ጸሓፊ ጉዳያት ወጻኢ ኣመሪካ ናብ ኢትዮጵያ ክበጽሕ'ዩ

ጸሓፊ ክፍሊ ጉዳያት ወጻኢ ኣመሪካ ኣንቶኒ ብሊንከን ናብ ኣዲስ ኣበባ ክበጸሕ ምዃኑ ቤት ጽሕፈቱ ኣብ ዘውጽኦ ጋዜጣዊ መብርሂ ሓቢሩ።

ኣንቶኒ ብሊንከን፡ ኣብ ዝመጽእ ሰሙን ምስ ሰብመዚ ኢትዮጵያ ኣብ ዘካይዶ ርክብ ብዛዕባ ትግባረ ስምምዕ ሰላም ኲናት ትግራይን ጉዳያት መሰጋገሪ ፍትሒ ክዘራረብ ምዃኑ ተገሊጹ'ሎ።

ብዘይካ'ዚ፡ ምስ መሻርኽቲ ኣካላት ሰብኣዊ ረዲኤትን ሲቪካውያን ማሕበራትን ብምርኻብ፡ ብዛዕባ ቀረባትን ምብጻሕን ሰብኣዊ ደገፍ፡ ውሕስነት መግቢን ሰባዊ መሰላትን ክላዘብ'ዩ።

እቲ ላዕለዋይ ኣመሪካዊ ብዓል ስልጣን፡ ኣብቲ ካብ ሰሉስ ክሳብ ዓርቢ ዝጸንሕ ናይ ኣፍሪቃ ዑደቱ ናብ ሃገረ ኒጀር ክበጽሕ ምዃኑ'ውን ተፈሊጡ'ሎ።

ምስ ኣቦ መንበር ሕብረት ኣፍሪቃ ሙሳ ፋኪ ብምርኻብ ዓለምለኻዊን ዞባውን ጉዳያት ብምልዓል ክዝቲ መደብ ከም ዘለዎ ክፍሊ ጉዳያት ወጻኢ ኣፍሊጡ።

ኣመሪካ፡ ንኲናት ትግራይ ሰላማዊ ፍታሕ ንምርካብ ፍሉይ ልኡኽ ብምምዛዝ ጻዕርታት ከተካይድ ምጽንሓን፡ ኣብ ቀዋሚ ስምምዕ ምቁራጽ ተጻብኦታት ፕሪቶርያን ናይሮቢን ግደ ከም ዝተጻወትትን ይፍለጥ።

ብሰንኪ እቲ ኲናት ኣብ መንጎ ክልቲአን ሃገራት ዝነበረ ዝምድና እናሓርፈፈ'ዩ ክመጽእ ጸኒሑ።

ኣመሪካ፡ ህዝቢ ትግራይ ኣብ ምሉእ ዕጽዋ ምእታውን፡ ሰብኣዊ ረዲኤት ተሓሪምዎ ብምንባሩ ኣብ ልዕሊ መንግስቲ ኢትዮጵያ ቀጻሊ ጸቕጢ ትገብር ምንባራ ይዝከር።

ገለ ካብቲ ዝወሰደቶ ተሪር ስጉምቲ፡ ኢትዮጵያ ካብቲ ፍርያታ ብናጻ ናብ ኣመሪካ ክኣቱ ዘፍቅድ ስምምዕ ኣጎዋ ምእጋዳ እዩ።

"ኣብ ሰሜን ኢትዮጵያ ሰላም ንምስፋንን መሰጋገሪ ፍትሒ ንምድንፋዕን፡ ብዛዕባ ትግባረ ስምምዕ ምቁራጽ ተጻብኦታት ክመያየጥ" ይብል እቲ ብክፍሊ ጉዳያት ወጻኢ ዝወጽአ መግለጺ።

ኣብ መንጎ መንግስቲ ኢትዮጵያን ህወሓትን ስምምዕ ሰላም ድሕሪ ምፍራሙ ግን፡ ዝምድና ክልቲአን ሃገራት እናተመሓየሸ ይመጽእ ኣሎ።

ከም መርኣያ ናይዚ ድማ ቀዳማይ ሚኒስተር ኣብዪ ኣሕመድ ናብቲ ኣብ ዋሽንግተን ዲሲ ኣብ መወዳእታ ናይቲ ዝሓለፈ ዓመት ዝተኻየደ ዋዕላ መራሕቲ ኣፍሪቃን ኣመሪካን ተዓዲሙ ተሳቲፉ ነይሩ።

ብሊንከን ድሕሪ ስምምዕ ሰላም ናብ ኢትዮጵያ ዝበጽሕ ዘሎ ላዕለዋይ ኣመሪካዊ ብዓል ስልጣን እዩ።

እቲ ላዕለዋይ ዲፕሎማሰኛ፡ ቅድሚ ሕጂ፡ ክልተ ግዜ ናብታ ኣህጉር ዑደት ብምክያድ ናብ ዝተፈላለያ ሃገራት በጺሑ ነይሩ'ዩ።

"እቲ ጸሓፊ [ጉዳያት ወጻኢ]፡ ኣፍሪካ ኣብ ዓለምለኻውያን ውድባት ቀዋሚ ውክልና ክህልዋ ኣመሪካ ዘለዋ ጽኑዕ ደገፍ" ደጊሙ ከረጋግጽ ምዃኑ እቲ ሎሚ ዝወጽአ ሓበሬታ ይገልጽ።

ኣመሪካ፡ ኣብታ ኣህጉር ዘሎ ጽልዋ ቻይናን እናማዕበለ ዝመጽእ ዘሎ ተገዳስነት ሩስያን ንምግታእ ዝዓለመ ሓድሽ ዲፕሎማስያዊ ንጥፈታት ጀሚራ ከም ዘላ ይንገር።