جنگ کے خاتمے کے لیے ’باوقار فریم ورک‘ کے حصول کے لیے تیار ہیں: ایرانی صدر

ایرانی خبر رساں ادارے کے مطابق صدر پزشکیان کا مزید کہنا تھا کہ ’ایران نے ہمیشہ سفارت کاری کے اصولوں اور معاہدوں کی روح کی پاسداری کی ہے۔ اب وقت آ گیا ہے کہ دوسرا فریق بھی اپنے قول و فعل دونوں سے بین الاقوامی وعدوں کی پاسداری کرے۔‘

خلاصہ

امریکی فوج کے جنوبی ایران پر نئے حملے
ایران کے ساتھ معاہدہ اب بھی ممکن ہے: امریکی وزیر خارجہ
افزودہ یورینیم امریکہ کے حوالے کیا جائے گا، یا ایران کے ساتھ مل کر وہیں تباہ کیا جائے گا: ٹرمپ
ایرانی صدر پزشکیان نے ملک میں انٹرنیٹ کی بحالی کا حکم جاری کر دیا
اسرائیلی وزیر اعظم کا لبنان میں حزب اللہ کے خلاف حملے سخت کرنے کا اعلان

لائیو کوریج

25 مئ 2026امریکہ ایرانی ٹیم کے بلا رکاوٹ اس ایونٹ میں شمولیت کو یقینی بنانے کا پابند ہے: اسماعیل بقائی
،تصویر کا ذریعہGetty Images
ایرانی وزارتِ خارجہ کے ترجمان اسماعیل بقائی نے 2026 فیفا ورلڈ کپ میں ایرانی قومی فٹبال ٹیم کی شرکت سے متعلق قیاس آرائیوں پر ردِعمل دیتے ہوئے کہا ہے کہ امریکہ ایرانی ٹیم کے بلا رکاوٹ اس ایونٹ میں شمولیت کو یقینی بنانے کا پابند ہے۔
یہ بیان اُن رپورٹس کے بعد سامنے آیا جن میں کہا گیا تھا کہ ایرانی فٹبال فیڈریشن کے صدر مہدی تاج نے امریکی ویزا کے حصول میں بار بار پیش آنے والی مشکلات کے باعث قومی ٹیم کا تربیتی کیمپ امریکہ کے بجائے میکسیکو منتقل کرنے کا فیصلہ کیا ہے۔
ایران کے خبر رساں ادارے ارنا کے مطابق سوموار 25 مئی کو اپنی ہفتہ وار پریس بریفنگ کے دوران اسماعیل بقائی سے سوال کیا گیا کہ آیا فیفا ممکنہ امریکی رکاوٹوں کا مؤثر طور پر مقابلہ کر سکتا ہے یا نہیں۔ اس پر انھوں نے کہا کہ اگرچہ ٹورنامنٹ کے انتظامی امور کے حوالے سے فیفا بنیادی رابطہ کا ادارہ ہے، تاہم امریکہ بھی شریک میزبان ہونے کے ناطے ذمہ داری رکھتا ہے۔
انھوں نے کہا کہ ’امریکہ اس بات کا پابند ہے کہ وہ ایرانی قومی ٹیم کی بغیر کسی رکاوٹ شرکت کے لیے تمام ضروری سہولتیں فراہم کرے۔‘
،تصویر کا ذریعہGetty Images
اسماعیل بقائی نے واضح کیا کہ تربیتی کیمپ کو منتقل کرنے کا فیصلہ فیفا، میکسیکن فٹبال فیڈریشن اور متعلقہ امریکی حکام سے مکمل مشاورت کے بعد کیا گیا تاکہ ممکنہ رکاوٹوں کو پہلے ہی دور کیا جا سکے۔
انھوں نے اس بات پر زور دیا کہ ایرانی ٹیم کا سفر مکمل طور پر کھیلوں کے مقاصد کے تحت اور فیفا کے ضوابط کے مطابق ہوگا۔
ترجمان وزارتِ خارجہ نے امید ظاہر کی کہ تمام انتظامات بین الاقوامی فٹبال کے اصولوں کے مطابق کیے جا رہے ہیں تاکہ ایرانی ٹیم عالمی سطح پر مقابلوں میں شرکت کے دوران کسی امتیازی سلوک یا رکاوٹ کا سامنا نہ کرے۔
،تصویر کا ذریعہGetty Images
25 مئ 2026سعودی عرب میں مناسکِ حج کا آغاز
،تصویر کا ذریعہGetty Images
حج 2026 کی ادائیگی کے لیے لاکھوں کی تعداد میں سعودی عرب پہنچنے والے مسلمانوں نے منیٰ میں خیموں سے بنے شہر کا رُخ کرنا شروع کر دیا ہے۔
سعودی عرب میں مناسکِ حج کا آغاز ہو چُکا ہے اور عازمین حج کی منیٰ آمد کا سلسلہ جاری ہے۔
خبر رساں ادارے اے ایف پی کے مطابق سعودی حج پاسپورٹ فورسز کے کمانڈر صالح بن سعد المربع نے جمعہ کو بتایا تھا کہ بیرون ملک سے 15 لاکھ سے زائد عازمین حج کی ادائیگی کے لیے سعودی عرب پہنچ چکے ہیں۔
