ایران اور اسرائیل کے بیچ مزید لڑائی کا امکان نہیں، اگلے ہفتے امریکہ ایران سے بات چیت کرے گا: ٹرمپ

لائیو کوریج

پیشکش: منزہ انوار

1. 24 جون 2025اقوام متحدہ نے ایرانی جیل پر اسرائیلی حملے کو بین الاقوامی قانون کی سنگین خلاف ورزی قرار دے دیا

   پیر کے روز ایران نے کہا تھا کہ اسرائیل نے اوین جیل کو نشانہ بنایا جس کی وجہ سے جیل کی عمارت کے کچھ حصوں کو نقصان پہنچا۔

   اقوام متحدہ کے انسانی حقوق کے دفتر نے اب اس حملے پر تبصرہ کرتے ہوئے اسے بین الاقوامی قانون کی ’سنگین خلاف ورزی‘ قرار دیا ہے۔

   ترجمان تھمین الخیطان نے جنیوا میں اسرائیل کا نام لیے بغیر صحافیوں کو بتایا کہ اوین جیل فوجی تنصیب نہیں ہے اور اسے نشانہ بنانا بین الاقوامی انسانی قوانین کی سنگین خلاف ورزی ہے۔

   اوین جیل میں سیاسی مخالفین، انسانی حقوق کے محافظوں اور صحافیوں سمیت ہزاروں افراد موجود ہیں۔

   ایران کی عدلیہ کے ترجمان اصغر جہانگیر نے سرکاری ٹی وی کے حوالے سے بتایا ہے کہ حملے کے بعد کم از کم ایک شخص ہلاک ہوا ہے۔

2. 24 جون 2025ٹرمپ نے نیتن یاہو کے ساتھ فون کال میں ’غیر معمولی طور پر براہ راست‘ بات چیت کی

   بی بی سی کے امریکی پارٹنر سی بی ایس سمجھتے ہیں کہ ٹرمپ اسرائیل کے وزیر اعظم بنیامن نیتن یاہو کے ساتھ غیر معمولی طور پر مستحکم اور براہ راست بات چیت کر رہے تھے کہ جنگ بندی کو برقرار رکھنے کے لیے کیا کرنے کی ضرورت ہے۔

   سی بی ایس کی رپورٹ کے مطابق وزیر اعظم صورتحال کی سنگینی اور صدر ٹرمپ کے خدشات کو سمجھتے ہیں۔

   جیسا کہ ہم آپ کو بتاتے رہے ہیں کہ اسرائیلی وزیراعظم نیتن یاہو کے دفتر نے ایک بیان جاری کیا جس میں کہا گیا کہ وزیر اعظم کی ٹرمپ سے بات چیت کے بعد اب اسرائیل نے ایران پر ’مزید حملوں سے گریز‘ کیا ہے۔

3. 24 جون 2025ایران جنگ بندی کا احترام کرے گا بشرطِ یہ کہ اسرائیل بھی ایسا ہی کرے: ایرانی صدر

   ایران کے صدر مسعود پزشکیان نے کہا ہے کہ ان کا ملک امریکی صدر ڈونلڈ ٹرمپ کی جانب سے اعلان کردہ جنگ بندی کا احترام کرے گا بشرطِ یہ کہ اسرائیل بھی اپنی شرائط پر قائم رہے۔

   ملائیشیا کے وزیر اعظم انور ابراہیم کے ساتھ ٹیلی فون پر بات چیت کرتے ہوئے پزشکیان نے کہا کہ اگر اسرائیل نے جنگ بندی کی خلاف ورزی نہیں کی تو ایران اس کی خلاف ورزی نہیں کرے گا۔

   انھوں نے کہا کہ ایرانی عوام نے ایک بار پھر ثابت کیا ہے کہ بعض مسائل اور شکایات کے باوجود وہ آخر تک دشمن کے حملے کے خلاف متحد تھے، ہیں اور متحد رہیں گے۔

4. 24 جون 2025شمالی ایران پر اسرائیلی حملوں کے بعد کی صورتحال

   بی بی سی فارسی کو ایسی تصاویر موصول ہوئی ہیں جن میں شمالی ایران کے شہر آستانہ اشرفیہ میں ایک رہائشی مکان پر اسرائیلی میزائل حملے کو دکھایا گیا ہے۔

