ኣብ ኢትዮጵያ ብዝሒ ብኮሮናቫይረስ ዝተትሓዙ ሰባት 7000 ሓሊፉ

ቀጥታዊ ሸፈነ

1. 10 ሓምለ 2020ኣብ ኢትዮጵያ ተወሰኽቲ 282 ሰባት ኮሮናቫይረስ ተረኸቢብዎም

   ኣብ ኢትዮጵያ ኣብ ዝሓለፈ 24 ሰዓታት 282 ሰባት ብኮሮናቫይረስ ተለኺፎም ከምዝተረኽቡ ሚኒሰትሪ ጥዕና እታ ሃገር ገሊጹ።

   ካልኦት 239 ሰባት ካብቲ ቫይረስ ሓዊዮም ከምዝፋነ’ውን እቲ ሚኒስትሪ ሓቢሩ። ዛጊት ብድምር 4152 ሰባት ካበቲ ቫይረስ ሓዊዮም ኣለው።

   ክሳብ ሕጂ፡ ኣብ ኢትዮጵያ ቁጽሪ ዝተለኸፉ ሰባት 7402 በጺሑ ኣሎ።

   ብመሰረት እቲ ሎሚ ዝተዋህበ ሓበሬታ፡ እቶም ዝተለኽፉ ሰባት ኣብዞም ዝስዕቡ ቦታታት ዝተረኽቡ’ዮም፡

   • ድረዳዋ = 75
   • ኣዲስ ኣበባ = 179
   • ጋምበላ = 15
   • ትግራይ = 7
   • ኦሮምያ = 2
   • ዓፋር ድማ 2 ተለኺፎም ተረኪቦም።

   ኢትዮጵያ፡ ክሳብ ሕጂ 28,1069 ሰባት መርመራ ኮሮናቫይረስ ገይራ ኣላ።

2. 10 ሓምለ 2020ኣብ እንግሊዝ ብዉሑድ 16 ግድም ሓደር ብኮቪድ-19 ሞይቶም ተረኺቦም

   ኣብ እንግሊዝ ብውሑድ 16 ግዳም ሓደር (ጎደና ተመሓደርቲ) ብሰንኪ ኮሮናቫይረስ ሞይቶም ከምዝተረኸቡ ቤት ጽሕፈት ሃገራዊ ስታትስቲክስ ኣፍሊጡ።

   እቶም ሰባት ኣብቲ ንሰለስተ ኣዋርሕ ዝጸንሐ ቀዳማይ ዙር ኣዋጅ ዕጽዋ ጥራይ ሞይቶም ከምዝተረኸቡ እዩ ተገሊጹ።

   እንተኾነ ስለዘይተጸብጸቡ እምበር ካልኦት ብዙሓት'ውን ብሰንኪ እቲ ቫይረስ ሞይቶም ክኾኑ ከምዝኽእሉ ወሲኹ ሓቢሩ።

   ካብቶም ዝሞቱ ዝበዝሑ ደቂተባዕትዮ ከምዝኾኑ'ዩ ተገሊጹ።

3. 10 ሓምለ 2020ሲንጋፖር ኣብዚ እዋን ለበዳ ሃገራዊ መረጻ ተካይድ ኣላ

   ሲንጋፖር ኣብዚ እዋን ለበዳ ኮሮናቫይረስን ብቁጠባ ኣብ ዝተፈተነትሉ ኩነታትን ሃገራዊ መረጻ ተካይድ ኣላ።

   እዛ ደሴታዊት ሃገር ሓንቲ ካብተን ኣብዚ እዋን ዓለማዊ ለበዳ ሃገራዊ ምርጫ ዘካየዳ ሃገራት ዓለም ኮይና።

   ስግኣታት ዝርግሐ ኮቪድ-19 ኣብ ግምት ብምእታው ጥንቃቀ ብዝተመልኦ እቲ ምርጫ ይካየድ ከምዘሎ ተሓቢሩ።

   ድምጺ ዝህቡ ዜጋታት'ውን መሸፈኒ ኢድ (ጓንት)ን መሸፈኒ ኣፍን ኣፍንጫን ብኣግባቡ ተጠቒሞም ኣብቲ ምርጫ ይሳተፉ ኣለዉ።

   ሲንጋፖር ሓንቲ ካብተን ኣብ እስያ ፓስፊክ ብኮሮናቫይሰረስ ኣዝየን ዝተሃሰያ ሃገራት ኮይና፡ ልዕሊ 45,000 ሰባት በቲ ቫይረስ ከምዝተትሓዝዋ ይግለጽ።