سعودی حکام کے مطابق حج کے انتظامات مکمل کر لیے گئے ہیں جبکہ مکہ مکرمہ، منیٰ، عرفات اور دیگر مقدس مقامات پر حاجیوں کو سہولیات کی فراہمی کے لیے خصوصی اقدامات کیے گئے ہیں۔
ان اقدامات میں حکومت کی جانب سے صحت، ٹرانسپورٹ اور مختلف زبانوں میں رہنمائی سمیت دیگر وسیع تر انتظامات شامل ہیں جبکہ سعودی وزارت صحت کے مطابق رواں سال پہلی مرتبہ عازمین حج کو طبی سہولیات فراہم کرنے کے لیے ڈرونز کا استعمال بھی کیا جا رہا ہے۔
،تصویر کا ذریعہGetty Images
،تصویر کا ذریعہGetty Images
،تصویر کا ذریعہGetty Images
،تصویر کا ذریعہGetty Images
25 مئ 2026روسی سرحد کے قریب برطانوی وزیرِ دفاع کو لے جانے والے رائل ایئرفورس کے طیارے کے سگنل جام, ایمی والکر، بی بی سی نیوز
،تصویر کا ذریعہGetty Images
برطانوی وزیرِ دفاع جان ہیلی کو لے جانے والے رائل ایئر فورس کے ایک طیارے کا سگنل رواں ہفتے روسی سرحد کے قریب پرواز کے دوران جام کر دیا گیا۔
برطانوی اخبار ’دی ٹائمز‘ کے مطابق یہ واقعہ جمعرات کے روز اُس وقت پیش آیا جب جان ہیلی ایسٹونیا میں تعینات برطانوی فوجیوں سے ملاقات کے بعد برطانیہ واپس جا رہے تھے۔
اطلاعات کے مطابق اس سائبر حملے کے پیچھے روس کا ہاتھ ہونے کا شبہ ہے۔ حملے کے باعث طیارے کا جی پی ایس نظام تقریباً تین گھنٹے تک معطل رہا، جس کے بعد پائلٹس کو متبادل نیویگیشن سسٹم استعمال کرنا پڑا۔
یہ واقعہ اُس خبر کے سامنے آنے کے ایک دن بعد سامنے آیا ہے کہ جس میں یہ بتایا گیا تھا کہ گزشتہ ماہ بحیرۂ اسود کے اوپر دو روسی جنگی طیاروں کی جانب سے ایک برطانوی جاسوس طیارے کو ’بار بار اور خطرناک انداز‘ میں روکنے کی خبر منظرِ عام پر آئی تھی۔
تاحال یہ واضح نہیں ہو سکا کہ آیا جان ہیلی کو دانستہ طور پر نشانہ بنایا گیا تھا یا نہیں، تاہم اخبار کے مطابق طیارے کی پرواز کا راستہ ایئرکرافٹ ٹریکنگ ویب سائٹس پر دیکھا جا سکتا تھا۔
برطانوی وزارتِ دفاع سے اس معاملے پر مؤقف جاننے کے لیے رابطہ کیا گیا ہے۔
ایسٹونیا کے دورے کے دوران جان ہیلی نے روسی سرحد کے قریب نیٹو کی فوجی مشقوں میں حصہ لینے والے برطانوی فوجی اہلکاروں سے بھی ملاقات کی۔
گزشتہ ماہ پیش آنے والے واقعے میں ایک روسی ایس یو 35 جنگی طیارہ برطانوی نگرانی کرنے والے ریویٹ جوائنٹ طیارے کے انتہائی قریب آ گیا تھا، جس کے باعث طیارے کا ہنگامی دفاعی نظام فعال ہو گیا اور آٹو پائلٹ نظام عارضی طور پر بند ہو گیا تھا۔
برطانوی وزارتِ دفاع کے مطابق یہ سنہ 2022 کے بعد روس کی جانب سے سب سے خطرناک کارروائی تھی، اُس وقت ایک ’بے قابو‘ روسی پائلٹ نے بحیرۂ اسود کے اوپر ایک ریویٹ جوائنٹ طیارے پر میزائل داغ دیا تھا۔
پھر سنہ 2024 میں بھی اُس وقت کے برطانوی وزیرِ دفاع گرانٹ شیپس کو لے جانے والے رائل ائیر فورس کے طیارے کا جی پی ایس سگنل روسی حدود کے قریب پرواز کے دوران جام کر دیا گیا تھا۔
25 مئ 2026مشرق وسطیٰ کا بحران: تازہ اطلاعات
ایران کا کہنا ہے کہ وزیر خارجہ عباس عراقچی کی نیو یارک میں اقوام متحدہ کے سلامتی کونسل کے اجلاس میں شرکت متوقع تھی مگر ویزا کے مسائل کی وجہ سے یہ دورہ منسوخ کر دیا گیا ہے۔
ادھر ایرانی میڈیا کے مطابق محمد باقر قالیباف کو مزید ایک سال کے لیے بطور سپیکر پارلیمنٹ منتخب کر لیا گیا ہے۔