   ایرانی میڈیا کی رپورٹس کے مطابق اس حملے میں محمد رضا سیدیغی نامی ایک ایرانی جوہری سائنسدان ہلاک ہوئے۔ یہ حملے جنگ بندی کے اعلان سے چند گھنٹے قبل کیے گئے۔

   شمالی ایران کے صوبہ گیلان کے ڈپٹی گورنر کا کہنا تھا کہ اس حملے میں چار رہائشی یونٹ مکمل طور پر تباہ ہو گئے اور دھماکے کی وجہ سے آس پاس کے کئی مکانات کو شدید نقصان پہنچا۔

   ایرانی حکام کا کہنا ہے کہ اس حملے کے نتیجے میں نو افراد ہلاک اور 33 زخمی ہوئے۔

5. 24 جون 2025ایران میں فوجی آپریشن ’ایک بڑا قدم‘ ہے: اسرائیلی صدر

   اسرائیل کے صدر آئزک ہرزوگ نے جنوبی شہر بیرشیبہ میں رات گئے ایرانی حملے کے مقام پر انگریزی میں ایک پریس کانفرنس کی۔ انھوں نے کہا کہ اسرائیل نے کامیابی کے ساتھ ’اسرائیل، خطے اور آزاد دنیا پر ایرانی جوہری خطرے کو ختم کر دیا ہے۔‘

   ہرزوگ نے اسرائیل کے فوجی آپریشن میں شامل جماعتوں کا شکریہ ادا کیا، ملک کے سیاسی رہنماؤں، اسرائیلی فوج، امریکی صدر ٹرمپ اور امریکی فضائیہ سب کا شکریہ ادا کیا۔

   ایکس پر بعد میں ایک پوسٹ میں ہرزوگ نے کہا کہ وہ شہر میں رات گئے ہلاک ہونے والے چار اسرائیلیوں کے اہل خانہ کے ساتھ تعزیت کا اظہار کرتے ہیں۔

   انھوں نے مزید کہا کہ انھیں امید ہے کہ اسرائیل ’اندرونی طور پر پائی جانے والی کشمکش‘ سے آگے بڑھ سکتا ہے اور اس لمحے کو ’خیر سگالی‘ اور ’تکلیف دہ معاملات پر قومی معاہدوں‘ میں تبدیل کر سکتا ہے۔

6. 24 جون 2025ایران کے اندر ’کریک ڈاؤن‘ کا خدشہ بڑھ گیا ہے, پریزاد نوبخت، بی بی سی فارسی

   اگرچہ ایران اور اسرائیل کے درمیان امریکہ کی ثالثی میں جنگ بندی پر توجہ مرکوز ہے، لیکن ایران کے اندر سے ملنے والی اطلاعات خوف اور جبر کے بڑھتے ہوئے ماحول کی نشاندہی کرتی ہیں۔

   تجزیہ کاروں اور کارکنوں نے متنبہ کیا ہے کہ جیسے جیسے لڑائی کی شدت میں کمی آرہی ہے، تہران اپنے ملک میں دوبارہ کنٹرول حاصل کرنے کے لیے تیزی سے آگے بڑھ سکتا ہے خاص طور پر ایران کے سکیورٹی نظام میں دراندازی میں اسرائیل کی واضح کامیابی کے بعد۔

   انٹیلی جنس کی ان خلاف ورزیوں نے ایران کے حکمران حلقوں میں بڑے پیمانے پر خوف و ہراس پیدا کر دیا ہے۔

   آج صوبہ کرمان شاہ کے پراسیکیوٹر نے اعلان کیا کہ 115 افراد کو ’سکیورٹی میں خلل ڈالنے‘ کے الزام میں گرفتار کیا گیا ہے۔ ان میں ایک یورپی شہری بھی شامل ہے جس پر جاسوسی کا الزام ہے۔

   حامد رضا کریمی نے کہا کہ حراست میں لیے گئے افراد کی ایک چھوٹی سی تعداد کو جاسوسی کے الزامات کا سامنا ہے جبکہ زیادہ تر پر ’نظام کے خلاف پروپیگنڈا‘ کرنے کا الزام ہے۔

