እስራኤል ኣብ ቓዛ "ናይ ትሕቲ መሬት ዒላማታት" ከምዘጥቀዐት ኣፍሊጣ

ቀጥታዊ ሸፈነ

1. 14 ሕዳር 2023ፕረዚደንት ባይደን ሆስፒታል ኣል-ሺፋ ውሕስነት ክወሃቦ ይግባእ ኢሉ

   ፕረዚደንት ኣሜሪካ ጆ ባይደን፡ እስራኤል ኣብ ቓዛ ንዝርከብ ሆስፒታል ኣል-ሺፋ ውሕስነት ክትህብ ተማህጺኑ።

   ንሱ ብሰኑይ ካብ ቤት-ጽሕፈቱ ኣብ ዘሕለፎ መልእኽቲ፡ ኣሜሪካ ምስ እስራኤል ክትዘራረብ ምጽንሓን “ምስቲ ሆስፒታል ብዝዛመድ ዝወሓደ ረባሺ ተግባራት ክህሉ” ከምዝትስፎን ዝጽበይን ሓቢሩ።

   ኣብቲ ንጋዜጠኛታት ዝሃቦ መብርሂ “እቲ ሆስፒታል ክሕሎ ይግባእ፡” ኢሉ።

   ኣብ ዝሓለፉ መዓልታት እስራኤል ብኣጋር ኣብ ልዕሊ ሓማስ እትገብሮ መጥቃዕቲ ኣብ ዝቐጸለትሉ ኩነታት ኣብ ከባቢ ሆስፒታል ከተማ ቓዛ ኲናት በርቲዑ ኣሎ።

   ብዙሓት ሃገራት ረድኤት ኮነ ሰባት ናብ ቓዛ ክኣትውን ክወጹን ምእንቲ ክኽእሉ ንሰብኣዊ ደውታ ተዅሲ ክጽውዓ እንከለዋ ካልኦት ከኣ ምሉእ ምቁራጽ ተዅሲ ይጠልባ።

   ኣብ ዝሓለፈ ሰሙን፡ እስራኤል ኣብ ገለ ክፋላት ሰሜናዊ ቓዛ መጥቃዕታ ክትቅጽል እንከላ፡ መዓልታዊ ንኣርባዕተ ሰዓታት ዝጸንሕ ወተሃደራዊ ደውታ ክትገብር ክትጅምር ምዃና ኣሜሪካ ገሊጻ ኔራ።

   ብሰኑይ ሰራዊት እስራኤል ኣብ ዝዘርግሖ ሓበሬታ፡ ካብ ዝሓለፈ ረቡዕ ጀሚሩ ደውታ ተኵሲ ዝግበረለን ምዃኑ ዝገለጸን ሸሞንተ ቦታታት ኣፍሊጡ።

   መብዛሕትኦም ኣብ ሰሜናዊ ምብራቕ ከተማ ቓዛ እኳ እንተነበሩ፡ እቲ ናይ ሰኑይ ግና ኣብ ደቡባዊት ከተማ ራፋሕ ኮይኑ ንኣርባዕተ ሰዓታት ጸኒሑ።

2. 14 ሕዳር 2023እስራኤል-ሓማስ እንታይ ምዕባለታት ኣሎ?

