لائیو, امریکہ یا تو ایران کے ساتھ معاہدہ کرے گا یا پھر ’کام تمام کر دے گا‘: صدر ٹرمپ

لائیو کوریج

1. ایک گھنٹہ قبلبلوچستان کے وزیر برائے پبلک ہیلتھ انجینیئرنگ سردار عبدالرحمان کھیتران عہدے سے برطرف

   

   ،تصویر کا ذریعہAPP

   پاکستان کے صوبہ بلوچستان کے گورنر شیخ جعفر خان مندوخیل نے صوبائی وزیر سردار عبدالرحمان کھیتران کو ان کے عہدے سے ہٹا دیا۔

   گورنر مندوخیل نے وزیر اعلی بلوچستان سرفراز بگٹی کے مشورے پر عبدالرحمان کھیتران کی وزارت سے برطرفی کا نوٹیفیکیشن جاری کیا ہے۔

   کھیتران کا تعلق مسلم لیگ ن سے ہے اور برطرفی سے قبل وہ پبلک ہیلتھ انجینیئرنگ اور واسا کے وزیر تھے۔

   اگرچہ سردار عبدالرحمان کھیتران کو وزارت سے ہٹانے کی کوئی وجہ سامنے نہیں آئی تاہم انھوں نے کوہ سلیمان کے نام سے نئے ڈویژن بنانے کے وزیر اعلیٰ بلوچستان کے فیصلے کی اعلانیہ مخالفت کی تھی اور وزیر اعلیٰ کو اس پر تنقید کا نشانہ بنایا تھا۔

   سردار عبدالرحمان کھیتران آج کل یورپ کے دورے پر ہیں اور انھوں نے واپسی تک وزارت سے برطرفی کے فیصلے پر تبصرہ کرنے سے گریز کیا ہے۔

2. ایک گھنٹہ قبلانسانی سمگلنگ کے خلاف عالمی کریک ڈاؤن، ایک ہزار سے زائد ملزمان گرفتار

   

   ،تصویر کا ذریعہInterpol

   انسانی سمگلنگ کے خلاف 59 ممالک میں ہونے والے ایک عالمی کریک ڈاؤن کے دوران ایک ہزار سے زائد ملزمان کو گرفتار کیا گیا ہے۔

   انٹرپول کی زیرِ نگرانی ہونے والے آپریشن گلوبل چین میں اہلکاروں نے جنسی استحصال، جبری مشقت، مجرمانہ سرگرمیوں اور زبردستی بھیک منگوانے کے لیے کی جانے والی انسانی سمگلنگ کو ہدف بنایا۔

   حکام کے مطابق اس کارروائی کے دوران کمبوڈیا میں افراد کو آن لائن فراڈ کی سکیموں میں شامل کرنے کے لیے سمگل کرنے والے ایک نیٹ ورک اور یورپ میں سوشل میڈیا کے ذریعے بھرتی کی جانے والی کم عمر لڑکیوں کو جسم فروشی کے کاروبار پر مجبور کرنے والے ایک نیٹ ورک کا خاتمہ کیا گیا۔

   مجموعی طور پر 2,070 متاثرین یا ممکنہ متاثرین کی نشاندہی کی گئی جن میں sy اکثریت خواتین کی تھی۔ گرفتار ہونے والوں میں 334 افراد کو انسانی سمگلنگ اور 690 کو اس سے منسلک جرائم کے الزام میں گرفتار کیا گیا۔

   انٹرپول، جس نے یورپی یونین کی قانون نافذ کرنے والے اداروں کے درمیان تعاون کی ایجنسی یوروپول اور یورپی سرحدی ایجنسی فرنٹیکس کے ساتھ مل کر یہ کارروائی انجام دی ہے، نے کہا کہ آپریشن کے نتائج سے انسانی سمگلنگ کے بدلتے ہوئے راستوں اور طریقۂ کار کا پتا چلا ہے۔

3. 3 گھنٹے قبلعلی خامنہ ای اور اہلِ خانہ کے تابوت قم روانہ کر دیے گئے

   ایران کے سابق رہبرِ اعلیٰ علی خامنہ ای کی آخری رسومات کے انتظامات کرنے والے ادارے کے سربراہ حسن حسن زادہ کا کہنا ہے کہ تہران میں ہونے والا جلوس شیڈول کے مطابق ختم ہو گیا تھا جس کے بعد تابوتوں کو قم شہر بھجوا دیا گیا۔

   آج علی الصبح علی خامنہ اور ان کے بعض اہلِ خانہ کے تابوت، جو تقریباً چار ماہ قبل ان کے ہمراہ امریکی اور اسرائیلی حملوں میں ہلاک ہوئے تھے، تہران کے مصلیٰ سے ایک ٹرالر پر روانہ کیے گئے تھے۔ اس جلوس نے آزادی سکوائر تک 10 کلومیٹر طویل راستہ طے کیا تھا جس میں کئی گھنٹے لگے۔

4. 4 گھنٹے قبلامریکہ یا تو ایران کے ساتھ معاہدہ کرے گا یا پھر ’کام تمام کر دے گا‘: صدر ٹرمپ

   

   ،تصویر کا ذریعہGetty Images

   امریکی صدر ڈونلڈ ٹرمپ نے کہا ہے کہ امریکہ یا تو ایران کے ساتھ ایک معاہدہ کرے گا یا پھر ’کام تمام کر دے گا۔‘

   ایک ٹیلی وژن انٹرویو میں گفتگو کرتے ہوئے صدر ٹرمپ نے ایک بار پھر دعویٰ کیا کہ امریکہ نے ایرانی بحریہ کے جہازوں اور ایرانی فضائیہ کے تمام طیاروں کو تباہ کر دیا تھا۔

   ان کے بقول ’بالآخر انھیں (ایران) احساس ہو گیا کہ اب ان کے پاس کوئی ریڈار نہیں رہا، کیونکہ اُن کے ریڈار سسٹمز تباہ کر دیے گئے تھے۔‘

   ڈونلڈ ٹرمپ نے مزید کہا کہ ’ہماری طاقتور بحریہ نے ایسی بڑی ناکہ بندی نافذ کی جو کسی نے پہلے کبھی نہیں دیکھی تھی، اور دو ماہ تک ایک بھی جہاز اس ناکہ بندی کو عبور نہیں کر سکا۔ پھر ہم ممکنہ طور پر ایک معاہدے کے قریب پہنچ گئے، اس لیے ہم نے ناکہ بندی میں نرمی کر دی۔ مجھے نہیں معلوم، شاید ہم کسی معاہدے تک پہنچ جائیں۔‘

   صدر ٹرمپ نے اصرار کیا کہ’ہم ہر صورت میں کامیاب ہوں گے۔ یا تو ہم معاہدہ کر لیں گے یا پھر ہم یہ کام مکمل کر دیں گے۔‘

