ኣብ ኢትዮጵያ ኣብ ዝሓለፉ 24 ሰዓታት ብዝተገበረ መርመራ ኮቪድ-19 ተወሰኽቲ 11 በቲ ቫይረስ ዝተለኸፉ ሰባት ከም ዝተረኸቡ ተረጋጊጹ። ብኻልእ ወገን ሽዱሽተ ሰባት ካብቲ ሕማም ከም ዝሓወዩን፡ በዚ ብዝሒ ካብ ኮሮናቫይረስ ዝሓወዩ ሰባት 105 ከም ዝበጽሐን መግለጺ ሚኒስትሪ ጥዕናን ኢንስቲትዩት ማሕበረሰብ ጥዕናን ይሕብር።
ኣብ ኤርትራ፡ ሓንቲ ካብቶም ኣብ ሆስፒታል ተዓቑቦም ሕክምናዊ ክንክን ክግበረሎም ዝጸንሑ ሕሙማት ኮሮናቫይረስ ምሉእ ብምሉእ ሓዊያ ናብ ቤታ ከምዝተፋነውት ሚኒስትሪ ጥዕና ኤርትራ ገሊጹ።
ብመሰረት እቲ መግለጺ፡ ምስቶም ኣቐዲሞም ብተመሳሳሊ ኣገባብ ዝተፋነው 37 ሰባት፡ ቁጽሪ ካብ ኮሮናቫይረስ ዝሓወዩ ሰባት 38 በጺሑ’ሎ።
ኣብ ኤርትራ፡ ክሳብ ሕጂ ቁጽሪ ብኮሮናቫይረስ ዝተለኽፉ ሰባት 39 እዩ።
ምንጪ ስእሊ, yemane G/meskel
ምንጪ ስእሊ, Getty Images
ኣብ ሓደ መዓልቲ ዘጋጠመ 179 ሞት ዘመዝገበት ጣልያን ካብቲ ትማሊ ሰንበት ዝነበረ ቁጽሪ ቁሩብ ወሰኽ ኣርእያ'ላ።
ኣብታ ሃገር ቁጽሪ ናይቶም ዛጊድ ዝሞቱ ሰባት 30,739 በጺሑ'ሎ።
እንተኾነ ቁጽሪ ናይቶም ብጽኑዕ ዝሓመሙ ክትትል ኣብ ዝገበረሉ ክፍሊ ዘለዉ ሰባት ናብ 999 ወሪዱ'ዩ።
እዚ ድማ ኣብ ውሽጢ ዝሓለፉ ክልተ ኣዋርሕ ንፈለማ እዋን ዝተረኣየ ምንካይ ከምዝኾነ ተገሊጹ።
ኣብ ጣልየያን 744 ሓደሽቲ በቲ ቫይረስ ዝተትሓዙ ክርከቡ ከለዉ፤ ብ0.34 ሚኢታዊት ምንካይ ኣርእዩ'ሎ።
ቁጽሪ ምርመራ ዝግበረሎም ሰባት'ውን ነክያ'ላ።
ምንጪ ስእሊ, Reuters
ዋና ፈጻሚ ስራሕ እቲ መገዲ ኣየር ኣክባር ኣል-ባከር፡ ሰባት ብነፋሪት መገሻ ንምግባር ዘለዎም ድልየቶም ብ2023/2024 እውን እንተተመሊሱ "ብጣዕሚ ከምዝግረም" ተዛሪቡ።
ብፍላይ ንስራሕ ዝግበሩ መገሻታት ብቕልጡፍ ናብ ዝነበርዎ መጠን ክምለሱ ከምዘይክእሉ ኣጠንቂቑ።
እቲ መገዲ ኣየር ኣብዚ እዋን ለበዳ ኮሮናቫይረስ ዝገብሮ በረራ ዝቐጸለ ኮይኑ፡ ቄጽሪ መዓርፎ (ዝበጽሓሎም ቦታታት) 30 ኣብጺሑ'ሎ።
