک کی بندش کی وجہ سے مطلوبہ مقام تک نہیں پہنچیں۔ زیادہ تر مسافر داسو میں پھسے ہوئے ہیں جہاں پر ان کو رہائش کھانا پینا دستیاب ہے جبکہ تقریباً دو سو خاندانوں کو سرکاری عمارتوں میں عارضی رہائش فراہم کی گئی ہے۔‘

   غلام سعید خان نے کوہستان اور گلگت بلتستان کی جانب سفر کرنے سے منع کیا گیا ہے اُن کا کہنا ہے کہ ’بارش کی وجہ سے سڑک بند ہے اور اس جانب سفر کرنے والوں کو مُشکلات کا سامنا کرنا پڑ سکتا ہے۔‘

   گلگت بلتستان کے ضلع دیامیر کی حدود میں ایک دو مقامات پر مٹی کے تودے گرنے سے روڈ بند ہونے کی بھی اطلاعات ہیں۔

   اپنی گاڑی میں ہنزہ جانے والے مسافر ریحان علی کا کہنا تھا کہ ’ہمیں اور دیگر کئی گاڑیوں کو پولیس نے شانگلہ کی حدود میں روکا تھا اور اب ہم بشام میں ایک ہوٹل میں ٹھہرے ہوئے ہیں۔ اس بات کا انتظار کررہے ہیں کہ روڈ کھلے تو اپنی منزل کی جانب سفر شروع کریں۔‘

6. 27 فروری 2025حماس اور اسرائیل کے درمیان جنگ بندی معاہدے کے تحت اب آگے کیا ہوگا؟

   

   ،تصویر کا ذریعہEPA

   حماس اور اسرائیل کے درمیان ہونے والا جنگ بندی کا پہلا مرحلہ سنیچر کے روز اختتام پزیر ہونے جا رہا ہے۔

   چھ ہفتوں پر محیط جنگ بندی معاہدے کی شرائط کے تحت اسرائیل کو تقریباً 1900 فلسطینی قیدیوں کو رہا کرنا تھا۔

   لیکن یہ دیکھنا باقی ہے کہ آیا فریق معاہدے کے دوسرے مرحلے میں آگے بڑھنے پر رضامند ہوسکتے ہیں یا نہیں۔

   اگر وہ ایسا کرتے ہیں تو اس میں مستقل جنگ بندی کی شرائط بھی شامل ہوں گی۔ غزہ میں باقی ماندہ یرغمالیوں کو مزید فلسطینی قیدیوں کے بدلے آزادی ملے گی اور اسرائیلی افواج کا مکمل انخلا ہوگا۔

   دوسرے مرحلے کے لیے مذاکرات پہلے مرحلے کے دوران شروع ہونے والے تھے تاہم ابھی تک ایسا کُچھ بھی نہیں ہوا ہے۔

   

   ،تصویر کا ذریعہReuters

   بدھ اور جمعرات کی درمیانی شب یرغمالیوں کی رہائی اسرائیل اور حماس کے درمیان کئی دنوں سے جاری تعطل کے بعد ہوئی ہے۔ واضح رہے کہ فریقین کے درمیان پیدا ہونے والے مسائل ثالثوں کے ذریعے حل ہوئے۔

   اگر دوسرے مرحلے کی شرائط کامیابی سے مکمل ہوجاتی ہیں تو اس سے معاہدے کے تیسرے اور آخری مرحلے کا آغاز ہوگا۔

   اس طرح ہلاک ہونے والے یرغمالیوں کی باقی ماندہ تمام لاشیں اسرائیل کو واپس کر دی جائیں گی اور غزہ کی تعمیر نو کا کام شروع ہو جائے گا جس میں کئی سال لگ سکتے ہیں۔

   واضح رہے کہ اسرائیل کی جانب سے رہا ہونے والے کچھ فلسطینی قیدیوں کو فوری طور پر مصر کے راستے غزہ بھیجا جانا تھا جبکہ اکثریت کو مغربی کنارے سے غزہ واپس بھیجا گیا اور خان یونس سے موصول ہونے والی اطلاعات اور تصاویر میں دیکھا جا سکتا ہے کہ اسرائیلی قید سے رہائی پانے والوں کا وہاں پرجوش ہجوم نے استقبال کیا۔

   

   ،تصویر کا ذریعہReuters

   تاہم اس سب کے دوران تین ایسے امور ہیں کے جن کے بارے میں ابھی بھی کچھ چیزیں واضح نہیں ہیں:

   • اسرائیلی انتظامیہ حماس کی جانب سے واپس کی جانے والی چاروں لاشوں کی شناخت کی تصدیق کے لئے ان کے ڈی این اے ٹیسٹ کرنے میں مصروف ہے۔ تاہم اس بارے میں تاحال اسرائیل کی جانب سے سرکاری طور پر کوئی بیان جاری نہیں کیا گیا ہے۔
   • بی بی سی کو اسرائیل کی قید سے رہا ہونے والے فلسطینی قیدیوں کی معین تعداد کے بارے میں معلومات نہیں مل پائی ہیں تاہم یہ ضرور پتہ چلا ہے کہ درجنوں قیدیوں سے بھری تین بسیں خان یونس پہنچی ہیں۔
   • بی بی سی کے پاس اس بارے میں بھی ابھی تک معلومات نہیں ہیں کہ آیا فریقین (حماس اور اسرائیلی انتظامیہ) جنگ بندی معاہدے کے اگلے مرحلے میں آگے بڑھنے پر راضی ہوئے ہیں یا نہیں اور یہ بھی کہ آیا آنے والے وقت میں قیدیوں اور یرغمالیوں کے اس طرح کے مزید تبادلے ان معاہدوں میں شامل ہوں گے یا نہیں۔

7. 27 فروری 2025چار اسرائیلی یرغمالیوں کی لاشوں کے بدلے 600 فلسطینیوں کی رہائی

   

   ،تصویر کا ذریعہGetty Images

   حماس کی جانب سے غزہ جنگ بندی معاہدے کے تحت چار اسرائیلی یرغمالیوں کی لاشیں بدھ اور جمعرات کی درمیانی شب اسرائیلی انتظامیہ کے حوالے کر دیا گیا۔

   حماس کی جانب سے جاری بیان میں بتایا گیا ہے کہ جن چار اسرائیلی یرغمالیوں کی لاشیں انتظامیہ کے حوالے کی گئی ہیں اُن میں 86 سالہ شلومو منصور، 50 سالہ احد یحد، 50 سالہ تساچی عدن اور 69 سالہ اتزک ایلگارات شامل ہیں۔

   اسرائیلی وزیر اعظم بنیامن نتن یاہو کے دفتر کی جانب سے بھی تصدیق کی گئی ہے کہ چار یرغمالیوں کی لاشیں اسرائیل کو واپس کر دی گئی ہیں۔ ان کی شناخت کی تصدیق کے لئے ان کا ڈی این اے ٹیسٹ کیا جائے گا۔

   ٹویوٹا کمپنی کی جیپس کو بدھ اور جمعرات کی درمیانی شب ریڈ کراس مخصوص نشان اور جھنڈے کے ساتھ اس راستے پر دیکھا گیا تھا جہاں قریب ہی حماس کی جانب سے اسرائیلی یرغمالیوں کی لاشوں کو تنظیم کے حوالے کیا گیا۔

   