   انھوں نے کہا کہ ایران کے خلاف فیصلہ کن کارروائی کرنا مشکل نہیں ہو گا۔ ’اسے ختم کرنا مشکل نہیں ہو گا۔ البتہ میں ایک معاہدے کو ترجیح دوں گا، کیونکہ میں نہیں چاہتا کہ 9 کروڑ 10 لاکھ لوگ متاثر ہوں۔‘

   انھوں نے مزید کہا کہ ’ہم ایک گھنٹے کے اندر اُن کے پل تباہ کر سکتے ہیں۔ ہم ان کا بجلی کا نظام ناکارہ بنا سکتے ہیں۔ وہ تمام بڑے، خوبصورت اور جدید بجلی گھر جو انھوں نے تعمیر کیے ہیں۔ ان کے پاس بہت پیسہ تھا، لیکن اب ان کے پاس کوئی پیسہ نہیں ہے۔ ہم نے انھیں کوئی رقم نہیں دی، لیکن ہم ان کی بجلی اور ان کے پاور پلانٹس کو تباہ کر سکتے ہیں۔‘

   چند روز قبل صدر ٹرمپ نے کہا تھا کہ انھوں نے ایران کو اس کے سابق رہنما (علی خامنہ ای) کی تدفین کے لیے ایک ہفتے کا وقت دے رکھا ہے۔

5. 4 گھنٹے قبلاسرائیلی وزیراعظم کا امریکہ سے ترکی کو ایف-35 طیارے اور جنگی طیاروں کے انجن فروخت نہ کرنے کا مطالبہ

   

   ،تصویر کا ذریعہGetty Images

   اسرائیل کے وزیراعظم نیتن یاہو نے امریکہ پر زور دیا ہے کہ وہ ترکی کو ایف-35 جنگی طیارے اور اُن کے پرزے فروخت نہ کرے کیونکہ، اُن کے بقول، یہ اقدام خطے میں ’طاقت کے توازن‘ کو متاثر کرے گا۔

   یاد رہے کہ امریکی صدر ڈونلڈ ٹرمپ آئندہ آنے والے دنوں میں نیٹو اجلاس میں شرکت کے لیے ترکی جائیں گے۔

   مبصرین کے مطابق ترکی صدر ٹرمپ کے اس دورے کو ایف-35 پروگرام سے متعلق اپنے منصوبے کو آگے بڑھانے اور درجنوں جنگی طیاروں کے انجنوں کی خریداری کے لیے ایک اہم موقع کے طور پر دیکھ رہا ہے۔

   نیتن یاہو نے خبردار کیا ہے کہ واشنگٹن کو ترک صدر رجب طیب اردوغان کو بطور ’انعام‘ جدید فوجی ٹیکنالوجی فراہم نہیں کرنی چاہیے۔ نیتن یاہو کے مطابق صدر اردوغان ’واضح طور پر اسرائیل کی تباہی کے خواہاں ہیں۔‘

   فاکس نیوز کو دیے گئے ایک انٹرویو میں اسرائیلی وزیراعظم نے مزید کہا کہ ’یہ مشرقِ وسطیٰ میں طاقت کے توازن کو بگاڑ دے گا، ایک ایسا توازن جو بالآخر اسرائیلی فضائی برتری اور میرے خیال میں مشرقِ وسطیٰ میں امریکہ کی موجودگی اور پوزیشن کے ذریعے برقرار رکھا جاتا ہے۔‘

   یاد رہے غزہ جنگ کے بعد سے خاص طور پر ترک صدر اور اسرائیلی وزیراعظم کے درمیان سخت لفظی جنگ جاری رہی ہے۔

   دو جولائی کو سامنے آنے والی اطلاعات کے مطابق ڈونلڈ ٹرمپ انتظامیہ ترکی کو سینکڑوں ملین ڈالر مالیت کے درجنوں جیٹ انجن فروخت کرنے کے منصوبے پر پیش رفت کرنا چاہتی ہے۔

   معاملے سے باخبر اہلکاروں نے خبر رساں ادارے روئٹرز کو بتایا تھا کہ یہ اقدام امریکی کانگریس کی مخالفت کے باوجود کیا جا رہا ہے۔

   یہ انجن امریکی کمپنی جنرل الیکٹرک تیار کرتی ہے اور انھیں ترکی کے پہلے مقامی جنگی طیارے قاآن میں استعمال کیا جائے گا۔

   نیٹو کے رکن ملک ترکی نے دفاعی شعبے میں خود انحصاری بڑھانے کے مقصد سے سنہ 2016 میں اس بڑے منصوبے کا آغاز کیا تھا۔

   روئٹرز کے مطابق مطابق اس ممکنہ معاہدے کی مالیت 70 کروڑ ڈالر سے زائد ہو گی اور توقع ہے کہ آئندہ چند روز میں اسے حتمی شکل دے دی جائے گی۔

6. 6 گھنٹے قبلکور کمانڈرز کانفرنس میں افغان طالبان کے زیرِ کنٹرول علاقوں سے حملوں پر تشویش، ’پاکستان آبی حقوق کے تحفظ کے لیے تمام ضروری اقدامات کرے گا‘

   

   ،تصویر کا ذریعہISPR

   پاکستان کے فیلڈ مارشل سید عاصم منیر نے پیر کو جنرل ہیڈکوارٹرز (جی ایچ کیو) راولپنڈی میں منعقدہ 276ویں کور کمانڈرز کانفرنس کی صدارت کی۔

   پاکستانی فوج کے شعبۂ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر کے زیرِ صدارت اجلاس میں شرکا نے افغان طالبان حکومت کے زیرِ کنٹرول علاقوں کو مبینہ طور پر انڈین سرپرستی میں سرگرم دہشت گرد گروہوں، جن میں فتنہ الخوارج اور فتنہ الہندوستان شامل ہیں، کی جانب سے پاکستان کے اندر حملوں کے لیے استعمال کیے جانے پر تشویش کا اظہار کیا۔

   آئی ایس پی آر کے مطابق شرکا نے مؤقف اختیار کیا کہ خطے میں دیرپا امن و استحکام اس بات سے مشروط ہے کہ افغان سرزمین کو ایسے عناصر کے استعمال سے روکا جائے، جس کی ذمہ داری افغان طالبان حکومت پر عائد ہوتی ہے۔

   آئی ایس پی آر کے مطابق فورم نے اس عزم کا اعادہ کیا کہ پاکستان کو اپنے شہریوں کے تحفظ کے لیے دہشت گردی کے خلاف دفاع کا غیر مبہم حق حاصل ہے، اور پاکستانی فوج افغان سرزمین سے ہونے والی دہشت گردی کے خلاف آپریشن ’غضبِ حق‘ کے تحت انٹیلی جنس بیسڈ آپریشنز جاری رکھے گی۔

   آئی ایس پی آر کے مطابق اجلاس میں شورش زدہ علاقوں میں مؤثر حکمرانی کے ڈھانچوں کی فوری ضرورت پر زور دیا گیا، جن کا مقصد عوامی خدمت اور فلاح و بہبود کو یقینی بنانا اور مبینہ طور پر سرگرم دہشت گردی و جرائم کے گٹھ جوڑ کو توڑنا ہے۔

