ኮሮናቫይረስ፡ ኣሜሪካ ኣብ ሓደ መዓልቲ ልዕሊ 2,000 ሰባት ሞይቶም

ትማሊ ዓርቢ ኣብ ኣሜሪካ ልዕሊ 2,000 ሰባት ብኮሮናቫይረስ ድሕሪ ምማቶም፡ እቲ ዝበዝሓ ቁጽሪ ሞት ዝተመዝገበላ መዓልቲ ኮይና'ላ።

ጸብጻባት ዩኒቨርስቲ ጆንስ ሆፕኪንስ ከም ዝሕበርዎ፡ ኣብ ዝሓለፉ 24 ሰዓታት 2,108 ሰባት ሞይቶም። ኣብታ ሃገር በቲ ቫይረስ ከም ዝተለኽፉ ዝተረጋገጸ ሰባት ልዕሊ ፍርቂ ሚልዮን በጺሖም ኣለው።

ኣሜሪካ ኣብ ሓጺር ግዜ ነታ ብብዝሒ ግዳያት ኮሮናቫይረስ ካብ ዓለም ቀዳመይቲ ኮይና ዝጸንሓት ሃገረ ጥልያን ክትቕድማ ከምእትኽእል ይግመት።

ክኢላታት ሓይሊ ዕመም ኮቪድ-19 ዋይት ሃውስ ግና እቲ ለበዳ ኣብ ኣሜሪካ ይጎድል ምህላው ይዛረቡ።

ዶክተር ዲቦራ ብሪክስ እቲ ለበዳ ይረጋጋእ ምህላው ዘንጸባርቕ ጽቡቕ ምልክታት ከም ዝተርኣየ እኳ እንተሓበረት፤ "ናብቲ ዝለዓለ ጥርዚ ግና ጌና ኣይበጻሕናን" ኢላ።

ፕረዚደንተ ዶናልድ ትራምፕ'ውን ኣሜሪካ ካብቲ ኣብ ፈለማ ዝተገመተ ዝተሓተ ሞት ከም ዝህልዋ ትጽቢቱ ገሊጹ'ዩ።

"እቲ ዝወሰድናዮ ጽኑዕ ስጉምትታት ህይወት ብዙሓት የድሕን ምህላው ንጹር ምልክታት ንርእይ ኣሎና" ኢሉ።

ኣብ መላእ ኣሜሪካ በቲ ቫይረስ ተለኺፎም ዘለዉ ሰባት'ውን 500,399 በጺሑ ከም ዘሎን፡ ልዕሊ 18,693 ሰባት ከምዝመቱን ይግለጽ። ፍርቂ ካብቶም ግዳያት ካብ ከተማ ኒው ዮርኮ እዮም።

ኣሜሪካ ዓርቢ ዝበዝሐ ምውታት ከም ተመዝግብን ካብኡ ንደሓር እናጎደለ ከም ዝኸይድን ተመራመርቲ ገሚቶም ነይሮም።

ብመሰረት ግምቶም ግምቦት 1 ኣብ ሓደ መዓልቲ ዝሞቱ ሰባት ናብ 970 ክወርድ እዩ። ምምሕዳር ትራምፕ'ውን ሽዑ ነቲ ደስኪሉ ዘሎ ቁጠባ እታ ሃገር ክከፍቶ ምዃኑ ይገልጽ።

ፕረዚደንት ትራምፕ ብዓርቢ ኣብ ዝሃቦ መግለጺ፡ "ቀልጢፉ ክኽፈት እየ ዝደልይ፤ ኣብ ህይወተይ ዝወሰንክዎ ዝዓበየ ውሳነ ከም ዝኸውን ኣይጠራጠርን" ኢሉ።

ወሲኹ'ውን "እንተኾነ ግን መንግስቲ እታ ሃገር ደሓን ከም ዘላ ከየረጋገጸ ዝኾነ ዝውሰድ ስጉምቲ የሎን። ንድሕሪት ተመሊስና ንኹሉ ክንደግም ኣይንደልይን ኢና" ኢሉ።

ኻልእ ምዕባለታት