   እታ ሃገር ናጽነታ ካብ ዝረኸበትሉ እዋን ጀሚሩ ብሓደ ውድብ (ሰልፊ) ፖለቲካ ማለት 'ፒፕልስ ኣክሽን ፓርቲ' እናተመርሐት ትርከብ።

4. 10 ሓምለ 2020ኣብ ኣሜሪካ ኣብ ሓደ መዓልቲ ጥራይ ልዕሊ 65,000 ሰባት ብኮሮናቫይረስ ከምዝተትሓዙ ተፈሊጡ

   ኣብ ኣሜሪካ ትማሊ ሰሉስ ጥራይ ልዕሊ 65,000 ሰባት ብኮሮናቫይረስ ከምዝተትሓዙ ውጽኢት ምርመራ ኣረጋጊጹ።

   እዚ ቁጽሪ ድማ ኣብታ ሃገር መዓልታዊ ክምዝገብ ካብ ዝጸንሐ ብዝሒ እቲ ዝለዓለ ከምዝኾነ ተፈሊጡ።

   ኣብታ ሃገር ዛጊድ ልዕሊ 3.2 ሚልዮን ሰባት ብኮቪድ-19 ከምዝተትሓዙ ጸብጻት የመልክቱ። እዚ ከኣ ኣብ ዓለም ቅድሚት ክትስራዕ ገይሩ'ሎ።

   ብዝሒ ናይቶም ብሰንኪ እቲ ቫይረስ ዝሞቱ ዘለዉ ሰባት'ውን ወሰኽ እናተረኣዮ ይርከብ።

   ፕረዚደንት ትራምፕ፡ ኣብ ብዝሒ ብኮሮናቫይረስ ዝተሓዙ ሰባት ዝረኣይ ዘሎ ምውሳኽ ምስቲ ኣብታ ሃገር ዝካየድ መጠነ ሰፊሕ ምርመራ ከምዝተሓሓዝ ይገልጽ።

5. 10 ሓምለ 2020ብሰንኪ ኮሮናቫይረስ ንዘጋጥም ሞት 1.5 ሚልዮን መቓብራ ኣብ ደቡብ ኣፍሪቃ

   ኣብ ደቡብ ኣፍሪቃ ሓላፊት ጥዕና ግዝኣት ጋውተን ዝኾነ ባንዲሌ ማሱኩ ብሰንኪ ለበዳ ኮሮናቫይረስ ንዘጋጥም ሞት 1.5 ሚልዮን መቓብራት ይዳሎ ብምባሉ ኣብ ህዝቢ ከቢድ ስግኣት ፈጢሩ።

   እቲ ሓላፊ ነዚ ዝበለ ኣብ ሃገራዊ ቴሌቪዥን ቀሪቡ ኣብ ዝሃቦ መብርሂ እዩ።

   ቢቢሲ ዘዘራረቦ ወሃቢ ቓል ቢሮ ጥዕና ክዋራ ኬካና ብወገኑ "ዋላ'ውን ብዛዕባ ሞት ምዝራብ ከም ነውሪ እንተተቖጸረ ምስቲ ዘሎ ሓቂ ግን ብዛዕባ እቶም ዝሞቱ ዘለዉ ሰባት ክንዘራረብ ይግባእ" ኢሉ።

