زیر تعمیر پُلوں پر حملے ایران کو گھٹنے ٹیکنے پر مجبور نہیں کر سکتے: ایرانی وزیر خارجہ کا امریکی صدر کو جواب

لائیو کوریج

1. 31 مار چ 2026خلیجی خطے میں تقریباً ایک ہزار برطانوی فوجی تعینات کر دیے گئے

   برطانوی وزیر دفاع جان ہیلی خلیجی خطے کا دورہ کر رہے ہیں۔ انھوں نے تصدیق کی ہے کہ اب تک تقریباً ایک ہزار برطانوی فوجی اہلکار خطے میں تعینات کیے جا چکے ہیں۔ اس تعداد میں وہ فوجی بھی شامل ہیں جو قبرص میں تعینات ہیں۔

   ہیلی نے خطے میں اتحادیوں کے لیے فضائی دفاع کے اضافی نظام بھیجنے کا اعلان بھی کیا۔

   برطانوی وزیر دفاع کا کہنا تھا کہ ایران خطے میں اپنے حملے ’بڑھا‘ رہا ہے اور انھیں توقع ہے کہ جنگ ’مزید کئی ہفتے‘ جاری رہے گی۔

   قطر کے دارالحکومت دوحہ کا دورہ کرتے ہوئے برطانوی وزیر دفاع نے خلیجی ممالک کو پیغام دیا: ’برطانیہ آپ کے ساتھ کھڑا ہے، برطانیہ کے بہترین اہلکار مشرق وسطیٰ کے آسمانوں کا دفاع کر رہے ہیں۔‘

   جان ہیلی نے مزید بتایا کہ خلیجی ممالک نے ان کے دورے کے دوران آبنائے ہرمز کو کھولنے کی اہمیت پر زور دیا۔

   ان کا کہنا تھا کہ اس اہم بحری راستے کو کھلا رکھنے کے لیے اتحادی مختلف آپشنز پر غور کر رہے ہیں اور اس مقصد کے لیے امریکہ سمیت دیگر ممالک کے تعاون کی ضرورت ہو گی۔

   انھوں نے کوئی ٹائم لائن یا مزید تفصیلات دینے سے گریز کرتے ہوئے کہا کہ تنازع کو کم کرنا ضروری ہے۔

2. 31 مار چ 2026امریکہ اور اسرائیل کے حملوں سے ایران میں ہلاک پاکستانی شہری کی میت پاکستان کے حوالے کر دی گئی, محمد کاظم، کوئٹہ

   امریکہ اور اسرائیل کے حملوں سے ایران میں ہلاک ہونے والے پاکستانی شہری یاسر خان کی لاش بلوچستان کے سرحدی شہر تفتان میں پاکستانی حکام کے حوالے کردی گئی۔

   یاسر خان چند روز قبل ایران کے شہر بندرعباس میں ہونے والے حملے میں ہلاک ہو گئے تھے۔

   چاغی میں انتظامیہ کے ایک سینیئر اہلکار نے تصدیق کی کہ یاسر شاہ کی لاش تفتان میں ایرانی حکام نے پاکستانی حکام کے حوالے کی۔

   اہلکار کا کہنا تھا کہ پاکستانی حکام نے قانونی کارروائی مکمل کر کے لاش ورثاء کے حوالے کر دی۔

3. 31 مار چ 2026آبنائے ہرمز کو مستقل طور پر کھولنے کا سب سے ممکنہ راستہ اب بھی مذاکرات ہی ہے, فرینک گارڈنر، نامہ نگار برائے سکیورٹی امور

   آبنائے ہرمز کے حوالے سے ایک معروف محاورے کا حوالہ دیا جائے تو ’تمام پتے‘ ایران کے ہاتھ میں ہیں۔

   باوجود اس کے کہ ایران کے پاس روایتی بحریہ اب موجود نہیں رہی اور اس کی بحریہ کے سربراہ بھی ہلاک کیے جا چکے ہیں، تاہم ایک چیز ایسی ہے جو ایران سے چھینی نہیں جا سکتی؛ اس کا جغرافیہ۔

   سٹریٹیجک طور پر اس انتہائی اہم سمندری راستے کے ساتھ ایران کا صوبہ ہرمزگان واقع ہے۔ یہ صوبہ مشرق میں خلیجِ عمان سے لے کر مغرب میں عسلویہ تک پھیلا ہوا ہے۔ یہاں اسرائیل نے ایران کی پارس گیس فیلڈ پر حملہ کیا تھا۔

   خلیج کے تمام ممالک میں سب سے طویل ساحل ایران کے پاس ہے۔ اس کے ساتھ قشم، لارک، ہرمز اور ابو موسیٰ سمیت متعدد جزائر موجود ہیں۔

   ایران چاہے تو ان میں سے کسی بھی جزیرے کو ڈرون حملے کرنے، سمندر میں بارودی سرنگیں بچھانے یا بحری جہازوں سے ٹکرا کر پھٹ جانے والی کشتیوں کے حملے کرنے کے لیے استعمال کر سکتا ہے۔