   ኣብ ኲናት እስራኤል-ሓማስ ካብ ዘለው እዋናዊ ምዕባለታት ዝስዕቡ ይርከብዎም፡

   • ውድብ ጥዕና ዓለም፡ እቲ ዝዓበየ ሆስፒታል ከተማ ቓዛ ኣል-ሺፋ፡ "ዳርጋ ናይ መቓብር ቦታ" ምዃኑን ኣብ ውሽጥን ወጻእን እቲ ሆስፒታል ሬሳታት ይእከቡን ይምሽምሹን ከምዘለዉ ይገልጽ
   • ኣብ ዝሓለፉ መዓልታት ኣብ ጥቓ እቲ ሆስፒታል ውግእ ይካየድ ከምዘሎን ብታንክታት ከምዝተኸበበን ሓደ ምንጪ ኣብ ቓዛ ንዘሎ ሪፖርተርና ሓቢሩ
   • ሰራዊት እስራኤል ንሓማስ ኣብ ትሕቲ ሆስፒታል ኣል-ሺፋ 'ማእከል እዚ' ኣለዎ ክብል ብተደጋጋሚ ይኸስስ - ሓማስ ግን ነዚ ክሲ ይነጽጎ።
   • ብፍላይ ጉዳይ ጥዕና ናይቶም ኣብ ዘይእዋኖም ዝተወልዱን ሓደስቲ ኣብ መዓልቶም ዝተወልዱን ህጻናት ሻቕሎት ፈጢሩ ኣሎ። ምቁራጽ ሓይሊ ኤሌክትሪክ ንኸም ኢንኩቤተር (ኣብ ዘይመዓልቶም ዝውለዱ ህፃናት ዝጸንሑሉ ሙቐት ወሃቢ ማሽን) ዝኣመሰሉ መሳርሒታት ሕክምና ኣገልግሎት ከይህቡ ይገብር ኣሎ
   • ሓይልታት ምክልኻል እስራኤል (IDF) ኢንኩቤተራት ናብ ቓዛ ንምእታው ኣብ ምውህሃድ ከምዘሎ ይገልጽ፤ ናብ ሆስፒታል ኣል-ሺፋ ክበጽሑ እንተኾይኖም ግን ኣየነጸረን።
   • ወሃቢ ቃል ሕቡራት ሃገራት ኣብቲ ሆስፒታል ሕክምና ዳያሊሲስ ዘድልዮም 45 ሕሙማት ኩሊት ብሰንኪ ሕጽረት ኤለክትሪክ ብግቡእ ክሕከሙ ከምዘይክእሉ ይገልጽ።
   • ፕረዚደንት ኣሜሪካ ጆ ባይደን "እቲ ሆስፒታል ክሕሎ ኣለዎ" ብምባል፡ ብዛዕባ እዚ ጉዳይ ምስ ሰበስልጣን እስራኤል ይራኸብ ከምዝነበረ ሓቢሩ

3. 14 ሕዳር 2023ሆስፒታል ቓዛ ምዉታት ክቐብር ኣይከኣለን - ሕቡራት ሃገራት

4. 14 ሕዳር 2023ኣመሪካ ኣብ ሶርያ ብኢራን ዝድገፉ መደበራት ዒላማ ዝገበረ መጥቃዕቲ ነፈርቲ ቀፂላ

5. 14 ሕዳር 2023ዝዓበየ ሆስፒታል ቓዛ ናብ መቓብር ተቐይሩ - ውድብ ጥዕና ዓለም

   እቲ ዝዓበየ ሆስፒታል ቓዛ ኣል-ሺፋ "ዳርጋ ናብ መቓብር" ከምዝተቐየረ ውድብ ጥዕና ዓለም ኣጠንቂቑ። ኣብ ውሽጥን ብደገን ሬሳታት ይእከቡ ከምዘለዉ ድማ ተገሊጹ።

   ብዓሰርተታት ዝቑጸሩ ቅድሚ ግዜኦም ዝተወለዱ ህጻናትን ሕክምና ዳያሊሲስ ዘድልዮም 45 ሕሙማት ኩሊትን ብሰንኪ ሕጽረት ኤለክትሪክ ብግቡእ ክሕከሙ ከምዘይክኣሉ ወሃቢ ቃል ሕቡራት ሃገራት ሓቢሩ።

   ኣብ ቀረባ መዓልታት ኣብ ከተማ ቓዛ ኣብ ጥቓ እቲ ሆስፒታል ውግእ ይካየድ ዘሎ ኮይኑ፡ ከቢድ ሕጽረት ነዳዲ ንኣገልግሎት ሕክምና ከምዝጸለዎ ይግለጽ።

   እስራኤል፡ ሓማስ ኣብ ትሕቲ እቲ ሆስፒታል ማእከል ትእዛዝን ቁጽጽርን ከምዘለዎትኸስስ፤ ሓማስግን ነዚክሲ ይነጽግዎ።

6. 13 ሕዳር 2023ቱርኪ ኣብ ጥቓ ራፋሕ ግዝያዊ ሆስፒታላት ክትሃንፅ እያ

   ንግዝያዊ ሆስፒታላት ዝኸውን መሳርሒ ዝፀዓነት መርከብ ቱርኪ፡ ኣብ ጥቓ ዶብ ራፋሕ ኣብ ዝርከብ ወደብ ግብፂ በፂሓ።

   እታ መርከብ፡ ጀነሬተራት፣ ኣምቡላንሳትን ናውቲ ሕክምናን ከም ዝፀዓነትን፡ ሸሞንተ ግዝያዊ ሆስፒታላት ከም ዝህነፁን ኤኤፍፒ ፀብፂቡ።

