అమెరికా ఎన్నికల ఫలితాలు 2020: ట్రంప్, బైడెన్‌ గెలుపు - ఓటములను నిర్ణయించే రాష్ట్రాలు ఏవి?

లైవ్ కవరేజీ

1. 4 నవంబర్ 2020పోస్టల్ బ్యాలెట్లకు అంత శక్తి ఎక్కడిది?: ట్రంప్

   డోనల్డ్ ట్రంప్ పోస్టల్ బ్యాలెట్లను లక్ష్యంగా చేసుకుని ట్వీట్లు చేశారు.

   "డెమాక్రాట్ల నియంత్రణలో ఉన్న దాదాపు అన్ని రాష్ట్రాల్లో గత రాత్రి వరకూ నేను ముందంజలో ఉన్నాను. కానీపోస్టల్ బ్యాలెట్ ఓట్లను లెక్కించేసరికి, చిత్రంగా అవన్నీ ఒక్కొక్కటిగా మాయమైపోవడం మొదలైంది. ఆశ్చర్యంగా ఉంది. ఎన్నికల విశ్లేషకులు వీటిని పూర్తిగా చారిత్రక తప్పుగా అనుకుంటున్నారు" అన్నారు.

   ఆయన ఈ ట్వీట్‌కు కూడా తప్పుదోవ పట్టించేది కావచ్చునని ట్విటర్ లేబుల్ ఇచ్చింది.

   ఆ తర్వాత ఆయన "ఆ పోస్టల్ బ్యాలెట్లు లెక్కించిన ప్రతిసారీ, వాటి శాతం లోనూ, విధ్వంస శక్తిలోనూ అంత భయంకరంగా ఉండటానికి కారణమేమిటి?" అని మరో ట్వీట్ చేశారు.

2. 4 నవంబర్ 2020అధ్యక్ష బరిలో మరో అభ్యర్థి కెన్యా వెస్ట్‌కు ఎన్ని ఓట్లు వచ్చాయి?

   ఈ ఏడాది అమెరికా అధ్యక్ష ఎన్నికలలో పోటీ చేసిన అభ్యర్థులు జో బైడెన్,డోనల్డ్ ట్రంప్ మాత్రమే కాదు.. అనే విషయం మరచిపోవటం సులభమే. కాన్యే వెస్ట్‌ను మరచిపోవటం కూడా అంత సులభమే.

   కాన్యే వెస్ట్.. అమెరికా అధ్యక్ష పదవికి పోటీ పడటం.. ఆయన సంగీత కెరీర్ అంత వైభవంగా లేదని చెప్పవచ్చు.

   ఈ విషయాన్ని కాన్యే కూడా అంగీకరించినట్లు సోషల్ మీడియాలో "కాన్యే 2024" అంటూ ఆయన పోస్టు చేసిన ఫోటో వలన తెలుస్తోంది.

   కాన్యే జూలై లోనే ప్రచారం మొదలు పెట్టినప్పటికీ.. చాలా అమెరికా రాష్ట్రాల్లో బ్యాలట్ మీద ఆయన పేరు చేరలేదు.

   అయినాకానీ, ఆయన మద్దతుదారులు మాత్రం ఆయన పేరును బ్యాలట్ మీద రాయటం (రైట్-ఇన్ అభ్యర్థిగా) మానలేదు.

   కాన్యేకి 12 రాష్ట్రాలలో 60,000 ఓట్లు పోలయ్యాయని.. అందులో అత్యధికంగా టెన్నెస్సి నుంచి లభించాయని ‘డెడ్‌లైన్’ చెప్పింది.

   ఆయన మంగళవారం నాడు.. తన జీవితంలో మొదటి సారి ఓటు వేశానని చెప్పారు.‘‘అది కూడా నేను ఎంతగానో విశ్వసించే వ్యక్తికే - నాకే ఆ ఓటు వేసుకున్నా’’ అని పేర్కొన్నారు.