ቅድሚ እቲ ለበዳ ናብ 165 ቦታታት ይበጽሕ ነይሩ። ክሳብ መዛዘሚ ወርሒ ሰነ ድማ እቶም ዝበጽሓሎም መዓርፎታት 80 ከብጽሖም ተሊሙ'ዩ።
ኣል-በከር ንወኪል ዜና ሮይተርስ ከምዝሓበሮ፡ ኣብ ዝካየዱ በራታት መናብር ነፈርቲ ካብ 50 ክሳብ 60 ሚኢታዊት ከምዝመልኡ ኣተንቢሁ።
መገዲ ኣየር ቀጠር (ኳታር) ኣብ መላእ ዓለም ኣብ ምክልኻል ኮሮናቫይረስ ንዝወፈሩ ሰብ ሞያ ሕክምና 100 ሽሕ መምለሲ ትኬት ብነጻ ክህብ ቃል ኣትዩ።
ምንጪ ስእሊ, Getty Images
ኣሪፍ [ሽሙ ዝተቐየረ] ኣብ ምዕራብ ህንዲ ካብ ዝርከብ ቤት ማእሰርቲ ብ31 ሚያዚያ ምስ ተፈትሐ ናብ ገዝኡ ኣይተመልሰን።
ኣብታ ዝተፈትሐላ ዕለት፡ ሰለስተ ግዜ ናብ ክልተ ከተማታት ተወሲዱ፤ ካብታ ዝነብረላ ከተማ መሓዝኡ ናብ ዝርከበሉ ከባቢ። ድሓር መንበሪ ገዛ ዘይብሎም ሰባት ናብ ዝርከብሉ መዕቆቢ ቦታ ኣትዩ።
ናብ ገዝኡ ንክኸይድ ከምልጥ ፈቲኑ ኣይሰመረሉን፤ ሕጂ ኣብ ናይ መሓዝኡ ገዛ ክውሸብ ተወሲኑዎ።
እዚ ዛንታ፡ ህንዲ ዝርግሐ ለበዳ ኮቪድ-19 ንምቁጽጻር ወሲዳቶ ኣብ ዘላ ኣዋጅ ዕጽዋ ኣብ ልዕሊ እሱራት ዘጋጥም ዘሎ ስምባደን ተነጽሎን ዝነግር ዛንታ እዩ።
እዚ ታክሲ ዘዊሩ ዝናበር ዝነበረ ወዲ 32 ዓመት መንእሰይ፡ ቴሌፎን ሰሪቑ ብዝብል ክሲ ንሽዱሽተ ኣዋርሕ ኣብ ምብራቕ ህንዲ ማሃራሽታራ ኣብ ዝተብሃለ ቦታ እዩ ተኣሲሩ ጸኒሑ።
198 ዶላር ከፊሉ ብዋሕስ ክወጽእ ምኸኣለ ነይሩ፤ ግን ድማ ስድርኡ እዚ ዝኣክል ገንዘብ ክረኽቡ ስለ ዘይክኣሉ ኣብ ቤት ማእሰርቲ ከሕልፎ ተገዲዱ።
ምንጪ ስእሊ, REUTERS
ፕረዚደንት ሩስያ ቭላድሚር ፑቲን ካብ ጽባሕ ሰሉስ ጀሚሩ እቲ ተነቢሩ ዝጸንሐ ኣዋጅ ዕጽዋ ከምዝፎኩስን ትካላት ንግዲ ናብ ስራሕ ከምዝምለሱን ኣፍሊጡ።
ንሱ ከምዝበሎ፡ ምልባዕ እቲ ቫይረስ ንምክልኻል ኣብታ ሃገር ዝተኣወጀ "ስራሕ ዝተኣገደሉ ግዜ" ሽድሽተ ሰሙናት ኣቑጺሩ'ሎ።