   تاہم اس چار اسرائیلی یرغمالیوں کی لاشوں کے بدلے اسرائیل کی جانب سے 600 سے زائد فلسطینی قیدیوں کو رہا کیا گیا ہے۔ اس سے قبل حماس کی جانب سے یرغمالیوں کے حوالے کیے جانے کے خلاف احتجاجاً اسرائیل کی جانب سے ان کی رہائی تاخیر کا شکار ہوئی تھی۔

   حماس کی جانب سے ماضی کے تبادلوں کے برعکس بدھ اور جمعرات کی درمیانی شب لاشوں کو بغیر کسی عوامی تقریب کے ریڈ کراس کے حوالے کرنے پر رضامندی ظاہر کی۔

   جنگ بندی معاہدے کے اس پہلے مرحلے میں 33 اسرائیلی یرغمالیوں کو تقریباً 1900 فلسطینی قیدیوں کے بدلے رہا کیا گیا ہے۔

   بتایا جا رہا ہے کہ اب تک 25 یرغمالیوں کو زندہ اور 8 اسرائیلی یرغمالیوں کی لاشوں کو ریڈ کراس کے حوالے کیا گیا۔

   تاہم بدھ اور جمعرات کی درمیانی شب حماس کی جانب سے جن چار اسرائیلی یرغمالیوں کی لاشوں کو انتظامیہ کے حوالے کیا گیا ہے اُن کے ڈی این اے کی تصدیق کا عمل جاری ہے کہ آیا یہ لاشیں ان افراد کی ہی ہیں کہ جن کی توقع کی جا رہی تھی۔

   اس سے قبل حماس کے مسلح گروہ کی جانب سے کہا گیا تھا کہ ’معاہدے کے مطابق عزالدین القسام بریگیڈ نے چار یرغمالیوں کی لاشیں آج رات ان کے حوالے کرنے کا فیصلہ کیا ہے۔‘

   

   ،تصویر کا ذریعہReuters

   حماس کے ایک عہدیدار نے خبر رساں ادارے اے ایف پی کو بتایا کہ چاروں لاشوں کی واپسی کسی عوامی اجتماع میں نہیں کی جائے گی۔

   واضح رہے کہ اس سے قبل اسرائیل نے حماس کی جانب سے یرغمالیوں کے حوالے سے ہونے والی عوامی تقریب کو ’ذلت آمیز‘ قرار دیا اور گزشتہ ہفتے قیدیوں کی رہائی میں تاخیر کی تھی کیونکہ اُن کا کہنا تھا کہ ’یرغمالیوں کے ساتھ ظالمانہ سلوک کیا گیا۔‘

   بی بی سی کو مغربی کنارے سے موصول ہونے والے چند تصاویر میں وہ مناظر دیکھ جا سکتے ہیں کہ جب اسرائیلی کی قید سے رہا ہونے والے فلسطینی قیدی واپس اپنے لوگوں تک پہنچے۔

   ان کی رہائی کا انتظار کرنے والے ہجوم نے واپس آنے والے قیدیوں کو اپنے کندھوں پر اُٹھا لیا۔ تاہم رہا ہونے والے ان فلسطینی قیدیوں سے متعلق بی بی سی کے پاس اس بارے میں کوئی معلومات نہیں ہیں کہ انھیں کس جُرم میں سزا سنائی گئی۔

8. 27 فروری 2025جنگ بندی جلد ہو گی، زیلنسکی سے قیمتی معدنیات کے معاہدے پر دستخط کرنے جا رہا ہوں: ٹرمپ

   

   ،تصویر کا ذریعہReuters

   امریکہ کے صدر ڈونلڈ ٹرمپ نے کہا ہے کہ معدنیات سے متعلق ڈیل یوکرین کے لیے بھی بہت بڑی ڈیل ہو گی کیونکہ اس سے وہ ہمیں یوکرین لے جائیں گے، اب ہم وہاں کام کرنے جا رہے ہیں۔‘

   ٹرمپ کے مطابق ’ہم جب یوکرین میں ہوں گے اس سے خود بخود اس ملک کو تحفظ حاصل ہو جائے گا۔ جب ہم وہاں ہوں گے تو پھر کوئی بھی ہمارے لوگوں کے ساتھ دھینگا مشتی کرنے کی جرات نہیں کرے گا۔‘

   ٹرمپ ایک صحافی کے سوال میں یہ جواب دے رہے تھے جب ان سے یہ پوچھا گیا کہ وہ یوکرین کو کس قسم کی سکیورٹی گارنٹی دے رہے ہیں۔

   یوکرین میں موجود قیمتی ذخائر جنھیں امریکہ ہر حال میں حاصل کرنا چاہتا ہے

   ریاض کے بند کمرے کی غیرمعمولی تصویر اور وہ ’سفارتی دھماکہ‘ جس نے مغربی دنیا کو ہلا کر رکھ دیا

   صحافی کے اس سوال کے جواب میں امریکی صدر نے کہا کہ ’اس سے بڑھ کر میں کوئی اور گارنٹی نہیں دے سکتا۔‘

   ٹرمپ نے کہا کہ ’ہم یورپ سے کہیں گے وہ یہ ضمانت دیں کیونکہ جیسا کہ آپ جانتے ہیں کہ یورپ یوکرین کا پڑوسی ہے۔‘

   امریکی صدر نے یوکرین کی قیمتی معدنیات سے متعلق کہا کہ اس ڈیل سے ہلاکتوں کا سلسلہ ختم ہو جائے گا اور امریکہ کو اس سے آمدن ملے گی اور بہت کچھ حاصل ہوگا۔

   

   ،تصویر کا ذریعہReuters

   ٹرمپ نے کہا کہ گذشتہ امریکی انتظامیہ نے امریکہ کو بہت برے مقام پر لا کھڑا کر دیا تھا۔ ٹرمپ نے کہا کہ امریکی ٹیکس دہندگان کو یورپ سے زیادہ اب یوکرین کے لیے ادائیگی نہیں کرنی چاہیے۔

   امریکی صدر نے کہا کہ جنگ بندی سے متعلق معاہدہ بہت قریب ہے۔ انھوں نے کہا کہ ’ہم روس اور یوکرین کے ساتھ ایک معاہدہ کرنے جا رہے ہیں کہ لوگوں کو مارنا بند کر دیں۔‘

   ٹرمپ نے کہا کہ یہ بہت اہمیت کی حامل چیز ہے اور یہ بہت بڑی کامیابی ہے۔ انھوں نے صحافیوں کو بتایا کہ ان کی ٹیم اس حوالے سے پیشرفت میڈیا سے شیئر کرتی رہے گی۔

   

   ،تصویر کا ذریعہGetty Images

   صدر ٹرمپ نے کابینہ کے اجلاس سے خطاب میں کہا کہ وہ اور یوکرین کے صدر کے ساتھ معاہدے پر دستخط کرنے جا رہے ہیں جو بہت بڑی کامیابی ہوگی۔ ٹرمپ نے کہا ہمارے روس کے ساتھ تعلقات بہت اچھے ہو رہے ہیں اور انھوں نے اپنی ٹیم کی تعریف کی کہ وہ اس حوالے سے بہت اچھا کام کر رہے ہیں۔

9. 26 فروری 2025امریکہ کے ساتھ معدنیات کا معاہدہ: ابتدائی معاہدے میں سکیورٹی گارنٹی شامل نہیں، ولادیمیر زیلنسکی

   