   ግዝኣት ጋውተንግ ነታ ኣብ ደቡብ ኣፍሪቃ ብኮሮናቫይረስ ብኸቢድ ተሃስያ ዘላ ከተማ ጆሃንስበርግ'ውን እትሓቁፍ እያ።

   ህዝቢ ጻዕቂ ብዘለዎ ኩነታት ዝነበር ብምዃኑ እቲ ለበዳ ካብቲ ሕዚ ዝርከበሉ ኩነታት ክውስኽ ከምዝኽእል ይግለጽ።

   ኣብ ደቡብ ኣፍሪቃ ልዕሊ 225 ሽሕ ሰባት በቲ ቫይረስ ክተሓዙ ከለዉ፡ ከባቢ 3 ሽሕን 600 ድማ ሞይቶም።

6. 10 ሓምለ 2020ኣብ ኤርትራ ተወሰኽቲ 17 ሰባት ኮቪድ-19 ተረኺብዎም 51 ድማ ሓውዮም

   ኣብ ኤርትራ፡ 17 ሰባት ኮሮናቫይረስ ከም ዝተረኽቦም ሚኒስትሪ ጥዕና ትማሊ ኣብ ዘውጽኦ ሓበሬታ ኣፍሊጡ።

   እቶም ሰባት፡ ኣብ ዞባ ጋሽ-ባርካ ኣብ ዝርከብ መወሸቢ ማእከል ኣዲባራ መርመራ ድሕሪ ምግባሮም’ዩ እቲ ቫይረስ ከምዘለዎም ተረጋጊጹ።

   ኩሎም “ኣብ ዝሓለፈ ሳምንታት ብፍኑው ካብ ሱዳን ዝተመልሱ’ዮም” ክብል እቲ ሓበሬታ ጠቒሱ።

   ምሉእ ትሕዝቶ ንምንባብ - ኣብ ኤርትራ ተወሰኽቲ 17 ሰባት ኮቪድ-19 ተረኺብዎም 51 ድማ ሓውዮም

7. 10 ሓምለ 2020ኣብ ኢትዮጵያ ብዝሒ ብኮሮናቫይረስ ዝተትሓዙ ሰባት 7000 ሓሊፉ

   ኣብ ኢትዮጵያ እቲ ለበዳ ካብ ዝተረኣየሉ ጀሚሩ ኣብ 275 ሽሕን 930 ቅምሶታታት ምርመራ ዝተገበረ ኮይኑ፡ ኣብቶም 7120 ሰባት ድማ ኮሮናቫይረስ ተረኺቡ።

   ትማሊ ጥራይ ኣብ ውሽጢ 24 ሰዓታት ምርመራ ካብ ዝተገበረሎም 3 ሽሕን 476 ሰባት እቶም 147 በቲ ቫይረስ ከምዝተትሓዙ ተረጋጊጹ።

   473 ሕሙማት ሓውዮም ካብ መሕከሚ ማእኸላት ክወጽኡ ብምኽኣሎም እውን፡ ብዝሒ ናይቶም ክሳብ ሕዚ ዝሓወዩ ሰባት 3 ሽሕን 913 በጺሑ።

8. 10 ሓምለ 2020ቀጥታዊ ፈነወ ቢቢሲ ትግርኛ ዕለተ ዓርቢ

   ሰላም ከመይ ሓዲርኩም!

   ኣብዚ ዕለት ዝህልዉ ምዕባለታት ኮሮናቫይረስ ኣብዚ ብቐጥታ ክትከታታሉ ከምእትኽእሉ ክንሕብረኩም ንፈትው።

   ናይ ትማሊ ዜናታት ካብዚ ጽሐፍ ንታሕቲ ናይ ሎሚመዓልቲ ድማ ብላዕሊ ትረኽብዎም።

   ካልኦት ትሕዝቶታት ንምርካብ ድማ ናብ ዋና ገጽ -https://bbc.com.im/tigrinya%3C/a%3E%3C/p%3E%3C/div%3E%3Cdiv dir="ltr" class="css-1k9op6x e17x9cvu0">

   ሰናይ መዓልቲ !

9. 9 ሓምለ 2020ኣብ ህንዲ ብዝሒ ብኮሮናቫይረስ ዝተትሓዙ ሰባት ልዕሊ 750,000 በጺሑ

   ኣብ ህንዲ ቁጽሪ መዓልታዊ ብኮሮናቫይረስ ዝተሓዙ ሰባት እናወሰኸ ከምዝመጽአ ይግለጽ።

   በዚ ምኽንያት ከኣ ዛጊድ ኣብታ ሃገር እቲ ቫይረስ ዝተረኸቦም ሰባት ልዕሊ 750,000 እቲ ቫይረስ ከምዝበጽሑ ተፈሊጡ።

   ኣብቶም ዝሓለፉ 24 ሰዓታት ጥራይ ዳርጋ 25,000 ሓደሽቲ ሰባት በቲ ቫይረስ ከምዝተትሓዙ ተረጋጊጹ።

   ህንዲ ካብ ዝሓለፈ ሰሙን ዝጀመረ ሰፊሕ ወፍሪ ምርመራ ተካይድ ዘላ እንተኾነት'ኳ እቲ ዝግለጽ ዘሎ ቁፍሪ በቲ ቫይረስ ዝተትሓዙ ሰባት ግን ክውስኽ ከምዝኽእል ስግኣታት ኣሎ።

