మూడువైపుల నుంచి యుక్రెయిన్‌పై రష్యా దాడులు, ఆరు విమానాలను కూల్చేశామన్న యుక్రెయిన్

లైవ్ కవరేజీ

1. 24 ఫిబ్రవరి 2022రష్యా మీద తీవ్ర ఆంక్షలు విధిస్తాం: బైడెన్

   యుక్రెయిన్ అధ్యక్షుడు వొలొదిమిర్ జెలెన్స్కీతో అమెరికా అధ్యక్షుడు జో బైడెన్ మాట్లాడారు. రష్యా సైనిక చర్యను ఖండించేలా అంతర్జాతీయ సమాజాన్ని కదిలించేందుకు తాను చేపట్టిన చర్యలను బైడెన్ ఆయనకు వివరించారు.

   ఈ దాడిని నిష్కారణమైన, అన్యాయమైన దాడిగా తాను ఖండిస్తున్నట్లు బైడెన్ ఒక ప్రకటనలో చెప్పారు.

   పుతిన్ ‘‘దుష్ట దురాక్రమణకు వ్యతిరేకంగా విస్పష్టంగా మాట్లాడేలా, యుక్రెయిన్ ప్రజల పక్షాన నిలబడేలా ప్రపంచ నేతలకు పిలుపునివ్వాలని ఆయన నన్ను కోరారు’’ అని బైడెన్ పేర్కొన్నారు.

   తాను గురువారం నాడు జీ7 నేతలతో సమావేశమవుతానని.. రష్యా మీద తీవ్ర ఆంక్షలు విధిస్తామని చెప్పారు.

   యుక్రెయిన్‌కు, యుక్రెయిన్ ప్రజలకు మద్దతు, సాయం అందించటాన్ని తాము కొనసాగిస్తామన్నారు.

2. 24 ఫిబ్రవరి 2022రష్యా వైమానిక దాడిని తిప్పికొడుతున్నాం: యుక్రెయిన్ సైన్యం

   యుక్రెయిన్ తూర్పు ప్రాంతంలో రష్యా సైన్యం తీవ్రస్థాయి షెల్లింగ్ ప్రారంభించిందని యుక్రెయిన్ సైనిక బలగాలు ఒక ప్రకటనలో చెప్పాయి.

   రాజధాని కీవ్ సమీపంలోని బోరిస్‌పిల్ విమానాశ్రయం సహా పలు ఇతర విమానాశ్రయాలపై రష్యా క్షిపణి దాడులు ప్రారంభించినట్లు ఆ ప్రకటన తెలిపింది.

   రష్యా వైమానిక దాడిని యుక్రెయిన్ వాయుసేన తిప్పికొడుతున్నట్లు చెప్పింది.

   దక్షిణాది రేవు నగరం ఒడెసాలోకి రష్యా పారాబలగాలు ప్రవేశించినట్లు వచ్చిన వార్తలను ఆ ప్రకటన తిరస్కరించింది.

3. 24 ఫిబ్రవరి 2022బెలారస్ నుంచి యుక్రెయిన్ మీదకు రష్యా సైనిక బలగాలు

   యుక్రెయిన్ మీద రష్యా సైనిక దాడిలో.. బెలారుస్‌లోని రష్యా సైనిక బలగాలు కూడా వచ్చి చేరుతున్నాయని యుక్రెయిన్ అధికారులను ఉటంకిస్తూ పలు కథనాలు చెప్తున్నాయి.

   అంటే.. ఉత్తర దిక్కు నుంచి కూడా ఇప్పుడు యుక్రెయిన్ మీద దాడి మొదలైందని అర్థం.

   యుక్రెయిన్ ఉత్తర సరిహద్దులో ఉన్న బెలారుస్.. సుదీర్ఘ కాలంగా రష్యాకు మిత్రపక్షంగా ఉంది. ఈ చిన్న దేశాన్ని రష్యా ‘క్లయింట్’ అని విశ్లేషకులు అభివర్ణిస్తారు.