   ،تصویر کا ذریعہReuters

   یوکرین کے صدر ولادیمیر زیلنسکی نے اس بات کی تصدیق کی ہے کہ تاحال ابتدائی معاہدے کے تحت امریکہ یوکرین کو کوئی سکیورٹی گارنٹی فراہم نہیں کرے گا۔

   زیلنسکی نے امید ظاہر کی ہے کہ امریکہ کے ساتھ طے پانے والا معدنیات سے متعلق معاہدہ مزید معاہدوں کی وجہ بنے گا۔

   ان کا کہنا ہے کہ ابتدائی معاہدہ ’صرف ایک آغاز ہے، ایک فریم ورک، لیکن یہ بہت بڑی کامیابی میں تبدیل ہو سکتا ہے۔‘

   ’اس کی کامیابی صدر ٹرمپ کے ساتھ ہونے والی بات چیت پر منحصر ہے۔‘

   انھوں نے ایک مشترکہ فنڈ کا حوالہ دیا جس میں یوکرین قدرتی وسائل سے حاصل ہونے والی آمدنی کا 50 فیصد ڈالے گا۔

   اس سے قبل یوکرینی وزیرِ اعظم ڈینس شمیہل نے کہا تھا کہ ابتدائی معاہدے کے تحت ایک ’انویسٹمنٹ فنڈ‘ قائم کیا جائے گا۔ ان کے مطابق امریکہ بھی اس فنڈ میں حصہ ڈالے گا۔ تاہم امریکی حکام کی جانب سے اس بارے میں کوئِ تبصرہ سامنے نہیں آیا ہے۔

   زیلنسکی کا کہنا تھا کہ ان کی ٹیم نے امریکی حکام پر سکیورٹی گارنٹی کے متعلق ایک لائن اس معاہدے میں ڈالنے پر زور دیا تھا۔

   یوکرینی صدر کا کہنا ہے، ’میری خواہش تھی کہ یوکرین کے لیے سکیورٹی گارنٹی کے متعلق ایک سطر اس میں شامل ہو، اور یہ بہت اہم ہے کہ یہ اس میں موجود ہے۔‘

   یوکرین میں موجود قیمتی ذخائر جنھیں امریکہ ہر حال میں حاصل کرنا چاہتا ہے

   ڈونلڈ ٹرمپ کے اس مطالبے پر کہ یوکرین کو امریکہ کی جانب سے فراہم کیے جانے والے اربوں ڈالرز کے ہتھیاروں کی ادائیگیاں کرنی ہوں گی، زیلنسکی کا کہنا تھا کہ اس معاہدے کے تحت یوکرین ’10 سینٹ بھی ادا نہیں کرے گا۔‘

   ان کا کہنا تھا کہ اگر وہ جمعے کے روز وائٹ ہاؤس کا دورہ کریں گے تو وہ صاف لفظوں میں پوچھیں گے کہ آیا امریکہ یوکرین کی حمایت جاری رکھے گا یا نہیں۔

   بی بی سی کے سوال پر کہ اگر صدر ٹرمپ نے سکیورٹی گارنٹی دینے سے انکار کر دیا تو کیا وہ معاہدہ توڑ دیں گے، زیلنسکی کا کہنا تھا، ’میں نیٹو کے ذریعے یا کچھ اس ہی طرز کا چاہتا ہوں۔‘ ان کا مزید کہنا تھا کہ ’اگر ہمیں سکیورٹی گارنٹی نہیں ملی تو جنگ بندی نہیں ہوگی، کچھ بھی کام نہیں کرے گا، کچھ بھی نہیں۔‘

   اس سے قبل یوکرینی وزیر اعظم نے بی بی سی کو بتایا تھا کہ سکیورٹی گارنٹی کے بغیر یوکرین اس معاہدے پر دستخط نہیں کرے گا۔

10. 26 فروری 2025پاکستان اور ازبکستان کا دوطرفہ تجارت دو ارب ڈالرز تک بڑھانے پر اتفاق

    

    ،تصویر کا ذریعہPM OFFICE

    پاکستان کے وزیرِ اعظم شہباز شریف کے دورہ ازبکستان کے دوران دونوں ممالک نے مستقبل قریب میں دوطرفہ تجارت کے حجم کو موجودہ 400 ملین ڈالرز سے بڑھا کر دو ارب ڈالر تک لے جانے پر اتفاق کیا ہے۔

    اس کے علاوہ دونوں ملکوں میں علاقائی رابطے کے فروغ کے لیے ٹرانس افغان ریلوے منصوبے سمیت مواصلات، معدنیات، سیاحت، زراعت، سائنس وٹیکنالوجی اور دیگر شعبوں میں بھی تعاون بڑھانے پر اتفاق ہوا ہے۔

    بدھ کے روز تاشقند میں ازبکستان کے صدر شوکت مرزایوف کے ساتھ مشترکہ پریس کانفرنس سے خطاب کرتے ہوئے وزیراعظم شہباز شریف کا کہنا تھا کہ ازبکستان پاکستان کا بااعتماد شراکت دار ہے۔

    پاکستان کے سرکاری خبر رساں ادارے اے پی پی کے مطابق، وزیرِ اعظم کا کہنا تھا کہ ٹرانس افغان ریلوے منصوبہ پورے خطے کے لیے گیم چینجر ثابت ہوگا اور پاکستان اس منصوبے میں بھرپور تعاون کرے گا۔

    ان کا کہنا تھا کہ دونوں ممالک کے درمیان سیاحت کو بھی فروغ دیا جائے گا جب کہ دونوں ملکوں کے درمیان پروازوں کی تعداد میں بھی اضافہ کیا جائے گا۔

    وزیر اعظم شہباز شریف کا کہنا تھا کہ افغانستان میں امن و استحکام خطے کے مفاد میں ہے۔ ان کا کہنا تھا کہ افغانستان کی سرزمین پاکستان سمیت کسی بھی دوسرے ملک پر حملے کے لیے استعمال نہیں ہونی چاہیے۔

    پاکستانی چاول کی برآمد میں بڑے اضافے کے بعد اچانک کمی کے پیچھے انڈیا کا کیا کردار ہے؟

    شہباز شریف کے دورہ ازبکستان کے دوران جن معاہدوں اور مفاہمت کی یادداشتوں پر دستخط کیے گئے ان میں دونوں ممالک کے وزارت داخلہ کے مابین تعاون کی مفاہمتی یادداشت، پاکستان اور ازبکستان کی وزارت دفاع کے مابین عسکری انٹیلیجنس کے شعبے میں تعاون کا معاہدہ، سائنٹفیک-تکنیکی اور جدید شعبوں میں تعاون کے معاہدے سمیت دیگر معاہدے شامل ہیں۔

    اس سے قبل آذربائیجان کے دورے کے دوران وزیرِ اعظم شہباز شریف نے اعلان کیا تھا کہ پاکستان اور آذربائیجان کے مابین دوطرفہ تجارت کو دو ارب ڈالرز تک بڑھانے کا فیصلہ کیا گیا ہے۔ ان کے مطابق اس وقت دونوں ممالک کے درمیان تجارت کا حجم ایک کروڑ 40 لاکھ ڈالرز ہے۔

11. 26 فروری 2025خفیہ ادارے پہلے لوگوں کو کرپٹ کرکے ان کی فائلیں بناتے ہیں پھر انھیں اقتدار دیتے ہیں: محمود خان اچکزئی