3. 4 నవంబర్ 2020కీలక రాష్ట్రం మిచిగాన్‌లో బైడెన్ ఆధిక్యం

   అమెరికా ఎన్నికల ఫలితాల్లో కీలక రాష్ట్రంగా భావిస్తున్న మిచిగాన్‌లో జో బైడెన్ తన ప్రత్యర్థి డోనల్డ్ ట్రంప్‌పై పైచేయి సాధించారు.

   ఓట్ల లెక్కింపు ఇంకా కొనసాగుతోంది. అయితే, తాజా సమాచారం ప్రకారం ట్రంప్ మీద బైడెన్ 0.2 శాతం ఆధిక్యం సాధించారు.

   ఇప్పటివరకూ బైడెన్‌కు 49.3 శాతం, ట్రంప్‌కు 49.1 శాతం ఓట్లు లభించాయి.

   బైడెన్‌కు 2,515,781 ఓట్లు రాగా, ట్రంప్‌కు 2,506,388 ఓట్లు వచ్చాయి.

   2016 ఎన్నికల్లో విస్కాన్సిన్, మిచిగాన్, పెన్సిల్వేనియా రాష్ట్రాలు ప్రధానమయ్యాయి.

   హిల్లరీ క్లింటన్‌పై ట్రంప్‌ విజయం సాధించడంలో ఇవి కీలక పాత్ర పోషించాయి.

4. 4 నవంబర్ 2020పోస్టల్ ఓటింగ్‌లో మోసాలు జరిగినట్లు ఏవైనా ఆధారాలు ఉన్నాయా?

   అమెరికా అధ్యక్ష ఎన్నికల గురించి బ్రిటన్ పొలిటీషియన్, ట్రంప్ మద్దతుదారుడు నీగెల్ ఫరేజ్ బీబీసీతో మాట్లాడారు.

   "పోస్టల్ ఓటింగ్‌లో మోసాలు జరిగాయనడానికి అందరూ చూసేలా ఆధారాలు ఉన్నాయి. స్వయంగా ఇక్కడ మా దేశంలో జరిగినట్లు మాకు తెలుసు" అన్నారు.

   అయితే, ఏ ఆధారాలు ఉన్నాయి?

   రియాలిటీ చెక్‌లో ఇంతకు ముందే వివరించినట్లు, అమెరికాలో కొన్ని చెదురుమదురు కేసుల మినహా, అవి జరగడం చాలా అరుదని ఎన్నో అధ్యయనాలు చెబుతున్నాయి.

   "పోస్టల్ ఓటింగ్‌లో మోసాలు జరుగుతాయనే కుట్ర సిద్ధాంతానికి ఎలాంటి ఆధారాలు లేవ"ని ఫెడరల్ ఎలక్టోరల్ కమిషన్ హెడ్ ఎలెన్ వెయిన్‌ట్రాబ్ చెప్పారు.

   అదే విషయం ఫరేజ్‌ను అడిగితే, "అమెరికా ఎన్నికల్లో మోసాలు జరిగినట్లు ప్రస్తుతానికి ఎలాంటి ఆధారాలు లేవ"న్నారు.

   బ్రిటన్ విషయానికి వస్తే తమ దేశంలో ఎన్నికల్లో భారీ స్థాయిలో మోసాలు జరిగినట్లు ఎలాంటి ఆధారాలు లేవని ఎలక్టోరల్ కమిషన్ చెప్పింది.

   2019లో ఎన్నికల్లో మోసానికి పాల్పడినట్లు మూడు కేసులు నమోదయ్యాయి. ఒకరిని పోలీసులు హెచ్చరించి వదిలేశారు.

   ఇక 2018లో ఒక కేసు నమోదవగా, ఇద్దరికి పోలీసులు వార్నింగ్ ఇచ్చారు 2017లో ఒక కేసు నమోదైంది. ఎనిమిది మందిని హెచ్చరించారు.

   ఆ కేసుల్లో నాలుగు సార్లు పోస్టల్ బ్యాలెట్ల విషయంలో పోలీసులు హెచ్చరించారు.