   యుక్రెయిన్ మీద తూర్పు నుంచి రష్యా సైన్యం దాడులు, దక్షిణాల ఒడెస్సా వైపు రష్యా సైనిక బలగాల కదలికలకు తోడు ఇప్పుడు ఉత్తరం నుంచి కూడా రష్యా సైనిక దాడి మొదలైంది.

4. 24 ఫిబ్రవరి 2022కీవ్‌లో యుక్రెయిన్ సైనిక స్థావరాలపై క్షిపణి దాడులు...

   రష్యా సైనిక చర్య ఇప్పటివరకూ ఏ స్థాయిలో ఉందో యుక్రెయిన్ ప్రభుత్వ అధికారి ఒకరు సూచనప్రాయంగా వివరించినట్లు బీబీసీ కీవ్ ప్రతినిధి జేమ్స్ వాటర్‌హౌస్ చెప్తున్నారు.

   యుక్రెయిన్ రాజధాని కీవ్ మీద గురువారం ఉదయం క్షిపణి దాడులు జరిగాయని, దేశానికి దక్షిణంగా ఒడెస్సాలో సైనిక బలగాల కదలికలు ఉన్నాయని ఆ అధికారి తెలిపారు.

   రష్యా సరిహద్దుకు 25 మైళ్ల దూరంలోని ఖార్కీవ్ సరిహద్దును సైనిక బలగాలు దాటివస్తున్నాయని కూడా సదరు అధికారి చెప్పారు.

   ప్రత్యక్ష సాక్షులు, ప్రభుత్వ అధికారులు చెప్తున్న దాని ప్రకారం.. ఇది భారీ స్థాయిలో జరుగుతోందని తొలి సంకేతాలు సూచిస్తున్నట్లు బీబీసీ విలేకరి జేమ్స్ పేర్కొన్నారు.

   కీవ్‌లోని యుక్రెయిన్ మిలటరీ మిసైల్ కమాండ్ సెంటర్లు, సైనిక ప్రధాన కార్యాలయాల మీద క్షిపణి దాడులు జరిగినట్లు అంతర్గత మంత్రిత్వశాఖను ఉటంకిస్తూ స్థానిక మీడియాలో కథనాలు వస్తున్నాయి.

5. 24 ఫిబ్రవరి 2022బ్రిటన్, మిత్ర పక్షాలు నిర్ణయాత్మకంగా స్పందిస్తాయి: బోరిస్ జాన్సన్

   యుక్రెయిన్‌లో భయానక సంఘటనలు తనను కలచివేశాయని బ్రిటన్ ప్రధానమంత్రి బోరిస్ జాన్సన్ పేర్కొన్నారు.

   రష్యా అధ్యక్షుడు వ్లాదిమిర్ పుతిన్.. ఈ ‘‘నిష్కారణ దాడిని ప్రారంభించటం ద్వారా రక్తపాత, విధ్వంస మార్గాన్ని ఎంచుకున్నార’’ని ఆయన మండిపడ్డారు.

   దీనికి ఎలా స్పందించాలో చర్చించటానికి యుక్రెయిన్ అధ్యక్షుడితో తాను మాట్లాడానని, బ్రిటన్ దాని మిత్రపక్షాలు నిర్ణయాత్మక చర్యలు చేపడతాయని బోరిస్ జాన్సన్ హామీ ఇచ్చారు.

6. 24 ఫిబ్రవరి 2022సైనిక సదుపాయాలే లక్ష్యం: రష్యా సైన్యం

   యుక్రెయిన్ నగరాల మీద దాడులు చేస్తున్నామనటాన్ని రష్యా రక్షణ మంత్రిత్వశాఖ తిరస్కరించింది.