    

    ،تصویر کا ذریعہGetty Images

    پشتونخوا ملی عوامی پارٹی کے سربراہ محمود خان اچکزئی کا کہنا ہے کہ پاکستان کے خفیہ ادارے خود لوگوں کو کرپٹ کرتے ہیں، ان کی فائلیں بناتے ہیں اور پھر ان کے ہاتھ میں اقتدار دیتے ہیں۔

    وہ تحریک تحفظ آئین پاکستان کے زیر انتظام اسلام آباد میں جاری دو روزہ قومی کانفرنس سے خطاب کر رہے تھے۔ ’آئین کی بالادستی اور قانون کی حکمرانی کا آغاز‘ کے نام سے جاری اس کانفرنس میں اپوزیشن جماعتیں بشمول پاکستان تحریکِ انصاف، پشتونخوا ملی عوامی پارٹی اور عوام پاکستان پارٹی سمیت دیگر شرکت کر رہی ہیں۔ تاہم مولانا فضل الرحمن کی جمیعت علمائے اسلام اس کانفرنس کا حصہ نہیں۔

    بدھ کے روز کانفرنس سے خطاب کرتے ہوئے ان کا کہنا تھا کہ کوئی بھی ملک جاسوسی اداروں، افواج اور ایک مستقل نظام کے بغیر نہیں چل سکتا جس پر عوام کا اتفاق ہو۔

    ان کے مطابق جاسوسی ادارے ملک کے آنکھ اور کان ہوتے ہیں جو سیاسی اداروں کی رہنمائی کرتے ہیں اور اس رہنمائی کی روشنی میں فیصلے لیے جاتے ہیں۔

    ’بد قسمتی سے ہمارے جاسوسی ادارے خود ہی لوگوں کو کرپٹ کرتے ہیں، ان کی فائلیں بناتے ہیں اور پھر ان کے ہاتھ میں پاکستان کی رہبری دیتے ہیں۔‘

    ان کا کہنا تھا ’یہ نسخہ جو ہمارے دوست استعمال کر رہے ہیں، سوویت یونین میں ناکام ہو چکا ہے۔‘

    باچا خان: پاکستان کی آزادی کے مخالف سرحدی گاندھی جنھیں ’افغان ایجنٹ‘ قرار دیا گیا

    جب مٹھی بھر خواتین نے ضیا حکومت کو متنازع قانون شہادت میں ترمیم پر مجبور کیا

    اپنے خطاب کے دوران محمود خان کا کہنا تھا کہ ایک ایسا شخص جو خود عوام سے نکل کر نہ آیا ہو، وہ کیسے پاکستان کی نمائندگی کرسکتا ہے۔

    محمود خان اچکزئی نے کہا کہ ہمیں آزادی تو 1947 میں ملی لیکن اس کے ثمرات آج تک نیچے منتقل نہیں ہوئے ہیں۔

    ان کا کہنا تھا کہ ہم نے اپنے لوگوں کو حق کی حکمرانی میں حصہ دار نہیں بنایا۔ ’حق کی بات کرنے پر فوراً الزامات لگ جاتے ہیں۔‘

    ’جب آپ حق کی بات کرتے ہِں تو آپ کو غدار قرار دے دیا جاتا ہے۔ آئین میں غداری کی تعریف کر دی گئی ہے۔ آئیں کے مطابق جو آئین کی پامالی یا اسے توڑے وہ سنگین غداری کا مرتکب ہوتا ہے۔‘

12. 26 فروری 2025آئی سی سی چیمپیئنز ٹرافی میں پاکستان کی کارکردگی: جو ٹیم کھیلی اس سے بہتر ٹیم نہیں بن سکتی تھی، عاقب جاوید

    

    ،تصویر کا ذریعہGetty Images

    آئی سی سی چیمپیئنز ٹرافی میں پاکستان کی مایوس کن کارکردگی اور ایونٹ سے باہر ہونے کے بعد قومی کرکٹ ٹیم کے ہیڈ کوچ عاقب جاوید کا کہنا ہے کہ جو ٹیم ایونٹ کے لیے چنی گئی تھی اس سے بہتر ٹیم نہیں بنائی جا سکتی تھی۔

    بدھ کے روز راولپنڈی میں پریس کانفرنس کرتے ہوئے عاقب جاوید کا کہنا تھا کہ قومی ٹیم کی شکست کے بعد سے ٹیم سیلکشن پر کافی تنقید کی جا رہی ہے لیکن آپ کھلاڑیوں کی بات کریں تو اس سے بہتر ٹیم نہیں بن سکتی تھی۔

    انھوں نے سعود شکیل کو ٹیم میں شامل کرنے کے فیصلے کا دفاع کرتے ہوئے کہا کہ سعود کو ان کنڈیشنز میں سپن کھیلنے کی ان کی صلاحیت کو مدِ نظر رکھتے ہوئے ٹیم میں رکھا گیا تھا۔

    ’جو کھلاڑی شامل کیے گئے ان سب نے ہی حال میں اچھی کارکردگی دکھائی ہے۔‘

    سینیئر کھلاڑیوں کی خراب کارکردگی کے متعلق سوال کے جواب میں ان کا کہنا تھا کہ شاہین شاہ آفریدی، نسیم شاہ اور حارث رؤف کا موازنہ کسی بھی ٹیم کے بالرز سے کیا جائے تو ان کا شمار بہترین فاسٹ بالرز میں ہوگا۔

    پاکستان چیمپیئنز ٹرافی کے چھٹے روز ایونٹ سے باہر: ’اب اگر مگر سے بات بہت آگے بڑھ گئی ہے، بس اب آرام سے گھر بیٹھیں‘

    سکیورٹی حصار توڑ کر پنڈی سٹیڈیم میں داخل ہونے والا نوجوان: ’دوست نے کہا مولوی کی تصویر لے جا، وائرل ہو جائے گا‘

    پاکستان ٹیم کے سینیئر بلے باز بابر اعظم کے متعلق بات کرتے ہوئے ان کا کہنا تھا کہ ’بابر کے علاوہ آپ کے پاس کونسا آپشن ہے؟ ہمیشہ ٹیم کو تبدیل کرنے کی بات کی جاتی ہے لیکن یہ پہلے ہی آپ کی سب سے ناتجربہ کار ٹیم ہے۔ پوری ٹیم کو مجموعی طور پر 400 میچوں کا بھی تجربہ نہیں۔‘

    پاکستان کے ہیڈ کوچ کا کہنا تھا کہ نسیم شاہ کا شمار تجربہ کار کھلاڑیوں میں کیا جا رہا ہے جبکہ انھیں محض 25 ایک روزہ میچ کھیلنے کا تجربہ ہے۔

    ’ہم 25 میچ والے کو کہہ رہے ہیں کہ یہ سینیئر ہے اور اس نے پرفارم نہیں کیا۔‘

    پاکستان کی انڈیا کے ہاتھوں شکست کے بارے میں بات کرتے ہوئے ان کا کہنا تھا کہ پاکستان انڈیا کا میچ صرف کرکٹ سے کہیں زیادہ ہوتا ہے۔

    ان کا کہنا تھا کہ ایسے میچوں میں آپ کو تجربے کی ضرورت ہوتی ہے۔ عاقب جاوید کا کہنا تھا کہ انڈین ٹیم مجموعی طور پر پاکستان سے کہیں زیادہ تجربہ کار تھی جبکہ پاکستان کی ٹیم میں بابر، رضوان اور شاہین کے علاوہ باقی کھلاڑی کافی ناتجربہ کار تھے۔