   ماضی میں ہرمزگان اور اس سے ملحقہ جزائر کے اپنے دوروں کے دوران میں نے دیکھا کہ اس سر زمین کی ساخت دفاع کے لیے کس قدر موزوں ہے۔ یہ چٹانی، پہاڑی علاقہ ہے جس میں بے شمار غار، سرنگیں اور قدرتی پناہ گاہیں موجود ہیں۔

   امریکہ ہر ایک میزائل اور ڈرون لانچ سائٹ کو تباہ کر دے، یہاں تک کہ اپنے فوجی بھی اس سر زمین پر اتار کر ’یہ بات یقینی بنا لے کہ کام مکمل ہو گیا ہے،‘ اس کے باوجود ایران اپنے ہتھیاروں کا ذخیرہ دوبارہ بنا لے گا، غالباً چین اور روس کی مدد سے۔

   اسی لیے، آبنائے ہرمز کو مستقل طور پر کھولنے کا سب سے ممکنہ راستہ مذاکرات ہی ہے۔

4. 31 مار چ 2026لبنان میں ہلاکتوں کی تعداد 1268 تک پہنچ گئی: سرکاری میڈیا

   لبنان کے سرکاری خبر رساں ادارے کے مطابق دو مارچ سے اب تک لبنان میں ہونے والی ہلاکتوں کی تعداد 1268 تک پہنچ گئی ہے۔

   ملک کی وزارت صحت کے حوالے سے یہ بھی بتایا گیا ہے کہ اسی مدت میں 3750 افراد زخمی ہوئے۔

   جنگ کے آغاز سے اسرائیل بیروت اور جنوبی لبنان میں مسلسل حملے کر رہا ہے۔ اسرائیل کا دعویٰ ہے کہ وہ حزب اللہ سے منسلک مقامات کو ہدف بناتا ہے، جو کہ ایران کا حمایت یافتہ گروہ ہے۔

   زمینی کارروائی کے آغاز کے بعد سے اسرائیل نے لبنان میں اپنے نو فوجیوں کی ہلاکت کی اطلاع دی ہے۔

5. 31 مار چ 2026گذشتہ 24 گھنٹوں میں تہران کے اندر 230 اہداف کو نشانہ بنایا: اسرائیل کا دعویٰ

   اسرائیلی فوج نے دعویٰ کیا ہے کہ اس نے گذشتہ 24 گھنٹوں کے دوران ایران میں ’حکومت کے‘ 230 اہداف کو نشانہ بنایا ہے۔

   فوج کا کہنا ہے کہ ان حملوں کا ہدف فضائی دفاعی نظام، بیلسٹک میزائل لانچرز اور ہتھیار تیار کرنے کی تنصیبات تھیں۔

6. 31 مار چ 2026مشرق وسطیٰ میں امن کے لیے پاکستان اور چین کے پانچ نکات

   پاکستان کے وزیر خارجہ اسحاق ڈار کی بیجنگ میں اپنے چینی ہم منصب وانگ ژی سے ملاقات کے بعد دفتر خارجہ نے اس کی تفصیلات جاری کی ہیں۔

   پاکستانی دفتر خارجہ کی جانب سے جاری بیان کے مطابق 31 مارچ کو اسحاق ڈار اور وانگ ژی کی ملاقات کے دوران خلیج اور مشرق وسطیٰ کی صورتحال کا جائزہ لیا گیا۔

   دفتر خارجہ کی جانب سے جاری بیان میں کہا گیا ہے خطے میں امن و امان کی بحالی کے لیے دونوں ممالک نے یہ پانچ نکاتی اقدامات تجویز کیے ہیں۔

   • کشیدگی کا فوری خاتمہ کیا جائے اور جنگ سے متاثرہ تمام علاقوں تک انسانی بنیادوں پر امداد کی بلا تعطل رسائی یقینی بنائی جائے۔
   • امن مذاکرات فوری طور پر شروع کیے جائیں کیوں کہ گفت و شنید اور سفارت کاری ہی تنازعات کے حل کا واحد قابل عمل راستہ ہے۔ اس کے ساتھ ساتھ ایران اور خلیج کی ریاستوں کی خود مختاری، علاقائی سالمیت، قومی آزادی اور سکیورٹی یقنی بنائے جائے۔ تمام فریق تنازعات کا پر امن حل تلاش کریں اور مذاکرات کے دوران طاقت کے استعمال یا اس کی دھمکی سے گریز کریں۔
   • شہریوں اور غیر فوجی مقامات کا تحفظ یقینی بنایا جائے۔ توانائی کے مراکز، پانی کو قابل استعمال بنانے والے مراکز اور پر امن مقاصد کے لیے استعمال ہونے والی جوہری تنصیبات پر حملے روکے جائیں۔
   • بحری گزر گاہوں کی حفاظت کی جائے۔ آبنائے ہرمز میں پھنسے ہوئے جہازوں اور عملے کی سلامتی کو یقینی بنایا جائے، سول اور تجارتی مقاصد کے لیے استعمال ہونے والے بحری جہازوں کو محفوظ راستہ دیا جائے اور آبنائے ہرمز میں معمول کی آمد و رفت جلد از جلد بحال کی جائے۔
   • اقوام متحدہ کے تحت جامع امن کے لیے ایک فریم ورک تشکیل دیا جائے۔