   حالیہ دنوں میں کم از کم تین افراد کو سزائے موت دی جا چکی ہے۔

   اسی طرح کے الزامات کے تحت متعدد شہروں میں درجنوں مزید افراد کو حراست میں لیا گیا ہے، جن کا تعلق اکثر سوشل میڈیا پر اظہارِ خیال کرنے یا مشتبہ جاسوسی سے ہوتا ہے۔

   ملک کی عدلیہ کے ایک ترجمان نے کہا ہے کہ ایرانی پارلیمنٹ نے جاسوسی پر قانونی پابندیوں میں نرمی کی ہے، جس سے حکام کو ’دراندازوں اور جاسوسوں‘ کو زیادہ تیزی سے اور سخت سزا دینے کی اجازت مل گئی ہے۔

   وہ کہتے ہیں کہ ’پچھلے قانون کے تحت اسرائیل کے ساتھ جنگ کے دوران گرفتار کیے گئے بہت سے لوگوں پر مقدمہ نہیں چلایا جا سکتا تھا۔ اب پارلیمنٹ نے مثالی سزائیں دینے کے لیے ہمارے ہاتھ کھول دیے ہیں۔‘

7. 24 جون 2025جنگ بندی کا عمل پیچیدگیوں سے بھرا ہوا ہے, گیری او ڈونوگو، بی بی سی نیوز

   حالات ہر لمحے تبدیل ہو رہے ہیں۔

   ہم نے امریکی صدر ڈونلڈ ٹرمپ کو نیٹو سربراہ اجلاس کے لیے وائٹ ہاؤس سے نکلتے ہوئے دیکھا، وہ گزشتہ رات اپنے سوشل میڈیا پلیٹ فارم پر جنگ بندی کے اعلان کے بعد اسرائیل کے اقدامات پر برہم تھے۔

   لیکن ایئر فورس ون میں سوار ہونے کے کچھ ہی دیر بعد انھوں نے ایک بار پھر پوسٹ کیا کہ ’جنگ بندی دوبارہ شروع ہو گئی ہے۔‘ انھوں نے دعویٰ کیا کہ ’اسرائیلی طیارے موجود تھے جس کے بعد وہ ایرانی فضائی حدود سے ’دوستانہ انداز میں ہاتھ ہلاتے ہوئے‘ واپس روانہ ہوئے۔‘

   ٹرمپ اور بنیامن نیتن یاہو کے درمیان ٹیلیفونک رابطہ ہوا دونوں کے درمیان گفتگو ہوئی۔ رپورٹس میں بتایا گیا ہے کہ امریکی صدر اسرائیلی وزیر اعظم کے ساتھ ’باضابطہ طور پر جنگ کے حوالے سے اپنے موقف اظہار کیا۔‘ جنگ بندی کا آغاز اکثر مشکل سے ہوتا ہے اور وائٹ ہاؤس کو امید ہے کہ معاملات ٹھیک ہو جائیں گے۔

   لیکن جیسا کہ ہم جانتے ہیں کہ مشرق وسطیٰ میں بہت سی امیدیں زندہ بھی ہیں اور بہت سی مر بھی چکی ہیں۔ جنگ بندی امن جیسی چیز نہیں ہے اور اس کے لیے مذاکرات کی ضرورت ہوگی۔ یہ کیا شکل اختیار کرتا ہے اور اس کے مقاصد کیا ہیں یہ انتہائی متنازعہ ہوگا۔

   ایران کے 400 کلو گرام افزودہ یورینیم کا سوال ہے۔ اس میں کوئی شک نہیں کہ امریکہ اور اسرائیل چاہتے ہیں کہ زمین پر موجود معائنہ کار اس بات کا جائزہ لیں کہ انھوں نے جوہری تنصیبات میں موجود مشینری کو حملے کے بعد کتنے سال پہلے کے دور میں دھکیلنے کا کام کیا ہے۔

   یہاں ہر قدم پیچیدگیوں سے بھرا ہوا ہے۔

8. 24 جون 2025ایران اور اسرائیل کی سڑکوں پر جنگ بندی کے بعد کے مناظر

   جنگ بندی کے ابتدائی گھنٹوں کے دوران ایران اور اسرائیل سے موصول ہونے والی چند تصاویر۔