    ’نئے کھلاڑیوں کو ایسے پریشر میں پرفارم کرنے میں کافی مشکلات پیش آتی ہیں۔‘

    عاقب جاوید کا کہنا تھا کہ صائم ایوب اور فخر زمان کی غیر موجودگی میں لوگ بابر، رضوان، نسیم، شاہین اور حارث کی طرف ہی دیکھتے ہیں۔

    جب ایک صحافی نے ان سے پوچھا کہ کیا ان سینیئر کھلاڑیوں نے توقعات کے مطابق پرفارم کیا تو ان کا کہنا تھا ’نہیں، تب ہی تو ہم ہار گئے۔‘

    ’لیکن آپ یہ نہیں کہہ سکتے کہ انھیں ٹیم میں نہیں ہونا چاہیے تھا یا آگے شامل نہیں کیا جانا چاہیے۔‘

    ان کا مزید کا کہنا تھا کہ ’ہم یہ تو نہیں کر سکتے کہ ہارنے والی پوری ٹیم کو باہر نکال کر انڈر 19 ٹیم کھلا لیں۔‘

    خیال رہے کہ پاکستان اس سال منعقد ہونے والی آئی سی سی چیمپئنز ترافی کی میزبانی کر رہا ہے جبکہ پاکستانی ٹیم نیوزی لینڈ اور انڈیا کے خلاف اپنے دونوں ابتدائی میچز ہارنے کے بعد ٹورنامنٹ سے باہر ہو چکی ہے۔ پاکستان پنا تیسرا اور آخری گروپ میچ بنگلہ دیش کے خلاف کل راولپنڈی میں کھیلے گا۔

13. 26 فروری 2025چھٹیوں پر جانے والا جوڑا جسے قطر ایئرویز کی پرواز پر چار گھنٹے لاش کے برابر میں گزارنے پڑے

    

    ،تصویر کا ذریعہGetty Images

    آسٹریلین شہری مچل رنگ اور جینیفر کولن چھٹیاں منانے کی غرض سے وینس جا رہے تھے جب انھیں ایک تکلیف دہ تجربے کا سامنا کرنا پڑا۔

    انھوں نے آسٹریلین نشریاتی ادارے چینل 9 کو بتایا کہ میلبورن سے دوہا جانے والی قطر ایئر ویز کی پرواز کے دوران ان کے برابر والی نشست پر بیٹھی خاتون وفات پا گئیں۔

    اس واقعے کی تفصیلات بتاتے ہوئے مچل رنگ کا کہنا تھا کہ خاتون کے بے ہوش ہوتے ہی جہاز کا عملہ فوراً حرکت میں آیا لیکن وہ ان کی جان نہیں بچا سکا۔

    انھوں نے بتایا کہ عملے نے پہلے خاتون کی لاش کو بزنس کلاس منتقل کرنے کی کوشش کی لیکن خاتون کا جسم کافی بھاری ہونے کے باعث وہ ایسا کرنے میں ناکام رہے۔

    مچل رنگ کا کہنا تھا کہ اس کے بعد عملے نے ان سے درخواست کی کہ کیا وہ اپنے برابر میں موجود خالی نشست پر منتقل ہو سکتے ہیں۔ ’میں نے کہا بالکل، کوئی مسئلہ نہیں۔‘

    آسٹریلین جوڑے نے بتایا کہ جہاز کے عملے نے خاتون کی لاش کو ایک کمبل سے ڈھانپ کر اگلے چار گھنٹوں کے لیے مچل رنگ کے برابر میں رکھ دی۔

    مچل رنگ نے بتایا کہ، ’اس کے بعد عملے نے خاتون کو اس نشست پر لٹا دیا جس پر پہلے میں بیٹھا ہوا تھا۔‘

    دوران پرواز مسافر کی موت ہونے پر پائلٹ کیا کرتا ہے؟

    اگر مسافر طیارے کا پائلٹ وفات پا جائے تو کیا ہوتا ہے؟

    ان کا کہنا ہے کہ جہاز پر کئی نشستیں خالی ہونے کے باوجود عملے نے مچل رنگ کو نشست تبدیل کرنے کی آفر نہیں کی۔

    قطر ایئر ویز کا کہنا ہے کہ وہ مسافروں کو ہونے والی تکلیف کے لیے معذرت خواہ ہیں اور متاثرہ مسافروں سے رابطہ کرنے کی کوشش کی جا رہی ہے۔

    تاہم متاثرہ جوڑے کا دعویٰ ہے کہ ان سے کسی نے رابطہ نہیں کیا ہے۔

    ان کا کہنا تھا کہ ایسے حالات میں جہاز میں سوار مسافروں کی دیکھ بھال کو یقینی بنانے کے لیے ایک پروٹوکول ہونا چاہیے۔

14. 26 فروری 2025صدر ٹرمپ کا 50 لاکھ ڈالر کے عوض امریکی گولڈ کارڈ کے اجرا کا اعلان

    

    ،تصویر کا ذریعہAFP

    امریکہ کے صدر ڈونلڈ ٹرمپ نے کہا ہے کہ ویزا گولڈ کارڈ کے اجرا کا اعلان کرتے ہوئے کہا ہے کہ نئے ویزوں کی فروخت سے امریکہ میں ملازمتوں کے مواقع بڑھیں گے جبکہ اس سے ہونے والی آمدن کو امریکہ کے قومی خسارے کو کم کرنے کے لیے استعمال کیا جائے گا۔

    خبر رساں اداروں روئٹرز اور اے ایف پی کے مطابق ٹرمپ نے اوول آفس میں نامہ نگاروں کو بتایا ہے کہ ’ہم ایک گولڈ کارڈ فروخت کرنے جا رہے ہیں۔ آپ کے پاس گرین کارڈ ہے، مگر یہ ایک گولڈ کارڈ ہے۔ ہم اس کارڈ کی قیمت تقریباً 50 لاکھ ڈالر مقرر کرنے جا رہے ہیں۔‘

    اقتدار سنبھالتے ہی امریکہ میں مقیم لاکھوں غیرقانونی تارکین وطن کی ملک بدری کا اعلان کرنے والے صدر ٹرمپ کا مزید کہنا تھا کہ یہ قیمتی گولڈ کارڈ امریکی شہریت حاصل کرنے کا ایک ذریعہ ہو گا۔

    ٹرمپ نے کہا کہ ’بہت سے لوگ امریکہ میں رہنا چاہتے ہیں۔ گولڈ کارڈ کے حامل افراد یہاں کام کر سکیں گے، کمپنیاں بنا سکیں گے اور لوگوں کو نوکریاں فراہم کر سکیں گے۔ یہ پیسے والے لوگ ہوں گے۔‘

    ٹرمپ نے مزید کہا کہ نئے گولڈ کارڈ کی فروخت آئندہ دو ہفتوں میں شروع کر دی جائے گی۔

    ٹرمپ نے مزید کہا کہ ’ہم شاید دس لاکھ کے قریب گولڈ کارڈ لوگوں کو فروخت کر پائیں گے، ہم نے اس ضمن میں قانونی کارروائی پوری کر لی ہے۔‘