سنہ 2000 میں جنوبی لبنان پر 22 سالہ قبضے کے خاتمے کی سالگرہ کے موقع پر جاری ایک بیان میں لبنانی صدر جوزف عون نے کہا ہے کہ ’اسرائیل کا مکمل انخلا ایک مستقل قومی مطالبہ ہے۔ ایسا مطالبہ جس کے حصول کے لیے لبنانی حکومت مذاکرات کے ذریعے کام کر رہی ہے۔‘
ادھر اسرائیلی فوج کے ترجمان نے جنوبی لبنان کے 10 دیہاتوں کو فوری طور پر خالی کرانے کا حکم جاری کیا ہے۔
25 مئ 2026چین میں شہباز شریف کا بیان: ’ایران، امریکہ مذاکرات میں درست سمت میں پیشرفت ہو رہی ہے‘
،تصویر کا ذریعہPID
چینی سرکاری میڈیا کے مطابق پیر کو پاکستان کے وزیر اعظم شہباز شریف کی چینی صدر شی جن پنگ سے ملاقات ہوئی ہے۔
اس سے قبل شہباز شریف کی چینی وزیر اعظم سے بھی ملاقات ہوئی تھی۔
پاکستان کی طرف سے جاری کردہ ایک ویڈیو میں شہباز شریف چینی رہنماؤں سے گفتگو کرتے ہوئے کہتے ہیں کہ ’دنیا خلیجی بحران کے باعث ایک نازک مرحلے سے گزر رہی ہے اور پاکستان نے امریکہ اور ایران کے درمیان ثالثی کے لیے خلوص کے ساتھ کام کیا ہے۔‘
ان کا کہنا تھا کہ ’فیلڈ مارشل سید عاصم منیر نے نائب وزیر اعظم اسحاق ڈار کے ہمراہ ایرانی، امریکی اور خلیجی قیادت کے ساتھ مسلسل رابطوں کے ذریعے اہم کردار ادا کیا ہے۔
’ہم دعا گو ہیں کہ جلد امن بحال ہو کیونکہ درست سمت میں پیش رفت ہو رہی ہے۔ میں صدر شی جن پنگ اور چینی قیادت کا بھی شکریہ ادا کرتا ہوں جنھوں نے امن کی کوششوں اور جنگ بندی کے اقدام کی حمایت کی۔‘
انھوں نے کہا کہ ’ہمیں امن کی بحالی اور معمول کی اقتصادی سرگرمیوں کی بحالی کے لیے مل کر کام کرنا چاہیے۔‘
25 مئ 2026امریکہ کے ساتھ کئی نکات پر فیصلہ ہو چکا لیکن معاہدہ ناگزیر نہیں: ایرانی وزارت خارجہ
،تصویر کا ذریعہReuters
ایرانی وزارت خارجہ کے ترجمان اسماعیل بقائی کا کہنا ہے کہ پاکستان کی ثالثی میں امریکہ کے ساتھ مذاکرات میں کچھ پیشرفت ہوئی ہے لیکن ’اس کا یہ مطلب نہیں کہ معاہدے پر دستخط قریب ہیں۔‘
تہران میں نیوز کانفرنس کے دوران ان کا کہنا تھا کہ ’زیرِ غور کئی نکات پر فیصلہ ہو چکا ہے لیکن اس کا یہ مطلب نہیں کہ معاہدہ ناگزیر ہے۔‘
ان کا کہنا تھا کہ مذاکرات کی توجہ جنگ کے خاتمے پر ہے اور اس مرحلے پر ’ہم جوہری مسئلے کی تفصیلات پر بات نہیں کر رہے۔‘
بقائی کا مزید کہنا تھا کہ ’دھمکیاں، دباؤ، منفی تاثر دینا اور خاکے شائع کرنا اس خطے کی سیاست کا حصہ ہیں۔ ہم مخالف فریق کے تصورات اور بیانیوں سے قطع نظر میدان عمل میں اپنا کام جاری رکھتے ہیں اور حقائق دیکھتے ہیں۔‘
’ہم ایران کے قومی مفادات کے تحفظ کے لیے تیاری اور پیش رفت پر توجہ دے رہے ہیں۔ جہاں ضروری ہو، ہم جواب دیتے ہیں۔ ہمارا اپنا انداز ہے اور ہم دشمن کے انداز اور طریقہ کار کی نقل نہیں کریں گے۔‘
آبنائے ہرمز کے بارے میں ایران کی وزارت خارجہ کے ترجمان بقائی نے کہا ہے کہ اگرچہ تہران کسی قسم کا ٹول عائد نہیں کرے گا لیکن ’یہ معمول کی بات ہے کہ فراہم کی جانے والی خدمات کی قیمت ہو گی۔‘
ترجمان نے کہا کہ اس آبی گزرگاہ کا انتظام ساحلی ممالک کے پاس ہے۔ ’ہم آبنائے ہرمز سے ملحق ممالک کے ساتھ رابطے میں ہیں تاکہ وہاں سکیورٹی فراہم کی جا سکے اور ان کے مفادات کا تحفظ کیا جا سکے۔‘
بقائی کا کہنا تھا کہ کسی ممکنہ معاہدے کے حوالے سے اس بات کی ’کوئی ضمانت نہیں‘ کہ امریکہ اپنی ذمہ داریوں کو پورا کرے گا۔ مگر ان کے بقول تہران ’دھمکیوں کی پروا نہیں کرتا۔‘
جوہری معاملات پر بات چیت کے حوالے سے ایرانی ترجمان کا کہنا تھا کہ اگر مفاہمتی یادداشت کو حتمی شکل دی گئی تو دیگر موضوعات پر 60 روز کی مدت میں بات چیت ہو گی۔