እቶም ገደባት ምፍኳሶም ንኹሎም ዓውዲታት ቁጠባ ከምዝጸልዎም ዝሓበረ ፑቲን ገለ ግዝኣታት ግን ኣገዳሲ ኮይኑ እንተተረኺቡ ጥቡቕ ቁጽጽር ክገብራ እየን ኢሉ።
ሩስያ ኣብዚ ሕዚ እዋን ብብዝሒ እቲ ቫይረስ ዝሓዞም ሰባት ብደረጃ ዓለም ሳልሰይቲ ትስራዕ።
ምንጪ ስእሊ, AFP
ኬንያ ብምኽንያት ኣብ አብያተ ማእሰርቲ ዝፍጠር ምጭንናቕ ኮሮናቫይረስ ከይጋፋሕ ብምስጋእ 7,000 እሱራት ከምዝፈትሐት ሚንስትር ውሽጣዊ ጉዳያት ፍሬድ ማቲያንጊ ንኣባለት ባይቶ ኣፍሊጡ።
እቲ ሚንስትር ከምዝሓበሮ፡ ኣብ ከተማ ናይሮቢ ዘሎ ሓደ ቤት ማእሰርቲ ክልተ በቲ ቫይረስ ዝተትሓዙ እሱራት ተረኺቦምዎ ኣለዉ።
ሚንስትሪ ጥዕና ኬንያ ኣብ ኩለን ኣብያተ ማእሰርቲ ጃምላዊ ምርመራ ኮሮናቫይረስ የካይድ ከምዘሎ ኣብታ ሃገር እትርከብ ቴሌቪዥን ሲትዝን ጸብጺባ።
ኬንያ 672 ሰባት በቲ ቫይረስ ክተሓዝዋ ከለዉ፡ 32 ሰባት ድማ ሞይቶም።
ምንጪ ስእሊ, Karina Igonikon
ሰብ መዚ ናይጀርያ ምልባዕ ኮሮናቫይረስ ንምቁጽጻር ንዝተነበረ ድንጋገ ዕጽዋ ዝጠሓሱ ክልተ ሆቴላት ኣዕንዮም።
ኣመሓዳሪ ግዝኣት 'ኖርዝርን ሪቨርስ' ኒይሶም ዋይክ፡ ክልቲኦም ሆቴላት ብሰንበት ከምዝፈረሱ ኣፍሊጡ።
ሓለፍቲ ክልቲኦም ሆቴላት ኣብ ቀይዲ ዝወዓሉ ኮይኖም፡ ሓዉ ነቲ ሓላፊ ናይቲ ፕሮደስተ ሆምስ ዝተበሃለ ሆቴል ንቢቢሲ ከምዝሓበሮ እቲ ሆቴል ንሕግታት ዕጽዋ ኣኽቢሩ'ዩ ዝሰርሕ ነይሩ።
እቶም ሆቴላት ብምፍራሶም ንዝቐረቡ ነቐፌታታት ዘይተቐበለ ኣመሓዳሪ ኒይሶም፡ ኣብ ዝተፈላለዩ ሆቴላት እታ ግዝኣት ኮሮናቫይረስ ዝሓዞም ሰባት ከምዝተረኸቡ ኣዘኻኺሩ።
"መጠን እቲ ዘጋጥም ዘሎ ረኽሲ ተዓዘቡ፤ እቶም ዝበዝሑ ሰባት ድማ ኣብ ሆቴላት'ዮም ዝርከቡ" ኢሉ።
እቶም ዝፈረሱ ክልተ ሆቴላት በቲ ቫይረስ ዝተለኸፉ ሰባት ተረኺቦምዎም'ዶ ኣብ ዝብል ግን ሓበሬታ ኣይሃበን።
ኣብታ ግዝኣት 21 ሰባት በቲ ቫይረስ ክትሓዙ ከለዉ፡ ክልተ ሰባት ሞይቶም'ዮም።
ምንጪ ስእሊ, Getty Images