10. 9 ሓምለ 2020ናይጀርያ ኣብያተ ትምህርቲ ናብ ኣገልግሎት ክምለሳ ዘሕለፈቶ ውሳነ ሰሪዛ

    መንግስቲ ናይጀርያ ኣብ ሃገሩ ዘለዋ ኣብያተ ትምህርቲ ናብ ኣገልግሎት ክምለሳ ኣሕሊፍዎ ዝነበረ ውሳነ ቀይሩ።

    ሚንስተር ትምህርቲ እታ ሃገር ኣዳሙ ኣዳሙ፡ መንግስቲ ኣብያተ ትምህርቲ ክኸፈታ ዝኽእላ ዝሓሸ ኩነታት እንተሃልዩ ጥራይ እዩ ከምዝበለ ንጋዜጠኛታት ሓቢሩ።

    ኣብ ዝርግሐ ለበዳ ኮኦቪድ-19 ወሰኽ ኣብ ዝህሉ ግን ክኽፈታ ከምዘይክእላ ምግላጹ ኣዘኻኺሩ።

    መንግስቲ ናይጀርያ፡ ኣብ ዝሓለፈ ሰሙን ቀዳማይን ካልኣይን ደረጃ ኣብያተ ትምህርቲ ክኽፈታ ከምዝኽእላ ኣፍሊጡ ነይሩ።

    ኣብታ ሃገር 30,249 በቲ ቫይረስ ክተሓዙ ከለዉ፡ 684 ድማ ሞይቶም።

11. 9 ሓምለ 2020ጥምየት ልዕሊ ኮሮናቫይረስ ሰባት ክቐትል ይኽእል'ዩ - ኦክስፋም

    ድኽነት ኣብ ምውጋድ ኣድሂቡ ዝሰርሕ ዓለማዊ ትካል ግብረሰናይ ኦክስፋም ብኮሮናቫይረስ ካብ ዝሞቱ ሰባት ብጥምየት ዝሞቱ ክበዝሑ ከምዝኽእሉ ኣጠንቂቑ።

    "ብሰንኪ ለበዳ ኮቪድ-19 ብዝስዕብ ጥምየት ምኽንያት መዓልታዊ 12,000 ሰባት ክሞቱ ይኽእሉ እዮም" ዝበለ እቲ ትካል፡ እዚ ቁጽሪ ድማ ልዕሊ እቶም በቲ ሕማም ዝሞቱ ከምዝኸውን ሓቢሩ።

    ኦክስፋም ነቲ ከጋጥም ዝኽእል ጥምየት መንቀሊ ዝበሎም ምኽንያታት ዘርዚሩ'ሎ።

    ብስፍሓት ዘጋጥም ስእነት ስራሕ፣ ብምኽንያት ኣዋጃት ዕጽዋ ከጋጥም ዝኽእል ምንካይ ዓቕሚ ኣፍረይቲ መግቢ ከምኡ'ውን ኣብ ምክፍፋል ረድኤት ዘጋጥሙ ማሕለኻታት ካብቶም ምኽንያታት ከምዝኾኑ ኣፍሊጡ።

    በዚ ከጋጥም ዝኽእል ጥምያት ብዝያዳ ክህሰያ ዝኽእላ ብዝብል ድማ 10 ሃገራት ኣነጺሩ። ኢትዮጵያ ሓንቲ ካብተን ሃገራት እያ።

    የመን፣ ዲሞክራቲክ ሪፐብሊክ ኮንጎ፣ ቭነዝዌላ፣ አፍጋኒስታን፣ ምዕራብ ኣፍሪቃ ሳሕል፣ደቡብ ሱዳን፣ ሶርያ፣ ሱዳንን ሃይቲን ከኣ እተን ዝተረፋ ሃገራት እየን።