7. 31 مار چ 2026ایران ٹرمپ کے ساتھ کسی معاہدے پر راضی نہ ہوا تو ’مزید شدت سے‘ کارروائیاں کریں گے: پیٹ ہیگسیتھ

   امریکی وزیر دفاع پیٹ ہیگسیتھ نے کہا ہے کہ اگر ایران امریکی صدر ٹرمپ کے ساتھ کسی معاہدے پر رضا مند نہ ہوا تو امریکی فوج ’مزید شدت سے‘ کارروائیاں جاری رکھے گی۔

   پینٹاگون میں پریس کانفرنس کے دوران امریکی وزیر دفاع نے کہا کہ ایران میں حکومت تبدیل ہو چکی ہے اور ملک کی نئی قیادت کو چاہیے کہ وہ ’پچھلی قیادت سے زیادہ سمجھ دار‘ ہو۔

   پیٹ ہیگسیتھ کے بعد امریکہ کے جوائنٹ چیفس آف سٹاف ڈین کین نے بھی بریفنگ دی۔ ان کا کہنا تھا کہ امریکی نیوی نے 150 سے زیادہ بحری جہازوں کو تباہ کر دیا ہے اور امریکی بی 52 بمبار طیاروں کے مشن بھی شروع ہو چکے ہیں۔

8. 31 مار چ 2026ایرانی فوج کا مورال ختم ہو رہا ہے: امریکی وزیر دفاع

   امریکی وزیر دفاع پیٹ ہیگسیتھ نے کہا ہے کہ حملے کرنے کے لیے امریکہ کی طاقت بڑھ رہی ہے جبکہ ایران کی کم ہو رہی ہے اور ’صدر ٹرمپ وہ سب کچھ کر رہے ہیں جو کرنے کی کسی دوسرے صدر میں ہمت نہیں تھی۔‘

   پینٹاگون میں پریس کانفرنس کے دوران امریکی وزیر دفاع کا کہنا تھا کہ گذشتہ 24 گھنٹوں میں ایران کی جانب سے داغے جانے والے میزائلوں کی تعداد سب سے کم رہی۔

   انھوں نے کہا کہ ’ایرانی فوج کا مورال ختم ہو رہا ہے جس کی وجہ سے فوجی بھاگ رہے ہیں اور عسکری قیادت میں مایوسی پائی جاتی ہے۔‘

   امریکی وزیر دفاع نے بتایا کہ ہفتے کے آخر میں وہ ان فوجیوں سے ملے جو عسکری کارروائیوں میں حصہ لے رہے ہیں۔

   پیٹ ہیگسیتھ کے مطابق امریکی فوج حوصلے میں ہے، اس کی اپنے مشن پر مکمل توجہ ہے اور وہ کام کو ’جلد‘ ختم کرنا چاہتی ہے۔

9. 31 مار چ 2026آپ نے ہماری مدد نہیں کی، آبنائے ہرمز جا کر اپنا تیل خود لے آئیں: امریکی صدر برطانیہ اور فرانس سے ناراض

   امریکی صدر ڈونلڈ ٹرمپ نے کہا ہے کہ ’برطانیہ جیسے ممالک‘ جو آبنائے ہرمز کی بندش کی وجہ سے جیٹ فیول حاصل نہیں کر پا رہے، انھیں چاہیے کہ ’خود میں ہمت پیدا کریں، آبنائے ہرمز جائیں اور بس تیل لے آئیں۔‘

   انھوں نے یہ تجویز بھی پیش کی کہ ’امریکہ سے تیل خرید لیں کیونکہ ہمارے پاس بہت زیادہ ہے۔‘

   سوشل میڈیا پلیٹ فارم ٹروتھ سوشل پر پوسٹ میں امریکی صدر نے لکھا کہ ملکوں کو ’سیکھنا پڑے گا کہ اپنی خاطر لڑائی کیسے لڑی جاتی ہے۔ امریکہ اب آپ کی مدد کو نہیں آئے گا، بالکل ویسے ہی جیسے آپ ہمارے لیے نہیں آئے تھے۔‘

   ٹرمپ کے مخاطب وہ ممالک تھے جنھوں نے ایران کے خلاف کی جانے والی امریکی کارروائی میں حصہ لینے سے انکار کیا۔