ሩስያ ብብዝሒ ብኮሮናቫይረስ ዝተትሓዙ ሰባት ኣብ ዓለም ሳልሳይ ደረጃ እትስራዕ ኮይና፡ ኣብ ውሽጢ ዝሓለፉ 24 ሰዓታት ድማ 11,656 ሰባት በቲ ቫይረስ ተታሒዞም።
ዛጊድ ኣብታ ሃገር 221,344 ሰባት ከምዝተትሓዙ ተፈሊጡ'ሎ። 2,009 ሰባት'ውን ሞይቶም።
ካብ ናይ ሩስያ ብዝበለጸ ብኮሮናቫይረስ ዝተትሓዙ ሰባት ዝርከቡለን ሃገራት ኣሜሪካን ስፔንን እየን።
ኣብታ ሃገር ዝተነበረ እገዳ ምንቅስቓስ (ዕጽዋ) ጸባሕ ከብቅዕ እዩ።
ፕረዚደንት ቭላድሚር ፑቲን ኣብዚ ጉዳይ ሎሚ መዓልቲ መግለጺ ክህብ ትጽቢት ይግበር።
ምንጪ ስእሊ, Getty Images
ኣብ ኢትዮጵያ ኣብ ዝሓለፉ 24 ሰዓታት ብዝተገበረ መርመራ ኮቪድ-19 ተወሰኽቲ 11 በቲ ቫይረስ ዝተለኸፉ ሰባት ከም ዝተረኸቡ ተረጋጊጹ።
ሚኒስትሪ ጥዕና ኣብ ዘውጽኦ ሓበሬታ፡ ኣብ ዝሓለፉ 24 ሰዓታት 1764 ሰባት መርመራ ቤተፈተነ ከም ዝተገብረሎም ይገልጽ።
እቶም እዚ ቫይረስ ዝተረኸቦም ሰባት ዕድሚኦም ካብ 18-38 ዓመት ኮይኑ፡ ኩሎም ኢትዮጵያውያን'ዮም፤ ካብዘኢም እቶም 10 ደቂ ተባዕትዮ'ዮም።
እቶም ሓሙሽተ ካብ ከተማ ኣዲስ ኣበባ፣ እቶም ክልተ ካብ ትግራይ ኣብ ዘሎ መወሸቢ ማእከል፣ ሰለስተ ካብ ክልል ዓፋር፣ ሓደ ድማ ኣብ ክልል ኦሮሚያ ካብ ዘሎ መወሸቢ ማእከል ዝተረኸቡ እዮም።
ብኻልእ ወገን ትማሊ ሽዱሽተ ሰባት ካብቲ ሕማም ከም ዝሓወዩን፡ በዚ ብዝሒ ካብ ኮሮናቫይረስ ዝሓወዩ ሰባት 105 ከም ዝበጽሐን እቲ መግለጺ ይሕብር።
ሰባት ንነብሶም ካብዚ ሕማም ንምክልኻል፡ መዓልታዊ ኣብ ዝህልዎም ምንቅስቓስ ኣገደስቲ ኣብ ዝኾኑ ቦታታት መሸፈኒ ኣፍን ኣፍንጫን ክጥቀሙ፣ ኢዶም ክሕጸቡን ኣካላዊ ርሕቀቶም ክሕልውን ውድብ ጥዕና ዓለም ይምዕድ።
ምንጪ ስእሊ, Getty Images
ስዑዲ ዓረብ ብምኽንያት ኮሮናቫይረስ ዝተሃሰየ ቑጠብኣ ንምሕጋዝ ኣብ ልዕሊ ኣቅሑትን ኣገልግሎትን ተወሳኺ እሴት ግብሪ ሰለስተ ዕጽፊ ወሰኽ ከም እትገብር ኣፍሊጣ።
መንግስቲ፡ እታ ሃገር ብተወሳኺ ንዜጋታት ዝወሃብ ዝነበረ ናይ ድጎማ ገንዘብ ደው ከም ዘብል ኣፍሊጡ።