    انھوں نے کہا کہ نئے گولڈ کارڈ کے حصول کے لیے درخواست دینے والے تمام افراد کی احتیاط سے جانچ پڑتال کی جائے گی، مگر جب ان سے پوچھا گیا کہ کیا روس کے امیر افراد بھی گولڈ کارڈ حاصل کرنے کے اہل ہوں گے تو انھوں نے جواب دیا ایسا ممکن ہو سکتا ہے۔ ’ممکن ہے۔ میں چند روسی بااثر کاروباری شخصیات کو جانتا ہوں جو اچھے لوگ ہیں۔ یہ ممکن ہے۔ اگرچہ یہ روسی کاروباری شخصیات اب اتنی دولت مند نہیں رہیں جتنی پہلے ہوتی تھیں۔ مگر میرے خیال میں وہ 50 لاکھ ڈالر ادا کر سکتے ہیں۔‘

    اس موقع پر اوول آفس میں ٹرمپ کے پہلو میں کھڑے امریکی وزیر تجارت ہاورڈ لٹنک نے گولڈ کارڈ کے بارے میں کہا کہ ’ہم اس رقم کو اپنے خسارے کو کم کرنے کے لیے استعمال کر سکتے ہیں۔‘

    اس موقع پر کسی نے سوال کیا کہ ’کیا ہم اسے ٹرمپ گولڈ کارڈ کہہ سکتے ہیں؟‘ اس پر ٹرمپ نے جواب دیا کہ ’اگر ایسا کرنے سے مدد مل سکتی ہے تو کیوں نہیں۔‘

15. 26 فروری 2025عدالتی حکم کے باوجود بشری بی بی سمیت سیاسی رہنماؤں سے ملاقات نہیں کروائی جاتی : عمران خان

    

    ،تصویر کا ذریعہGetty Images

    سابق وزیراعظم اور بانی پی ٹی آئی عمران خان نے دعویٰ کیا ہے کہ بشری بی بی سمیت سیاسی رہنماؤں سے بھی ان کی ملاقات نہیں کروائی جاتی جس کا مقصد ان پر اور اہلیہ پر دباؤ بڑھانا ہے تاہم ’ہم ٹوٹنے والے نہیں ہیں‘۔

    ڈیالہ جیل میں وکلا اور میڈیا سے گفتگو کے دوران عمران خان نے الزام عائد کیا ہے کہ ’اڈیالہ جیل کو ایک کرنل غیر قانونی طور پر کنٹرول کیے ہوئے ہے جو بالکل غیر قانونی ہے۔‘

    یاد رہے کہ عمران کا یہ بیان سماجی رابطے کی ویب سائٹ ایکس پر ان کے آفیشل اکاؤنٹ پر جاری کیا گیا ہے تاہم یہ اکاؤنٹ وہ خود آپریٹ نہیں کرتے۔

    ایکس پر موجود عمران خان کے پیغام کے مطابق ’میری اہلیہ سے میری ملاقات جیل مینول میں اجازت کے باوجود بار بار رکوائی جا رہی ہے۔ یہ تیسری دفعہ ہے کہ میری ملاقات بشری بی بی سے نہیں کروائی گئی۔ عدالت کے احکامات کے باوجود مجھے ملاقات کی اجازت نہیں دی جاتی۔‘

    عمران خان نے کہا کہ ’میری سیاسی لوگوں سے بھی ملاقات نہیں کروائی جاتی، دور دراز سے لوگ مجھ سے ملاقات کے لیے آتے ہیں ان کو گھنٹوں انتظار کرنا پڑتا ہے لیکن ان کو اجازت نہیں دی جاتی۔ میری کتابیں تک روک لی جاتی ہیں۔ یہ سب کچھ کرنے کا مقصد مجھ پر اور میری اہلیہ پر دباؤ بڑھانا ہے لیکن ہم ٹوٹنے والے نہیں ہیں۔‘

    ان کا کہنا تھا کہ انسانی حقوق سے متعلق ہماری پٹیشنز ابھی تک لاہور ہائی کورٹ میں جسٹس باقر نجفی، اسلام آباد ہائی کورٹ اور سپریم کورٹ میں زیر التوا ہیں جن پر اب تک کوئی شنوائی نہیں ہوئی۔

    انھوں نے الزام عائد کیا کہ ’ہمیں ایک جلسہ یا کنونشن تک کرنے کی اجازت نہیں ہے۔ ہم سے ہمارے آئینی حقوق چھینے جا رہے ہیں۔‘

    

    ،تصویر کا ذریعہ@ImranKhanPTI

    محسن نقوی نے کرکٹ کی تباہی کردی ہے: عمران خان

    ایکس پر موجود عمران خان کی پوسٹ میں کرکٹ کے حوالے سے محسن نقوی پر بھی شدید تنقید کی گئی ہے۔

    عمران خان کے مطابق ’پاکستان کو کرکٹ کی وجہ سے بین الاقوامی سطح پر پذیرائی ملتی آئی ہے مگر اب اس شعبے کی بھی منظور نظر افراد کی بھرتیاں کر کے تباہی کر دی گئی ہے۔ محسن نقوی کی ساکھ کیا ہے؟ انھوں نے کرکٹ کی تباہی کر دی ہے۔ ان کے پاس کرکٹ کے حوالے سے کوئی تجربہ نہیں ہے۔‘

    عمران خان کی قید کا ایک برس: ’جیل میں ہونے کے باوجود تحریک انصاف کے بانی پاکستانی سیاست پر غالب‘

    عمران خان، فوج اور کنٹینرز: اقتدار کی جاری جنگ کا پاکستان کے لیے کیا مطلب ہے؟

    انھوں نے کہا کہ ’کسی بھی باؤلر کے لیے بہت ضروری ہوتا ہے کہ وہ ٹیسٹ کرکٹ کھیلتا ہو تاکہ اس میں ہمت موجود ہو مگر یہاں ٹیم میں ایسی سلیکشن کی گئی ہے جس میں کھلاڑیوں نے ایک ٹیسٹ میچ تک نہیں کھیلا۔‘

    عمران خان کے بیان کے مطابق ’میرے مقرر کردہ پارٹی عہدیداران ہی پارٹی پالیسی دینے کے مجاز ہیں- پارٹی ڈسپلن کی بہت اہمیت ہے- میرے بار بار منع کرنے کے باوجود شیر افضل مروت بیانات دینے سے نہیں رکے اسی لیے ان کو پارٹی سے نکالا گیا ہے۔‘

16. 26 فروری 2025اسرائیلی یرغمالیوں، مرنے والوں کی لاشوں اور فلسطینی قیدیوں کے بیک وقت تبادلے پر اتفاق ہو گیا: حماس کا دعویٰ

    

    ،تصویر کا ذریعہEPA

    فلسطین کی مسلح تنظیم حماس نے اعلان کیا ہے کہ اسرائیلی یرغمالیوں اور فلسطینی قیدیوں کی رہائی کے آخری مرحلے میں تاخیر کے مسلئے کے حل پر اتفاق کر لیا گیا ہے جس کے تحت یرغمالیوں اور مرنے والوں کی لاشوں کو بیک وقت اسرائیل کے حوالے کیا جائے گا اور اسی دوران فلسطینی خواتین اور بچوں کی بھی رہائی عمل میں آئے گی۔

    بدھ کی صبح حماس کی جانب سے جاری اس بیان میں قیدیوں اور یرغمالیوں کی رہائی کے وقت کا ذکر نہیں کیا گیا۔