   ኵናት እስራኤል-ጋዛ ካብ ዝውላዕ ንነዘ፡ ከምዚ ዓይነት ሓገዝ ናብ ግብፂ እንትበፅሕ፡ እዚ ፈላማይ’ዩ።

   ውድብ ጥዕና ዓለም፡ ኣብ ጋዛ ዝርከብ እቲ ዝዓበየ ሆስፒታል ኣገልግሎት ምሃብ ደው ከም ዘበለ ኣፍሊጡ’ዩ።

   ካልኦት ማእኸላት ጥዕና እውን ብሰንኪ ምቁራፅ ፀዓት፣ ስእነት ነዳዲ ከምኡ’ውን በቲ ዝቕፅል ዘሎ ውግእ ብምስጋእ ኣገልግሎት ከም ዘቋረፃ እቲ ውድብ ገሊፁ።

   በዓልመዚ ጥዕና ቱርኪ ንኤኤፍፒ ኣብ ዝሃቦ ቃል፡ ኣንካራ ግዝያዊ ሆስፒታላት ክትሃንፅ ካብ ሰብመዚ ግብፂ ፍቓድ ከም ዝረኸበት ሓቢሩ።

   እዞም ሆስፒታላት ካብ ዶብ ራፋሕ 40 ኪሎሜትር ርሕቐት እዩ ክህነፁ።

7. 13 ሕዳር 2023እስራኤል 44 ወተሃደራታ ከም ዝሞቱ ኣፍሊጣ

   እስራኤል ናብ ጋዛ እግረኛ ሰራዊታ ካብ ተዋፍር ንነዘ ቁፅሪ ዝሞቱ ወተሃደራታ 44 ከም ዝበፅሐ ኣፍሊጣ።

   ሚኒስትር ምክልኻል እስራኤል ብሰኑይ’ውን ካልኦት ክልተ ወተሃደራት ኣብ ሰሜን ጋዛ ከም ዝሞትዎ ገሊፁ።

   ሰራዊት እታ ሃገር ኣብ ምዕራብ ጋዛ ኣብ ጥቓ መዕቖቢ ስደተኛታት ኣል-ሻቲ ዘካይዶ መጥቃዕቲ ከም ዝቐፀለሉ ሓቢሩ።

   ሓማስ ኣብ ልዕሊ እስራኤል ሃንደበታዊ መጥቃዕቲ ብምኽፋት 1200 ሰባት ምቕታሉ ስዒቡ፡ እስራኤል ኣብ ልዕሊ ጋዛ መጥቃዕቲ ተካይድ ኣላ።

   ሚኒስትር ጥዕና ጋዛ፡ ዛጊድ ልዕሊ 11 ሽሕ ፍልስጤማውያን ብመጥቃዕቲ እስራኤል ከም ዝተቐተሉን ካብዚኦም 4500 ህፃናት ምኻኖምን ኣፍሊጡ እዩ።

8. 13 ሕዳር 2023"መጥቃዕቲ ሆስፒታል ጋዛ ብሓማስ ዝተፈጸመ’ዩ "፡ ፕረዚደንት እስራኤል

9. 13 ሕዳር 2023ኣብ ቓዛ ልዕሊ 100 ሰራሕተኛታት ሕቡራት ሃገራት ተቐቲሎም

   ሕቡራት ሃገራት ኣብ ቓዛ ልዕሊ 100 ሰራሕተኛታቱ ከም ዝተቐተሉ ኣፍሊጡ።

   እቲ ትካል ነቶም ንዝተቐተሉ ሰራሕተኛታቱ ንምዝካርን ክብሪ ንምግላፅን ሎሚ መዓልቲ ባንዴርኡ ትሒቱ ከም ዝውልብለብ ሓቢሩ።

   ኤጀንሲ ረድኤት ስደተኛታት ፍልስጤም እቲ ትካል፡ እስራኤል ኣብ ልዕሊ ቓዛ መጥቃዕቲ ቦንቧ ካብ ትጅምር ንነዘ ልዕሊ 100 ሰራሕተኛታቱ ከም ዝተቐተሉን ገሊፁ።