ለበዳ ኮሮናቫይረስ ስዒቡ ብዝመጽአ ቅልውላው ዋጋ ነዳዲ ምንካይ ስለ ዘርኣየ፡ ካብቲ ዓውዲ ትረኽቦ ዝነበረት እቶት ብዝለዓለ መጠን ነክዩ።
ማዕከን ዜና እታ ሃገር ከም ዝጸብጸቦ፡ እዚ ተወሳኺ እሴት ታክስ ካብ ዝቕጽል ወርሒ ሰነ ጀሚሩ ካብ 5 ሚኢታዊት ናብ 15 ሚኢታዊት ሓፍ ክብል እዩ።
ምንጪ ስእሊ, AFP
ኣብ ዲሞክራሲያዊት ሪፐብሊክ ኮንጎ፡ ልዕሊ ሓደ ሽሕ ሰባት ብኮሮናቫይረስ ተትሒዞም።
እቲ ቫይረስ ካብ 26 ግዝኣታት እታ ሃገር ኣብ ሸውዓቲአን ከም ዝተላብዐ ይግለጽ።
መብዛሕትኦም ብኮሮናቫይረስ ተለኺፎም ዘለው ሰባት ድማ ኣብ ርእሰ ከተማ ኪንሻሳ ዝርከቡ'ዮም።
ኣብታ ሃገር ብዝሒ ግዳያት እዚ ቫይረስ 1924 ዝበጽሐ ኮይኑ፡ እቶም 938 ኣብ ከተማ ኪንሻሳ ይርከቡ።
ዲሞክራሲያዊት ሪፐብሊክ ኮንጎ ዝርግሐ እዚ ለበዳ ንምቁጽጻር ብዝብል ኣብ መጀመርታ ወርሒ መጋቢት ኣዋጅ ህጹጽ ግዜ ኣዊጃ እያ።
ሕዚ ድማ ንዝቕጽሉ 15 መዓልታት ተናዊሑ ኣሎ።
ምንጪ ስእሊ, AFP
ታንዛኒያ፡ ናብ ሃገሮም ክምለሱ ንዝደልዩ ዜጋታት ሃገራት ወጻኢ ንምጉዕዓዝ ብዝብል ኣብ ልዕሊ ዓለምለኻዊ በረራታት ኣንቢራቶ ዝነበረት እገዳ ከም ዘፍኮሰት ተገሊጹ።
ብመሰረት እቲ ዝተመሓየሸ መምርሒ ሃገራት ዜጋታተን ካብ ታንዛኒያ ንምውጻእ ኣብ ዝግበሩ በረራታት፡ ኣብ ውሽጢ ክልተ ሰዓት ፍቓድ ረኺቦም ንክኣትውን ንከዕርፉን ከተፍቅድ እያ።
ቅድሚ ሕጂ ግን በረራታት ቅድሚ ክልተ ሰሙን ኣቢሉ'ዮም ፍቓድ ዝረኽቡ ነይሮም።
ዳይሬክተር ሲቪል ኣቪየሽን ታንዛኒያ ሃምዛ ጆሃሪ፡ ሰብኣዊ ሓገዝን ናውታት ሕክምንናን ንምጉዕዓዝ'ውን በረራ ተፈቒዱ ኣሎ ኢሉ።
ብተወሳኺ ቴክኒካዊ ጸገም ኣጋጢምወን ከምኡ'ውን ምስ ድሕነት ብዝተሓሓዝ ከዕርፋ ዝደልያ ነፈርቲ፡ ኣብ ታንዛኒያ ንክዓርፋ ክፍቀደለን እዩ።
ታንዛኒያ ካብ 11 ሚያዚያ 2020 ጀሚሩ ዝኾነ ዓይነት ናይ ወጻኢ በረራ ኣጊዳ ከም ዝጸንሐት ይፍለጥ።
ምንጪ ስእሊ, AFP