   یہ دو تصاویر تہران سے موصول ہوئی ہیں:

   اور اب آپ نیچے دو تصاویر میں منگل کے روز جنگ بندی کے بعد تل ابیب کے مناظر دیکھ سکتے ہیں:

9. 24 جون 2025ایران میں ’حکومت کی تبدیلی نہیں چاہتے،‘ ٹرمپ

   امریکہ صدر ڈونلڈ ٹرمپ نیدرلینڈز میں نیٹو سربراہ اجلاس میں شرکت کے لیے منگل کے روز امریکہ سے روانہ ہوئے اپنے سفر کے دوران ایئر فورس ون میں صحافیوں سے گفتگو کی۔

   سفر کے دوران امریکی صدر سے جب یہ پوچھا گیا کہ کیا وہ ایران میں حکومت کی تبدیلی دیکھنا چاہتے ہیں تو اس کے جواب میں امریکی صدر نے کہا کہ ’نہیں۔ میں یہ نہیں چاہتا۔ میں جتنی جلدی ممکن ہو سب کچھ پرسکون دیکھنا چاہتا ہوں۔‘

   ٹرمپ نے مزید کہا کہ ’حکومت کی تبدیلی افراتفری کا باعث بنتی ہے اور ہم ایسی افراتفری نہیں دیکھنا چاہتے۔‘

10. 24 جون 2025ایران کا جنگ بندی کی خلاف ورزی کا الزام، ٹرمپ کے بیان کے بعد اسرائیل کی مزید حملے نہ کرنے کی یقین دہانی

    اسرائیلی وزیر اعظم بنیامن نیتن یاہو کے دفتر سے جاری ایک بیان میں کہا گیا ہے کہ ’اسرائیل نے ایران کی طرف سے جنگ بندی کی خلاف ورزیوں‘ کے جواب میں تہران کے قریب ایک ریڈار لائن کو نشانہ بنایا ہے۔

    نیتن یاہو کے دفتر سے جاری ہونے والے ایک بیان میں کہا گیا ہے کہ ’ایران نے اسرائیل پر ایک میزائل مقامی وقت کے مطابق سات بج کر چھ منٹ پر داغا جبکہ جنگ بندی کے نفاذ کے بعد 10 بج کر 25 منٹ پر دو میزائل داغے گئے۔‘

    بیان میں کہا گیا ہے کہ ’اسرائیلی وزیر اعظم کی امریکی صدر ڈونلڈ ٹرمپ سے بات چیت کے بعد اسرائیل نے مزید حملوں سے گریز کیا۔‘

    بیان میں مزید کہا گیا ہے کہ ’ٹیلی فون پر امریکی صدر ٹرمپ نے اسرائیل کی بے پناہ تعریف کی جس نے اپنے تمام جنگی اہداف حاصل کر لیے ہیں۔‘

    بیان میں مزید کہا گیا ہے کہ صدر ٹرمپ نے جنگ بندی پر بھی اعتماد کا اظہار کیا۔

    تاہم دوسری جانب تہران نے جنگ بندی شروع ہونے کے بعد نئے حملے شروع کرنے کی تردید کی ہے۔

11. 24 جون 2025تہران میں ایک جانب حکومت کے حامی جشن منا رہے ہیں وہیں کچھ کو یہ خدشہ بھی ہے کہ اب آگے کیا ہوگا

    ہمیں ایرانی دارالحکومت تہران کے اندر سے تصاویر موصول ہوئی ہیں کہ جن میں ایرانی حکومت کے کچھ حامیوں کو ایران کا جھنڈا تھامے موٹر سائیکلوں اور گاڑیوں پر سوار دکھایا گیا ہے۔

    فوٹیج سے پتہ چلتا ہے کہ سڑکوں پر موجود حکومت کے حامی افراد سپیکروں سے حکومت کی طاقت کی تعریف کرنے والی اونچی آواز میں نغمے چلا رہے ہیں۔