    دوسری جانب حماس کے بیان پر تاحال اسرائیل نے کوئی تبصرہ نہیں کیا ہے۔

    اسرائیلی نشریاتی ادارے کے مطابق امریکہ کے مشرق وسطیٰ کے ایلچی سٹیو وتکوف نے مشرق وسطی کا اپنا دورہ مصروفیات کے باعث فی الحال ملتوی کر دیا ہے اور کہا ہے کہ ’اسرائیل اپنا ایک وفد مصر یا قطر بھیجے گا اور اگر معاملات ٹھیک رہے تو دوسرے مرحلے کے معاہدے کو حتمی شکل دینے کے لیے وہ اتوار کو وہاں کا دورہ کریں گے تاکہ مزید یرغمالیوں کی رہائی یقینی بنائی جا سکے۔‘

    اسرائیلی حکام کے حوالے سے خبر رساں ادارے رائٹرز نے رپورٹ کیا ہے کہ اسرائیل 42 دن کی جنگ بندی میں توسیع پر غور کر رہا ہے تاکہ باقی 63 یرغمالیوں کی بازیابی کو ممکن بنایا جا سکے جبکہ فی الحال غزہ کے مستقبل سے متعلق کسی معاہدے کو مؤخر کیا جا رہا ہے۔

17. 26 فروری 2025اسرائیل کا جنوبی دمشق پر فضائی حملہ، چار افراد ہلاک

    

    ،تصویر کا ذریعہsyriahr

    اسرائیل نے اپنے جنگی طیاروں کی مدد سے رات گئے جنوبی دمشق پر حملہ کیا ہے جس کے نتیجے میں کم از کم چار افراد ہلاک ہو گئے ہیں۔

    اسرائیلی وزیر دفاع نے اسرائیلی فوج کے جنوبی شام پر حملے کی تصدیق کی ہے۔

    بی بی سی عربی کے مطابق منگل کی رات گئے دمشق میں کئی دھماکوں کی آوازیں سنائی دیں، اور کم اونچائی پر اڑنے والے طیاروں کی گونج بھی محسوس کی گئی۔

    بی بی سی عربی نے سیرین آبزرویٹری برائے حقوق انسانی کا حوالے دیتے ہوئے رپورٹ کیا ہے کہ اسرائیلی فضائیہ نے دمشق کے مضافات اور درعا میں رات گئے شامی فوجی ٹھکانوں پر متعدد فضائی حملے کیے جس کے نتیجے میں کم از کم چار افراد ہلاک ہو گئے ہیں۔

    سیرین آبزرویٹری برائے حقوق انسانی کے ڈائریکٹر رامی عبد الرحمن نے ان حملوں کو ’سال کے آغاز سے اب تک کے سب سے شدید حملے‘ قرار دیا ہے۔

    رپورٹ کے مطابق اسرائیلی فوج نے چار فضائی حملے شامی فوج کے فرسٹ ڈویژن ہیڈ کوارٹر پر کیے جہاں فوجی ٹینک بھی موجود تھے۔

    جبکہ درعا کے مضافات میں فوج کے 112ویں بریگیڈ کو نشانہ بنایا گیا اور ان دھماکوں کی آوازیں ازرع کے علاقے تک بھی سنائی دیں۔

    جنوبی شام کو جنوبی لبنان نہیں بننے دیں گے:اسرائیلی وزیر دفاع

    اسرائیلی وزیر دفاع اسرائیل کاٹز نے تصدیق کی کہ اسرائیلی فوج نے جنوبی شام پر حملہ کیا ہے۔

    اسرائیل کاٹز کے ترجمان کے مطابق ’اسرائیلی فضائیہ جنوبی شام میں بھرپور حملے کر رہی ہے جو ہماری جنوبی شام میں امن قائم رکھنے کے لیے نئی پالیسی کا حصہ ہے۔ ہمارا پیغام واضح ہے کہ ہم جنوبی شام کو جنوبی لبنان نہیں بننے دیں گے۔‘

    اسرائیلی فوج نے ایک بیان میں کہا کہ اس نے گزشتہ چند گھنٹوں کے دوران جنوبی شام میں فوجی اہداف کو نشانہ بنایا، جن میں کمانڈ سینٹرز اور متعدد اسلحہ ڈپو شامل ہیں تاہم اس بیان میں فضائی حملوں کے درست مقام کو واضح نہیں کیا گیا۔

    ’محمد زندہ ہیں‘: حزب اللہ کا جنگجو تباہ شدہ گھر کے ملبے تلے سے پانچ ماہ بعد کیسے زندہ برآمد ہوا؟

    پرتعیش ولاز میں چھپے میزائل، دھماکہ خیز کمبل اور خفیہ پروازیں: اسرائیل سے مقابلے کے لیے ایران نے شام کے راستے اسلحہ کیسے بھجوایا؟

    واضح رہے کہ اتوار کے روز اسرائیلی وزیر اعظم بنیامین نیتن یاہو نے جنوبی شام کو مکمل طور پر غیر فوجی علاقہ بنائے جانے کا مطالبہ کیا تھا۔

    انھوں نے اس بات پر زور دیا تھا کہ ’ہم حیات تحریر الشام یا نئی شامی فوج کو دمشق کے جنوب میں داخل ہونے کی اجازت نہیں دیں گے۔‘

    نیتن یاہو نے اتوار کے روز یہ بھی اعلان کیا تھا کہ اسرائیلی افواج غیر معینہ مدت تک جبل الشیخ اور اس کے آس پاس تعینات رہیں گی تاکہ کسی بھی خطرے کا سامنا کیا جا سکے۔

18. 26 فروری 2025شام کی تقسیم کسی صورت قبول نہیں، احمد الشرع

    شام میں عبوری حکومت کے سربراہ احمد الشرع کا کہنا ہے کہ شام کی تقسیم کسی صورت قبول نہیں اور ملک کی طاقت اتحاد میں ہی ہے۔

    وہ منگل کے روز شام کے دارالحکومت دمشق میں شروع ہونے والے نیشنل ڈائیلاگ کانفرنس کے افتتاحی تقریب سے خطاب کر رہے تھے۔

    مقامی اخباروں نے ذرائع کے حوالوں سے بتایا ہے کہ اس کانفرنس میں شام کے مختلف صوبوں سے تعلق رکھنے والے 600 افراد شرکت کر رہے ہیں۔ اس کانفرنس کا مقصد ملک میں آئندہ کے لائحہ عمل کے لیے مختلف گروپوں میں ہم آہنگی پیدا کرنا ہے۔

    تقریر کے دوران، احمد الشرع کا کہنا تھا کہ ’ہتھیاروں پر ریاست کی اجارہ داری عیش و آرام کی چیز نہیں بلکہ ایک فرض ہے۔‘ ان کا کہنا تھا کہ ’شہری امن و امان تمام شامیوں کا فرض ہے۔‘

    احمد الشرع کا مزید کہنا تھا کہ ہر اس شخص کا مقابلہ کرنے کی ضرورت ہے جو شام کی سلامتی اور اتحاد سے چھیڑ چھاڑ کرنا چاہتا ہے۔

    احمد الشرع کے باغی اتحاد کا جہادی ماضی سے لاتعلقی کا دعویٰ لیکن کیا ان پر اعتبار کیا جا سکتا ہے؟