ኣሜሪካ 1.3 ሚሊዮን ብኮቪድ-19 ዝተትሓዙ ሰባት ብምሓዝ ኣብ ዓለም ዝለዓለ ቑጽሪ ግዳያት ዘለውዋ እንተኾነት’ውን፡ ኣብ መላእ ኤውሮጳ ብሓፈሽኡ 1.5 ሚሊዮን በጺሑ ኣሎ።
ስፐይን ፣ ብሪጣንያን ጥልያንን ካብተን ብብዝሒ ኮሮናቫይረስ ዝተጥቕዓ ሃገራት ዝመርሓ እየን።
ይኹን'ምበር፡ ብርክት ዝበላ ሃገራት ኤውሮጳ ወሲደንኦ ዝጸንሓ ስጉምታት ዕጽዋ ብዝተፈላለየ መልክዑ ከፍኩሳ ጀሚረን ኣለዋ።
መባእታዊ ኣብያተ ትምህርቲ ፈረንሳ ሎሚ መዓልቲ ብውሑድ ቑጽሪ ተመሃሮ ምምሃር ምስትምሃር ክጅምራ እየን። መሸጢ ክዳን ድኳናት፣ መጽሓፍቲ ዝሽየጠሎም ቦታታትን እንዳ ጸጉርን ክኽፈቱ'ዮም። ሬስቶራንታት፣ ሲነማን ባራትን ግን ዕጹዋት ኮይኖም ክቕጽል እዩ።
ኣብ ቤልጅም ኣካላዊ ርሕቀትካ ምሕላው ግድን ኮይኑ ትካላት ንግዲ ክኽፈቱ ወሲና ኣላ፤ ሬስቶራንታት፣ ባራትን ካፌታትን ግን ክዕጸው'ዮም።
ኔዘርላንድስ ካብ ሎሚ መዓልቲ ጀሚራ መባእታዊ ኣብያተ ትምህርቲ፣ ቤተ ንባብ፣ መሰልጠኒ ማእከላት ምዝዋር መኪናን እንዳ ጸጉርን ክትኸፍት እያ። ስዊዘርላንድ ብወገና፡ ቑጽሪ ኣብ ሓደ መምሃሪ ክፍሊ ዝኣትው ተመሃሮ ነክያ መባእታውን ማእከላይን ኣብያተ ትምህርቲ ክትኸፍት እያ።
ኣብ ስፔን ክሳብ 10 ሰባት ኮይንካ ምእካብ ክፍቀድ'ዩ። ሎሚ ኣብ ዴንማርክ ድኳናት እንትኽፈቱ፡ ፖላንድ ድማ ኣብዚ ሰሙን ሆቴላት ከም እትኸፍትን በጻሕቲ ዓዲ ንኽልተ ሰሙን ክውሸቡ ብምግባር ክኣትው ከም እተፍቅድን ገሊጻ።
ዝርዝር ናይቲ ዛንታ ክተንብቡ እንተደሊኹም ኣብዚ ተወከሱ
ብምኽንያት ለበዳ ኮቪድ-19 ኣብ መላእ ዓለም በረራታት ካብን ናብን ጠጠው ኢሉ ኣብ ዘለሉ እዋን፡ ትማሊ፡ 200 ፓኪስታናውያን ዝሓዘት ነፋሪት ካብ ኣሜሪካ ናብ ፖኪስታን በሪራ።
እዚ ናብ ኢዝላማባድ ዝተገብረ በረራ ኮይኑ፡ መንግስቲ ፓኪስታን ካብ ዘዳለዎም ሽዱሽተ ተመሳሰልቲ በረራታት ቻርተር ነፋሪት ሓደ እዩ።
ኤምባሲ ፓኪስታን ከም ዝበሎ ድማ፡ ብምኽንያት ኮሮናቫይረስ በረራታት ጠጠው ብምባሎም ኣብ ኣሜሪካ ተዓጊቶም ዘለው ኣስታት 1500 ፓኪስታናውያን ብተመሳሳሊ መገዲ ናብ ሃገሮም ክምለሱ እዮም።