    تاہم دوسری جانب ایران میں ہی چند لوگ اس بارے میں بھی اپنی تشویش کا اظہار کر رہے ہیں کہ اب آگے کیا ہونے والا ہے۔

    ایک شخص نے بی بی سی فارسی کو بتایا کہ ان کے خیال میں جنگ بندی کا اعلان صرف ایران کے سپریم لیڈر آیت اللہ علی خامنہ ای کو دھوکہ دینے کے لیے کیا گیا ہے۔

    انھوں نے کہا کہ اسرائیل اور امریکہ کا منصوبہ یہ ہے کہ ’خامنہ ای کو سامنے آنے پر مجبور کیا جائے اور اس کی کوئی اور وجہ نہیں ہے۔‘

    اس کی وجہ یہ ہے کہ اسرائیل اور امریکہ کبھی بھی بغیر کسی وجہ کے کوئی فیصلہ نہیں کرتے۔

12. 24 جون 2025ٹرمپ کی جانب سے سخت زبان کا استعمال اس بات کی علامت ہے کہ وہ کتنے مایوس ہیں

    میں اپنے دن کا زیادہ تر وقت وائٹ ہاؤس میں گزارتا ہوں اور میں اکثر پریس پول کا حصہ رہتا ہوں یا صدر ڈونلڈ ٹرمپ کے ساتھ ان کے امریکہ کے دوروں پر سفر کرتا ہوں۔

    واشنگٹن ڈی سی سے بی بی سی کے نامہ نگار برنڈ ڈیبسمین جونیئر کا کہنا ہے کہ شاذ و نادر ہی میں نے امریکی صدر کو اس طرح کی زبان استعمال کرتے ہوئے سُنا اور دیکھا ہے جو انھوں نے منگل کی صبح استعمال کی۔

    اُن کا کہنا تھا کہ ’ٹرمپ اپنے غصے کے لمحات کو ٹروتھ سوشل کے لیے محفوظ رکھتے ہیں۔ وہ ایک ایسے شخص ہیں جو کم از کم عوامی طور پر ایک ٹھنڈے اور سوچے سمجھے کر بات کرنے والے ایک فرد کے طور پر سامنے آنا پسند کرتے ہیں اور کچھ مواقع پر میں نے انھیں میڈیا کے سامنے کھینچتے دیکھا ہے، یہ صحافیوں کو ’احمقانہ‘ یا ’مضحکہ خیز‘ سوالات کے لئے تنقید کا نشانہ بناتے ہیں۔‘

    برنڈ ڈیبسمین کے مطابق ’وائٹ ہاؤس کے جنوبی لان میں دنیا بھر کے میڈیا کے نمائندوں اور کیمروں کے سامنے ان کی جانب سے نازیبا الفاظ کا استعمال شاید اس بات کی علامت ہے کہ وہ متحارب فریقوں سے کتنے مایوس ہو چکے ہیں اور بظاہر اسرائیل کو ان کے غصے کا خمیازہ بھگتنا پڑ رہا ہے۔‘

    ’ٹرمپ نے بارہا اس عزم کا اظہار کیا ہے کہ وہ غزہ اور یوکرین سمیت تنازعات کا خاتمہ کریں گے۔‘

    برنڈ کا کہنا ہے کہ ’حال ہی میں، ہم نے انھیں روانڈا اور جمہوریہ کانگو، انڈیا اور پاکستان کے درمیان لڑائی کو ختم کرنے کا کریڈٹ لیتے ہوئے دیکھا ہے۔ تاہم، یہ تنازعات زیادہ تر امریکیوں کے ذہن سے بہت دور تھے۔‘

    ’امریکی انتظامیہ کی نظر میں ایران اور اسرائیل کے درمیان جنگ بندی خارجہ پالیسی کی ایک اہم کامیابی ہوگی جس سے وہ ایک اہم کامیابی کی جانب اشارہ کر سکتے تھے۔‘

    اُن کا کہنا ہے کہ ’گزشتہ رات ہی ہم نے دیکھا کہ وائٹ ہاؤس کے اندر سے لوگ ٹرمپ کے ’امن‘ کے لیے کی جانے والی کوششوں کی تعریف کرتے رہے ہیں۔ لیکن فی الحال، ایسا نہ ہونے پر وہ پریشان اور غصے میں دکھائی دیتے ہیں۔‘