   امریکی صدر کی پوسٹ میں مزید کہا گیا: ’ایران بنیادی طور پر تباہ ہو چکا ہے، یہ مشکل کام اب ختم ہو گیا ہے۔‘

   پوسٹ کا اختتام ان الفاظ پر ہوا: ’جا کر اپنا تیل خود لے آئیں!‘

   ٹروتھ سوشل کی ایک اور پوسٹ میں امریکی صدر نے فرانس کے خلاف بھی اپنی ناراضی کا اظہار کیا۔

   انھوں نے لکھا: ’فرانس نے اسرائیل کے لیے عسکری سامان لے جانے والے طیاروں کو اپنی فضائی حدود سے گزرنے کی اجازت نہیں دی۔‘

   ٹرمپ نے ایرانی رہبرِ اعلیٰ کی ہلاکت میں کردار ادا نہ کرنے پر بھی فرانس سے شکوہ کیا اور لکھا: ’فرانس بہت غیر مدد گار رہا، امریکہ یہ بات یاد رکھے گا۔‘

10. 31 مار چ 2026پاکستان، مصر، ترکی اور سعودی عرب کے درمیان ایران پر مذاکرات ’دفاعی اتحاد‘ کے ایجنڈے کی طرف اشارہ کرتے ہیں: ترک میڈیا, بی بی سی مانیٹرنگ

    ترکی میں حکومت کے حامی اخبار ترکیہ نے کہا ہے کہ اسلام آباد میں ایران جنگ پر ہونے والی حالیہ بات چیت سے اس بات کا اشارہ ملتا ہے کہ ترکی، پاکستان، سعودی عرب اور مصر ایک ’دفاعی اتحاد‘ بنانے جا رہے ہیں۔

    31 مارچ کی اپنی رپورٹ میں اخبار نے کہا کہ چار ممالک کے نمائندوں کے اجلاس کا محور ایران کی جنگ، اس کے اثرات اور ممالک کے درمیان ممکنہ عسکری ہم آہنگی تھا۔

    رپورٹ نے ایک نا معلوم ترک اہلکار کے حوالے سے کہا: ’امریکہ اور یورپ کی اسلامی دنیا اور مشرق وسطیٰ میں سٹریٹجک پوزیشننگ، جس کا واحد مقصد اسرائیل کی حفاظت ہے، عالمی استحکام کے لیے خطرہ بن چکی ہے۔ حالیہ اجلاس میں سکیورٹی اور استحکام کے نئے تصورات کی ضرورت پر زور دیا گیا۔‘

    رپورٹ کے مطابق اسلام آباد میں کئی اصولی فیصلے کیے گئے اور اس بات پر اتفاق ہوا کہ اگلا اجلاس ترکی میں ہوگا، تاہم مزید تفصیل نہیں بتائی گئی۔

    تجزیہ کار احمت خان کے حوالے سے کہا گیا کہ ترکی اور پاکستان کے اتحاد میں مصر اور سعودی عرب کی شمولیت سے پیغام ملتا ہے کہ اسلامی دنیا کے فیصلے ’اب ہم خود کریں گے۔‘

    رپورٹ میں مزید کہا گیا کہ: ’چار مسلم ممالک کے درمیان قائم ہونے والا 'دفاعی اتحاد' اتحادیوں کے لیے اعتماد کا باعث ہے جبکہ اسرائیلی میڈیا نے اس پیشرفت کو ’اسرائیل کے لیے انتہائی خطرناک‘ قرار دیا ہے۔‘

    اسرائیلی اخبار یروشلم پوسٹ کے ایک تجزیے کا حوالہ دیتے ہوئے رپورٹ میں کہا گیا: ’ایران کمزور ہوا ہے، ترکی مضبوط ہوا ہے۔ پاکستان سمٹ اس بات کی بھی نشاندہی کرتی ہے کہ علاقائی مسلم قیادت کے لیے ترکی اب بھی سب سے مضبوط امیدوار ہے۔ بلا شبہ ترک عوام کی نظر میں اسرائیل کو ایک رکاوٹ کے طور پر دیکھا جاتا ہے۔‘

    ترکی کے میڈیا میں وقتاً فوقتاً مسلم اکثریتی ممالک کے درمیان نیٹو طرز کا ایک اتحاد بنانے کا خیال پیش کیا جاتا رہا ہے تاکہ خطے کے سکیورٹی مسائل حل کیے جا سکیں۔

    رپورٹ کے مصنف یلماز بلگن علاقائی معاملات پر عموماً سخت گیر ترک قوم پرست مؤقف رکھتے ہیں۔ اگرچہ وہ شام کی زمینی صورتحال پر رپورٹس بھی دیتے رہے ہیں لیکن ان کی رپورٹنگ میں اکثر غیر مصدقہ معلومات بھی شامل ہوتی ہیں۔

11. 31 مار چ 2026امریکہ اور اسرائیل کی ایران کے خلاف جنگ: سعودی ولی عہد کی قطر اور اردن کے رہنماؤں سے ملاقات, بی بی سی مانیٹرنگ