5. 4 నవంబర్ 2020120 ఏళ్లలో అత్యధిక ఓటింగ్ నమోదు

   అమెరికా అధ్యక్ష ఎన్నికల్లో ఈసారి 16 కోట్ల మంది అమెరికన్లు తమ ఓటు హక్కును వినియోగించుకున్నట్లు యూఎస్ ఎలక్షన్స్ ప్రాజెక్ట్ ప్రాథమిక అంచనాలు చెబుతున్నాయి. ఇంత అత్యధిక స్థాయిలో ఓటింగ్ నమోదు కావడం గత 120 సంవత్సరాలలో ఎన్నడూ జరగలేదని తెలిపింది.

   ఈసారి 66.9 శాతం ఓటింగ్ జరిగింది. 1900 నుంచి ఓటింగ్ తీరును పరిశీలించి చూస్తే ఇదే అత్యధికమని వెబ్‌సైట్‌లో పొందుపరిచిన సమాచారం తెలియచేస్తోంది.

   1900లో రిపబ్లిక్ పార్టీకి చెందిన అధ్యక్షుడు విలియం మెక్ కిన్లే.. డెమోక్రటిక్ పార్టీకి చెందిన ప్రత్యర్థి విలియం జెన్నింగ్స్ బ్రయన్‌ని ఓడించారు. అప్పుడు 73.7 శాతం ఓటింగ్ నమోదైంది.

   ‘‘గత 120 సంవత్సరాలలో ఎన్నడూ లేనంతగా 2020 అధ్యక్ష ఎన్నికలలో అత్యధిక ఓటింగ్ శాతం నమోదయింది" అని యూఎస్ ఎలక్షన్స్ ప్రాజెక్ట్ వ్యవస్థాపకుడు మైకేల్ మెక్ డోనల్డ్ ట్వీట్ చేశారు.

   కరోనావైరస్ నేపథ్యంలో పోస్టు ద్వారా బ్యాలట్ వేసిన వారి వలన కూడా ఈ ఓటింగ్ శాతం పెరిగినట్లు ఎన్నికల పరిశీలకులు భావిస్తున్నారు. కనీసం 10 కోట్ల మంది ప్రజలు త్వరగా ఓటు వేసినట్లు అంచనా వేశారు.

   గతంలో ఓటింగ్60 శాతానికి అటూ ఇటూగానే ఉండేది.

6. 4 నవంబర్ 2020అమెరికా అధ్యక్ష ఎన్నికల్లో విజేతను తేల్చేది ఈ ఐదు రాష్ట్రాలే..., జుబేర్ అహ్మద్, బీబీసీ ప్రతినిధి

   అమెరికా అధ్యక్ష ఎన్నికల్లో మ్యాజిక్ నంబర్ 270.

   ఇప్పటివరకూ మ్యాజిక్ ఫిగర్‌కు అభ్యర్థులు ఇద్దరూ చాలా దూరంలో ఉన్నారు.

   బైడెన్‌కు 224 ఓట్లు, ట్రంప్‌కు 213 ఓట్లు వచ్చాయి.

   2016లో మూడు ప్రధాన రాష్ట్రాలు విస్కాన్సిన్, మిచిగాన్, పెన్సిల్వేనియాలో పడిన కేవలం 70 వేల ఓట్లు ట్రంప్‌కు విజయాన్ని అందించాయి.

   దీనిని బట్టి ఎలక్టోరల్ కాలేజీ ఓట్లు ఎంత ముఖ్యమో మనం అంచనా వేయవచ్చు.

   చదవండి: విజేతను తేల్చేది ఈ ఐదు రాష్ట్రాలే...

7. 4 నవంబర్ 2020ఏ రాష్ట్రం ఫలితాలు ఎప్పుడు వెలువడవచ్చు?

8. 4 నవంబర్ 2020జో బైడెన్‌, డోనల్డ్ ట్రంప్: ఏడు దశాబ్దాల జీవితాలు ఎలా సాగాయంటే...

   అమెరికా అధ్యక్ష ఎన్నికల్లో డోనల్డ్ ట్రంప్, జో బైడెన్‌ల మధ్య పోటీ హోరాహోరీగా సాగుతోంది.