   ኣብ ዝዀነ ይኹን ኵናት ክንድዚ ዝኣኽሉ ሰራሕተኛታት እቲ ትካል ተቐቲሎም ኣይፈልጡን። እዚ ኣጋጢሙ ዘሎ ኣሃዝ ዝለዓለ’ዩ።

   ኣብ ቓዛ ልዕሊ 13 ሽሕ ሰራሕተኛታት ሕቡራት ሃገራት ኣለዉ። ካብዚኦም እቶም ልዕሊ 100 ግዳያት፡ ምስ ስድርኦም እንከለዉ ከም ዝተቐተሉ'ዩ እቲ ትካል ዝገልጽ።

   ካብ መንጐ እዞም ግዳያት፡ መምህራን፣ ሰብሞያ ጥዕና፣ ሓካእም ማህፀን፣ መሃንዲሳት፣ ሰብሞያ ስነ-ልቦናን ሰራሕተኛታት ወሃብቲ ድጋፍን ይርከብዎም።

   ሕቡራት ሃገራት፡ ኣብ ወሽመጥ ቓዛ ኣብ ዘለውዎ ልዕሊ 150 ማእኸላት፡ ንልዕሊ 750 ሽሕ ህዝቢ የተኣናግድ ኣሎ።

   ካብዞም ማእኸላት እቶም 60 መጥቃዕቲ ተፈፂምዎም እዩ።

10. 13 ሕዳር 2023ሰራዊት እስራኤል፡ ካብ ሊባኖስ ናብ ግዝኣት እስራኤል ሞርታራት ከምዝተተኮሰ ገሊጹ

    ሓይልታት ምክልኻል እስራኤል (ኣይዲኤፍ) ካብ ወገን ሊባኖስ ክልተ ደብዳባት ሞርታር ከምዝተፈጸመ ኣፍሊጡ።

    ኣብ ከባቢታት ጋሊለ ናይ መጠንቀቕታ ደወል ዝተሰምዐ ኮይኑ፡ እቶም ሞርታራት ኣብ ሜዳ ብምዕራፎም ኣብ ልዕሊ ሰባት ዘጋጠመ ጉድኣት የለን።

    ኣይዲኤፍ ኣብ ማሕበራዊ መራኸቢ ኤክስ ኣብ ዘዘርገሖ ሓበሬታ ሓይልታቱ ትማሊ ለይቲ ኣብ ግዝኣት ሊባኖስ ኣብ ልዕሊ ዝርከብ “ዋህዮ ዕጡቕ ግብረ ሽበራዊ” መጥቃዕቲ ፈጺሞም ኢሉ።

    ድሕሪ እቲ ኣብ መንጎ እስራኤልን ሓማስን ዝተወለዐ ጎንጺ፡ ኣብ ዶባት እስራኤልን ሊባኖስን ዳርጋ መዓልታዊ ጎንጺ ይካየድ ኣሎ። መብዛሕተኦም እቶም ጎንጺታት ብኢራን ዝድገፍ ሓያል ጉጅለ ሒዝቦላሕ ዝተሳተፈሎም እዮም።

    ብካልእ ዜና እስራኤል ንቓዛ ተቖጻጺራ ኣብ ዝነበረትሉ እዋን ሓላፊ ትካል ስለያ እስራኤል ሞሳድ ዝነበረ ዳኒ የቶም፡ እስራኤል ኣብ ወሽመጥ ቓዛ ነዊሕ ክትጸንሕ ከምዘይብላ ገሊጹ።

    ንሱ ምስ ቢቢሲ ኣብ ዝገበሮ ጻንሒት “ኩሎም ዝተጨወዩ ሰባት ናብ ኢድና ክሳብ ዝምለሱን ኣንጻር ሓማስ ዝግበር ኲናት ክሳብ እንዕወትን” እስራኤል ካብ ቓዛ ክትለቅቕ ኣይትኽእልን ኢሉ።

    ዓወት ማለት ድማ “ ውድቀት ሓማስ ከም ትካል ከምኡ ድማ ናይ እዚ ሰንሰለቱ ምብትታኽ” ምዃኑ ገሊጹ።

11. 13 ሕዳር 2023ኣመሪካ ኣብ ሶርያ ንዝርከቡ ወታሃደራዊ ዒላማታት ኢራን ደብዲባ

    ሰራዊት ኣመሪካ ኣብ ደቡብ ምብራቓዊ ሶርያ ኣብ ዝርከቡ ክልተ ወታሃደራዊ ማእከላት ኢራን ደብዳብ ከምዘካየደ ኣፍሊጡ።

    ኣመሪካ ኣብ ሶርያን ዒራቕን ኣብ ልዕሊ ሰራዊታ ድሕሪ ዝተፈጸመ መጥቃዕቲ እዩ ነቲ ስጉምቲ ከምዝወሰደት ትማሊ ምሸት ኣፍሊጣ ዘላ።