    سعودی عرب کے سرکاری خبر رساں ادارے ایس پی اے کے مطابق سعودی ولی عہد نے 30 مارچ کو جدہ میں قطر کے امیر اور اردن کے بادشاہ سے ایران کے خلاف جاری جنگ پر گفتگو کی۔

    ایس پی اے کے مطابق تینوں رہنماؤں نے خبردار کیا کہ خلیجی ریاستوں اور اردن پر ایران کے مسلسل حملے کشیدگی میں ’خطرناک حد تک اضافہ‘ کر رہے ہیں۔

    انھوں نے تہران کی جانب سے شہریوں اور اہم تنصیبات پر حملوں کی مذمت کی اور خبردار کیا کہ اس سے خطے میں مزید عدم استحکام پیدا ہو سکتا ہے۔

    ایس پی اے کے مطابق رہنماؤں نے بین الاقوامی بحری گزرگاہوں کی آزادی، توانائی کی فراہمی اور عالمی معیشت کو لاحق خطرات پر بھی گفتگو کی۔

    یہ سربراہی اجلاس ایسے وقت میں ہوا جب ایران خلیجی ممالک میں اہداف پر مسلسل میزائل اور ڈرون برسا رہا ہے۔

    30 مارچ کو سعودی وزارت دفاع نے کہا کہ اس کی فورسز نے پانچ بیلسٹک میزائلوں اور کم از کم سات ڈرونز کو روکا۔

    گذشتہ ہفتے سعودی حکام نے ان رپورٹس کی تردید کی تھی کہ ریاض ایران کے ساتھ جنگ کو طول دینا چاہتا ہے اور کہا تھا کہ سعودی عرب کشیدگی کم کرنے کا حامی ہے۔

    28 مارچ کو یمن کی ایران نواز حوثی تحریک بھی اس تنازع میں شامل ہو گئی، جس سے بحیرہ احمر کے راستے ہونے والی بحری تجارت میں بھی خلل پیدا ہونے اور توانائی کی عالمی فراہمی کو مزید خطرات لاحق ہونے کے خدشات بڑھ گئے ہیں۔

12. 31 مار چ 2026امریکہ اور اسرائیل کی ایران کے خلاف جنگ سے خطے میں ہونے والی ہلاکتوں کی تفصیل

    28 فروری کو امریکہ اور اسرائیل کی ایران کے خلاف جنگ شروع ہونے کے بعد سے خطے میں ہلاکتوں کی تعداد مسلسل بڑھ رہی ہے۔

    ایران: امریکہ میں قائم تنظیم ہیومن رائٹس ایکٹوسٹس اِن ایران کے مطابق جنگ کے آغاز سے اب تک تین ہزار 492 افراد ہلاک ہو چکے ہیں۔ ان میں کم از کم 236 بچوں سمیت 1574 عام شہری شامل ہیں۔

    اسرائیل: اسرائیل کی ایمبولینس سروس ماگن ڈیوڈ ایڈوم (ایم ڈی اے) کے مطابق جنگ کے آغاز سے اب تک میزائل حملوں سے 19 افراد ہلاک ہو چکے ہیں۔

    اسرائیلی فوج کے مطابق نو اسرائیلی فوجی لبنان میں ہلاک ہوئے ہیں۔

    لبنان: لبنان کی وزارت صحت کا کہنا ہے کہ اب تک 124 بچوں سمیت 1247 افراد ہلاک ہوئے ہیں۔

    خلیج: اب تک خلیجی خطے میں کم از کم 24 افراد ہلاک ہوئے ہیں، جن میں زیادہ تر سکیورٹی اہلکار یا غیر ملکی کارکن شامل ہیں۔

    متحدہ عرب امارات نے 11، کویت نے سات جبکہ عمان، سعودی عرب اور بحرین نے دو، دو ہلاکتوں کی اطلاع دی ہے۔

13. 31 مار چ 2026دبئی میں نشانہ بننے والے آئل ٹینکر کو آگ لگنے سے نقصان

    دبئی میں لنگر انداز ایک آئل ٹینکر پر مبینہ حملے کے بعد اب اس کی تصاویر سامنے آ گئی ہیں۔

    کویتی پرچم بردار آئل ٹینکر السامی 20 لاکھ بیرل تیل لے کر چین کی جانب جا رہا تھا جب حملے کے بعد اس میں آگ بھڑک اٹھی۔

    دبئی میڈیا آفس کے مطابق کسی کے زخمی ہونے کی اطلاع نہیں ملی اور نہ ہی تیل کا اخراج ہوا۔

14. 31 مار چ 2026سعودی عرب اور متحدہ عرب امارات پر حملے جاری، متعدد افراد زخمی

    خلیجی ممالک میں رات بھر ہونے والے حملوں کے بعد متعدد افراد کے زخمی ہونے کی اطلاعات ہیں۔