   సైనిక సదుపాయాలు, వైమానిక రక్షణ వ్యవస్థలు, వైమానిక బలగాలను లక్ష్యంగా చేసుకున్నామని.. ‘అత్యధిక కచ్చితత్వంతో గురిపెట్టే ఆయుధాల’ను ఉపయోగిస్తున్నామని ఆ మంత్రిత్వశాఖ చెప్పినట్లు రష్యా ప్రభుత్వ సంస్థ ఆర్ఐఏ పేర్కొంది.

7. 24 ఫిబ్రవరి 2022క్షిపణి దాడులు ప్రారంభించిన రష్యా

   రష్యా తమ దేశం మీద క్షిపణి దాడులు ప్రారంభించిందంటూ వస్తున్న వార్తలను యుక్రెయిన్ అధ్యక్షుడు జెలెన్స్కీ ధృవీకరించినట్లు రాయిటర్స్ కథనం చెప్తోంది.

   యుక్రెయిన్ మౌలిక సదుపాయాలు, సరిహద్దు రక్షణల మీద రష్యా క్షిపణి దాడులు చేసినట్లు ఆయన చెప్తున్నారు.

8. 24 ఫిబ్రవరి 2022సైనిక చట్టం అమలు చేయాలన్న యుక్రెయిన్ అధ్యక్షుడు

   దేశంలో సైనిక చట్టాన్ని ప్రకటించాలని యుక్రెయిన్ అధ్యక్షుడు వొలోదిమిర్ జెలెన్స్కీ తన జాతీయ భద్రత, రక్షణ మండలికి పిలుపునిచ్చారు.

   ఈ అంశంపై నిర్ణయం తీసుకోవటానికి ఈ మండలి అత్యవసర సమావేశం కానుంది.

9. 24 ఫిబ్రవరి 2022100 డాలర్లు దాటిన చమురు ధర

   తూర్పు యుక్రెయిన్ మీద పుతిన్ సైనిక చర్య ప్రకటించటంతో.. చమురు ధరలు అమాంతం పెరిగిపోయాయి. ఏడేళ్లలో మొదటిసారి.. బారెల్ ధర 100 డాలర్లు దాటింది.

   సైనిక చర్య వార్తలతో ఏసియన్ స్టాక్ మార్కెట్లు సైతం 2 నుంచి 3 శాతం తక్కువ స్థాయిలో ట్రేడ్ అవుతున్నాయి. యుక్రెయిన్ విషయంలో ఉద్రిక్తతలు పెరుగుతుండటంతో మార్కెట్లు గత కొద్ది రోజులుగా నష్టపోతున్నాయి.

   కొద్ది రోజుల కిందట, శాంతి ఒప్పందాన్ని ఉల్లంఘిస్తూ, యుక్రెయిన్ తూర్పు ప్రాంతంలో తిరుగుబాటుదార్ల ఆధీనంలోని రెండు ప్రాంతాల్లోకి సైనికులను వెళ్లాలని ఆదేశించినపుడు చమురు ధరలు 98 డాలర్లకు పెరిగిపోయాయి.

   స్టాక్ మార్కెట్ల నుంచి మదుపుదారులు మళ్లిపోతున్నారని.. తాము సరక్షితమైన ఆస్తులుగా పరిగణించే వాటిలోకి పెట్టుబడులను మళ్లిస్తున్నారని బీబీసీ ఆసియా బిజినెస్ కరెస్పాండెంట్ మారికో ఓయి చెప్తున్నారు.

   బంగారం ధరలు కూడా ఏడాది కాలంలో అత్యధిక స్థాయికి పెరిగాయి. అమెరికా డాలర్, జపాన్ యెన్ బలపడుతున్నాయి.

10. 24 ఫిబ్రవరి 2022రష్యాది ‘‘దుస్సాహస దాడి’’: నాటో సెక్రటరీ జనరల్

    యుక్రెయిన్ మీద రష్యా ‘‘దుస్సాహస దాడి’’కి పాల్పడుతోందంటూ నాటో సెక్రటరీ జనరల్ జెన్స్ స్టోల్టెన్‌బర్గ్ ఖండించారు.

