በርሊን ማራቶን፡ ኣትሌት ቀነኒሳ በቀለ ኣብቲ ሰንበት ዝኻየድ ውድድር ማራቶን ክሳተፍ'ዩ

ኣትሌት ቀነኒሳ በቀለ ድሕሪ ክልተ መዓልቲ ኣብ በርሊን ኣብ ዝካየድ ውድድር ማራቶም ከምቲ ቅድሚ ሕጂ ኣብ በርሊን ማራቶን ዝፈጸምኩዎ ጌጋ ኣይደግምን ኢሉ።

እቲ ኣትሌት ብ2019 ዓ.ም ኣብ ጀርመን ኣብ ዝተኻየደ ውድድር ማራቶን ክብረ ወሰን ዓለም ንምምሕያሽ ክልተ ካልኢታት ምስ ተረፎ ኣብቲ ውድድር ከም ዝተዓወተ ይዝከር።

"ቅድሚ እቲ ውድድር ነቲ ክብረወሰን ንምምሕያሽ ኣይተዳለኹን ነይረ፤ እንተዝዳሎ ነይረ ነቲ ክብረወሰን ምሰበርክዎ ነይረ" ክብል ኣብ ኢንስተግራም ኣብ ዝፈነዎ ቪድዮ ተዛሪቡ።

ቀነኒሳ ኣብቲ ናይ 2019 ውድድር ማራቶን ክልተ ካልኢት ጥራይ ተሪፈንኦ እናሃለዋ ነቲ ክብረወሰን ዘይምምሕያሹ "ወትሩ'ዩ ዘሰንብደኒ" ክብል እንከሎ ኣብዚ ሰንበት ዝካየድ ውድድር ብኬንያዊ ኣትሌት ሌሊዩድ ኪፕቾጌ ዝተታሕዘ ክብረወሰን ንምምሕያሽ መደብ ኣለኒ ኢሉ።

ቀነኒሳ ኣብ ዘካየዶም ውድድራት

ኣትሌት ቀነኒሳ በቀለ ካብ ዝመርጾም ውድድራት ሓደ በርሊን ማራቶን ከም ዝኾነ ይገልጽ።

"ብዙሕ ሰብ ዝሳተፈሉ'ዩ፤ ጽቡቕ ኩነታት ኣየር'ውን ኣለዎ። እቲ ከተማ ጽሩይ ስለ ዝኾነ ይፈትዎ'የ" ኢሉ።

ኣብ ከተማታት በርሊን፣ ለንደን፣ ቦስተንን ኒውዮርክን ዓብዩ ትጽቢት ዝወሃቦም ውድድራት ማራቶን ይዳለው'ዮም።

በርሊን ማራቶን ድማ ብዝተፈለየ መልክዑ ብዙሕ ግዜ ክብረወሰናት ዝመሓየሸሉ መድረኽ'ዩ።

ኣብዚ ዓመት ኣብ ዝካየድ ውድድር ዘይሳተፍ ኤሊዩድ ኪፕቾጌ ኣብ 2018 ኣብ ዝነበረ ውድድር ብ2፡01፡39 እቲ ናይ ዓለም ክብረወሰን ክሕዝ ክኢሉ።

ቀነኒሳ ድማ ኣብቲ ኣብ 2019 ዝተኻየደ ውድድር ብ2፡01፡41 እዩ ወድድሩ ዛዚሙ።

ኣብ በርሊን ማራቶን ዝተመሓየሹ ክብረ ወሰናት

ኣብዚ ውድድር ትጽቢት ዝግበረሎም ካልኦት ኣትሌታት

ካብ ኣትሌት ቀነኒሳ ብተወሳኺ ብዙሓት ትጽቢት ዝግበረሎም ኢትዮጵያውያን ኣትሌታት ክሳተፉ'ዮም'።

ኣብ 2017 ካልኣይ ዝወጽአ ጉዬ ኣዶላ፣ ወዲ 22 ዓመት ኦሊቃ ኣዱኛ ኣብዚ ወድድር ክሳተፉ ትጽቢት ይግበረሎም።

ኦሊቃ ብ2020 ኣብ ዱባይ ማራቶን ተዓዊቱ ነይሩ።

ኣብ 2021 ኣብ ጃፓን ኣብ ዝተኻየደ ውድድር ሌክ ቢዋ ማራቶን ዝተዓወተ ጃፓናዊ ሂዴካዙ ሂጂካታ'ውን ካልእ ትጽቢት ዝግበረሉ ተወዳዳሪ ኮይኑ፡ እቲ ናይ ደቂ ተባዕትዮ ውድድር ሰንበት ንጉሆ ክካየድ'ዩ።

ብናይ ደቂ ኣንስትዮ ኢትዮጵያዊት ህይወት ገብረኪዳን፣ ሻምፒዮና ኮፐንሃገንን ሊዝበንን 2015 ኬንያዊት ፒዩሪቲ ሪኦኖሪፓ ካልኦት ትጽቢት ዝተገብረለን ተወዳደርቲ'የን።