    میڈیا آفس کے مطابق دبئی میں حملے روکے جانے کے نتیجے میں شہر کے جنوبی حصے کے رہائشی مکانات پر ملبہ گرا، جس سے چار ایشیائی افراد زخمی ہوئے۔

    اس سے پہلے صبح دھماکے رپورٹ کیے گئے اور لوگوں کو پناہ لینے کی ہدایت کی گئی۔

    جنرل ڈائریکٹوریٹ آف سعودی سول ڈیفنس کے مطابق، سعودی عرب کے علاقے الخرج میں ڈرون کے ٹکڑے گرنے سے دو افراد زخمی ہوئے جبکہ متعدد گاڑیوں اور تین گھروں کو نقصان پہنچا۔

15. 31 مار چ 2026ٹرمپ کے بیانات تیل کی قیمتوں کو کیسے اوپر نیچے کر رہے ہیں؟, جیما کریئو، ٹومی لیمبیئانڈ اور نیٹلی شرمین

    امریکہ اور اسرائیل کے ایران پر حملوں کے ایک ماہ بعد بھی یہ سمجھنا مشکل ہے کہ صدر ڈونلڈ ٹرمپ کو کس بنیاد پر جنگ سے متعلق فیصلے کر رہے ہیں۔ تاہم یہ واضح ہے کہ اُن کی نظر تیل کی منڈی پر ضرور ہے۔

    جنگ کے آغاز کے بعد ابتدائی دنوں میں امریکی صدر کے ایک بیان یا سوشل میڈیا پوسٹ کے بعد تیل کی قیمتوں میں بڑی تبدیلی آتی تھی کیونکہ سرمایہ کار اُن کی سوشل میڈیا پوسٹس سے اس بات کے اشارے تلاش کرتے تھے کہ آیا مستقبل قریب میں تنازع بڑھ سکتا ہے یا ختم ہو سکتا ہے۔ لیکن حالیہ دنوں میں سرمایہ کاروں نے اُن کے بیانات کی ساکھ پر بھی شکوک و شبہات ظاہر کرنا شروع کر دیے ہیں۔

    28 فروری (ایران پر حملے کا دن) سے پہلے تیل کی قیمت تقریباً 72 ڈالر فی بیرل تھی۔ نو مارچ کو یہ قیمت 119.50 ڈالر فی بیرل تک جا پہنچی اور منگل (آج) کے روز یہ 113 ڈالر سے کچھ کم ہے۔

    گذشتہ ایک ماہ کے دوران ٹرمپ اور تیل کی عالمی منڈی کے درمیان کئی مواقع پر ردعمل دیکھنے کو ملا:

    • 9 مارچ: ٹرمپ نے امید دلائی کہ جنگ طویل نہیں ہو گی، چنانچہ ان کے اس بیان کے بعد تیل کی قیمت90 ڈالر فی بیرل سے نیچے آ گیا
    • 13-16 مارچ: ٹرمپ کے ایران سے متعلق متعلق بیانات کا کوئی فوری اثر نہیں ہوا
    • 20 مارچ: ٹرمپ نے ٹروتھ سوشل پر اشارہ دیا کہ جنگ اختتام کے قریب ہے
    • 23 مارچ: ٹرمپ کے مثبت دعووں کے چند منٹ بعد ہی تیل کی قیمت 13 فیصد گر گئی
    • 25-27 مارچ: امن مذاکرات مشکوک ہونے پر تیل کی قیمتیں دوبارہ بڑھنے لگیں

    ماہرین کے مطابق عالمی سطح پر انرجی کی قیمتیں وسیع تر جغرافیائی اور معاشی خطرات کی علامت بن گئی ہیں۔ کوئلٹر شیویٹ کے انویسٹمنٹ مینیجر جوناتھن ریمونڈ کہتے ہیں کہ جب ٹرمپ کی زبان جارحانہ ہوتی ہے تو قیمتیں بڑھتی ہیں اور جب وہ نرم لہجہ اختیار کرتے ہیں تو قیمتیں کم ہو جاتی ہیں۔

    ان کا کہنا ہے کہ سرمایہ کار حقیقی غیر یقینی صورتحال کو قیمت میں شامل کرنے کی کوشش کر رہے ہیں۔ ’مارکیٹ بظاہر غیر مستحکم یا الجھی ہوئی لگتی ہے، لیکن اصل میں وہ حقیقی وقت میں خطرات کو سنبھال رہی ہے، اور تیل اس کے مرکز میں ہے۔‘

    بہنسن گروپ کے برائن سزیٹل کے مطابق بعض اوقات ٹرمپ کے بیانات پالیسی کے بجائے تیل کی قیمتوں کو متاثر کرنے کے لیے ہوتے ہیں۔ ’جیسا کہ کہا جاتا ہے، جنگ کا پہلا شکار سچائی ہوتی ہے۔ میرا خیال ہے کہ مذاکرات کے بارے میں مثبت یا منفی بیانات زیادہ تر تیل کی قیمت کو اوپر نیچے کرنے کے لیے ہیں۔‘