   آئی ایس پی آر کے جاری کردہ بیان کے مطابق فورم نے کہا کہ ’معرکۂ حق‘ میں کامیابی کے بعد اب بیرونی حمایت یافتہ ہائبرڈ جنگ اور منظم پروپیگنڈا مہمات کے ذریعے بدامنی پھیلانے کی کوششوں میں اضافہ ہوا ہے۔ اجلاس نے ایسی تمام سرگرمیوں کی مذمت کرتے ہوئے واضح کیا کہ پاکستان کو غیر مستحکم کرنے کی کسی بھی کوشش کا مؤثر اور فیصلہ کن جواب دیا جائے گا۔

   آئی ایس پی آر کا کہنا ہے کہ اجلاس میں ملک کی مجموعی سکیورٹی صورتحال کا تفصیلی جائزہ لیا گیا اور فورم نے پاکستانی فوج کی آپریشنل تیاری، پیشہ ورانہ مہارت اور جنگی صلاحیت پر اطمینان کا اظہار کیا۔

   آئی ایس پی آر کے مطابق علاقائی صورتحال کے جائزے کے دوران فورم نے پاکستان کے اس کردار کو سراہا جو وہ مکالمے، کشیدگی میں کمی اور علاقائی استحکام کے فروغ کے لیے ادا کر رہا ہے۔ فورم نے پرامن حل، بین الاقوامی قوانین کی پاسداری اور علاقائی تعاون کے فروغ کے عزم کو دہرایا۔

   ’انڈیا کی جانب سے سندھ طاس معاہدے سے متعلق بیانات کا نوٹس لیتے ہوئے فورم نے 24 اپریل 2025 کی قومی سلامتی کمیٹی کی ہدایات کی توثیق کی اور اس عزم کا اظہار کیا کہ پاکستان اپنے آبی حقوق کے تحفظ کے لیے تمام ضروری اقدامات کرے گا۔‘

   آئی ایس پی کے مطابق فورم نے انڈیا کے زیرِ انتظام کشمیر میں انسانی حقوق کی مبینہ خلاف ورزیوں اور یکطرفہ آبادیاتی تبدیلیوں کی مذمت کرتے ہوئے کہا کہ کشمیر پاکستان کی 'شہ رگ' ہے۔ اجلاس میں کشمیری عوام کے حقِ خودارادیت کی حمایت جاری رکھنے کے عزم کا اعادہ کیا گیا اور کہا گیا کہ خطے میں پائیدار امن مسئلۂ کشمیر کے حل سے مشروط ہے، جیسا کہ اقوام متحدہ کی سلامتی کونسل کی قراردادوں میں درج ہے۔

   آئی ایس پی کے مطابق چیف آف آرمی سٹاف اور چیف آف ڈیفنس فورسز نے کمانڈرز کو ہدایت کی کہ وہ بدلتی ہوئی جنگی نوعیت کے مطابق ملٹی ڈومین ٹرانسفارمیشن پلان پر فوری عملدرآمد یقینی بنائیں۔ انھوں نے اعلیٰ ترین سطح کی چوکسی، آپریشنل تیاری اور پیشہ ورانہ مہارت برقرار رکھنے پر زور دیتے ہوئے کہا کہ پاکستان کی خودمختاری اور قومی مفادات کے تحفظ کے لیے تمام خطرات کا مربوط اور مؤثر انداز میں مقابلہ کیا جائے۔

7. 6 گھنٹے قبل’صرف امریکہ ہی نہیں بلکہ ہمارے دیگر دوست بھی ہیں، جیسے انڈیا‘: نیتن یاہو

   

   ،تصویر کا ذریعہReuters

   اسرائیل کے وزیراعظم بنیامین نیتن یاہو نے دعویٰ کیا ہے کہ انڈیا میں انھیں بڑے پیمانے پر عوامی حمایت حاصل ہے اور اسرائیل کے امریکہ کے علاوہ بھی متعدد دوست ممالک ہیں۔

   فاکس نیوز کو دیے گئے ایک انٹرویو میں نیتن یاہو نے کہا کہ امریکہ کے نائب صدر جے ڈی وینس نے جون میں انھیں امریکہ اور صدر ڈونلڈ ٹرمپ پر تنقید سے گریز کرنے کا مشورہ دیا تھا۔ اس کے جواب میں انھوں نے کہا کہ اسرائیل صرف امریکہ پر انحصار نہیں کرتا بلکہ اس کے دیگر دوست بھی ہیں، جن میں انڈیا بھی شامل ہے۔

   یہ بیان ایسے وقت میں سامنے آیا ہے جب جون میں امریکہ اور ایران کے درمیان جنگ بندی کے لیے سفارتی رابطے جاری تھے، جبکہ اسی دوران اسرائیل کی جانب سے لبنان پر حملے بھی جاری رہے۔ ایران کا کہنا تھا کہ لبنان پر حملے ان مذاکرات کو متاثر کر سکتے ہیں۔ اسی عرصے میں صدر ڈونلڈ ٹرمپ اور نائب صدر جے ڈی وینس نے بھی اسرائیل کے حوالے سے نسبتاً سخت مؤقف اختیار کیا تھا۔

   نیتن یاہو نے کہا: ’صرف امریکہ ہی نہیں بلکہ ہمارے دیگر دوست بھی ہیں، جیسے انڈیا۔ 140 کروڑ کی آبادی والے اس ملک میں ہمیں بہت زیادہ حمایت حاصل ہے۔ فیس بک اور دیگر سوشل میڈیا پلیٹ فارمز پر مجھے انڈیا سے مسلسل حمایت کے پیغامات موصول ہوتے رہتے ہیں۔‘

   انھوں نے یہ بھی دعویٰ کیا کہ کئی ممالک میں اسرائیل پر تنقید کرنا ایک ’فیشن‘ بن چکا ہے اور اس کی ایک وجہ میڈیا کی اسرائیل مخالف کوریج ہے۔

8. 7 گھنٹے قبل’اگر اسرائیل کے پاس ہماری رپورٹ کو غلط ثابت کرنے والا کوئی ثبوت ہے تو وہ اسے پیش کر سکتا ہے‘ جسٹس مرلی دھر, مہتاب عالم - بی بی سی اردو، دہلی

   

   ،تصویر کا ذریعہUN

   اقوام متحدہ کے مقبوضہ فلسطینی علاقوں سے متعلق تحقیقاتی کمیشن کے سربراہ جسٹس سری نواسن مرلی دھر نے کہا ہے کہ اسرائیلی حکام نے کمیشن کی رپورٹ کے جواب میں 18 صفحات پر مشتمل ایک تردیدی دستاویز تیار کر کے تقسیم کی، تاہم یہ دستاویز کمیشن کو باضابطہ طور پر نہیں بھیجی گئی۔