    ఇది లెక్కలేనంత మంది పౌరులను ప్రమాదంలోకి నెడుతుందని ఆయన ఒక ట్విటర్ పోస్టులో పేర్కొన్నారు.

    ‘‘ఇది అంతర్జాతీయ చట్టాన్ని తీవ్రంగా ఉల్లంఘించటమే. యూరో-అట్లాంటిక్ భద్రతకు పెను ముప్పు’’ అని వ్యాఖ్యానించారు.

    రష్యా ‘‘సరికొత్త ఆక్రమణ’’ను ఎదుర్కోవటానికి నాటో మిత్రపక్షాలు సమావేశమవుతాయని చెప్పారు.

11. 24 ఫిబ్రవరి 2022పుతిన్ అమెరికా బలహీనతను చూశారు: ట్రంప్

    అమెరికాలో తన ప్రభుత్వ హయాంలో.. యుక్రెయిన్ మీద రష్యా సైనిక చర్య చేపట్టి ఉండేది కాదని అమెరికా మాజీ అధ్యక్షుడు డోనల్డ్ ట్రంప్ వ్యాఖ్యానించారు.

    ఆయన ఫాక్స్ న్యూస్‌తో ఫోన్‌లో మాట్లాడుతూ.. పుతిన్ ఈ పని చేయాలని కోరుకుంటున్నట్లు తాను తొలుత నమ్మలేదన్నారు.

    ‘‘ఆయన ఏదో ఒకటి చేసి బేరమాడాలని కోరుకున్నారని నేను అనుకుంటాను. అది అంతకంతకూ విషమిస్తూ పోయింది. అప్పుడాయన బలహీనతను చూశారు’’ అని ట్రంప్ వ్యాఖ్యానించారు.

    అఫ్గానిస్తాన్ నుంచి అమెరికా వైదొలగటంలో ‘బలహీనత’.. రష్యా దండయాత్రకు పాక్షిక ప్రేరణనిచ్చిందని తాను నమ్ముతున్నట్లు కూడా ట్రంప్ చెప్పారు.

12. 24 ఫిబ్రవరి 2022పుతిన్ పూర్తిస్థాయి దండయాత్ర ఆరంభించారు: యుక్రెయిన్

    యుక్రెయిన్ మీద పుతిన్ పూర్తి స్థాయి దండయాత్రను ప్రారంభించారని యుక్రెయిన్ విదేశాంగ మంత్రి ట్వీట్ చేశారు.

    యుక్రెయిన్ తనను తాను రక్షించుకుంటుందన్నారు. పుతిన్‌ను ప్రపంచం ఆపగలదని, ఆపితీరాలని కోరారు.

    ‘మా దేశం మీద యుద్ధం’

    రష్యా అధ్యక్షుడు మా దేశం మీద యుద్ధం ప్రకటించారని.. ఐక్యరాజ్యసమితిలో రష్యా రాయబారి ధృవీకరించినట్లు ఐరాసలో యుక్రెయిన్ రాయబారి సెర్గీ కిస్లిత్స్యా చెప్పినట్లు రాయిటర్స్ వార్తా సంస్థ తెలిపింది.

    ‘‘దండయాత్ర మొదలైంది’’ అని యుక్రెయిన్ అంతర్గత వ్యవహారాల మంత్రిత్వశాఖ సీఎన్ఎన్‌తో పేర్కొంది.

13. 24 ఫిబ్రవరి 2022ప్రపంచం రష్యా బాధ్యత వహించేలా చేస్తుంది: బైడెన్

    రష్యా సైనిక దళాలు అక్రమంగా, అన్యాయంగా దాడి చేస్తున్నాయని అమెరికా అధ్యక్షుడు జో బైడెన్ స్పందించారు.