13. 24 جون 2025لاہور ہائیکورٹ نے نو مئی کو توڑ پھوڑ سے متعلق آٹھ مقدمات میں عمران خان کی درخواست ضمانت خارج کر دی

    لاہور ہائیکورٹ نے کور کمانڈر ہاؤس پر حملے سمیت نو مئی کے واقعات سے جڑے آٹھ مقدمات میں پاکستان کے سابق وزیر اعظم عمران خان کی درخواست ضمانت خارج کر دی ہے۔

    یاد رہے کہ عمران خان اس وقت اڈیالہ جیل میں قید ہیں۔ رواں سال جنوری میں انھیں 190 ملین پاؤنڈز کیس میں 14 سال قید کی سزا سنائی گئی تھی جبکہ اس سے قبل توشہ خانہ کیس میں ان کی سزا معطل ہو گئی تھیں۔ عدت کے دوران نکاح اور سائفر کیس میں عمران خان کو بری کر دیا گیا تھا۔

    جسٹس شہباز رضوی پر مشتمل دو رکنی بینچ نے اِن درخواستوں پر گذشتہ روز دلائل سننے کے بعد فیصلہ محفوظ کیا تھا جو آج یعنی منگل کے روز سنایا گیا۔

    عمران خان نے اپنے وکیل بیرسٹر سلمان صفدر کے ذریعے 15 جنوری کو یہ درخواستیں لاہور ہائیکورٹ میں دائر کی تھیں۔

    سابق وزیر اعظم کو نو مئی سے متعلق اِن مقدمات میں نامزد کیا گیا تھا۔ عمران خان پر یہ الزام عائد ہے کہ انھوں نے تحریک انصاف کے حامیوں کو عسکری ٹاور پر حملے، شادمان جلاؤ گھیراؤ، راحت بیکری کے قریب گاڑیاں نذر آتش کرنے پر اکسایا تھا۔

14. 24 جون 2025ایران اور اسرائیل کے درمیان جنگ بندی نافذ العمل ہے، امریکی صدر کا اصرار

    امریکی صدر ڈونلڈ ٹرمپ نے سوشل پلیٹ فارم ٹروتھ پر اپنے ایک بیان میں اس بات پر زور دیا کہ ایران اور اسرائیل کے درمیان ’جنگ بندی نافذ العمل ہے۔‘

    امریکی صدر نے لکھا کہ ’اسرائیل ایران پر حملہ نہیں کرے گا۔ ایران کی جانب جانے والے اسرائیلی لڑاکا تیارے ’دوستانہ انداز میں ہاتھ ہلاتے ہوئے ‘ واپس گھر (اسرائیل) کی طرف روانہ ہوئے۔‘

    انھوں نے اسی پوسٹ میں مزید یہ بھی لکھا کہ ’کسی کو کوئی نقصان نہیں پہنچے گا، جنگ بندی نافذ ہے! اس معاملے پر آپ کی توجہ کے لئے آپ کا شکریہ!‘

    واضح رہے کہ امریکی صدر کے ان سخت بیانات کے بعد اسرائیلی میڈیا اور ایگزیوس کی اطلاعات کے مطابق امریکی صدر ڈونلڈ ٹرمپ اور اسرائیلی وزیر اعظم بنیامن نیتن یاہو کے درمیان فون پر بات چیت بھی ہوئی ہے۔

15. 24 جون 2025ایران میں اسرائیلی حملوں میں 600 سے زائد افراد ہلاک: ایرانی وزیر صحت

    ایران کے وزیر صحت کی جانب سے جاری ہونے والے ایک بیان میں کہا گیا ہے کہ 13 جون سے اب تک اسرائیلی حملوں میں 606 افراد ہلاک ہو چکے ہیں۔

    محمد رضا ظفرغانی کا کہنا ہے کہ پانچ ہزار سے زائد افراد زخمی ہوئے ہیں اور انھیں طبی امداد فراہم کی جا رہی ہے۔

    ایرانی وزیر خارجہ کا یہ بھی کہنا ہے کہ ایران میں گزشتہ 24 گھنٹوں کے دوران بدترین حملے ہوئے ہیں جن میں 107 افراد ہلاک ہوئے ہیں۔