   بی بی سی کے نامہ نگار جُگل پروہت سے گفتگو کرتے ہوئے جسٹس مرلی دھر نے کہا: 'اسرائیلی حکام نے ہماری رپورٹ کے خلاف 18 صفحات کا ایک تردید نامہ تیار کیا اور اسے لوگوں میں تقسیم کیا۔ انھوں نے یہ ہمیں نہیں بھیجا، لیکن ہم پر امتیاز اور جانبداری کا الزام ضرور لگایا ہے۔'

   جسٹس مرلی دھر، جو انڈین قانون دان اور سابق جج ہیں، نے اس تنقید کا بھی جواب دیا جن میں کہا جاتا ہے کہ کمیشن نے اپنی رپورٹ کی تیاری کے دوران اسرائیلی فوجیوں سے براہِ راست بات نہیں کی۔

   انھوں نے کہا: 'بہت سے لوگ سوال کرتے ہیں کہ آپ نے رپورٹ کی تیاری کے دوران اسرائیلی فوجیوں سے بات نہیں کی۔ لیکن اسرائیلی فوجیوں نے خود ہی اس بارے میں بات کی ہے۔ انھوں نے نہ صرف ہم سے بلکہ پوری دنیا سے بات کی ہے۔ انھوں نے ویڈیوز بنائی ہیں اور ان پر فخر کیا ہے۔'

   خیال رہے کہ گذشتہ ماہ اقوام متحدہ کے تحقیقاتی کمیشن کی ایک رپورٹ میں کہا گیا تھا کہ اسرائیل نے جان بوجھ کر فلسطینی بچوں کو نشانہ بنایا، جس کے نتیجے میں غزہ میں نسل کشی، انسانی حقوق کی خلاف ورزی اور جنگی جرائم ہوئے۔

   رپورٹ میں کہا گیا تھا کہ اسرائیلی حکام اور سکیورٹی فورسز نے 'ہزاروں فلسطینی بچوں کو موت اور شدید جسمانی و ذہنی نقصان پہنچانے کے اقدامات جان بوجھ کر کیے' اور یہ سلسلہ جنگ بندی کے بعد بھی جاری رہا۔

   کمیشن کے مطابق اس کے پاس یہ نتیجہ اخذ کرنے کی معقول وجوہات موجود ہیں کہ یہ اقدامات غزہ میں فلسطینیوں کے مستقبل کو نقصان پہنچانے کی ایک منظم حکمت عملی کا حصہ تھے۔ اسرائیل ان الزامات کی تردید کرتا ہے۔

   اقوام متحدہ کی ہیومن رائٹس کونسل نے اس تحقیقاتی کمیشن کو مئی 2021 میں قائم کیا تھا۔ اس کی پہلی سربراہ ناوی پلّئی تھیں، جو 2008 سے 2014 تک اقوام متحدہ کی ہائی کمشنر برائے انسانی حقوق بھی رہ چکی ہیں۔ کمیشن کے موجودہ سربراہ جسٹس سری نواسن مرلی دھر ہیں، جنھوں نے ستمبر 2025 میں یہ ذمہ داری سنبھالی، جبکہ کمیشن کے دیگر ارکان کرس سیدوتی اور فلورینس ممبا ہیں۔

   

   ،تصویر کا ذریعہGetty Images

   رپورٹ میں کیا کہا گیا ہے؟

   کمیشن کی رپورٹ میں کہا گیا ہے کہ اسرائیلی افواج نے غزہ میں فلسطینی بچوں کو براہِ راست نشانہ بنایا۔ رپورٹ کے مطابق اس مقصد کے لیے ایسے ہتھیار استعمال کیے گئے جو جسم کے اہم اعضا کو نشانہ بناتے ہیں، جن میں کواڈ کاپٹر ڈرونز اور سنائپرز شامل ہیں۔ رپورٹ میں یہ بھی کہا گیا ہے کہ رہائشی عمارتوں، سکولوں اور بچوں سے بھرے مہاجر کیمپوں پر بھاری تباہی پھیلانے والے ہتھیاروں سے حملے کیے گئے۔

   رپورٹ میں مزید کہا گیا ہے کہ غزہ اور مقبوضہ مغربی کنارے میں بچوں، خصوصاً کم عمر لڑکوں، کو اسرائیلی جیلوں اور حراستی مراکز میں 'تشدد اور بدسلوکی' کا نشانہ بنایا گیا۔ کمیشن کے مطابق اس نے گرفتاری اور حراست کے دوران فلسطینی بچوں کے خلاف 'جنسی اور صنفی بنیاد پر تشدد' کے واقعات بھی دستاویزی صورت میں ریکارڈ کیے ہیں۔

   رپورٹ کے مطابق غزہ میں نوزائیدہ بچوں اور بچوں کے ہسپتالوں پر حملوں کے باعث 'بچوں کو زندگی بچانے والی طبی سہولتوں تک رسائی منظم انداز میں ختم کر دی گئی، جس سے ان کے زندہ رہنے کے امکانات متاثر ہوئے۔'

   کمیشن نے کہا گیا ہے کہ سکولوں پر حملوں، بڑے پیمانے پر نقل مکانی اور تعلیمی اداروں کی جبری بندش کے ذریعے اسرائیلی حکام نے بچوں کی تعلیم کے عمل میں 'منظم طور پر خلل ڈالا'، جس سے 'فلسطینی معاشرے کی ذہنی اور سماجی بنیادوں کو نقصان پہنچا'۔

   

   ،تصویر کا ذریعہGetty Images

   اسرائیلی حکومت کا ردعمل اور کمیشن کے سربراہ کا جواب

   بی بی سی کے نامہ نگار جُگل پروہت سے گفتگو کرتے ہوئے تحقیقاتی کمیشن کے سربراہ جسٹس سری نواسن مرلی دھر نے کہا کہ کمیشن نے رپورٹ کا مسودہ اسرائیل کو بھیجا تھا اور اس سے اپنا مؤقف پیش کرنے کی بھی درخواست کی تھی۔

   انھوں نے کہا: 'میں بار بار یہی کہنا چاہتا ہوں کہ اس پوری رپورٹ کا ڈرافٹ اسرائیل کو بھیجا گیا تھا۔ ہم نے ان سے یہ بھی کہا کہ ہم غزہ جانا چاہتے ہیں، مقبوضہ فلسطینی علاقوں کا دورہ کرنا چاہتے ہیں، لیکن انھوں نے کوئی جواب نہیں دیا۔'

   جسٹس مرلی دھر کا کہنا تھا کہ اگر اسرائیلی حکام کے پاس ایسے شواہد موجود ہیں جو کمیشن کو موصول ہونے والی معلومات سے مختلف ہیں تو وہ انھیں پیش کر سکتے ہیں۔

   انھوں نے کہا: 'جنگ بندی کے بعد بھی بچے مارے جا رہے ہیں اور شدید زخمی ہو رہے ہیں، جبکہ اسرائیل کی جانب سے جنگ بندی اور بین الاقوامی قانون کے تحت فلسطینی بچوں کو حاصل تحفظ کو مسلسل نظر انداز کیا جا رہا ہے۔'