ብዝተፈላለየ ናይ ስልጠናታት ፕሮግራም ኣብ ኣሜሪካ ዝነበሩ 150 ተመሃሮ ሎሚ መዓልቲ ናብ ሃገሮም ክምለሱ’ዮም።
ኣብ ቀረባ ፓኪስታን ዝርግሐ ለበዳ ኮሮናቫይረስ ንምቁጽጻር ወሲዳቶ ዝነበረት ስጉምቲ ዕጽዋ ከተፍኩስ ጀሚራ ኣላ።
ኣብታ ሃገር ብዝሒ በዚ ቫይረስ ዝተትሓዙ ሰባት ልዕሊ 30 ሽሕ እንትበጽሕ፡ 600 ሰባት ድማ ሞይቶም።
ምንጪ ስእሊ, STR
ንፈላማ እዋን ለበዳ ኮሮናቫይረስ ዝተርኣየላ ቻይና፡ ዝርግሐ እቲ ቫይረስ ብኣጋ ክትቆጻጸሮ ክኢላ ተባሂላ እያ ትነኣድ።
እንተዀነ ኣብ ገለ ከተማታት እታ ሃገር ሕዚ'ውን ከም ብሓድሽ ፈኸም ዝብል ለበዳ ኣይተስኣነን።
ሹላን ዝተብሃለት ከተማ ቻይና፡ ከም ብሓድሽ ዝርገሐ ኮሮናቫይረስ ዝተርአየላ ከተማ ቻይና ዀይና ክትዕጾ ተወሲኑ ኣሎ።
ኣብ ዝሓለፉ መዓልታት ኣብታ ከተማ 11 በቲ ቫይረስ ዝተለኸፉ ሰባት ከም ዝተረኸቡ ምስ ተገለጸ፡ መጀመርታ በቲ ቫይረስ ዝተለኸፈት ኣብ እንዳ ሕጽቦ ክዳውንቲ ትሰርሕ ዝነበረት ሰበይቲ እያ ተባሂሉ።
እዛ ጓል 45 ሰበይቲ፡ ሰብኣያ፣ ሓፍታን ካልኦት ኣባላት ስድርኣን ዝለከመት ኰይና፡ ኣብዚ ቀረባ እዋን ዝዀነ ናይ ነዊሕ ጉዕዞ ታሪኽ የብላን።
ብዚ ምኽንያት፡ ናይ ህዝቢ መጓዓዝያታት ስርሐን ደው ከብላ፣ ህዝባዊ ቦታታት ብሙሉኦም ክዕጸውን ነበርቲ ድማ ካብ ገዘኦም ከይወጽኡ ተነጊሩዎም።
ሹላን ጂሊን ኣብ እትበሃል ግዝኣት ቻይና ትርከብ ኮይና፡ ምስ ሰሜን ኮርያ ትዳወብ ከተማ እያ።
ሰሜን ኮርያ፡ ዛጊድ እቲ ቫይረስ ከም ዝተረኸበላ ብዕሊ'ኳ እንተዘይኣፍለጠት፡ ሓቢኣ ተባሂላ እያ ትንቀፍን ብርክት ዝበሉ ዜጋታትታ እውን ብሰንኪ እቲ ቫይረስ ይሃልቁ ከም ዘለዉ ይዝረብ።
ምንጪ ስእሊ, AFP
ኣብ ጀርመን ኣብዚ ሰሙን ዝርኣይ ዝነበረ ሓደሽቲ ብኮሮናቫይረስ ዝተሓዙ ሰባት ቑጽሮም ናብ 357 ሓፍ ብምባሉ፡ ብሓፈሻ ኣብታ ሃገር እዚ ቫይረስ ዝተረኽቦም ሰባት 169 ሽሕን 575 ከም ዝበጽሐ ተሓቢሩ።