12. 9 ሓምለ 2020ሚንስተር ምክልኻል እስራኤል ነብሰ-ውሸባ ገይሩ

    ሚንስተር ምክልኻል እስራኤል ቤኒ ጋንትዝ ነብሰ-ውሸባ ክገብር ወሲኑ።

    ንሱ ነዚ ክገር ዝኸኣለ ምስ ብኮሮናቫይረስ ከምዝተትሓዘ ዝተረጋገጸሉ ሰብ ርክብ ስለዝነበሮ እዩ።

    እዚ ዝኸውን ዘሎ ከኣ እታ ሃገር ብዝሒ ዝልከፉ ሰባት ንኸይውስኽ ኣብ እትቃለሰሉ ዘላ እዋን ከምዝኾነ ተገሊጹ።

13. 9 ሓምለ 2020ብምኽንያት ለበዳ ኮሮናቫይረስ ተናዊሑ ዝጸንሐ ፍርዲ ሞት ሓደ እሱር ተፈጻሚ ኮይኑ

    ኣብ ኣሜሪካ ግዝኣት ቴክሳስ ብምኽንያት ለበዳ ኮቪድ-19 ተናዊሑ ዝጸንሐ ተፈጻምነት ፍርዲ ሞት ሓደ እሱር ትማሊ ረቡዕ ግብራዊ ኮይኑ።

    መቕጻዕቲ ሞት ወዲ 45 ዓመት ቢሊ ጆ ዋርድሎው፡ እቲ ለበዳ ካብ ዘጋጥም ድሕሪ ሓሙሽተ ኣዋርሕ ኣብታ ግዝኣት ንፈለማ እዋን ዝተፈጸመ ከምዝኾነ ተገሊጹ።

    መድሓኒት ተወጊኡ ክመውት ዝተገበረ ቢሊ ዋርድሎው፡ ኣብ 1993 ብዝፈጸሞ ስርቅን ቅትለት ወዲ 82 ዓመት ሰብኣይን'ዩ ብሞት ክቕጻዕ ተፈሪድዎ።

    ጠበቓታቱ፡ ንሱ ነቲ ገበን ኣብ ዝፈጸመሉ እዋን ገና ወዲ 18 ዓመት መንእሰይ ስለዝነበረ ብሞት ክቕጻዕ የብሉን ብዝብል ክካትዑሉ ጸኒሖም'ዮም።

    ብሰንኪ ኮሮናቫይረስ ተናዊሑ ዝጸንሐ ተፈጻምነት ፍርዲ ሞት ግብራዊ ብምግባር ቴክሳስ ፈላመይቲ ግዝኣት ኣሜሪካ አይኮነትን። ቅድሚኡ ብ19 ግንቦት ኣብ ግዝኣት ሚዙሪ ሓደ እሱር ብሞት ተቐጺዑ ነይሩ።

14. 9 ሓምለ 2020አብ ሰርቢያ ንኣዋጅ ዕጽዋ ብምቅዋም ዝተወልዐ ዓመጽ ንኻልኣይ መዓልቲ ቀጺሉ

    ዋና ከተማ ሰርቢያ ኣብ ዝኾነት ቤልግሬድ ዝተወለዐ ተቓውሞ ናብ ጎንጺ ሰልፈኛታትን ፖሊስን ከምዝተሰጋገረ ተገሊጹ።

    እቲ ኣብ ዝሓለፈ ሰሉስ ብሰላማዊ መገዲ ዝጀመረ ተቓውሞ፡ ካብ ዓርቢ ምሸት ክሳብ ሰኑይ ንጉሆ ዝጸንሕ እዋጅ እቶ እቶ ምስተኣወጀ እዩ ተወሊዑ።

    ናብ ጎንጺ ዝተሰጋገረ ተቓውሞ እናተጓሃሃረ ብምምጽኡ ትማሊ ረቡዕ 10 ኣባላት ፖሊስ ከምዝቖሰሉ ተፈሊጡ።

    ኣብቲ ኣዋጅ እቶ እቶ ሎሚ ሓሙስ ናይ መወዳእታ ውሳነ ዝወሃብ'ኳ እንተኾነ፡ ግብራዊ ምዃኑ ከምዘይተርፍ'ዩ ዝግለጽ ዘሎ።

15. 9 ሓምለ 2020ኣብ ኣሜሪካ ትማሊ ጥራይ ልዕሊ 60 ሽሕ ሰባት ብኮሮናቫይረስ ከምዝተትሓዙ ተፈሊጡ

    ኣብ ኣሜሪካ ትማሊ ረቡዕ ዝተመዝገበ ቁጽሪ ብኮሮናቫይረስ ዝተትሓዙ ሰባት ኣብ ዓለም እቲ ዝለዓለ መዓልታዊ ብዝሒ ኮይኑ'ሎ ከም ጸብጻብ ሮይተርስን ኒው ዮርክ ታይምስን።