    ጸሓፊ ሚኒስትሪ ምክልኻል ኣመሪካ ሎይድ ኦስቲን እቶም መጥቃዕቲታት “ኣባላት ሓለዋ እስላማዊ ሰውራ ኢራንን (ኣይኣርጂሲ) ደገፍቲ ኢራን ጉጅለታትን” ኣብ ዝርከቡሎም ከባቢታት ከምዝተፈጸመ ኣፍሊጡ።

    ንሱ ኣብ መግለጺኡ “እቶም መጥቃዕቲታት ኣብ መሰልጠኒ ማእከላት ኣቡ ካማልን ኣብ ጥቓ ከተማ ማየዲን ዝርከብ መዕቆብን እዮም ተኻይዶም" ክብል ሓቢሩ።

    “እቲ ፕረዚደንት ካብ ድሕነት ወታሃደራት ኣመሪካ ንላዕሊ ቀዳምነት ዝህቦ ነገር የለን፤ እቲ ናይ ሎምመዓልቲ ስጉምቲ ድማ ኣመሪካ ንባዕላ፣ ሰራዊታን ድልየታታትን ከምእተኽብር ግልጺ ንምግባር ዝሃቦ ትእዛዝ እዩ” ኢሉ።

    ኣመሪካ ብረቡዕ ኣብ ምብራቓዊ ኢራን ዞባ ማይሱሉን ኣብ ዝርከብ መኽዘን ኣጽዋር ሓለዋ እስላማዊ ሰውራን ደገፍቶምን ከምዝኾነ ኣብ ዝገለጸቶ ከባቢ “ናይ ዓርሰ ምክልኻል መጥቃዕቲ” ከምዝፈጸመት ኣፍሊጣ እያ።

12. 13 ሕዳር 202383 ኣይሁዳውያን ህጻናት ዘድሓነት ደፋር ፈላሲት

13. 13 ሕዳር 2023ሓሙሽተ ወተሃደራት ኣመሪካ ኣብ ልምምድ ነፋሪት ብዘጋጠመ ሓደጋ ሞይቶም

14. 13 ሕዳር 2023ሕቡራት ሃገራት ኣብ ሆስፒታል ኣል-ሽፋ ሰለስተ ነርስታት ተቐቲሎም ኢሉ

    ኣብ ጥቓ ሆስፒታል ኣል-ሽፋ “ደብዳብን ብዕጥቂ ዝተሰነየ ጎንጽን” ኣብ ዝተጓሃሃረሉ፡ ሰለስተ ነርስታት እቲ ሆስፒታል ከምዝተቐተሉ ሕቡራት ሃገራት ገሊጹ።

    እቲ ትካል ብሰንበት ኣብ ዝሃቦ መግለጺ ኦክስጅን መፍረዪ ክፍሊ፣ መጠራቐሚ ማይን ዒላን፣ ማእከል ሕክምና ልብን መዋልዳንን ሓዊሱ ወሰንቲ ክፍልቲታት እቲ ሆስፒታል ጉድኣት በጺሕዎም ኢሉ።

    እስራኤል፡ ቅድም ክብል ሓማስ ኣብ ትሕቲ ምድሪ እቲ ዝዓበየ ሆስፒታል ቓዛ መአዘዚ ማእከል ከምዘለዎ ከሲሳ ነይራ፤ ሓማስ ግን ነቲ ክሲ ይነጽጎ።

    ሓላፊ ክፍሊ መጥባሕቲ እቲ ሆስፒታል ዶ/ር ማርዋን ኣቡ ሰዓዳ፡ ሓማስ ኣብ ውሽጢ እቲ ሆስፒታል ይንቀሳቐስ እንተኾይኑ ንዝቐረበሉ ሕቶ “ዓብዪ ሕሶት” ክብል መሊሱ።

    “ሲቪላት ኢና። ኣነ ናይ ሕክምና መጥባሕቲ ዶ/ር እየ። ኣባላት ሰብሞያ ሕክምና ኣለዉና፤ ተሓከምትን ተፈናቐልትን ኣለዉና። ካልእ ምንም ነገር የለን” ኢሉ።