እንተኾነ፡ እዚ ኣብ ቀረባ ሳምንታት ዝርኣይ ዝነበረ ናይ ምውሳኽ መጠን ግን ይንኪ ከም ዘሎ ዘርእይ እዩ።
ጀርመን፡ ለበዳ እዚ ቫይረስ ንምቁጽጻር በጺሓ ኣብ ዝተባህለሉ እዋን ዝተኣርኣየ ዳግም ምውሳኽ ቑጽሪ በቲ ቫይረስ ዝተለኸፉ ሰባት ፡ጥርጣረታት ይፈጥር ኣሎ።
እታ ሃገር ዝርግሐ እቲ ለበዳ ንምቁጽጻር ኣውጺኣቶም ዝነበሩ እገዳታት ክፎኽሱ ስለ ዝጀመሩ እቲ ሕማም ዳግም ክላባዕ ምኽንያት ክኸውን እዩ ዝብል ስግኣት ፈጢሩ።
ይኹን’ምበር፡ ምንካይ ኣሃዝ ዝተፈጥረ እቲ ሕማም ዝምልከቱ ጸብጻባት ስለ ዝዘንግዑ ክኽውን ስለ ዝኽእል፡ ዝርግሐ እቲ ለበዳ ነክዩ እዩ ቅድሚ ምባል ተወሳኺ መዓልታትምጽባይ ኣድላዪ’ዩ ዝብሉ ኣለው።እቲ ካብታ ሀገር ዝወጽእ ዘሎ ጸብጻባት ከምዚ ይኹን'ምበር፡ ኣብ ዝሓለፈ ቀዳም እቲ ኣዋጅ ዕጽዋ ክግደፍ ኣለዎ ኢሎም ተቓውሞ ዘስምዑ ነይሮም።
መንግስቲ ሎሚ መዓልቲ ዘውጽኦ መረዳእታ ከም ዘመላኽቶ፡ ብምኽንያት እቲ ቫይረስ ዝሞቱ ሰባት ቑጽሮም 7417 በጺሑ ይብል።
ምንጪ ስእሊ, Getty Images
ብመሰረት መረዳእታ ጆንስሆፕ ኪንስ ዩኒቨርሲቲ፡ ኣብ ኣመሪካ ኣብ ዝሓለፈፉ 24 ሰዓታት ጥራሕ ምስ ሕማም ኮሮናቫይረስ ብዝተኣሳሰር 776 ሰባት ሞይቶም።
እዚ ድማ፡ ብዝሒ በቲ ለበዳ ህይወቶም ዝሰኣኑ ሰባት ብድምር ናብ 79,526 ክብ ኣቢልዎ።
ካብ ወርሒ መጋቢት ጀሚሩ ኣብ ዘሎ እዋን እንትረአ፡ ብዝሒ መወትቲ ብኮሮናቫይረስ መዓልታዊ እናወሰኸ እዩ መጺኡ።
ምስቲ ዝጸንሐ እንትነጻጸር፡ እዚ ትማሊ ዝተመዝገበ ቁጽሪ ሞት ልዑል ዝበሃል ኣይኮነን።
ኣብ ዝሓለፉ ሰሙናት፡ መዓልቲ ቁጽሪ መወትቲ፡ ካብ ሓደ ሽሕ ክሳብ 2500 እዩ እናተመዝገበ ቀንዩ።
ኣመሪካ ብዚ ሕማም ዝተለኸፈ ዝለዓለ ብዝሒ ሰብ ዘለዋ ሃገር እያ።
እታ ሃገር ዝለዓለ መጠን ምርመራ ዘካየደትሃገር’ውን እያ።
ኣብዚ ሕዚ እዋን፡ ብሓፈሻ 1,329,260 ሰባት በቲ ቫይረስ ዝተለኸፉ ዝርከቡላሃገርእያ።
እዚ ቁጽሪ እታ ምስታ ኣዐርያ ተሃስያ እትብሃል ስፔን ዝነበረ ብዝሒ እንትነጻጸር፡ ሓሙሽተ ዕጽፊ እዩ።