   ان کے مطابق فلسطینی بچوں کی حفاظت، دیکھ بھال اور بقا کو فلسطینی عوام کے حقِ خود ارادیت سے الگ نہیں کیا جا سکتا۔

   انھوں نے کہا: 'فلسطینی بچوں کی حفاظت، دیکھ بھال اور بقا، فلسطینی عوام کے حقِ خود ارادیت سے الگ نہیں کی جا سکتی۔ اسرائیل بچوں کو نشانہ بنا کر فلسطینی عوام کی موجودگی اور ان کے اپنے مستقبل کا فیصلہ کرنے کی صلاحیت پر حملہ کر رہا ہے۔'

   دوسری جانب اسرائیل کی وزارت خارجہ نے رپورٹ کو مسترد کرتے ہوئے اسے 'جھوٹا'، 'بدنیتی پر مبنی' اور 'سابقہ رپورٹس کی طرح ایک اشتہاری ٹکڑا' قرار دیا۔

   وزارت خارجہ کے مطابق 'یہ رپورٹ ان اسرائیلی بچوں کو مکمل طور پر نظر انداز کرتی ہے جو بے رحمی سے قتل کیے گئے، اغوا کیے گئے اور حماس کی جانب سے نشانہ بنائے گئے، جبکہ فلسطینی بچوں کو انسانی ڈھال اور جنگ کے مہرے کے طور پر استعمال کرنے کے حماس کے طریقۂ کار کو بھی نظر انداز کرتی ہے۔'

   اسرائیل نے کمیشن پر یہ الزام بھی عائد کیا کہ اس کے دعوؤں کی تصدیق کے لیے کوئی قابلِ اعتماد طریقۂ کار موجود نہیں۔

   اس بیان کے جواب میں جسٹس مرلی دھر نے کہا: 'اگر اسرائیل کے پاس کوئی ایسا ثبوت ہے جو ہماری رپورٹ کو غلط ثابت کرتا ہے تو وہ اب بھی اسے پیش کر سکتا ہے۔'

   

   ،تصویر کا ذریعہGetty Images

9. 7 گھنٹے قبلجنوبی لبنان میں نباتیح پر اسرائیلی ڈرون حملے میں چار افراد ہلاک

   لبنان کی سرکاری خبر رساں ایجنسی کے مطابق جنوبی لبنان کے شہر نباتیح میں اسرائیلی ڈرون نے ایک کار کو نشانہ بنایا ہے جس کے نتیجے میں چار افراد ہلاک ہو گئے ہیں۔

   خبر رساں ایجنسی کے مطابق ’سکول کی پرنسپل، ان کی والدہ، ایک غیر ملکی گھریلو خاتون ملازمہ اور ایک مرد شامی کارکن‘ ایک کار میں نبطیہ فوقا کے علاقے میں اپنے گھر سے واپس آرہے تھے کہ ’اسرائیلی ڈرون‘ نے انھیں نشانہ بنایا۔

   اسرائیل نے کہا ہے کہ وہ ان رپورٹس کی تحقیقات کر رہا ہے۔

   جنگ بندی کے باوجود جنوبی لبنان میں اسرائیلی فوج اور حزب اللہ کے درمیان جاری محدود جھڑپیں جاری ہیں۔

10. 8 گھنٹے قبلگل پلازہ آتشزدگی کیس: ایسوسی ایشن کے صدر سمیت پانچ ملزمان کی ضمانت منظور, ریاض سہیل - بی بی سی اردو، کراچی

    

    ،تصویر کا ذریعہgettyimages

    کراچی کی ایک عدالت نے گل پلازہ آتشزدگی کیس میں نامزد گل پلازہ ایسوسی ایشن کے صدر تنویر پاستا سمیت پانچ ملزمان کی ضمانت منظور کرتے ہوئے انھیں پانچ، پانچ لاکھ روپے کے مچلکے جمع کرانے کا حکم دیا ہے۔

    سماعت کے دوران عدالت نے ملزمان کے وکیل سے استفسار کیا کہ کم عمر ملزم کی درخواست اسی عدالت میں کیوں دائر کی گئی ہے۔ وکیل نے مؤقف اختیار کیا کہ تمام ملزمان کے خلاف ایک ہی مقدمے کا چالان جمع کرایا گیا ہے، اسی لیے درخواست بھی اسی عدالت میں دائر کی گئی۔

    عدالت نے سوال کیا کہ کم عمر ملزم کا اس مقدمے میں کیا کردار ہے، جس پر وکیل نے موقف اختیار کیا کہ 72 افراد کی جانیں چلی گئیں لیکن پولیس نے آدھے صفحے میں پورا کیس نمٹا دیا اور کسی بھی سرکاری یا سول ادارے پر ذمہ داری عائد نہیں کی۔

    عدالت نے ریمارکس دیتے ہوئے کہا کہ پولیس نے ملزمان کو رعایت دیتے ہوئے گرفتار نہیں کیا، جبکہ چارج شیٹ دو مرتبہ مسترد ہونے کے باوجود انھی اعتراضات کے ساتھ دوبارہ چالان عدالت میں جمع کرایا گیا ہے۔

    اس سے قبل سنیچر کو پولیس نے اپنے عبوری چالان میں مؤقف اختیار کیا تھا کہ گل پلازہ مارکیٹ میں لگنے والی ہولناک آگ، جس میں 72 افراد ہلاک اور آٹھ زخمی ہوئے، کسی بیرونی سازش کا نتیجہ نہیں بلکہ دکان کے مالک کی مجرمانہ غفلت اور ایک کم عمر بچے کی لاپرواہی کے باعث بھڑکی۔

    پولیس کے مطابق گراؤنڈ فلور پر واقع دکان نمبر 193 کے مالک اپنی دکان اکثر اپنے کم عمر بیٹے کے سپرد کر کے چلے جاتے تھے۔ واقعے کے روز وہ بچہ اپنے ایک دوست کے ساتھ دکان پر موجود تھا اور مبینہ طور پر کھیل کے دوران ماچس کی تیلیاں جلا کر پھینک رہا تھا، جس سے دکان میں موجود مصنوعی پھولوں نے آگ پکڑ لی اور آگ تیزی سے پوری مارکیٹ میں پھیل گئی۔

    عبوری چالان میں کہا گیا ہے کہ دونوں بچوں نے آگ بجھانے کی کوشش کی، تاہم آگ کی شدت زیادہ ہونے کے باعث وہ کامیاب نہ ہو سکے۔ پولیس کے مطابق عینی شاہدین اور دیگر ملازمین کے بیانات بھی اس مؤقف کی تائید کرتے ہیں۔

    چالان میں مزید بتایا گیا ہے کہ ریسکیو 1122 اور ایدھی کے اہلکاروں کے بیانات سے معلوم ہوا کہ مارکیٹ کے مختلف فلورز اور مسجد کے اطراف نصب شٹر نما گرل گیٹس پر تالے لگے ہوئے تھے، جبکہ ہنگامی اخراج کے راستے بند تھے اور ایمرجنسی لائٹنگ کا بھی کوئی انتظام موجود نہیں تھا، جس کے باعث متعدد افراد بروقت باہر نہ نکل سکے۔