   ఈ ఇద్దరు నేతలూ ఏడు పదుల వయసులో ఉన్నవారే. ట్రంప్ వయసు 74 ఏళ్లు కాగా, బైడెన్‌కు 77 ఏళ్లు.

   వ్యక్తిగతంగా, వృత్తిపరంగా గత ఏడు దశాబ్దాల్లో వీరి జీవితాలు చాలా మలుపులు తిరిగాయి. ఎన్నో అనుభవాలను వీరు మూటగట్టుకున్నారు.

   వీరి జీవితాల్లోని వివిధ దశలకు అద్దం పట్టే ఫొటోలతో ఆ వివరాలను ఈ కథనం ద్వారా మీ ముందుకు తెచ్చాం.

   చదవండి: జో బైడెన్‌, డోనల్డ్ ట్రంప్: ఏడు దశాబ్దాల వీరి జీవిత ప్రయాణాలు ఎలా సాగాయంటే...

9. 4 నవంబర్ 2020సారా మెక్‌బ్రైడ్: సెనేట్‌కు ఎన్నికైన తొలి ట్రాన్స్‌జండర్

   అమెరికా సెనేట్‌కు ఎన్నికైన తొలి ట్రాన్స్‌జండర్‌గా సారా మెక్‌బ్రైడ్ నిలిచారు.

   ఆమె డెలవేర్ నుంచి రిపబ్లిక్ పార్టీ అభ్యర్థి స్టీవ్‌ని ఓడించి సెనెటర్‌గా ఎన్నికయ్యారు.

   అంతకు ముందు ఆ స్థానం డెమొక్రట్ పార్టీకి చెందిన హ్యారిస్ మెక్ డవెల్ చేతిలో ఉండేది.

   30 సంవత్సరాల సారా.. ఓ మానవ హక్కుల సంస్థలో ఎల్‌జీబీటీ హక్కుల గ్రూపు ప్రెస్ కార్యదర్శిగా పని చేశారు. ఒబామా పాలనలో వైట్‌హౌస్‌లో ట్రైనీగా కూడా పని చేశారు.

   న్యూయార్క్‌లో 32 సంవత్సరాల రిచి టోర్రెస్ తొలి నల్లజాతి స్వలింగ సంపర్క సభ్యులుగా కాంగ్రెస్‌కి వెళతారు.

   ఇక నార్త్ కరోలినా నుంచి 25 సంవత్సరాల మాడిసన్ కాథోర్న్ 1990లలో జన్మించిన తొలి కాంగ్రెస్ సభ్యుడిగా నిలిచారు.

10. 4 నవంబర్ 2020ఓటరు అభిప్రాయం: ‘మోసం ఆరోపణలు నాకు బాధ కలిగించాయి’

    జో బైడెన్‌కు ఓటు వేసిన ఆమ్నా బీబీసీ రేడియో లైవ్ 5తో మాట్లాడుతూ.. ‘‘ఈరోజు ఉదయం లేచేసరికి నాకు డోనాల్డ్ ట్రంప్ మోసం జరింగిందని అన్నారని తెలిసింది. అది చాలా బాధ కలిగించింది’’ అని చెప్పారు.

    "నేను విదేశాల నుంచి నా ఓటు పంపించాలని అనుకున్నాను. కానీ ట్రంప్ మాటలు నాకు చాల బాధ కలిగించాయి. ఒక దేశంగా ఎవరు గెలిచినా మాలో ఐకమత్యం, శాంతి తీసుకువస్తారని నేను ఆశిస్తున్నాను. కానీ ట్రంప్ ఈ ప్రకటన నా ఆశలపై నీళ్లు చల్లింది" అన్నారామె.

11. 4 నవంబర్ 2020అమెరికా ఎన్నికల ఫలితాలను కోర్టులో సవాలు చేస్తే..., ప్రక్రియ ఎలా ఉంటుంది? ఎవరెవరు భాగం అవుతారు?