    حکومتی پابندیوں کی وجہ سے بی بی سی کے صحافی ایران کے اندر سے رپورٹنگ نہیں کر سکتے، اس لیے نقصان کی تصدیق کرنا مشکل ہے۔

    اس تنازعے پر نظر رکھنے والے انسانی حقوق کے ایک گروپ، ایران میں انسانی حقوق کے کارکنوں نے کہا ہے کہ ہلاک ہونے والوں کی تعداد سرکاری اعداد و شمار سے تقریباً دو گُنا ہے۔

16. 24 جون 2025میں ایران سے بھی خوش نہیں ہوں: ٹرمپ

    امریکی صدر ڈونلڈ ٹرمپ کا یہ بھی کہنا ہے کہ اسرائیل اور ایران دونوں نے اُن کی جانب سے اعلان کردہ جنگ بندی کی خلاف ورزی کی ہے اور وہ ایران سے بھی خوش نہیں ہیں۔

    صحافیوں سے بات کرتے ہوئے اُن کا کہنا تھا کہ ’میرے خیال میں انھوں نے ایسا دانستہ طور پر نہیں کیا مُجھے یہ بات بھی پسند نہیں آئی کہ اسرائیلی نے آج صبح حملے کیے اور میں دیکھوں گا کہ میں اُنھیں رکوا سکتا ہوں۔‘

    امریکی صدر کا یہ بھی کہنا تھا کہ ’ایران اب کبھی بھی دوبارہ جوہری صلاحیت حاصل نہیں کر سکے گا۔‘

17. 24 جون 2025صدر ٹرمپ اسرائیل سے ناخوش: ’معاہدے کے بعد اسرائیل نے حملے کیے، اُسے ایسا نہیں کرنا چاہیے تھا‘

    امریکی صدر کا کہنا ہے کہ وہ اُن کی جانب سے جنگ بندی کے اعلان کے بعد اسرائیل کی جانب سے کیے جانے والے اقدامات سے خوش نہیں ہیں۔

    منگل کی صبح صحافیوں سے بات کرتے ہویے اُن کا کہنا تھا کہ ’میرے خیال میں (جنگ بندی کے نفاذ کے بعد) ایک راکٹ چلا اور اب اسرائیل بدلہ لینے جا رہا ہے۔ انھیں تحمل سے کام لینا چاہیے۔‘

    اُن کا یہ بھی کہنا تھا کہ انھیں گذشتہ روز رونما ہونے والے بہت سے واقعات پسند نہیں آئے۔

    ’مُجھے یہ بات پسند نہیں آئی کے ہمارے معاہدے کرنے کے بعد اسرائیل نے حملے کیے انھیں حملے نہیں کرنے چاہیے تھے۔‘

    نازیبا الفاظ استعمال کرتے ہوئے صدر ٹرمپ کا کہنا تھا ’یہ وہ دو مُلک ہیں کہ جو ایک طویل عرصے سے شدت سے لڑ رہے ہیں اور نہیں جانتے کہ وہ کیا کر رہے ہیں۔‘

18. 24 جون 2025اسرائیل ایران پر بمباری سے باز رہے، ٹرمپ کی تنبیہ

    امریکی صدر ڈونلڈ ٹرمپ نے اسرائیل کو خبردار کیا ہے کہ اگر اس نے ایران پر بمباری کی تو یہ جنگ بندی کی بڑی خلاف ورزی ہوگی۔

    سوشل پلیٹ فار ٹروتھ پر ایک پیغام میں امریکی صدر نے اسرائیل کو مخاطب کرتے ہوئے کہا کہ ’بم نہ گرائیں، اگر آپ نے ایسا کیا تو یہ ایک بڑی خلاف ورزی ہوگی۔ اپنے پائلٹس کو فوراً واپس بلائیں۔‘

    امریکی صدر کی جانب سے یہ بیان اسرائیل کے ایران پر جنگ بندی کی خلاف ورزی کے الزامات اور ایران پر دوبارہ بمباری کے اعلانات کے بعد سامنے آیا ہے۔