    پولیس نے اپنی تفتیش میں یہ بھی دعویٰ کیا ہے کہ کال ڈیٹا ریکارڈ کے مطابق مارکیٹ یونین کے عہدیداران نے واقعے کے بعد کسی بھی ہنگامی امدادی سروس، جیسے 15 یا 16، پر مدد کے لیے رابطہ نہیں کیا۔ چالان میں یہ بھی کہا گیا ہے کہ یونین نے کم عمر بچے کو دکان چلانے سے روکنے کے لیے بھی کوئی اقدام نہیں کیا۔

    تحقیقاتی رپورٹ کے مطابق ڈسٹرکٹ آفیسر سول ڈیفنس نے بتایا کہ مارکیٹ میں فائر ہائیڈرنٹ سسٹم، فائر ماسک، ٹارچ اور دیگر بنیادی حفاظتی سہولیات موجود نہیں تھیں، جبکہ مارکیٹ انتظامیہ کے پاس فائر سیفٹی سے متعلق کوئی تربیت بھی نہیں تھی اور دکانداروں کے لیے حفاظتی سیشن بھی منعقد نہیں کیے گئے تھے، حالانکہ اس سے قبل بھی اس پلازہ میں دو مرتبہ آتشزدگی کے واقعات پیش آ چکے تھے۔

    پولیس نے اپنے عبوری چالان میں گل پلازہ یونین کے صدر تنویر پاستا، نائب صدر عماد اسماعیل، جوائنٹ سیکریٹری محمد رمضان، جنرل سیکریٹری محمد امین، دکاندار نعمت اللہ اور ایک کم عمر بچے کو نامزد کیا ہے۔

    چالان کے مطابق مارکیٹ یونین کے عہدیداران اور دکان مالک نعمت اللہ کی عدم گرفتاری کے باعث ان کے خلاف ضابطۂ فوجداری کی دفعہ 512 کے تحت کارروائی کی جا رہی ہے، جبکہ کم عمر ہونے کے باعث بچے کا مقدمہ الگ سے جووینائل کورٹ کو بھیجا گیا ہے۔

11. 9 گھنٹے قبلبریکنگ, حماس نے تقریباً 20 سال بعد غزہ میں اپنی حکومتی انتظامیہ تحلیل کر دی

    

    ،تصویر کا ذریعہGetty Images

    حماس نے تقریباً 20 سال بعد غزہ میں اپنی حکومتی انتظامیہ تحلیل کر دی ہے۔

    بی بی سی فارسی کے مطابق حماس نے اس ادارے کو تحلیل کر دیا ہے جو تقریباً دو دہائیوں سے غزہ کی پٹی کا انتظام سنبھال رہا تھا۔ اس فیصلے کو حماس کی سیاسی حکمتِ عملی میں ایک اہم تبدیلی قرار دیا جا رہا ہے، جس سے ایک ٹیکنوکریٹک کمیٹی کے ذریعے علاقے میں شہری اور انتظامی امور چلانے کی راہ ہموار ہو گئی ہے۔

    حماس 2007 سے غزہ کی انتظامیہ چلا رہی تھی، جب اس کی فورسز نے فتح سے اس علاقے کا کنٹرول حاصل کیا تھا۔ اس سے ایک سال قبل، 2006 میں، حماس فلسطینی پارلیمانی انتخابات میں کامیاب ہوئی تھی۔

    گذشتہ سال اکتوبر میں حماس اور اسرائیل کے درمیان جنگ بندی کے بعد سے یہ گروپ بارہا کہہ چکا ہے کہ وہ غزہ کے روزمرہ انتظام سے پیچھے ہٹنے کے لیے تیار ہے، تاہم اسے غیر مسلح کا مسئلہ تاحال حل طلب ہے۔

    حماس کے سرکاری اطلاعاتی دفتر کے سربراہ نے خبر رساں ادارے اے ایف پی کو بتایا:’محمد فرا، ایمرجنسی کمیٹی کے سربراہ نے باضابطہ طور پر اپنا استعفیٰ پیش کر دیا ہے۔‘

    انھوں نے مزید کہا: ’یہ بھی فیصلہ کیا گیا ہے کہ اس کمیٹی کو تحلیل کر دیا جائے تاکہ انتظامی اور حکومتی امور کی منتقلی کو غزہ کی قومی انتظامی کمیٹی کے حوالے کرنے میں آسانی ہو۔‘

    غزہ کی قومی انتظامی کمیٹی، جو اس وقت قاہرہ میں قائم ہے، ڈونلڈ ٹرمپ کے امن فریم ورک کے تحت تشکیل دی گئی تھی۔ امریکی صدر نے یہ فریم ورک اکتوبر 2025 میں جنگ بندی کے لیے ثالثی کے دوران متعارف کرایا تھا۔

    حماس کے ترجمان نے اے ایف پی کو بتایا: ’حماس نے ایک نیا قدم اٹھایا ہے اور اب وہ غزہ کی پٹی کے انتظام کی ذمہ دار نہیں رہی، تاکہ قابض قوتوں کے لیے کسی بھی بہانے کو ختم کیا جا سکے جو اب بھی جارحیت اور تباہ کن جنگ جاری رکھے ہوئے ہیں۔‘

12. 9 گھنٹے قبلبرطانیہ کا روسی طیارے کو ناروے کے سمندر کے اوپر روکنے اور دور بھگانے کا دعویٰ

    

    ،تصویر کا ذریعہPA Media

    برطانیہ کی وزارتِ دفاع نے کہا ہے کہ برطانوی جنگی طیاروں نے ناروے کے سمندر میں ایک روسی بحری گشت کرنے والے طیارے کو اس وقت روکا، جب وہ کیریئر سٹرائیک گروپ کے ’بار بار قریب آ رہا تھا‘۔

    وزارتِ دفاع کے مطابق روسی بیئر-ایف (Bear-F) طیارہ کم بلندی پر پرواز کرتا ہوا ایچ ایم ایس پرنس آف ویلز طیارہ بردار جہاز کے ’غیر ضروری حد تک قریب‘ آ گیا تھا، اور خیال کیا جاتا ہے کہ اس نے جمعرات کو سمندر میں 10 سونوبوائز بھی گرائے۔

    وزارتِ دفاع نے کہا کہ ناروے کے سمندر میں ماسکو کی سرگرمی ’غیر محفوظ اور غیر پیشہ ورانہ‘ تھی۔

    یہ واقعہ ان ہفتوں کے بعد پیش آیا ہے جب رائل میرینز نے انگلش چینل میں روسی ’شیڈو فلیٹ‘ کے ایک آئل ٹینکر پر کارروائی کی تھی، جبکہ برطانوی فوج کے سربراہ خبردار کر چکے ہیں کہ برطانیہ کو درپیش خطرات اور خدشات سرد جنگ کے بعد کسی بھی وقت کے مقابلے میں زیادہ ہیں۔