12. 4 నవంబర్ 2020అమెరికా అధ్యక్ష ఎన్నికలు: ఎలక్టోరల్ కాలేజీ సీట్లు - మ్యాజిక్ ఫిగర్

    అమెరికా అధ్యక్ష ఎన్నికల్లో ఎలక్టోరల్ కాలేజీ ఓట్ల మ్యాజిక్ ఫిగర్ చాలా కీలకం.

    మొత్తం 50 రాష్ట్రాల్లో ఎలక్టోరల్ ఓట్ల సంఖ్య 538. అంటే మ్యాజిక్ ఫిగర్ 270.

    ఎవరు 270 ఎలక్టోరల్ కాలేజీ ఓట్లు గెలుచుకుంటారో వారే అద్యక్షుడు అవుతారు.

    కాలిపోర్నియాలో అత్యధికంగా 55 ఎలక్టోరల్ ఓట్లు ఉన్నాయి.

    వ్యోమింగ్, అలస్కా, నార్త్ డకోటా లాంటి కొన్ని రాష్ట్రాల్లో కనిష్టంగా 3 ఎలక్టోరల్ ఓట్లు ఉన్నాయి.

13. 4 నవంబర్ 2020బాటిల్ గ్రౌండ్ స్టేట్: విస్కాన్సిన్‌లో 99 శాతం ఓట్ల లెక్కింపు, బైడెన్‌కు స్వల్ప ఆధిక్యం

    మిడ్ వెస్టర్న్ పారిశ్రామిక రాష్ట్రం విస్కాన్సిన్‌లో 99 శాతం ఓట్లు లెక్కింపు పూర్తైంది.

    ఇక్కడ అధ్యక్షుడు డోనాల్డ్ ట్రంప్‌పై డెమోక్రాట్ అభ్యర్థి జో బైడెన్ స్వల్ప ఆధిక్యంలో ఉన్నారు.

    2016లో ట్రంప్ ఇక్కడ హిల్లరీ క్లింటన్‌పై 30 వేల లోపు ఓట్ల తేడాతో గెలిచారు.

    బైడెన్‌కు స్వల్ప ఆధిక్యం ఉన్నప్పటికీ, ఇద్దరి మధ్యా చాలా ఉత్కంఠ పోటీ ఉంది.

    వైట్‌హౌస్ పీఠం దక్కేది ఎవరికో నిర్ణయించడంలో విస్కాన్సిన్ చాలా కీలకంగా మారింది.

14. 4 నవంబర్ 2020సెనేట్‌ మీద పట్టు కోసం హోరాహోరీ పోరు

    వైట్‌హౌస్‌తోపాటూ అమెరికా సెనేట్‌ (పార్లమెంటు) మీద కూడా తమ పట్టు తెచ్చుకునేందుకు డెమోక్రాట్లు, రిపబ్లికన్ల‌ మధ్య గట్టి పోటీ కనిపిస్తోంది.

    కాంగ్రెస్ ఎగువ సభలో రిపబ్లికన్లకు 53-47 మెజారిటీ ఉంది. అంటే, డెమోక్రాట్లు మరో నాలుగు స్థానాలు దక్కించుకోవాలని ప్రయత్నిస్తున్నారు.

    జార్జియా, నార్త్ కెరోలినా, కొన్ని బాటిల్ గ్రౌండ్ స్టేట్స్ సహా ఐదు స్థానాల్లో ఫలితాలు ఇంకా ప్రకటించలేదు.

    దిగువ సభలో కూడా డెమోక్రాట్లు తమ ఆధిపత్యాన్ని నిలబెట్టుకోడానికి చూస్తున్నారు. సర్వేల్లో ముందంజలో నిలిచారు.

    కానీ చాలా ఓట్లు ఇంకా లెక్కించాల్సి ఉంది. రెండు సభల తుది ఫలితాలు రావడానికి కొంతకాలం పట్టవచ్చు.

    ఈ ఏడాది కాంగ్రెస్‌ ఎన్నికలు డోనాల్డ్ ట్రంప్, డెమోక్రటిక్ ప్రత్యర్థి జో బైడెన్ మధ్య అధ్యక్ష ఎన్నికలతోపాటూ జరుగుతున్నాయి.