    ሮይተርስ ከምዝሓበሮ ኣብ ዝተፈላለያ ግዝኣታት ኣሜሪካ ብዝሒ ሓደሽቲ በቲ ቫይረስ ዝተሓዙ ሰባት እናወሰኸ ብምምጽኡ ትማሊ ጥራይ ብሓፈሻ ኣብ ልዕሊ 60,000 ሰባት ዘጋጠመ ረኽሲ ተመዝጊቡ።

    ፕረዚደንት ትራምፕ ክንድዚ ዝኣክል ሓድሽ ረኽሲ ክምዝገብ ዝኸኣለ፡ ብብዝሒ ምርመራ ምክያድ ስለዝተኽኣለ ምዃኑ ይገልጽ።

    ኣብታ ሃገር ትማሊ ልዕሊ 900 ሰባት ብሰንኪ እቲ ቫይረስ ከምዝሞቱ ጸብጻባት የመልክቱ።

16. 9 ሓምለ 2020ቀጥታዊ ፈነወ ቢቢሲ ትግርኛ ዕለተ ሓሙስ

    ሰላም ከመይ ሓዲርኩም!

    ኣብዚ ዕለት ዝህልዉ ምዕባለታት ኮሮናቫይረስ ኣብዚ ብቐጥታ ክትከታታሉ ከምእትኽእሉ ክንሕብረኩም ንፈትው።

    ካልኦት ትሕዝቶታት ንምርካብ ድማ ናብ ዋና ገጽ - https://bbc.com.im/tigrinya%3C/a%3E%3C/p%3E%3C/div%3E%3Cdiv dir="ltr" class="css-1k9op6x e17x9cvu0">

    ሰናይ መዓልቲ !

17. 8 ሓምለ 2020ኣብ ኢትዮጵያ 199 ሓደስቲ ሰባት ብኮሮናቫይረስ ተታሒዞም

    ኣብ ኢትዮጵያ ኣብ ልዕሊ 4162 ሰባት ብዝተገብረ መርመራ 199 በቲ ቫይረስ ዝተለኽፉ ከም ዝተረኽቡ ሚኒስትሪ ሓለዋ ጥዕና ሓቢሩ።

    ብቦታ፡ 77 ኣብ ድሬዳዋ፡ 71 ኣብ ኣዲስ ኣበባ፡ 21 ኣብ ጋምቤላን፡ 15 ኣብ ትግራይ፡ ካልኦት 15 ድማ ኣብ ዝተፈላለዩ ቦታት ዝተረኽቡ ምዃኖም እቲ ሓበሬታ ይጠቅስ።

    ዛጊት ኣብታ ሃገር ቁጽሪ ዝተለኽፉ፡ 6,973 ክበጽሕ እንከሎ፡ 3440 ሓውዮም ኣለዉ።

    ክሳብ ሕጂ 272,454 ሰባት መርመራ ከም ዝተገብረሎም’ውን እቲ ሚኒስትሪ ይሕብር።

18. 8 ሓምለ 2020ዘወርቲ ሞተር ብሽክሌታ ዩጋንዳ ንመንግስቲ ከሲሶም

    ወሃብቲ አገልግሎት ታክሲ ሞተር ብሽክሌታ ዩጋንዳ ተሳፈርቲ ከይጽዕኑ ንዝአገዶም መንግስቲ ከሲሶም።

    ማሕበር እቶም ዘወርቲ ሞተር ብሽክሌታ፡ መንግስቲ ካልኦት ንጥፈታት ናብ ስራሕ ክምለሱ ብምውሳን ነዓና ግን ከልኪሉና ክብል አፍሊጡ።

    ፕረዚደንት ዮወሪ ሙሰቪኒ፡ ዝርገሐ ኮሮናቫይረስ ንምቁጽጻር ብዝብል፡ ወሃብቲ አገልግሎት ህዝባዊ መጓዓዝያ ፍርቂ ጥራይ ብምጽዓን ናብ ስራሕ ክምለሱ አፍቂዱ እዩ።

    ኣብታ ሃገር 'ቦዳ ቦዳ' ብዝብል ዝፍለጣ ሞተር ብሽክሌታታት ግን አካላዊ ርሕቐት ንምሕላው ስለዘይምችዋ ናብ አገልግሎት ከይተመለሳ ክጸንሓ'ዩ ውሳነ ኣሕሊፉ።