    برطانیہ کا کیریئر سٹرائیک گروپ اس وقت نیٹو کی کمان کے تحت آئس لینڈ کے قریب تعینات ہے، جس پر 1,500 برطانوی اہلکار موجود ہیں۔

    یہ پہلا موقع ہے کہ نیٹو نے کسی یورپی طیارہ بردار جہاز سے فضائی نگرانی کی کارروائیاں انجام دی ہیں۔

    جن نگرانی کے آلات کو بیئر-ایف طیارے کی جانب سے گرایا گیا، ان کے متعلق سمجھا جاتا ہے، وہ پانی کی سطح پر تیرتے ہیں اور آبدوزوں اور دیگر جہازوں کا پتا لگانے کے لیے سونار استعمال کرتے ہیں۔

    برطانوی افواج نے بین الاقوامی مواصلاتی فریکوئنسیوں پر روسی طیارے سے رابطہ کرنے کی کوشش کی، لیکن اس نے کوئی جواب نہیں دیا۔

    اس کے بعد دو ایف-35 طیارے پرنس آف ویلز سے اڑے اور بیئر-ایف طیارے کو کیریئر سٹرائیک گروپ سے دور لے گئے۔

    چیف آف دی ڈیفنس سٹاف سر رچرڈ نائٹن نے جون میں بی بی سی کو بتایا تھا کہ روس ’ہماری دفاعی صلاحیتوں کو جانچ رہا ہے، چیلنج کر رہا ہے اور آزمائش میں ڈال رہا ہے‘ اور ’خطرات بڑھا رہا ہے اور حدود عبور کرنے کے قریب پہنچ رہا ہے۔‘

    نیٹو پہلے ہی خبردار کر چکا ہے کہ روس 2030 تک فوجی طاقت استعمال کرنے کے لیے تیار ہو سکتا ہے۔

13. 6 جولائی 2026تہران میں سابق رہبرِ اعلیٰ علی خامنہ کی آخری رسومات شام 5 بجے تک جاری رہیں گی

    علی خامنہ ای کی آخری رسومات کے انتظامات کرنے والے ادارے نے اعلان کیا ہے کہ آج تہران میں آخری رسومات شام پانچ بجے تک جاری رہیں گی۔

    آج علی الصبح، اسلامی جمہوریہ کے سابق رہنما اور ان کے بعض اہلِ خانہ کے تابوت، جو تقریباً چار ماہ قبل ان کے ہمراہ امریکی اور اسرائیلی حملوں میں ہلاک ہوئے تھے، تہران کے مصلیٰ سے ایک ٹرالر پر روانہ کیے گئے۔ یہ جلوس آزادی سکوائر تک 10 کلومیٹر طویل راستہ طے کرے گا۔

    توقع ہے کہ اس تقریب، جس میں لوگوں کی بہت بڑی تعداد شریک ہے، کو 10 گھنٹوں سے زیادہ وقت لگے گا۔

    تہران میں ہونے والی آخری رسومات کی تصاویر ملاحظہ کیجیے۔

    

    ،تصویر کا ذریعہReuters

    

    ،تصویر کا ذریعہReuters

    

    ،تصویر کا ذریعہGetty Images

    

    ،تصویر کا ذریعہGetty Images

    

    ،تصویر کا ذریعہGetty Images

14. 6 جولائی 2026پزشکیان، قالیباف اور علی خامنہ ای کے بڑے بیٹے عراق میں نمازِ جنازہ میں شرکت کریں گے

    

    ،تصویر کا ذریعہgettyimages

    مہر نیوز ایجنسی کے مطابق، علی خامنہ ای کے تابوت کو کل قم سے شیعہ مسلمانوں کے لیے مقدس مقام اور حضرت علی کے روزہ مبارک والے شہر نجف منتقل کیا جائے گا۔

    رپورٹ کے مطابق، اسلامی جمہوریہ کے سابق رہنما کے بڑے صاحبزادے مصطفیٰ خامنہ ای، ایران کے صدر مسعود پزشکیان اور پارلیمان کے سپیکر محمد باقر قالیباف بھی کل نجف جائیں گے اور عراق میں نمازِ جنازہ میں شرکت کریں گے۔

    علی خامنہ ای کی نمازِ جنازہ کی تقریبات بدھ کے روز عراق کے شہروں کربلا اور نجف میں منعقد کی جائیں گی۔

    اسلامی جمہوریہ کے سابق رہنما کو جمعرات کے روز مشہد میں حرمِ امام رضا میں سپردِ خاک کیا جائے گا۔

15. 6 جولائی 2026سوگواروں نے ’انتقام کی علامت‘ سرخ جھنڈے اٹھا رکھے ہیں, لیز ڈوسٹ، بی بی سی تہران

    

    ،تصویر کا ذریعہReuters

    ایران کے سابق رہبرِ اعلیٰ کے تابوت کے راستے میں تقریباً 10 کلومیٹر (6.2 میل) طویل سڑک کے دونوں جانب لوگوں کی بڑی تعداد موجود ہے۔ کچھ سوگوار نعرے لگا رہے ہیں جبکہ کئی اشک بار ہیں۔

    جنازے کا جلوس مشہور انقلاب سکوائر سے گزرے گا۔ اس چوک پر ایک بہت بڑا مجسمہ نصب ہے، جو مضبوطی سے بندھی ہوئی مٹھی کی شکل میں ہے اور اسے ’مزاحمت کی مٹھی‘ کہا جاتا ہے۔ یہ ان تقریبات کی نمایاں علامت ہے، جس پر درج نعرہ ہے: ’ہمیں اٹھ کھڑا ہونا ہوگا۔‘

    ایک اور نعرہ بھی مسلسل سنائی دے رہا ہے، جو حکومت کے وفادار حامیوں میں گونج رہا ہے: امریکی اور اسرائیلی فضائی حملوں میں سپریم لیڈر کے قتل کا انتقام۔

    انتقام کی علامت سمجھے جانے والے سرخ جھنڈے اب ہجوم میں نمایاں نظر آ رہے ہیں، جبکہ کئی پوسٹروں پر امریکی صدر ڈونلڈ ٹرمپ کو خاص طور پر نشانہ بنایا گیا ہے۔

    اگرچہ اس کا ایک حصہ محض نعرے بازی ہے، لیکن آیت اللہ کے قتل پر غم و غصہ ایران کی نئی قیادت کے اندر بھی بے چینی کو ہوا دے رہا ہے۔ سخت گیر حلقے خاص طور پر ٹرمپ کی ٹیم کے ساتھ ہونے والے مذاکرات پر شدید تنقید کر رہے ہیں۔

16. 6 جولائی 2026امن مذاکرات خامنہ ای کی آخری رسومات تک معطل رہیں گے: صدر ٹرمپ

    

    ،تصویر کا ذریعہGetty Images

    آج کا جنازے کا جلوس ایسے وقت میں نکل رہا ہے جب امریکہ اور ایران کے درمیان ایک نازک جنگ بندی برقرار ہے اور مستقل امن معاہدے کے لیے بات چیت کا سلسلہ بھی جاری ہے۔