    రెండోసారి అధ్యక్షుడిగా ఎన్నికయ్యే ట్రంప్ ప్రణాళికలను అడ్డుకోడానికి, లేదా మొట్టమొదట అధ్యక్షుడు అవుతున్న జో బైడెన్ ఎజెండాను సమర్థించడానికి డెమాక్రాట్ల నియంత్రణలో ఉన్న హౌస్, సెనేట్‌కు అదికారం ఉంటుంది.

    ఉన్న 35 సెనేట్ స్థానాల్లో 23 స్థానాల్లో రిపబ్లికన్లు, 12 స్థానాల్లో డెమోక్రాట్లు ఉన్నారు. సెనెటర్లు ఆరేళ్లు పదవిలో ఉంటారు. ప్రతి రెండేళ్లకు ఒకసారి మూడోవంతు స్థానాలకు తిరిగి ఎన్నికలు జరుగుతుంటాయి.

15. 4 నవంబర్ 2020ట్రంప్ గెలిచారని చెప్పిన యూజర్లకు ఫేస్‌బుక్ హెచ్చరిక

    ఎన్నికల్లో గెలిచానంటూ ట్రంప్ చేసిన నిరాధార ప్రకటనపై ఫేస్‌బుక్ స్పందించింది.

    "అధ్యక్షుడు ట్రంప్ ఎన్నికల్లో తాము గెలిచామని చెప్పగానే, మేం ఓట్ల లెక్కింపు ఇంకా కొనసాగుతోందని, విజేత ఎవరో ఇంకా తెలీలేదని ప్రతి ఒక్కరికీ తెలిసేలా ఫేస్‌బుక్, ఇన్‌స్టాగ్రామ్‌లో టాప్-ఆఫ్-ఫీడ్ నోటిఫికేషన్స్ రన్ చేయడం ప్రారంభించాం" అని ఫేస్‌బుక్ ప్రతినిధి ఎన్‌బీసీ న్యూస్‌తో అన్నారు.

    కొన్ని లక్షల చట్టబద్ధమైన ఓట్లను ఇంకా లెక్కిస్తున్నారు.స్వింగ్ స్టేట్స్ అయిన పెన్సిల్వేనియా, మిచిగాన్, విస్కాన్సిన్ మిగతా రాష్ట్రాల్లో ఎన్నికల ఫలితాన్ని ఇంకా నిర్ణయించలేదు. ఈ రాష్ట్రాల్లో విజేతలను ప్రకటించడానికి రోజులు పట్టవచ్చని ఎన్నికల అధికారులు చెప్పారు.

    ఇంతకు ముందు, ఎన్నికల ఫలితాల గురించి తప్పుదోవ పట్టించే సమాచారాన్ని అడ్డుకునేందుకు ట్విటర్ కూడా ఇలాంటి చర్యలే చేపట్టింది. ట్రంప్ ట్వీట్‌కు అది హెచ్చరిక కూడా పెట్టింది.

16. 4 నవంబర్ 2020ఈ బ్యాలట్ పోరు కోర్టుకు చేరుతుందా?, ఆంథోని జుర్చర్, నార్త్ అమెరికా రిపోర్టర్

    ఒకవైపు బైడెన్ విజయం సాధించే దిశలో ఉన్నానని ప్రకటించుకుంటూ ఉండగా.. మరోవైపు ట్రంప్ ఎన్నికలలో అక్రమాలు, అరాచకం చోటు చేసుకున్నాయంటూ నిరాధార ఆరోపణలు చేయడం చూస్తుంటే ఒక భయానకమైన కల నిజమవుతున్నట్లుగా అనిపిస్తోంది.

    ఇది కోర్టుల్లో సుదీర్ఘ న్యాయ సమరానికి సూచికగా కనిపిస్తోంది. ఆ సమరంలో ఓడిపోయిన వారిలో తాము మోసపోయామనే ఆగ్రహం పెల్లుబుకుతుంది.

