شام میں دولتِ اسلامیہ کے جنگجو نے تین امریکی فوجی ہلاک کر دیے: امریکی افواج
،تصویر کا ذریعہAFP via Getty Images
امریکی افواج کا کہنا کہ شام میں شدت پسند تنظیم دولتِ اسلامیہ کے مبینہ حملے میں دو امریکی فوجی اور ایک امریکی مترجم ہلاک ہو گیا ہے جبکہ اس حملے میں امریکی افواج کے تین اہلکار زخمی بھی ہوئے ہیں۔
امریکی صدر ڈونلڈ ٹرمپ نے کہا ہے کہ شام میں امریکہ کے خلاف ’داعش کا حملے پر بہت سخت جواب دیا جائے گا۔‘ صدر ٹرمپ نے کہا کہ زخمی امریکی فوجیوں کی حالت بہتر ہے۔ شام کی حکومت نے بھی اس حملے کی مذمت کی ہے۔
امریکی سینٹ کام نے داعش کے حملے میں ہلاک ہونے والے فوجیوں کی شناخت نہیں جاری کی ہے۔ سینٹ کام نے سوشل میڈیا سائٹ ایکس پر اپنی پوسٹ میں کہا کہ شدت پسند تنظیم دولتِ اسلامیہ کے ایک جنگجو نے گھات لگا کر حملہ کیا‘ جبکہ پینٹاگون کا کہنا ہے کہ ابتدائی تحقیقات کے مطابق ایسا لگتا ہے کہ اس حملے میں داعش ملوث ہے۔
اس حملے کی ذمہ داری تاحال کسی گروہ نے قبول نہیں کی ہے لیکن بی بی سی مانٹیرنگ کے مطابق دولتِ اسلامیہ کے حامی اس حملے پر خوشی کا اظہار کر رہے ہیں۔
پینٹاگون کے ترجمان کا کہنا ہے کہ یہ حملہ شام کے وسط میں پلمائراہ کے علاقے میں ہوا اور یہ شام کا وہ علاقہ ہے جہاں صدر احمد الشرع کا کنٹرول نہیں ہے۔
شام کی سرکاری نیوز ایجنسی کا کہنا ہے کہ اس حملے میں شام کی سکیورٹی فورسز میں شامل دو افراد بھی زخمی ہوئے ہیں۔
امریکہ کے سیکریٹری دفاع کا کہنا ہے کہ ’میں یہ واضح کر دینا چاہتا ہوں کہ اگر آپ دنیا میں کسی بھی جگہ پر امریکیوں کو نشانہ بنائیں گے تو چاہے آپ دنیا میں کہیں بھی ہوں آپ کو فکر مند ہونا چاہیے کہ امریکہ آپ کو تلاش کرے گا اور بے رحمی سے مارے گا۔‘
شام میں نئی حکومت کے قیام کے بعد دولتِ اسلامیہ کی کارروائیوں میں کمی آئی ہے اور ملک کے صدر احمد الشرع کے امریکہ سے تعلقات بھی بہتر ہیں۔
گذشتہ ماہ شام کے صدر نے وائٹ ہاؤس میں ڈونلڈ ٹرمپ سے ملاقات کی تھی۔
شام نے حال ہی میں دولتِ اسلامیہ کا مقابلہ کرنے کے لیے ایک بین الاقوامی اتحاد میں شمولیت اختیار کی ہے جس کا مقصد نام نہاد اسلامک اسٹیٹ کے باقی ماندہ عناصر کو ختم کرنا اور مشرق وسطیٰ میں غیر ملکی عسکریت پسندوں کو روکنا ہے
اقوام متحدہ کا کہنا ہے کہ شام اور عراق میں اس گروپ کے اب بھی 5000 سے 7000 کے درمیان جنگجو موجود ہیں۔
2015 سے امریکی افواج شام میں موجود ہیں تاکہ دولتِ اسلامیہ کے خلاف کے کاروائیوں کے لیے دیگر فورسز کو تربیت فراہم کی جا سکے۔