تاہم انھوں نے خدشہ ظاہر کیا کہ اسرائیل ان مذاکرات کو نقصان پہنچا سکتا ہے۔
25 مئ 2026شاید آج ایران کے ساتھ کسی معاہدے پر پہنچ جائیں: امریکی وزیرِ خارجہ
،تصویر کا ذریعہGetty Images
امریکی وزیرِ خارجہ مارکو روبیو کا کہنا ہے کہ امریکہ اور ایران جنگ کے خاتمے کے لیے کسی معاہدے پر شاید آج (پیر) تک پہنچ جائیں۔
انڈیا میں صحافیوں سے بات کرتے ہوئے انھوں نے کہا کہ ’ہم اس پر اب بھی کام کر رہے ہیں۔‘
خیال رہے اس سے قبل صدر ڈونلڈ ٹرمپ نے کہا تھا کہ انھوں نے مذاکرات کاروں کو کہا ہے کہ وہ ’معاہدے کے لیے جلدی نہ کریں۔‘
تاہم دہلی میں پیر کو صحافیوں سے بات کرتے ہوئے کہا تھا کہ ’ہم اب بھی اس پر کام کررہے ہیں۔ جیسے میں نے پہلے کہا تھا کہ ہمیں لگا تھا کہ شاید کوئی خبر گذشتہ رات آجائے، لیکن شاید آج آ جائے۔‘
صحافیوں کے سوال کا جواب دیتے ہوئے مارکو روبیو نے کہا کہ ہمارے پاس ایک خاصی مضبوط تجویز ہے۔ امریکی وزیر خارجہ کے مطابق اس تجویز کے خد و خال یہ ہیں کہ آبنائے ہرمز کھول دی جائے اور وقت کا تعین کر کے جوہری امور پر مذاکرات شروع کیے جائیں۔
انھوں نے کہا کہ اس تجویز کو خلیجی ممالک اور عالمی سطح پر بھرپور حمایت حاصل ہے۔
مارکو روبیو کے مطابق: ’جس ملک سے ہم نے بات کی، وہ یہ سمجھتا ہے کہ یہ نہ صرف معقول ہے بلکہ دنیا کے لیے درست اقدام ہے۔‘
ان سے پوچھا گیا کہ پھر تاخیر کس بات کی ہے؟ مارکو روبیو نے جواب دیا کہ ایران کا نظام جواب دینے میں وقت لیتا ہے۔
انھوں نے کہا: ’یا تو ہم ایک اچھا معاہدہ کریں گے یا پھر اس معاملے سے کسی اور طرح نمٹیں گے۔‘
25 مئ 2026اسرائیلی فوج کا جنوبی لبنان میں ایک فوجی کی ہلاکت کا اعلان
،تصویر کا ذریعہAnadolu via Getty Images
اسرائیلی فوج کا کہنا ہے کہ جنوبی لبنان میں ’جھڑپوں کے دوران‘ اس کا ایک فوجی ہلاک ہو گیا ہے۔
اسرائیل نے یہ بھی اعلان کیا کہ اسی واقعے میں ایک اور فوجی شدید زخمی ہوا اور علاج کے لیے ہسپتال منتقل کیا گیا ہے۔
اسرائیلی فوجی کیسے ہلاک ہوا اور جھڑپ کس مقام پر ہوئی، اس کے بارے میں مزید تفصیلات جاری نہیں کی گئیں۔
25 مئ 2026انڈیا میں پیٹرول اور ڈیزل کی قیمت میں مزید اضافہ
،تصویر کا ذریعہAFP via Getty Images
انڈیا میں پیر کے روز پیٹرول کی قیمت میں دو روپے 61 پیسے فی لیٹر اور ڈیزل کی قیمت میں دو روپے 71 پیسے فی لیٹر اضافہ کیا گیا ہے۔
اس سے پہلے 15 مئی کو بھی انڈیا میں پیٹرول اور ڈیزل کی قیمت تین روپے فی لیٹر بڑھائی گئی تھی۔
قیمتوں میں یہ اضافہ چار برس کے طویل وقفے کے بعد کیا گیا تھا۔
اب مزید اضافے کے بعد دہلی میں ایک لیٹر پیٹرول کی قیمت 102 روپے 12 پیسے جبکہ ڈیزل کی قیمت 95 روپے 20 پیسے فی لیٹر ہو گئی ہے۔
اپوزیشن جماعت کانگریس نے انڈیا کے وزیر اعظم نریندر مودی کو تنقید کا نشانہ بنایا ہے۔
سوشل میڈیا پلیٹ فارم ایکس پر کانگریس نے لکھا: ’اپنے سرمایہ دار دوستوں کو فائدہ پہنچانے کے لیے مودی عوام کی جیب کاٹنے میں مصروف ہیں۔‘
25 مئ 2026صوابی سوات موٹروے پر بس اور کوچ میں تصادم، 11 افراد ہلاک
موٹروے پولیس کے مطابق خیبر پختونخوا میں سوات صوابی موٹروے پر اسمعاعلہ کے قریب بس اور کوچ میں تصادم ہوا، جس کے نتیجے میں 11 مسافر ہلاک اور سات شدید زخمی ہو گئے۔
موٹروے پولیس کا مؤقف ہے کہ حادثہ وین ڈرائیور کی غفلت کے باعث پیش آیا جس نے سڑک کے کنارے کھڑی بس کو پیچھے سے ٹکر مار دی۔