    ప్రపంచ ప్రజలందరూ యుక్రెయిన్ ప్రజల కోసం ప్రార్థిస్తున్నారని చెప్పారు.

    ‘‘రష్యా అధ్యక్షుడు పుతిన్ ప్రణాళిక ప్రకారం యుద్ధాన్ని ఎంచుకున్నారు. అది భీకరమైన ప్రాణనష్టాన్ని, బాధలను కలిగిస్తుంది’’ అని పేర్కొన్నారు.

    ‘‘ఈ దాడివల్ల జరిగే మరణాలకు, విధ్వంసానికి ఒక్క రష్ మాత్రమే బాధ్యురాలు. అమెరికా, దాని మిత్రపక్షాలు, భాగస్వాములు సమైక్యంగా, నిర్ణయాత్మకంగా ప్రతిస్పందిస్తాయి. రష్యాను ప్రపంచం బాధ్యురాలిని చేస్తుంది’’ అని బైడెన్ ప్రకటించారు.

    రష్యా ఎదుర్కొనబోయే పర్యవసనాల గురించి తాను గురువారం నాడు అమెరికా ప్రజలకు చెప్తానన్నారు.

    అధ్యక్షభవనం శ్వేతసౌథం నుంచి పరిస్థితిని తాను పర్యవేక్షిస్తుంటానని, రష్యా మీద తదుపరి పర్యవసానాలను ప్రకటించేముందు ఉదయం జీ7 నాయకులతో సమావేశమవుతానని చెప్పారు.

    నాటో సభ్యుల మీద ఎలాంటి దురాక్రమణనైనా తిప్పికొట్టటానికి నాటో మిత్రపక్షాల నుంచి బలమైన సమైక్య ప్రతిస్పందన ఉంటుందన్నారు.

    ‘‘ఈ రాత్రి జిల్ (బైడెన్ భార్య), నేను.. ధీరులైన, గర్వులైన యుక్రెయిన్ ప్రజల కోసం ప్రార్థిస్తాం’’ అన్నారాయన.

14. 24 ఫిబ్రవరి 2022యుక్రెయిన్‌ను ఆక్రమించే ప్రణాళిక లేదు: పుతిన్

    అయితే.. యుక్రెయిన్‌ను ఆక్రమించే ప్రణాళికేదీ తమ దేశానికి లేదని పుతిన్ తన టెలివిజన్ ప్రసంగంలో చెప్పారు.

    ఆ దేశంలో ప్రత్యేక సైనిక చర్యను ప్రకటిస్తూ మాట్లాడిన పుతిన్.. దేశాన్ని ఎవరు నడుపుతారో ఎంచుకునే స్వేచ్ఛ యుక్రెయిన్ ప్రజలకు ఉంటుందన్నారు.

15. 24 ఫిబ్రవరి 2022పుతిన్.. మీ సైన్యాన్ని ఆపండి: ఆంటోనియో గుటెరస్

    యుక్రెయిన్‌ మీద దాడి చేయకుండా రష్యా సైన్యాన్ని ఆపాలని పుతిన్‌కు ఐక్యరాజ్యసమితి సెక్రటరీ జనరల్ ఆంటోనియో గుటెరస్ విజ్ఞప్తి చేశారు.

    శాంతికి ఒక అవకాశం ఇవ్వాలని కోరారు. ఇప్పటికే చాలా మంది జనం చనిపోయారన్నారు.

16. 24 ఫిబ్రవరి 2022కీవ్ సహా పలు ప్రాంతాల్లో పేలుళ్ల వార్తలు

    పుతిన్ సైనిక చర్యను ప్రకటించిన కొద్ది సేపటికే.. యుక్రెయిన్‌ రాజధాని కీవ్ సహా దేశంలోని ఇతర ప్రాంతాల్లోనూ పేలుళ్లు జరిగినట్లు వార్తలు వస్తున్నాయి.

