You’re viewing a text-only version of this website that uses less data. View the main version of the website including all images and videos.
ఆంధ్రప్రదేశ్లో అధికార పార్టీ వైసీపీకి ఎదురుదెబ్బ తగిలింది. ఆపార్టీ ప్లీనరీలో తీసుకున్న నిర్ణయంపై ఎన్నికల కమిషన్ అభ్యంతరం చెప్పింది. పార్టీ శాశ్వత అధ్యక్షుడిగా వైఎస్ జగన్ ని ఎన్నుకోవడం చెల్లదని తెలిపింది. ఈ మేరకు యువజన శ్రామిక రైతు కాంగ్రెస్ పార్టీ ప్రధాన కార్యదర్శికి లేఖ రాసింది.
అజయ్ దేవగణ్, రకుల్ ప్రీత్ సింగ్ నటించిన ‘థ్యాంక్ గాడ్’ సినిమా చుట్టూ వివాదం అలుముకుంటోంది.
ఈ సినిమాలో హిందూ దేవతలను కించపరిచేలా చూపించారని, అందువల్ల ఆ సినిమాను బ్యాన్ చేయాలంటూ మధ్యప్రదేశ్ విద్యాశాఖ మంత్రి విశ్వాస్ సారంగ్, కేంద్ర సమాచారశాఖ మంత్రి అనురాగ్ ఠాకుర్కు లేఖ రాశారు.
‘థ్యాంక్ గాడ్’ సినిమా త్వరలోనే విడుదల కానుంది. ఈ సినిమాలో అజయ్ దేవగణ్ చిత్రగుప్తునిగా నటించారు.
‘ఇది యుద్ధాలు చేయడానికి సరైన సమయం కాదు’ అని భారత ప్రధాని నరేంద్ర మోదీ చేసిన వ్యాఖ్యలు సరైనవేనని ఫ్రాన్స్ అధ్యక్షుడు ఇమ్మాన్యుయేల్ మేక్రాన్ అన్నారు.
ఇటీవల రష్యా అధ్యక్షుడు వ్లాదిమిర్ పుతిన్తో ప్రధాని నరేంద్ర మోదీ చేసిన వ్యాఖ్యల మీద మేక్రాన్ ఇలా స్పందించారు.
‘ఇది యుద్ధాలు చేసే శకం కాదు. దీని గురించి మీతో ఫోనులో కూడా మాట్లాడాను. శాంతి కోసం మనం ముందుకు ఎలా వెళ్లాలో మాట్లాడుకునేందుకు ఈ రోజు అవకాశం లభించింది. కొన్ని దశాబ్దాలు భారత్, రష్యా కలిసిమెలిసి ముందుకు సాగుతున్నాయి’ అని మోదీ ఎస్సీఓ సమిట్ సందర్భంగా అన్నారు.
నరేంద్ర మోదీ చేసిన వ్యాఖ్యలను అమెరికా కూడా ఆహ్వానించింది.
బీబీసీ న్యూస్ తెలుగు లైవ్ పేజీకి స్వాగతం. స్థానిక, జాతీయ, అంతర్జాతీయ వార్తల లైవ్ అప్డేట్స్ కోసం ఈ పేజీని చూస్తూ ఉండండి.