    እተን ሞተር ብሽክሌታታት ኣቑሑት ጥራሕ ክጽዕና እዩ ዝፍቀደለን።

    ነዚ ውሳነ ዘይተቐበሉ ዘወርቲ ሞተር ብሽክሌታታት ድማ ተቓውሞ ከስምዑ ጸኒሖም።

    መንግስቲ ብምኽንያት እቲ ውሳነ ንዘጋጠሞም ቁጠባዊ ቅልውላው ዘካሓሕስ ገንዘብ ከምዘይሃቦም'ውን ገሊጾም።

19. 8 ሓምለ 2020ውሳነ ኣሜሪካ ኣብ ጉዳይ ቪዛ ወጻእተኛታት ተምሃሮ ንብዙሓት ኣቖጢዑ

    ዝተፈላለያ ትካላት ትምህርቲ ለበዳ ኮሮናቫይረስ ንምክልኻል ኢለን መስርሕ ምምሃር ምስትምሃር ካብ ብኣካል ብመርበብ [ኦንላይን] ክህባ ጀሚረን ኣለዋ።

    ነዚ ስዒቡ እምበኣር ኣብ ኣመሪካ ዝምሃሩ ዜጋታት ወጻኢ ነናብ ዓዶም ክኸዱ ተወሲኑ እዩ።

    ኣብ ኣመሪካ ንጉዳይ ዜጋታት ወጻኢ ብላዕለዋይነት ዝመርሕ ኣይስ [ኢሚግሬሽን ኤንድ ከስተምስ ኢንፎርስመንት]፡ እቶም ተምሃሮ ብኦንላይን ጥራሕ ዝመሃሩ እንተድኣኾይኖም ካብታ ሃገር ክወጽኡ ከምዝግበር ኣፍሊጡ ኣሎ።

    ዘላቶም እንኮ ኣማራጺ ዝመሃርሉ ትካል ትምህርቲ ብምቕያር ብኣካል ክመሃርሉ ዝኽእልሉ ባይታ ምእላሽ ከምዝኾነ'ውን ገሊጹ።

    ምሉእ ትሕዝቶ ንምንባብ - ውሳነ ኣሜሪካ ኣብ ጉዳይ ቪዛ ወጻእተኛታት ተምሃሮ ቁጠዐ ፈጢሩ

20. 8 ሓምለ 2020ሚንስተር ጥዕና ዚምባብወ ካብ ስልጣኑ ተኣልዩ

    ፕረዚደንት ዚምባብወ ኤመርሰን ምናንጋግዋ ንሚንስተር ጥዕና ኦባዲሃ ሞዮ ካብ መዝነቱ ኣልዩ።

    እቲ ሚንስተር "ዘይእርኑብ ጠባያት ኣርእዩ" ብዝብል ካብ ስልጠኑ ከምዝተኣለየ ተገሊጹ'ሎ።

    "ካብ ሓደ ሚንስትር ትጽቢት ብዘይግበረሉ ባህርያት" ከምዝተሰጐጐ ዋና ጸሓፊ ፕረዚደንት ዚምባብወ ሚሺክ ሲባንዳ ብትዊትር ኣብ ዝጥቅዖ መልእኽቲ ኣፍሊጡ።

    እቲ ሚንስትር ግን ብዛዕባ'ዚ ዝሃቦ ግብረመልሲ የለን።

    ሚንስተር ጥዕና ማዮ፡ ምስ ዕድጊት ናውቲ ምክልኻል ኮሮናቫይረስ ብዝተሓሓዝ ኣብ ዝተፈጸመ ብልሽውና ተሳቲፉ ብዝብል ኣብ ዝሓለፈ ወርሒ ተኣሲሩ ነይሩ።

    ብድሕሪኡ ድማ መሰል ዋሕስ ተዋሂብዎ ክፍታሕ ክኢሉ።

    ኣብቲ ሽዑ እዋን፡ ንምክልኻል እቲ ለበዳ ዘገልግሉ አፋውስ፣ መመርመርታትን ካልኦት ናውትን ንምቕራብ ተወዳዲሮም ንዝተሰዓሩ ተጫረትቲ ኩባንያታት ዕድል ሂቡ ዝብል ክሲ እዩ ቀሪቡሉ።