    అమెరికా అధ్యక్ష ఎన్నికల తుది ఫలితాలు ఇంకా రావల్సి ఉండగా ఇప్పటి వరకు వెల్లడైన ఫలితాలను చూస్తుంటే అమెరికా తీవ్రంగా విభజితమైన దేశంగా కనిపిస్తోంది.

    అమెరికా ప్రజలు ట్రంప్‌ని పూర్తిగా నిరాకరించలేదు. అలాగని ట్రంప్ భావించినట్లుగా ఆయనకు సంపూర్ణమైన మద్దతు కూడా ప్రకటించినట్లు లేరు.

    ఈ ఎన్నికలలో గెలుపు ఎవరిదైనప్పటికీ రాజకీయ యుద్ధం మాత్రం కొనసాగుతూనే ఉంటుంది అని చెప్పవచ్చు.

    చదవండి: ట్రంప్ - బైడెన్.. ఎవరు గెలవాలంటే ఏం జరగాలి?

17. 4 నవంబర్ 2020హవాయిలో బైడెన్ విజయం సాధించే అవకాశం

    హవాయి రాష్ట్రంలో జో బైడెన్ విజయ సాధించే అవకాశం ఉంది.

    1959 రాష్ట్రం అయినప్పటి నుంచి ఇది రిపబ్లికన్ అధ్యక్ష అభ్యర్థికి రెండు సార్లు మాత్రమే ఓటు వేసింది.

18. 4 నవంబర్ 2020విస్కాన్సిన్‌లో ట్రంప్‌పై బైడెన్ ఆధిక్యం

    అమెరికా అధ్యక్ష ఎన్నికల్లో చాలా కీలకంగా భావించే విస్కాన్సిన్ రాష్ట్రంలో డోనల్డ్ ట్రంప్‌పై జో బైడెన్ 0.3 శాతం ఆధిక్యం సాధించారు.

    ఇక్కడ గత ఎన్నికల్లో డోనల్డ్ ట్రంప్ విజయం సాధించారు.

    ఇప్పటివరకూ ఇక్కడ దాదాపు 89 శాతం ఓట్లు లెక్కించారు.

    డోనల్డ్ ట్రంప్‌కు 1,566,844 ఓట్లు రాగా, జో బైడెన్‌కు 1,578,433 ఓట్లు వచ్చాయి.

    అంటే, డోనల్డ్ ట్రంప్‌కు 49.0 శాతం ఓట్లు రాగా, బైడెన్‌కు 49.3 శాతం.ఓట్లు పడ్డాయి.

19. 4 నవంబర్ 2020ఈసారీ పోస్టల్ ఓట్లే చట్టపరమైన వివాదానికి కారణం: బారీ రిచర్డ్

    ఈసారి కూాడా చట్టపరమైన వివాదానికి పోస్టల్ ఓట్లు కారణం అవుతాయని అమెరికాలోని ప్రముఖ లాయర్ బారీ రిచర్డ్ బీబీసీ వరల్డ్ సర్వీస్‌తో అన్నారు.

    బారీ రిచర్డ్ 2000లో అధ్యక్ష ఎన్నికలకు సంబంధించిన వివాదంలో జార్జ్ బుష్ తరఫున వాదించారు.

    "ఈసారీ ఈ కేసు చాలా రకాలుగా భిన్నంగా ఉంది. అప్పుడు ఫ్లోరిడాలో బ్యాలెట్ డిజైన్‌లో గందరగోళం జరిగింది. చట్టపరమైన తప్పిదాలు కూడా జరిగాయి. అవి కేసుకు సాక్ష్యంగా నిలిచాయి. అత్యంత అవసరం అయితే తప్ప ఈసారీ సుప్రీంకోర్టు అంత సులభంగా ఈ కేసును స్వీకరిస్తుందని నాకైతే అనిపించడం లేదని" అన్నారు.

20. 4 నవంబర్ 2020Reality Check: లేదు, ట్రంప్ గెలవలేదు

    ఫలితాలు తారుమారు చేయగలిగిన కీలకమైన రాష్ట్రాల్లో ఇంకా చాలా ఓట్లు లెక్కించాల్సి ఉన్నా, అమెరికా ఎన్నికల్లో తాను ఇప్పటికే విజయం సాధించానని ట్రంప్ ప్రకటించారు.