25 مئ 2026پاکستان کے امریکہ اور ایران میں ثالث کا کردار ادا کرنے پر انڈیا نے کبھی اعتراض نہیں کیا: امریکی وزیر خارجہ
،تصویر کا ذریعہAFP via Getty Images
انڈیا کے دورے پر آئے امریکی وزیر خارجہ مارکو روبیو سے پوچھا گیا کہ امریکہ، ایران تنازع میں پاکستان ثالث کا کردار ادا کر رہا ہے، کیا انڈیا نے اس پر کسی تشویش کا اظہار کیا۔
مارکو روبیو کا جواب تھا: ’انڈیا ہمیشہ اس بات کی طرف اشارہ کرتا ہے کہ پاکستان کی سر زمین سے مسلح دہشت گرد گروہ کام کر رہے ہیں جو انڈیا کو نشانہ بناتے ہیں۔ وہ ہمیشہ اس پر فکر مند رہتے ہیں۔‘
تاہم، امریکی وزیر خارجہ کے مطابق: ’جہاں تک ایران کے معاملے میں ثالث اور سہولت کار کے طور پر پاکستان کے کردار کی بات ہے، یہ موضوع کبھی سامنے نہیں آیا۔‘
مارکو روبیو کا کہنا تھا: ’مجھے نہیں لگتا کہ وہ اس پر اعتراض کریں گے۔ پاکستان کے ساتھ ان کا مسئلہ مختلف ہے۔‘
25 مئ 2026آبنائے ہرمز کھول کر وقت کا تعین کر کے جوہری امور پر مذاکرات شروع کرنے کی تجویز ہے: مارکو روبیو
،تصویر کا ذریعہAFP via Getty Images
انڈیا کے دورے پر آئے امریکی وزیر خارجہ مارکو روبیو سے پوچھا گیا کہ کیا ایران پر کوئی نئی خبر ہے؟
امریکی وزیر خارجہ کا جواب تھا: ’اس پر ابھی کام چل رہا ہے۔‘
صحافیوں کے سوال کا جواب دیتے ہوئے مارکو روبیو نے کہا کہ ہمارے پاس ایک خاصی مضبوط تجویز ہے۔ امریکی وزیر خارجہ کے مطابق اس تجویز کے خد و خال یہ ہیں کہ آبنائے ہرمز کھول دی جائے اور وقت کا تعین کر کے جوہری امور پر مذاکرات شروع کیے جائیں۔
مارکو روبیو نے امید ظاہر کی کہ ’ہم اسے ممکن بنا لیں گے۔‘
انھوں نے کہا کہ اس تجویز کو خلیجی ممالک اور عالمی سطح پر بھرپور حمایت حاصل ہے۔
مارکو روبیو کے مطابق: ’جس ملک سے ہم نے بات کی، وہ یہ سمجھتا ہے کہ یہ نہ صرف معقول ہے بلکہ دنیا کے لیے درست اقدام ہے۔‘
ان سے پوچھا گیا کہ پھر تاخیر کس بات کی ہے؟ مارکو روبیو نے جواب دیا کہ ایران کا نظام جواب دینے میں وقت لیتا ہے۔
انھوں نے کہا: ’یا تو ہم ایک اچھا معاہدہ کریں گے یا پھر اس معاملے سے کسی اور طرح نمٹیں گے۔‘
سوال ہوا کہ کیا لبنان بھی اس معاہدے کا حصہ ہو گا؟
اس پر امریکی وزیر خارجہ نے کہا کہ ’لبنان پر الگ سے کام ہو رہا ہے۔‘
ان کا کہنا تھا کہ جب تک لبنان میں مسلح حزب اللہ کا وجود ہے، تب تک امن کا حصول مشکل ہو گا۔
25 مئ 2026وائٹ ہاؤس کے باہر فائرنگ کرنے والے ملزم کی شناخت ظاہر کر دی گئی
،تصویر کا ذریعہAaron Schwartz/Bloomberg via Getty Images
بی بی سی کے امریکہ میں شراکت دار ادارے سی بی ایس نیوز نے ذرائع کے حوالے سے بتایا ہے کہ وائٹ ہاؤس کے باہر فائرنگ کرنے والے مبینہ حملہ آور کی شناخت ناصر بیسٹ کے نام سے کی گئی جو میری لینڈ کے علاقے ڈنڈالک کے رہائشی تھے۔
سی بی ایس نیوز کو حاصل دستاویزات سے ظاہر ہوتا ہے کہ بیسٹ نے جون 2025 میں بھی وائٹ ہاؤس کے ایک داخلی راستے کو بند کر دیا تھا اور اہلکاروں کو بتایا تھا کہ وہ یسوع مسیح ہیں اور گرفتاری چاہتے ہیں۔ بیسٹ کو ذہنی معائنے کے لیے بھیجا گیا تھا اور انھوں نے جولائی 2025 میں دوبارہ وائٹ ہاؤس کے علاقے تک رسائی کی کوشش کی تھی۔
اس کے بعد بیسٹ کو سیکرٹ سروس کے اہلکاروں نے گرفتار کیا اور واشنگٹن میں وفاقی کنٹرول والی جگہ پر غیر قانونی داخلے کے الزام میں فرد جرم عائد کی گئی۔ عدالتی دستاویزات کے مطابق ایک جج نے انھیں وہاں سے دور رہنے کا حکم دیا تھا۔