    ካብ ቀረባ መዓልቲታት ጀሚሩ ኣብ ጥቓ እቲ ኣብ ሰሜናዊ ቓዛ ዝርከብ ሆስፒታል ኣል-ሺፋ ከቢድ ውግእ ዝካየድ ዘሎ ኮይኑ፡ እስራኤል ነቲ ሆስፒታል ብቀጥታ ኣጥቂዓ ዝብል ክሲ ይቐርበላ ኣሎ።

    እስራኤል ኣብ ዙርያ እቲ ሆስፒታል ስርሒት ተካይድ ከምዘላ ዝገለጸት ኮይና፡ ነቲ ትካል ኣጥቂዓ ዝብል ክሲ ግን ነጺጋቶ።

15. 13 ሕዳር 2023ዓብዪ ሆስፒታል ቓዛ ስርሑ ደው ከምዘበለ ውድብ ጥዕና ዓለም ኣፍሊጡ

    ውድብ ጥዕና ዓለም፡ ኣብ ከተማ ቓዛ ዝርከብ ሆስፒታል ኣል-ሺፋ "ከም ሆስፒታል ከገልግል ኣብ ዘይክእለሉ ደረጃ በፂሑ" ክብልገሊጹ።።

    "ኣብቲ ከባቢ ዘሎ ቀጻሊ ተኹሲን ቦምባታትን ነቲ ቐደሙ’ውን ኣብ ዝኸፍአ ደረጃ ዝበፅሐ ኩነታት ኣጋዲድዎ" ይብልእቲ ዓለማዊ ትካል።

    ብሓማስ ዝምራሕ ሚኒስትሪ ጥዕና ቓዛ፡ ብውሕዱ 2300 ሰባት ገና ኣብ ውሽጢ ሆስፒታል ኣል-ሺፋ ከምዘለዉይሕብር።

16. 11 ሕዳር 2023ንፍልስጤማውያን ዝድግፍ ኣብ ኒውዮርክ ዝተኻየደ ሰልፊ

    ኣብ ኣሜሪካ ከተማ ኒው ዮርክ ንፍልስጤማውያን ዝድግፍ ሰልፊ ተኻይዱ።

    እቶም ሰልፈኛታት ኣብ ቓዛ ተኹሲ ደው ክብል ጠሊቦም።

    ካብዚ ብተወሳኺ፡ ጋዜጣ ኒው ዮርክ ታየምስ መደባቱ ንእስራኤል ዝወገኑ እዮም ብምባል፡ ኣብ በሪ ቤት ፅሕፈት እቲ ሚድያ ተቓውሞኦም ኣስሚዖም።

17. 11 ሕዳር 2023ብሰራዊት እስራኤል ዝተኸበበ ሆስፒታል ስራሕ ደው ኣቢሉ

    ብሰንኪ ክባ ሰራዊት እስራኤል ነዳዲ ዝወድአ ሆስፒታል፡ ኣገልግሎት ምሃብ ደው ከም ዘበለ ሚኒስትሪ ጥዕና ፍልስጤም ኣፍሊጡ።

    ካብ ትማሊ ዓርቢ ጀሚሩ ወተሃደራት እስራኤል ነቲ ኣብ ቓዛ ዝርከብ ሆስፒታል ከም ዝኸበብዎ ተገሊፁ።

    ወሃቢ ቃል ሚኒስትሪ ጥዕና ፍልስጤም፡ “ኣብ መውዓይ ክፍሊ ዝነበረ ህፃን ሞይቱ። ካልኦት 45 ዕሸላት’ውን ኣብዚ ሆስፒታል ኣለዉ” ክብል ነቲ ኵነታት ኣረዲኡ።

    ኣባል ትካል ዶብ ኣልቦ ሓኻይም ዝኾነ ዶክተር መሓመድ ኣቡ፡ ተዅሲ ደው እንተዘይሉ ወይ ረድኤት ሕክምና ክኣቱ እንተ ዘይተገይሩ “ኣብቲ ሆስፒታል ዘለዉ ተሓከምቲ ኩሎም ሞይቶም፡ እቲ ሆስፒታል ናብ መቓብር ክቕየር’ዩ” ክብል ንቢቢሲ ገሊፁ።