    جنگ بندی کے نفاذ کے کُچھ دیر بعد اسرائیلی کی جانب سے یہ دعویٰ کیا تھا کہ ایران نے دو میزائل داغے ہیں جنھیں تباہ کر دیا گیا ہے اور اسرائیلی وزیرِ دفاع نے اس کے ردِ عمل میں سخت جواب دینے کا اعلان کیا تھا۔

19. 24 جون 2025ہم نے اپنے ایک واضح بیان کے ساتھ ایران کی حمایت کی: روس

    روس کا کہنا ہے کہ اس نے جوہری تنصیبات پر امریکی اور اسرائیلی حملوں کی مذمت میں ’واضح موقف‘ کے ساتھ ایران کی حمایت کی ہے اور روس ایران کے ساتھ اپنے تعلقات کو مزید وسعت دینے کا ارادہ رکھتا ہے۔

    کریملن کے ترجمان دمتری پیسکوف نے بعض تجزیہ کاروں کی اس تنقید کے بارے میں کہ روس نے ایران کو خاطر خواہ مدد فراہم نہیں کی ہے، کے جواب میں کہا کہ ’بہت سے لوگ آگ پر تیل ڈال کر ماسکو اور تہران کے درمیان تعلقات کو خراب کرنے کی کوشش کر رہے ہیں۔‘

    انھوں نے کہا کہ ایرانی وزیر خارجہ عباس عراقچی نے روس کے صدر ولادیمیر پوتن کے ساتھ حالیہ ملاقات میں ماسکو کے کردار کو انتہائی قابل قدر قرار دیا۔

    عباس عراقچی نے ایران پر امریکی حملوں کی مذمت کرنے پر ولادیمیر پوتن کا شکریہ ادا کیا اور کہا کہ روس ’ایک اہم مقام پر کھڑا ہے۔‘

20. 24 جون 2025ایران کی جانب سے جنگ بندی کی خلاف ورزی کے اسرائیلی الزام کی تردید، اب تک کی تازہ صورتحال

    گزشتہ چند گھنٹوں کے دوران ایران اسرائیل تنازع میں کچھ ڈرامائی تبدیلیاں دیکھنے میں آئی ہیں۔ آئیے ان تبدیلیوں پر ایک نظر ڈالتے ہیں:

    • امریکی صدر ڈونلڈ ٹرمپ نے سوشل میڈیا پر پوسٹ میں کہا کہ ایران اور اسرائیل کے درمیان جنگ بندی نافذ العمل ہوگئی ہے۔
    • تاہم صرف امریکی صدر کی جانب سے بیان کے صرف ایک گھنٹے کے بعد ہی اسرائیل نے کہا کہ وہ امریکہ کی جنگ بندی کی تجویز پر آمادہ ہو گیا ہے جبکہ ایران نے پہلے کہا تھا کہ اگر اسرائیل نے ایسا کیا تو وہ حملے بند کر دے گا۔
    • اس کے بعد اسرائیلی فوج کی جانب سے جاری ہونے والے ایک بیان میں کہا گیا کہ انھوں نے ایران کی جانب سے داغے گئے میزائلوں کی نشاندہی کی ہے اور انھیں شمالی اسرائیل کے اوپر سے روکا گیا ہے۔
    • ایران نے میزائل داغے جانے کے الزام سے انکار کیا ہے، لیکن اسرائیل کی دفاعی افواج کا اصرار ہے کہ اسرائیل ’بھرپور طاقت کے ساتھ‘ اس حملے کا جواب دے گا۔
    • جنگ بندی شروع ہونے سے پہلے فریقین کے درمیان رات بھر شدید گولہ باری کا تبادلہ ہوا۔
    • ایران کے سرکاری میڈیا کا کہنا ہے کہ اسرائیل کی جانب سے داغے جانے والے میزائلوں نے دارالحکومت اور دیگر شہروں کو نشانہ بنایا ہے جس کے نتیجے میں کم از کم نو افراد ہلاک ہو چکے ہیں جن میں ایک ایرانی جوہری سائنسدان بھی شامل ہیں۔
    • اسرائیل میں بیرشیبا میں کم از کم چار افراد ہلاک اور 22 زخمی ہوئے ہیں۔