ڈی سی سپیریئر کورٹ کے ریکارڈ کے مطابق غیر قانونی داخلے کے الزام میں ابتدائی پیشی کے بعد بیسٹ کو رہا کر دیا گیا تھا، تاہم وہ سات اگست 2025 کی سماعت میں پیش نہ ہوئے، جس کے ان کے ناقابل ضمانت وارنٹ گرفتاری جاری کیے گئے۔
قانون نافذ کرنے والے ذرائع نے سی بی ایس نیوز کو بتایا کہ سنیچر کے روز بیسٹ وائٹ ہاؤس کے باہر دوبارہ نمودار ہوئے، جہاں انھوں نے ایک بیگ سے ریوالور نکالا اور امریکی سیکرٹ سروس کے ایک چیک پوائنٹ پر فائرنگ شروع کر دی۔
قانون نافذ کرنے والے ذرائع کے مطابق جوابی فائرنگ کر کے حملہ آور کو ہلاک کر دیا گیا۔
25 مئ 2026امریکہ، ایران امن معاہدے کی امیدوں کے باعث تیل کی قیمتوں میں کمی
،تصویر کا ذریعہReuters
امریکہ، اسرائیل اور ایران میں جنگ بندی کے معاہدے کی امید پر تیل کی قیمتوں میں نمایاں کمی اور ایشیائی سٹاک مارکیٹوں میں تیزی آئی ہے۔
امریکہ کے صدر ڈونلڈ ٹرمپ نے سنیچر کے روز کہا کہ تہران کے ساتھ معاہدہ ’بڑی حد تک طے ہو چکا ہے‘ اور اس کی تفصیلات کا اعلان جلد ہی کر دیا جائے گا۔
تاہم ایک دن بعد انھوں نے اپنی مذاکراتی ٹیم سے کہا کہ معاہدے تک پہنچنے میں جلدی نہ کریں۔
پیر کی صبح ایشیا میں برینٹ خام تیل کی قیمت پانچ فیصد کمی کے ساتھ 98 ڈالر اور 36 سینٹ پر آ گئی، جبکہ امریکی خام تیل کی قیمت 3.5 فیصد کمی کے بعد 91 ڈالر اور 50 سینٹ ہو گئی۔
جاپان کا نکئی 225 انڈیکس بھی 2.5 فیصد اضافے کے ساتھ پہلی بار 65 ہزار پوائنٹس کی سطح سے تجاوز کر گیا۔ اس اضافے کو آبنائے ہرمز جلد کھلنے کی توقع سے منسوب کیا جا رہا ہے۔
برطانیہ اور امریکہ کی توانائی اور مالیاتی مارکیٹیں پیر کے روز سرکاری تعطیل کی وجہ سے بند ہیں۔
25 مئ 2026امریکہ، ایران معاہدہ ’نہ کسی نے دیکھا، نہ کوئی جانتا ہے کہ وہ ہے کیا‘: ٹرمپ
،تصویر کا ذریعہRoberto Schmidt/Getty Images
امریکی صدر ڈونلڈ ٹرمپ نے کہا ہے کہ ایران کے ساتھ امریکہ کا معاہدہ ’نہ کسی نے دیکھا ہے اور نہ ہی کسی کو معلوم ہے کہ وہ ہے کیا۔ اس پر ابھی مکمل طور پر مذاکرات بھی نہیں ہوئے۔‘
اپنے سوشل میڈیا پلیٹ فارم ٹروتھ سوشل پر پوسٹ میں امریکی صدر کا کہنا تھا کہ ’اگر میں ایران کے ساتھ کوئی معاہدہ کرتا ہوں تو وہ ایک اچھا اور مناسب معاہدہ ہو گا، اس طرح کا نہیں جیسا کہ اوباما نے کیا تھا، جس نے ایران کو بڑی مقدار میں رقم دی اور جوہری ہتھیار کے لیے ایک واضح اور کھلا راستہ فراہم کیا۔‘
امریکی صدر نے کہا کہ جو معاہدہ وہ کرنے جا رہے ہیں، وہ اوباما والے معاہدے کے ’بالکل برعکس‘ ہے۔ تاہم ساتھ ہی انھوں نے یہ بھی کہا کہ وہ معاہدہ نہ تو کسی نے دیکھا ہے نہ کسی کو اس کے بارے میں کچھ معلوم ہے۔
ٹرمپ نے کہا کہ اس معاہدے پر تنقید کرنے والوں کی بات نہ سنی جائے، ’میں خراب معاہدے نہیں کرتا۔‘
،تصویر کا ذریعہtruthsocial.com/@realDonaldTrump
25 مئ 2026ہمارے خاندان کو بیرسٹر گوہر اور سہیل آفریدی کی محسن نقوی سے ملاقات کا کوئی علم نہیں تھا: علیمہ خان
،تصویر کا ذریعہAFP via Getty Images
پاکستان تحریک انصاف (پی ٹی آئی) کے بانی عمران خان کی بہن علیمہ خان نے ایکس اکاؤنٹ پر کہا ہے کہ بیرسٹر گوہر (چیئرمین پی ٹی آئی) اور سہیل آفریدی (وزیر اعلیٰ خیبر پختونخوا) نے محسن نقوی (وفاقی وزیر داخلہ) سے ملاقات کی۔