    ኣብቲ ሆስፒታል ኣብ ክፍሊ ህፃናት ይሰርሑ ዝነበሩ ኣባላት ዶብ ኣልቦ ሓኻይም ንሕሙማት ገዲፎም ክሃድሙ ከም ዝተገደዱ ድማ ሓቢሩ።

    ከቢድ ሕጽረት ቀረብ ናውቲ ሕክምና ስለ ዘጋጠመ፡ ሕክምናታት መጥባሕቲ ብዘይ መደንዘዚ መድሓኒት ይካየድ ከም ዘሎ ገሊፁ።

18. 11 ሕዳር 2023ኣብ ለንደን ንፍልስጤም ዝድግፍ ዓብይ ሰልፊ ክካየድ እዩ

    ፖሊስ ለንደን፡ ኣብታ ከተማ ንፍልስጤም ዝድግፍ ሰልፊ ከም ዝካየድ ኣፍሊጡ።

    እቲ ሰልፊ ኣብታ ከተማ ኣብ ዝርከብ ገዚፍ ሕዛእቲ ‘ሃይድ ፓርክ’ ከም ዝካየድ ተገሊፁ።

    ቀዳማይ ሚኒስትር ሪሹ ሱናክ፡ ንፍልስጤማውያን ድጋፍ ንምሃብ ዝወፅኡ ሰባት፡ ኣብ መንጐ ማሕበረሰብ ኣይሁድን ሙስሊምን ዘሎ ስግኣትን ሻቕሎትን ከይርስዑ ሓቲቱ።

    ቅድሚ ሓደ ሰሙን’ውን ኣብ ለንደን ንፍልስጤማውያን ዝድግፍ ሰልፊ ተኻይዱ ነይሩ።

19. 11 ሕዳር 2023ደገፍቲ እስራኤልን ፍልስጤምን ኣብ ኣውስትራልያ ተጓኒፆም

    ኣብ ኣውስትራሊያ ካልአይቲ ዝዓበየት ከተማ ሜልበርን፡ ኣብ መንጎ ደገፍቲ እስራኤልን ፍልስጤምን ጐንፂ ከም ዝተፈጠረ ተገሊፁ።

    ተሌቬዥን እታ ሃገር ኤቢሲ፡ እቶም ተራፀምቲ ማይ ብዝመልአ ፕላስቲክ ከም ዝተደራበዩን ሃይማኖታዊ ትሕዝቶ ዘለዎ ፀርፊ ከም ዝተፃረፉን ፀብፂቡ።

    ደገፍቲ ክልቲኡ ወገን ዝኾኑ ካብ 400 ዘይውሕዱ ሰባት ናብ ኣደባባይ ከም ዝወፅኡ ፖሊስ እታ ሃገር ገሊፁ።

    ነቲ ጐንፂ ስዒቡ ሓደ ሰብ ኣብ ቀይዲ ከም ዘውዓለ ድማ ኣፍሊጡ።

    ብሰንኪ እቲ ጐንፂ ኣብ ሰባት ዝበፅሐ ጉድኣት ብዛዕባ ምህላዉ ግና ዝተብሃለ ነገር የለን።

20. 11 ሕዳር 2023መራሒ ሕዝቦላህ ሎሚ መደረ ክገብር’ዩ

    መራሒ ሕዝቦላህ ሓሰን ነስራላሕ፡ ሎሚ መዓልቲ ንደገፍቱ መደረ ከም ዘስምዕ ተገሊፁ።

    መራሒ ናይቲ ኣብ ሊባኖስ ዝመደበሩ ሕዝቦላህ፡ ኵናት እስራኤል-ቓዛ ካብ ዝውላዕ ንነዘ ሎሚ ኣብ ሰዓታት ድሕሪ ቀትሪ ዝገብሮ መደረ ንካልኣይ ግዘ ይኸውን።

    ሓሰን ነስራላሕ፡ ኣብ ኵናት እስራኤል-ቓዛ ግደ ሕዝቦላህ እንታይ ከም ዝኸውን ከአንፍት ትፅቢት ይግበር።

    ቅድሚ ሓደ ሰሙን፡ “ኩሉ ኣማራፂ ኣብ ጠረጴዛ እዩ” ኢሉ ነይሩ።

    ብዛዕባ እቲ ሊባኖስ ዝመደበሩ ጸረ-እስራኤል ምንቅስቓስ ሕዝቡላህ ኣብዚ ክተንብቡ ንዕድመኩም።