    యుక్రెయిన్‌ రాజధాని కీవ్, డోనెస్క్ ప్రాంతంలోని క్రామటోస్క్ ప్రాంతాల్లో భారీ పేలుడు శబ్దాలను విన్నట్లు అక్కడి బీబీసీ ప్రతినిధిలు ధృవీకరించారు.

    ఈశాన్యంలోని ఖార్కీవ్, దక్షిణ ప్రాంతంలోని ఒడెసా, తూర్పు డోనెస్క్‌లోని ఒబ్లాస్ట్ ప్రాంతాల్లోనూ పేలుళ్లు జరిగినట్లు సోషల్ మీడియాలో కథనాలు వచ్చాయి.

17. 24 ఫిబ్రవరి 2022పుతిన్ ఏమన్నారంటే...

    రష్యా అధ్యక్షుడు వ్లాదిమిర్ పుతిన్ యుక్రెయిన్‌లోని డాన్‌బాస్ ప్రాంతంలో సైనిక చర్యను ప్రకటించారు. యుక్రెయిన్ మీద దాడిని ఆపాలని ఐక్యరాజ్యసమితి భద్రతా మండలి కోరుతున్న సమయంలోనే టీవీ ప్రసంగంలో పుతిన్ ఈ ప్రకటన చేశారు.

    యుక్రెయిన్‌ రాజధాని కీవ్‌లో వరుస పేలుళ్లు సంభవించాయని బీబీసీ ప్రతినిధి పాల్ ఆడమ్స్ తెలిపారు.

    యుక్రెయిన్, రష్యా సైన్యాలకు మధ్య ఘర్షణలు అనివార్యమని, ఏ క్షణంలోనైనా అది జరగవచ్చునని పుతిన్ పేర్కొన్నారు.

    రష్యా చర్యలు ఆత్మరక్షణ చర్యలని పుతిన్ అన్నారు.

    యుక్రెయిన్ సైనికుల తండ్రులు, తాతలు పోరాడకపోవటానికి కారణం.. నియో-నాజీలకు సాయం చేయటానికేనని యుక్రెయిన్ సైనికులను ఉద్దేశించి వ్యాఖ్యానించారు.

    ‘‘న్యాయం, సత్యం’’ రష్యా వైపు ఉన్నాయని కూడా పుతిన్ పేర్కొన్నారు.

    ఎవరైనా రష్యా మీద దాడికి ప్రయత్నిస్తే తాము ‘‘తక్షణమే’’ ప్రతిస్పిందిస్తామని హెచ్చరించారు.

    గురువారం ఉదయం టెలివిజన్‌లో ప్రత్యక్ష ప్రసారంలో పుతిన్ మాట్లాడుతూ.. తూర్పు యుక్రెయిన్‌లోని యుద్ధ ప్రాంతంలో యుక్రెయిన్ సైనికులు ఆయుధాలు వదిలేసి వారి వారి ఇళ్లకు వెళ్లాలని విజ్ఞప్తి చేశారు.

    ఏ రక్తపాతానికైనా యుక్రెయిన్‌నే నిందించాల్సి ఉంటుందని ఆ దేశాన్ని హెచ్చరించారు.

18. 24 ఫిబ్రవరి 2022యుక్రెయిన్‌లో సైనిక చర్యను ప్రకటించిన పుతిన్

    యుక్రెయిన్‌లో రష్యా సైనిక చర్య ప్రారంభించింది.

    యుక్రెయిన్‌లో పరిణామాలు వేగంగా మారిపోయాయి.

    యుక్రెయిన్ రాజధాని కీవ్‌లో వరుస పేలుళ్లు సంభవించాయి.

    ఈ పరిణామాలపై ఎప్పటికప్పుడు తాజా విశేషాలను బీబీసీ తెలుగు మీకు అందిస్తుంది.

    ఈ పేజీని రిఫ్రెష్ చేస్తూ మీరు అప్ డేట్స్ ఫాలో కావచ్చు.