ان کا کہنا تھا کہ ’ہمارے خاندان کو اس ملاقات کے بارے میں کوئی علم نہیں تھا اور نہ ہی خاندان کا کوئی رکن اس ملاقات میں موجود تھا۔‘
علیمہ خان بنیادی طور پر ایک ایکس پوسٹ کا جواب دے رہی تھیں، جس میں تحریر کیا گیا تھا کہ سہیل آفریدی، علیمہ خان اور محسن نقوی کی ملاقات بیرسٹر گوہر کے گھر میں ہوئی۔
اس کے بعد وزیر اعلیٰ خیبر پختونخوا سہیل آفریدی نے اپنے ایکس اکاؤنٹ پر علیمہ خان کی پوسٹ کا حوالہ دے کر اپنا مؤقف بیان کیا۔ انھوں نے لکھا: ’میری محسن نقوی سے ملاقات بنوں میں ہونے والے دہشتگردی کے واقعات اور صوبے کے امن و امان کے حوالے سے تھی اور اس میں کوئی سیاسی بات چیت نہیں ہوئی۔‘
گذشتہ روز پریس کانفرنس میں سہیل آفریدی نے ایک بار پھر تحریک انصاف کا یہ مطالبہ دہرایا کہ ’عمران خان کا علاج ان کی فیملی کی موجودگی میں اور ان کے ذاتی ڈاکٹرز کی نگرانی میں الشفا انٹرنیشنل ہسپتال سے کرایا جائے۔‘
انھوں نے کہا کہ اگر ایسا نہ ہوا تو ’ہمارا رویہ مزید سخت ہو گا۔‘
وزیر اعلیٰ خیبر پختونخوا نے پریس کانفرنس میں ممبران صوبائی اسمبلی اور وزرا کو تحریک تحفظ آئین پاکستان کے تحت جمعے کے روز احتجاج میں شرکت کی ہدایت بھی کی۔
25 مئ 2026کانگریس ٹرمپ کے ایران سے متعلق اقدامات کو روک سکتی ہے: ڈیموکریٹ رکن کانگریس
،تصویر کا ذریعہBloomberg via Getty Images
امریکہ میں ڈیموکریٹک رکنِ کانگریس رو کھنہ نے این بی سی نیوز کے پروگرام میٹ دی پریس میں کہا ہے کہ اب کانگریس میں ’وار پاورز ریزولوشن‘ منظور کرانے کے لیے مطلوبہ حمایت موجود دکھائی دیتی ہے۔
پس منظر کے طور پر یہاں اس بات کا ذکر ضروری ہے کہ امریکی ایوانِ نمائندگان میں ریپبلکن قیادت نے جمعرات کو اس قرارداد پر ووٹنگ منسوخ کر دی تھی، جس کے تحت صدر ٹرمپ کو ایران سے امریکی افواج واپس بلانے پر مجبور کیا جا سکتا تھا، کیونکہ واضح ہو گیا تھا کہ ریپبلکن اراکین کے پاس اس قانون سازی کو روکنے کے لیے ووٹ ناکافی ہیں۔
رو کھنہ نے کہا کہ ’بہت سے ریپبلکن یہ سمجھتے ہیں کہ جنگ ختم ہونی چاہیے۔ انھوں نے کسانوں سے بات کی ہے جو کہہ رہے ہیں کہ آبنائے ہرمز کی ناکہ بندی اور کنٹرول کے باعث نائٹروجن، امونیا اور یوریا کی قیمتیں آسمان سے باتیں کر رہی ہیں۔‘
انھوں نے مزید کہا کہ عوام مہنگے پیٹرول کی وجہ سے بھی مشکلات کا شکار ہیں۔‘
رو کھنہ کے بقول ’یہ تمام صورتحال ٹرمپ پر مذاکرات کی طرف آنے کے لیے دباؤ ڈال رہی ہے اور یہی وجہ ہے کہ کانگریس اہم ہے۔ حتیٰ کہ اگر قرارداد منظور نہ بھی ہو، تب بھی ہم صدر پر دباؤ ڈالتے ہیں اور امید ہے کہ یہ جنگ ختم ہو جائے گی۔‘
25 مئ 2026کسی بھی حتمی معاہدے میں جوہری خطرہ مکمل طور پر ختم ہونا چاہیے: اسرائیلی وزیرِاعظم
،تصویر کا ذریعہAFP via Getty Images
اسرائیلی وزیرِ اعظم بنیامن نیتن یاہو نے کہا ہے کہ انھوں نے گزشتہ رات امریکی صدر ڈونلڈ ٹرمپ سے ایران کے ساتھ جاری مذاکرات کی تازہ صورتحال پر بات چیت کی۔
ایکس پر جاری بیان میں نیتن یاہو نے کہا کہ صدر ٹرمپ اور اُن کے درمیان اس بات پر اتفاق ہوا ہے کہ ’ایران کے ساتھ کسی بھی حتمی معاہدے میں جوہری خطرے کا مکمل خاتمہ ہونا چاہیے۔‘
انھوں نے کہا کہ اس عمل میں ایران سے ’افزودہ جوہری مواد‘ کا خاتمہ اور تہران کی یورینیم افزودگی کی تنصیبات کو ختم کرنا بھی شامل ہے۔
نیتن یاہو نے مزید کہا کہ ’میری پالیسی، صدر ٹرمپ کی طرح، تبدیل نہیں ہوئی ایران کو جوہری ہتھیار حاصل نہیں کرنے دیے جائیں گے۔‘