    جمعرات کو، جب امریکی سٹاک مارکیٹ نے ایران جنگ کے آغاز کے بعد سب سے بڑی گراوٹ دیکھی، تو ٹرمپ نے کہا کہ ایران کے ساتھ مذاکرات ’بہت اچھے‘ جا رہے ہیں اور انھوں نے ایران کی توانائی کے ڈھانچے پر حملے چھ اپریل تک مؤخر کر دیے ہیں۔ لیکن اس اعلان کے باوجود تیل کی قیمت پھر بھی بڑھتی رہیں۔

    ریبو بینک کی جین فولی کے مطابق جنگ کے طوالت کے ساتھ ساتھ مارکیٹ کا ردعمل ’زیادہ محتاط‘ ہوتا جا رہا ہے کیونکہ ٹرمپ کی یقین دہانیوں اور ایران کی خاموشی کے درمیان ’بڑا خلا‘ موجود ہے۔ ’بہت سے سرمایہ کار تنازع کے جلد خاتمے کو نہیں دیکھ پا رہے ہیں اور مارکیٹ اور سرمایہ کار بدستور پریشان ہے۔‘

    اے جے بیل کے رس مولڈ کا کہنا ہے کہ مارکیٹ ٹرمپ کے اس رویے کی عادی ہو گئی ہے کہ وہ سیاسی یا معاشی دباؤ کے وقت اکثر اپنی حکمتِ عملی بدل لیتے ہیں۔ ’اب شکوک و شبہات، بلکہ کھلی بدگمانی بھی بڑھتی جا رہی ہے۔‘

16. 31 مار چ 2026آبنائے ہرمز پر ایران کا کنٹرول برقرار ہے: سابق امریکی نیول کمانڈر

    سابق امریکی نیول کمانڈر ٹام شارپ کا کہنا ہے کہ وہ نہیں سمجھتے کہ آبنائے ہرمز، جو دنیا کے سب سے مصروف آبی گُزر گاہ ہے کو طاقت کے ذریعے کھولا جا سکتا ہے جیسا کہ امریکہ دھمکی دے رہا ہے۔

    شارپ نے بی بی سی ریڈیو فور کے پروگرام ’ٹوڈے‘ سے بات کرتے ہوئے کہا کہ ’جب تک ایران ان کشتیوں پر حملے بند کرنے پر رضامند نہیں ہوتا جو اس راستے سے گزر رہی ہیں، طاقت استعمال کرنا ’ممکنہ طور پر کامیاب‘ ثابت نہیں ہوگا۔‘

    انھوں نے مزید کہا کہ ’ایران کے پاس اس صورتحال کا کنٹرول ہے یہ بات واضح ہے اور میرا خیال ہے کہ وہ آگے بھی ایسا ہی کرتے رہیں گے اور یہ ان کے مفاد میں نہیں کہ وہ اسے سے پیچھے ہٹ جائیں۔‘

    شارپ نے یہ بھی کہا کہ سب کچھ ایران پر منحصر ہے کہ وہ اگلے چند ہفتوں یا مہینوں میں کیا فیصلہ کرتا ہے۔

17. 31 مار چ 2026برطانوی وزیر اعظم کی زیر صدارت ’جنگ کے معاشی اثرات‘ پر ہنگامی اجلاس آج ہوگا

    برطانوی وزیرِاعظم کیئر سٹارمر آج مشرقِ وسطیٰ کی جنگ کے معاشی اثرات پر غور کے حوالے سے کوبرا اجلاس کی صدارت کریں۔

    وزیرِاعظم نے پیر کے روز کہا کہ اس اجلاس میں ’اس بات کو یقینی بنانے پر توجہ دی جائے گی کہ جو کچھ بھی ضروری ہے وہ اپنی جگہ موجود ہو اور ہر چیز کی مناسب نگرانی اور جانچ پڑتال ہو۔‘

    یہ اجلاس اس ملاقات کے بعد ہو رہا ہے جس میں انھوں نے گزشتہ روز ڈاؤننگ سٹریٹ میں توانائی، شپنگ اور بینکاری کے شعبوں کے سربراہان سے ایران کی جانب سے آبنائے ہرمز کی جاری ناکہ بندی پر بات چیت کی۔

    سٹارمر نے کاروباری رہنماؤں سے کہا کہ جنگ کے اثرات سے نمٹنے کے لیے یہ ایک ’مشترکہ کوشش‘ ہونی چاہیے، کیونکہ حکومت ’اکیلے یہ کام نہیں کر سکتی۔‘

    کوبرا ایک ایسا فورم ہے جہاں سینئر برطانوی وزراء اور حکام دارالحکومت میں جمع ہو کر کسی بحران کے دوران ہنگامی اقدامات اور فیصلے کرتے ہیں۔

