ኣብ ሃደን፡ ብጌጋ ንወዲ 55 ዓመት ወላዲኡ ዝቐተለ ውልቀሰብ ተኸሲሱ

ኣቦን ወድን፡ ናይ በረኻ ሓሰማ ክሃድኑ ብምህቃን እዮም ካብ ገዝኦም ወጺኦም።

ኣብ ከባቢኦም ናብ ዝርከብ ጽዑቕ ደኒ ብምእታው፡ ኣሰር ሓሰማ በረኻ ኣብ ዘጸናጽንሉ እዋን፡ እቲ ወዲ 34 ዓመት ሃዳናይ፡ ጽላሎት ምስረኣየን ጣሕሸምሸም ምስ ሰምዐን፡ ተኲሱ።

ከምቲ ዝሓሰቦ ግን፡ ሓሰማ ኣይጨመተን፤ ንወላዲኡ ደኣ ብጥይት ወቕዎ። ነዚ ምስፈለጠ፡ ሽዑ ንሽዑ እዩ ረድኤት ሓቲቱ።

ነቲ ወዲ 55 ዓመት ወላዲ ከድሕኑ፡ ሓካይም ዝከኣሎም እኳ እንተጸዓሩ ኣይሰመረሎምን።

ኣቦን ወድን፡ ሃደን ክልኩል ኣብ ዝኾነሉ ሕዛእቲ እዮም እናሃደኑ ነይሮም። በዚ ምኽንያት ብድሕሪ እዚ ፍጻመ፡ ፖሊስ ብረቶም ኣሕዲግዎም።

ዋላኳ ኮነ ተባሂሉ ዝተፈጸመ ቅትለት ኣይኹን፡ ህይወት ሰብ ስለዝሓለፈ ግን ፖሊስ ክሲ መስሪቱ ኣሎ።

ኣብ ዝሓለፈ ወርሒ ጥቅምቲ'ውን ሓደ ወዲ 18 ዓመት ጣልያናዊ መንእሰይ፡ ምስ ፈረንሳይ ኣብ ዘዳብው ከባቢ፡ ብተመሳሳሊ ኩነታት ተቐቲሉ እዩ።

ኣብቲ እዋን፡ ሚኒስተር ሓለዋ ከባቢ ጣልያን ሰርጂዮ ኮስታ፡ እቲ ኩልሻብ ሰምበት ዝካየድ ሃደን ክኽልከል ኣለዎ ኢሉ ነይሩ።

ኣብ ተመሳሳሊ እዋን፡ ካልኦት ተወሰኽቲ ክልተ ሰባት ብተመሳሳሊ ኩነታት ህይወቶም ሓሊፉ እዩ።