    جہاں اس کانفرنس میں سول سوسائٹی، مختلف فرقوں اور اپوزیشن کے نمائندے شرکت کر رہے ہیں وہیں اس کانفرنس میں شام کے شمال مشرقی حصے پر کنٹرول رکھنے والی خود مختار کرد انتظامیہ اور اس کی عسکری تنظیم سیریئن ڈیموکریٹک فورسز کو مدعو نہیں کیا گیا ہے۔

    کانفرنس کے منتظمین کی جانب سے اعلان کیا گیا تھا کہ شام میں موجود کوئی بھی ایسی عسکری تنظیم جس نے اب تک ہتھیار نہیں ڈالے ہیں انھیں اس ڈائیلاگ میں شامل نہیں کیا جائے گا۔

    کرد انتظامیہ تیل کی دولت سے مالا مال ملک کے شمال مشرق کے ایک بڑے حصے کو کنٹرول کرتی ہے۔

    گذشتہ سال نومبر سے ترکی کے حمایت یافتہ شامی دھڑے شمالی شام میں سیریئن ڈیموکریٹک فورسز کے ٹھکانوں پر حملے کر رہے ہیں تاہم انھیں اب تک کامیابی جاصل نہیں ہوئی ہے۔

19. 26 فروری 2025ایرانی اور روسی وزرائے خارجہ کی ملاقات: جوہری تنازع پر امریکہ سے براہ راست مذاکرات نہیں ہوں گے، عباس عراقچی

    

    ،تصویر کا ذریعہReuters

    ایرانی وزیرِ خارجہ عباس عراقچی نے روسی ہم منصب سرگئی لاروف سے ملاقات کے بعد تہران میں مشترکہ پریس کانفرس سے خطاب کرتے ہوئے کہا ہے کہ ان کا ملک امریکی پابندیوں اور دباؤ کے سامنے نہیں جھکے گا اور نہ ہی امریکہ سے براہ راست مذاکرات کیے جائیں گے۔

    روسی وزیر خارجہ ایران کے ایک روزہ دورہ پر منگل کے روز تہران پہنچے تھے۔

    مشترکہ کانفرنس کے دوران عباس عراقچی کا کہنا تھا، ’جوہری مذاکرات پر ایران کا موقف بالکل واضح ہے۔ ہم دباؤ، دھمکی یا پابندیوں تلے مذاکرات نہیں کریں گے۔‘

    ’لہذا جب تک امریکہ ایران پر ’زیادہ سے زیادہ دباؤ‘ ڈالنے کی اپنی مہم جاری رکھے گا تب تک جوہری معاملے پر ہمارے اور امریکہ کے درمیان براہ راست مذاکرات کا کوئی امکان نہیں۔‘

    خیال رہے کہ دوسری مرتبہ صدر بننے کے بعد ڈونلڈ ٹرمپ نے ایران پر اپنی ’زیادہ سے زیادہ دباؤ‘ مہم کو بحال کرنے کا اعلان کیا تھا جس میں ایرانی تیل کی برآمدات مکمل طور پر روکنا بھی شامل ہے تاکہ ایران پر دباؤ بڑھایا جا سکے۔

    عباس عراقچی کا مزید کہنا تھا کہ ایران روس اور چین کے تعاون سے جوہری معاملے پر اپنے موقف کو مربوط کرے گا۔

    تیل کی ترسیل کا ’خفیہ‘ نیٹ ورک: روس اور ایران کی منافع بخش برآمد پر امریکی پابندی کتنی کامیاب ہوئی؟

    اس موقع پر روسی وزیر خارجہ نے امریکہ کی جانب سے لگائی جانے والی یکطرفہ پابندیوں کی مذمت کرتے ہوئے کہا کہ روس ان پابندیوں کے باعث ایران کو ہونے والے نقصانات کا ازالہ کرنے کی کوشش کرے گا۔

    ایرانی جوہری معاہدے کے متعلق بات کرتے ہوئے سر گئی لاروف کا کہنا تھا کہ اس معاملے کا سفارتی حل اب بھی موجود ہے اور اس مسئلے کے حل کے لیے دھمکی یا طاقت کا سہارا لینے کے بجائے سفارتی ذرائع استعمال کیے جائیں۔

    ’ہم اس کے (سفارتی) حل کے لیے بھرپور کوشش کریں گے‘

    روسی صدر کا بیان ایک ایسے وقت میں سامنے آیا ہے جب ڈونلڈ ٹرمپ کے صدر بننے کے بعد امریکہ اور روس کے درمیان تعلقات بہتر ہوتے نظر آ رہے ہیں۔ یاد رہے کہ رواں ماہ سعودی عرب میں امریکی اور روسی وزارئے خارجہ کی سطح پر وفود کی ملاقات بھی ہوئی ہے۔

20. 26 فروری 2025کوئٹہ اور پسنی میں سیاسی کارکنوں کی مبینہ ٹارگٹ کلنگ اور جبری گمشدگیوں کے خلاف احتجاجی ریلیاں, محمد کاظم، بی بی سی کوئٹہ

    

    بلوچ یکجہتی کمیٹی کے زیر اہتمام بلوچستان میں سیاسی کارکنوں کی مبینہ ٹارگٹ کلنگ اور جبری گمشدگیوں کے واقعات کے خلاف کوئٹہ اور ضلع گوادر کے شہر پسنی میں احتجاجی ریلیاں نکالی گئیں۔

    کوئٹہ شہر میں سہہ پہر کو ریلی کا آغاز سریاب روڈ پر شاہوانی کراس سے ہوا جس میں خواتین بھی شریک تھیں۔

    ریلی کے شرکا قمبرانی روڈ سے ہوتے ہوئے بشیر چوک پہنچے جہاں شرکا سے بلوچ یکجہتی کمیٹی کے رہنماؤں نے خطاب کیا۔

    بلوچ یکجہتی کمیٹی کی سربراہ ڈاکٹر ماہ رنگ بلوچ اور دیگر رہنماؤں نے شرکا سے خطاب کرتے ہوئے دعویٰ کیا کہ ’بلوچستان بالخصوص مکران ڈویژن میں سیاسی کارکنوں کی ٹارگٹ کنلگ اور جبری گمشدگیوں میں اضافہ ہوا ہے۔‘

    مقررین نے دعویٰ کیا کہ ’گذشتہ چند ہفتوں کے دوران ضلع کیچ اور دیگر علاقوں میں متعدد سیاسی کارکنوں کی ٹارگٹ کلنگ کی گئی جس کا مقصد بلوچ سیاسی کارکنوں اور باشعور افراد کو خوفزدہ کرکے انھیں قومی حقوق کے لیے جدوجہد سے باز رکھنا ہے۔‘

    انھوں نے حقوق انسانی کی تنظیموں سے اپیل کی کہ وہ ان واقعات کا نوٹس لیں اور ان کی روک تھام کے لیے اپنا کردار ادا کریں۔

    اُدھر پسنی میں ریلی کا آغاز پریس کلب سے ہوا جس کے شرکا مختلف شاہراہوں سے ہوتے ہوئے شہر کے مرکزی علاقے تک گئے جہاں مقررین نے ان سے خطاب کیا۔

    بلوچ یکحہتی کمیٹی کی جانب سے مبینہ ٹارگٹ کلنگ اور جبری گمشدگیوں کے خلاف 23 فروری سے احتجاجی مظاہروں کا سلسلہ شروع کیا گیا تھا جو کہ 28 فروری تک جاری رہیں گے۔