دوسری جانب ایک سینئر اسرائیلی عہدیدار نے بی بی سی کو بتایا ہے کہ وزیرِ اعظم بنیامن نیتن یاہو نے صدر ڈونلڈ ٹرمپ کو دو ٹوک انداز میں کہا ہے کہ اسرائیل لبنان سمیت ہر محاذ پر خطرات کے خلاف ’آزادانہ طور پر کارروائی کرنے کا حق برقرار رکھے گا۔‘
عہدیدار کے مطابق امریکہ، اسرائیل کو اس مفاہمتی یادداشت سے متعلق مذاکرات پر مسلسل آگاہ کر رہا ہے، جس کا مقصد ’آبنائے ہرمز کو کھولنا اور متنازع نکات پر حتمی معاہدے کے لیے مذاکرات شروع کرنا‘ ہے۔
اسرائیلی عہدیدار نے مزید کہا ہے کہ ’صدر ٹرمپ نے واضح کر دیا ہے کہ وہ مذاکرات میں ایران کے جوہری پروگرام کو مکمل طور پر ختم کرنے اور اس کی سرزمین سے تمام افزودہ یورینیم ہٹانے کے اپنے مستقل مؤقف پر سختی سے قائم رہیں گے اور ان شرائط کو تسلیم کیے بغیر کسی حتمی معاہدے پر دستخط نہیں کریں گے۔‘
واضح رہے کہ اس سے قبل اسرائیلی وزیراعظم نیتن یاہو نے بھی یہ بات کہہ چُکے ہیں کہ جب تک ’جوہری خطرہ‘ مکمل طور پر ختم نہیں کیا جاتا، ایران کے ساتھ کوئی حتمی معاہدہ ممکن نہیں۔
25 مئ 2026ایران کو یہ سمجھنا ہوگا کہ وہ جوہری ہتھیار نہیں بنا سکتا: ٹرمپ
،تصویر کا ذریعہGetty Images
امریکی صدر ڈونلڈ ٹرمپ نے ٹروتھ سوشل پر اپنے مکمل بیان میں کہا ہے کہ ایران کے ساتھ ہونے والا سابق جوہری معاہدہ امریکی تاریخ کے ’بدترین معاہدوں میں سے ایک‘ تھا، جو باراک اوباما اور ان کی انتظامیہ کے دور میں طے پایا۔
انھوں نے کہا کہ وہ معاہدہ ایران کے جوہری ہتھیار بنانے کی طرف ایک ’براہ راست قدم‘ تھا، تاہم ان کی انتظامیہ کی جانب سے ایران کے ساتھ جاری مذاکرات اس کے برعکس ہیں۔
صدر ٹرمپ کے مطابق امریکہ اور ایران کے درمیان مذاکرات ’منظم اور تعمیری انداز میں‘ جاری ہیں اور انھوں نے اپنے نمائندوں کو ہدایت دی ہے کہ کسی معاہدے میں جلد بازی نہ کی جائے کیونکہ ’وقت امریکہ کے حق میں ہے۔‘
انھوں نے کہا کہ ایران پر امریکی پابندیاں کسی معاہدے کے طے، تصدیق اور دستخط ہونے تک برقرار رہیں گی اور فریقین کو مکمل احتیاط کے ساتھ آگے بڑھنا ہوگا۔
ٹرمپ نے زور دیتے ہوئے کہا کہ ’کوئی غلطی کی گنجائش نہیں‘ اور امریکہ و ایران کے تعلقات زیادہ پیشہ ورانہ اور مثبت سمت میں جا رہے ہیں، تاہم ایران کو یہ سمجھنا ہوگا کہ وہ جوہری ہتھیار یا بم حاصل نہیں کر سکتا۔‘
انھوں نے مشرقِ وسطیٰ کے ممالک کا تعاون پر شکریہ ادا کرتے ہوئے کہا کہ یہ تعاون مستقبل میں مزید مضبوط ہوگا، خصوصاً ابراہیمی معاہدوں میں شمولیت کے ذریعے۔
انھوں نے یہ بھی عندیہ دیا کہ ممکن ہے کہ ایران بھی مستقبل میں ان معاہدوں کا حصہ بننے میں دلچسپی لے۔
25 مئ 2026ٹرمپ کا مذاکرات کاروں کو جلد بازی نہ کرنے کا مشورہ
،تصویر کا ذریعہAFP via Getty Images
امریکی صدر ڈونلڈ ٹرمپ نے کہا ہے کہ انھوں نے مذاکرات کاروں کو کسی بھی معاہدے میں جلد بازی نہ کرنے کی ہدایت دی ہے۔
ٹروتھ سوشل پر اپنے بیان میں صدر ٹرمپ نے کہا کہ ’مذاکرات منظم اور تعمیری انداز میں آگے بڑھ رہے ہیں‘ اور انھوں نے امریکی ٹیم کو ’کسی معاہدے میں جلدی نہ کرنے‘ کا کہا ہے۔ انھوں نے مزید کہا کہ ’وقت ہمارے حق میں ہے۔‘
انھوں نے یہ بھی کہا کہ ایران کی بندرگاہوں پر امریکی ناکہ بندی کسی بھی حتمی معاہدے تک برقرار رہے گی۔
انھوں نے کہا کہ اس حوالے سے مکمل بیان جلد جاری کیا جائے گا۔