    صحافیوں کو اس اجلاس میں شرکت کی اجازت نہیں ہوتی، تاہم جیسے ہی اس اجلاس کے حوالے سے معلامات میسر ہوں گی بی بی سی اپنے سامعین اور قارعین تک انھیں لے کر آئے گا۔

18. 31 مار چ 2026دبئی میں نشانہ بننے والا کویتی آئل ٹینکر 20 لاکھ بیرل تیل چین لے جا رہا تھا, جوشوا چیتھم، بی بی سی ویریفائی

    میری ٹائم انٹیلیجنس کمپنی وینگارڈ کے مطابق رات کے دوران کویت کے پرچم بردار ٹینکر ’السلمی‘ کو متحدہ عرب امارات کے ساحل کے قریب ایک ’نامعلوم پروجیکٹائل‘ نے نشانہ بنایا۔

    کمپنی کا کہنا ہے کہ جہاز میں لگی آگ پر قابو پا لیا گیا ہے، تمام عملہ محفوظ ہے اور جہاز سے تیل کے رساؤ کی بھی اطلاعات نہیں ہیں۔

    دبئی حکام نے بھی ان تفصیلات کی تصدیق کی ہے تاہم روایت کے مطابق انھوں نے جہاز کا نام ظاہر نہیں کیا۔

    سنہ2011 میں تیار ہونے والا ’السلمی‘ سرکاری ملکیت والی کویت آئل ٹینکر کمپنی کی ملکیت میں ہے۔ اس حوالے سے کمپنی سے رابطہ بھی کیا گیا ہے۔

    ایک اور میری ٹائم انٹیلیجنس فرم ’ٹینکر ٹریکرز ڈاٹ کام‘ کے مطابق جہاز پر تقریباً 12 لاکھ بیرل سعودی خام تیل اور آٹھ لاکھ بیرل کویتی خام تیل موجود ہے اور گزشتہ ماہ اس پر یہ تیل لادا گیا تھا۔

    میرین ٹریفک کے دستیاب ڈیٹا کے مطابق یہ ٹینکر چین کے شہر چنگ ڈاؤ کی جانب جا رہا تھا جس وقت اس پر حملہ ہوا۔

19. 31 مار چ 2026اسرائیلی فوج کا لبنان کے علاقے بقاع میں کئی دیہات خالی کرنے کا حکم

    اسرائیلی فوج نے آج صبح جنوبی لبنان کے اُن دیہات کے رہائشیوں کو ایک نیا انتباہ جاری کیا جو دریائے الزہرانی کے جنوب میں واقع ہیں اور انھیں دریا کے شمالی علاقوں کی طرف منتقل ہونے کی ہدایت کی ہے۔

    اس سے قبل اسرائیلی فوج کے ترجمان آویخائے ادرعی مارچ کے وسط میں بھی اسی نوعیت کے انتباہ جاری کر چکے ہیں۔

    دریائے لیتانی اور الزہرانی کے درمیان علاقوں کو خالی کرنے کے حکم کے بعد، میڈیا رپورٹس کے مطابق اب تک جنوبی لبنان کے کم از کم 10 فیصد رقبے کو خالی کرنے کے لیے کہا جا چکا ہے۔

    اسرائیلی فوج نے رات کے وقت بقاع الغربی کے مزید چھ دیہات زلایا، لبایا، یحمر، سحمر، قلایا اور دلافی کو خالی کرنے کی وارنگ بھی جاری کی، جس کے باعث ان دیہات کے مکین بارش میں رات کے وقت نقل مکانی پر مجبور ہوئے۔

20. 31 مار چ 2026بریکنگ, دبئی میں دھماکوں کی آوازیں، شہریوں کو محفوظ مقامات پر منتقل ہونے کی ہدایت

    بی بی سی کی دبئی میں موجود نامہ نگار لورنا گورڈن کے مطابق گزشتہ چند منٹوں میں دبئی میں متعدد دھماکوں کی آوازیں سنی گئی ہیں۔

    انھوں نے بتایا کہ دبئی میں حکام کا کہنا ہے کہ ان کا فضائی دفاعی نظام اس وقت میزائل حملوں کا جواب دے رہا ہے۔

    نامہ نگار لورنا گورڈن نے کہا کہ حملے کے آغاز پر ہمیں اور دبئی میں موجود تمام افراد کو فونز پر سرکاری الرٹس موصول ہوئے، جن میں ہدایت دی گئی کہ محفوظ مقامات پر منتقل ہو جائیں اور وہیں رہیں۔

    یہ الرٹس جو دیگر خلیجی ممالک میں بھی بھیجے جاتے ہیں عموماً دن کے مقابلے میں رات کے وقت زیادہ آتے ہیں۔ متحدہ عرب امارات کے حکام کا کہنا ہے کہ زیادہ تر حملوں کو کامیابی سے ناکام بنا دیا جاتا ہے۔