    امریکی صدر ڈونلڈ ٹرمپ کے مطابق جمعے کے روز جنازے کی تقریبات شروع ہونے کے بعد سے یہ مذاکرات تعطل کا شکار ہیں۔

    اُنھوں نے سنیچر کے روز نیوز ویب سائٹ ’ایگزیوس‘ کو بتایا کہ ایرانی فریق ’معاہدہ کرنے کے لیے بے تاب‘ ہے، لیکن فریقین نے فیصلہ کیا ہے کہ خامنہ ای کے جنازے کی تقریبات کے اختتام تک مذاکرات میں ایک ہفتے کا وقفہ لیا جائے۔

    ایران نے اس بات پر باضابطہ طور پر کوئی تبصرہ نہیں کیا ہے کہ آیا مذاکرات معطل کر دیے گئے ہیں۔

    جنازے میں ایرانی حکومت کی اعلیٰ شخصیات کی موجودگی کے حوالے سے ٹرمپ نے کہا کہ ’وہ سب وہاں موجود ہیں۔ ایک نشانہ [اور ہم ان سب کا خاتمہ کر سکتے ہیں]، لیکن ہم ایسا نہیں کریں گے کیونکہ پھر ہمارے پاس مذاکرات کے لیے کوئی نہیں بچے گا۔‘

17. 6 جولائی 2026خامنہ ای کے جنازے کے جلوس میں بعض سوگواروں نے ٹرمپ اور نیتن یاہو مخالف پوسٹرز اور بینرز اُٹھا رکھے ہیں

    

    ،تصویر کا ذریعہEPA

    ایران کے سابق رہبرِ اعلیٰ علی خامنہ ای کے جنازے کے جلوس کی تصاویر میں کچھ سوگواروں کو ٹرمپ مخالف پوسٹرز اور پلے کارڈز اٹھائے ہوئے دیکھا جا سکتا ہے جن پر تشدد پر مبنی پیغامات، بشمول جان سے مارنے کی دھمکیاں، درج ہیں۔

    ان بینرز میں اسرائیلی وزیرِ اعظم نیتن یاہو اور امریکی نائب صدر جے ڈی وینس کے خلاف نعرے بھی درج ہیں۔

    نیم سرکاری خبر رساں ادارے فارس نیوز کے ٹیلی گرام پر ایک ویڈیو بھی نشر کی گئی ہے جس میں سوگواروں کو ایک پل پر امریکی صدر کے پوسٹر پوسٹر پر پتھر پھینکتے ہوئے دکھایا گیا ہے۔

    

    ،تصویر کا ذریعہWANA via Reuters

18. 6 جولائی 2026پہلگام حملہ کیس: انڈیا نے حافظ سعید پر ضمنی چارج شیٹ فائل کر دی، جنگ شروع کرنے اور سازش تیار کرنے کی دفعات شامل

    

    ،تصویر کا ذریعہLightRocket via Getty Images

    خبر رساں ادارے ایشین نیوز انٹرنیشنل (اے این آئی) کے مطابق انڈیا کی قومی تحقیقاتی ایجنسی (این آئی اے) نے کہا ہے کہ اس نے پہلگام حملہ کیس میں پاکستان میں موجود کالعدم لشکرِ طیبہ اور اس کی مبینہ ذیلی تنظیم دی ریزسٹنس فرنٹ کے سربراہ اور بانی حافظ سعید کے خلاف ضمنی چارج شیٹ فائل کر دی ہے۔

    تحقیقاتی ایجنسی کا حوالے دیتے ہوئے اے این آئی نے رپورٹ کیا ہے کہ ضمنی چارج شیٹ جموں میں قائم این آئی اے کی خصوصی عدالت میں جمع کرائی گئی۔ اس میں حافظ سعید پر انفرادی حیثیت کے ساتھ ساتھ کالعدم لشکرِ طیبہ اور اس کی فعال ذیلی تنظیم دی ریزسٹنس فرنٹ کے سربراہ کے طور پر بھی الزامات عائد کیے گئے ہیں۔

    قومی تحقیقاتی ایجنسی کے مطابق چارج شیٹ میں حافظ سعید پر انڈیا کے خلاف جنگ شروع کرنے اور سرحد پار سے سازش تیار کرنے سے متعلق تعزیری دفعات بھی شامل کی گئی ہیں۔

    این آئی اے کا کہنا ہے کہ 1597 صفحات پر مشتمل اصل چارج شیٹ کے تسلسل میں جمع کرائی گئی اس ضمنی چارج شیٹ میں پاکستان کی مبینہ سازش، حافظ سعید کے مبینہ کردار اور کیس میں جمع کیے گئے شواہد کی تفصیلات شامل ہیں، جو ایجنسی کے مطابق سائنسی تحقیقات اور زمینی تفتیش کے دوران اکٹھے کیے گئے۔

19. 6 جولائی 2026ایرانی عوام ’عزت، ترقی اور عظمت‘ کے راستے پر گامزن رہیں گے: صدر پزشکیان

    

    ،تصویر کا ذریعہReuters

    ایران کے صدر مسعود پزشکیان نے کہا ہے کہ ایرانی عوام ’ایران کی عزت، ترقی اور عظمت کے راستے‘ پر گامزن رہیں گے۔

    انھوں نے پیر کی صبح سوشل میڈیا پلیٹ فارم ایکس پر ایک پیغام میں کہا کہ سابق رہبرِ اعلیٰ آیت اللہ علی خامنہ ای نے سب کو یہ سکھایا کہ ملک کا ’سب سے بڑا سرمایہ‘ اس کے عوام اور ان کا اتحاد ہے۔

20. 6 جولائی 2026تجزیہ: ایران کی نئی قیادت اس عوامی اجتماع کے ذریعے ایک پیغام دینا چاہتی ہے, لیز ڈوسیٹ، تہران میں موجود مرکزی نامہ نگار برائے عالمی امور

    

    ،تصویر کا ذریعہMajid Saeedi/Getty Images

    ایران کے سابق رہبرِ اعلیٰ آیت اللہ علی خامنہ ای اور ان کے اہل خانہ کے تابوت ایک گاڑی میں رکھے ہیں اور گاڑی تہران کی سڑکوں پر آہستہ آہستہ آگے بڑھ رہی ہے۔ سڑکوں پر سوگواروں کا ایک ہجوم ہے جو غم زدہ ہیں اور غصے میں ہیں۔

    ایران کی نئی قیادت چاہتی ہے کہ سوگواروں کے اس بڑے اجتماع کے ذریعے ملک کے اندر اور باہر موجود اپنے مخالفین کو طاقت اور مزاحمت کا ایک پیغام دیا جائے۔

    تہران میں تین روزہ عوامی سوگ کا آج آخری دن ہے۔ اس کے بعد یہ رسومات ایران اور پڑوسی ملک عراق کے دیگر شہروں کی طرف منتقل کر دی جائیں گی۔

    

    ،تصویر کا ذریعہAFP via Getty Images