    "మేం ఈ ఎన్నికల్లో గెలవడానికి సిద్ధమవుతున్నాం. నిజం చెప్పాలంటే, మేం ఈ ఎన్నికల్లో గెలిచాం" అని ఆయన వైట్ హౌస్ నుంచి ఇచ్చిన ప్రసంగంలో అన్నారు.

    హోరాహోరీ పోటీ ఉన్న రాష్ట్రాల్లో జార్జియా, విస్కాన్సిన్, పెన్సిల్వేనియా, మిచిగాన్ ఫలితాలు ఇంకా వెల్లడి కాలేదు. భారీ సంఖ్యలో ఓట్లు, ముఖ్యంగా డెమాక్రాట్ అభ్యర్థికి అనుకూలంగా ఉన్న పట్టణ పోలింగ్ కేంద్రాల్లో ఓట్లను ఇంకా లెక్కించాల్సి ఉంది.

    ముఖ్యంగా పెన్సిల్వేనియాలో పోటీ తీవ్రంగా ఉంది. పోలింగ్ భారీగా జరగడం, పోస్టల్ బ్యాలెట్లు పోటెత్తడంతో కౌంటింగ్ రోజులపాటు కొనసాగుతుందని అంచనా వేస్తున్నారు.

    "ముఖ్యంగా, మనం పెన్సిల్వేనియాలోతిరుగులేని ఆధిక్యంతో గెలుస్తున్నాం, మనకు పెన్సిల్వేనియా ప్రాంతాల్లో బాగా వస్తున్నాయి. అక్కడి వారు మీ అధ్యక్షుడిని ఇష్టపడ్డారు" అని ట్రంప్ అన్నారు.

    ప్రస్తుతం అక్కడ 74 శాతం ఓట్లు లెక్కించగా, 55.7 శాతం ఓట్లతో ట్రంప్ ఆధిక్యంలో ఉన్నారు. జో బైడెన్‌కు 43 శాతం ఓట్లు వచ్చాయి. అయితే, రాష్ట్రంలోని అతిపెద్ద నగరం ఫిలడెల్ఫియాలో 48 శాతం పోలింగ్ మాత్రమే నమోదైంది. అది ఎక్కువగా జో బైడెన్‌వైపు మొగ్గు చూపుతోంది.

    మిడ్‌వెస్ట్రన్ స్టేట్స్ మిచిగాన్, విస్కాన్సిన్‌లో కూడా అదే పరిస్థితి ఉంది. అక్కడ నువ్వా-నేనా అనేలా పోటీ కొనసాగుతోంది.

    "మేం మిచిగాన్‌లో గెలుస్తున్నాం. అక్కడ 65శాతం ఓట్లు పడ్డాయి. మేం విస్కాన్సిన్‌లో కూడా గెలుస్తున్నాం" అని ట్రంప్ అన్నారు.

    కానీ, మిచిగాన్‌లో అతిపెద్ద నగరం డెట్రాయిట్‌లో ఇంకా చాలా ఓట్లు లెక్కించాల్సి ఉంది. విస్కాన్సిన్‌లో డెమాక్రాట్ల పట్టున్న మిల్వాకీలో సగానికంటే తక్కువ ఓటింగ్ జరిగింది.

    జార్జియా సంగతేంటి, అక్కడ ఇంకా పోటాపోటీగా ఉందా?

    "జార్జియాలో కూడా మనమే గెలిచినట్లు స్పష్టంగా తెలుస్తోందని" ట్రంప్ అన్నారు. అయితే, అక్కడ 90 శాతం పైగా ఓట్లు లెక్కించినప్పటికీ, ఎవరు గెలుస్తారో ఇంకా తెలీని పరిస్థితి ఉంది. రాష్ట్రంలో అతిపెద్ద నగరం అట్లాంటాలో ఇంకా గణనీయమైన సంఖ్యలో ఓట్లను లెక్కించాల్సి ఉంది.