Jinsi mama alivyomtafuta mbakaji aliyeghushi kifo

Mwaka jana mwanamke mmoja katika jimbo la kaskazini mwa India la Bihar aliambiwa mbakaji wa bintiye amefariki na kesi dhidi yake kufungwa.

Alitilia shaka madai hayo na kufichua ukweli, na kusababisha kesi hiyo kufunguliwa tena na hatimaye kupata haki kwa binti yake. Mwandishi wa BBC Soutik Biswas anachunguza hadithi ya ajabu ya uvumilivu.

Asubuhi yenye tulivu huenda mnamo Februari mwaka jana, wanaume wawili walifika kwenye eneo la kuchoma maiti kwenye ukingo wa Ganges, mto mtakatifu zaidi nchini India.

Walikuwepo kufanya ibada ya mazishi ya Kihindu.

Watu hao walikuwa wakibeba kuni, lakini cha ajabu hawakubeba maiti.

Mara tu walipofika mahali pa kuchomea maiti, mambo yalichukua mkondo wa ajabu.

Wanaume walijenga paa ardhini. Kisha, mmoja wao akajilaza kwenye paa, akajifunika sanda nyeupe na akafumba macho. Yule mwingine alirundika kuni zaidi hadi kichwani.

Picha mbili za matukio haya zilipigwa. Haijulikani ni nani aliyepiga picha hizo au ikiwa mtu wa tatu alikuwepo.

Mwanaume huyo "aliyekufa" inaonekana alikuwa Niraj Modi, mwalimu wa shule ya serikali mwenye umri wa miaka 39. Mwanaume mwingine alikuwa baba yake, Rajaram Modi, mkulima mwenye miaka sitini na kitu.

Rajaram Modi kisha alikwenda hadi mahakamani, umbali wa kilomita 100 (maili 62) na wakili na kuapa hati ya kiapo iliyotiwa saini kwamba mtoto wake Niraj Modi alikufa mnamo 27 Februari nyumbani kwao kijijini. Pia alitoa picha mbili kutoka kwa uchomaji maiti na risiti za kuni zilizonunuliwa kwa ajili ya ibada kama ushahidi.

Hii ilikuwa siku sita baada ya polisi kuandaa mashtaka ya ubakaji dhidi ya Niraj Modi. Modi alishtakiwa kwa kumbaka msichana wa umri wa miaka 12, ambaye pia alikuwa mwanafunzi wake, mnamo Oktoba 2018.

Msichana huyo aliteswa akiwa peke yake kwenye shamba la miwa na mshambuliaji wake alidai kuwa alirekodi shambulio hilo na kulirusha mtandaoni.

Modi alikuwa amekamatwa mara baada ya malalamiko kuwasilishwa na mama wa msichana huyo, na alikuwa nje kwa dhamana baada ya kukaa gerezani kwa miezi miwili.

Mambo yalikwenda haraka baada ya "kifo" cha Niraj Modi mwaka jana. Miezi miwili baada ya baba yake kujulisha mahakama, mamlaka za eneo hilo zilitoa cheti cha kifo chake. Mnamo Mei, mahakama ilifunga kesi kwani "mshtakiwa pekee katika kesi" alikuwa amekufa.

Ni mtu mmoja tu aliyeshuku kuwa mwalimu huyo alighushi kifo chake na alikuwa amejificha ili kukwepa kukutwa na hatia, mama wa msichana huyo, mwanamke nyonge ambaye aliishi katika kibanda katika kijiji kimoja na akina Modi.

"Wakati nilipojua kuwa Niraj Modi amekufa, nilijua ni uwongo. Nilijua yu hai," alisema mama huyo nilipokutana naye hivi majuzi.

Saba kati ya vifo 10 nchini India hutokea katika karibu vijiji 700,000 nchini humo, na katika vijiji vifo vingi zaidi hutokea nyumbani kuliko ilivyo kwa vifo mijini. Sheria ya umri wa miaka 54 inahitaji usajili wa lazima wa ukweli wa kuzaliwa na vifo - lakini sio sababu za kifo.

Mtu anapofariki katika kijiji cha Bihar, mwanafamilia wa marehemu hana budi kuwasilisha nambari yake ya kipekee ya utambulisho wa kibayometriki, na kupata saini za wakazi watano wa kijiji hicho ambao wanathibitisha kifo hicho.

Hizi zinahitaji kutolewa kwa panchayat au baraza la kijiji. Wanachama wake, ikiwa ni pamoja na msajili wa ndani, huchunguza karatasi na ikiwa kila kitu kiko sawa kutoa cheti cha kifo ndani ya wiki. "Vijiji vyetu ni vingi na vimeunganishwa kwa karibu. Kila mtu anamjua kila mtu mwingine. Kifo hakitambuliwi au kusikika," anasema Jai ​​Karan Gupta, wakili wa mwathiriwa.

Rajaram Modi alikuwa amewasilisha saini na nambari za utambulisho wa kibayometriki za wanakijiji watano na hati ya kiapo ikisema mwanawe alikuwa amekufa, na kupata cheti cha kifo cha mwanawe. Hati hiyo haikutaja sababu ya kifo hicho. Risiti kutoka kwa duka la kuni ilisema kifo hicho kilisababishwa na "ugonjwa".

Siku moja Mei mwaka jana, mama huyo alikuja kujua kutoka kwa wakili kwamba kesi dhidi ya Niraj Modi imefungwa kwa sababu alikuwa amefariki.

"Lakini ilikuwaje hakuna mtu aliyejua kifo cha mwalimu? Kwa nini hakukuwa na ibada baada ya kifo? Kwa nini hakukuwa na mazungumzo juu ya kifo?" Aliniuliza.

Alisema alikwenda kuangalia kutoka kwa watu ikiwa Niraj Modi alikuwa amekufa. Hakuna mtu aliyesikia habari hiyo. Kisha akaenda mahakamani na ombi la kuchunguza suala hilo, lakini majaji wakaomba ushahidi wa kuthibitisha kwamba mwalimu huyo alikuwa hai.

Katikati ya Mei, mama huyo alimwomba afisa mwandamizi wa eneo hilo, akisema kuwa halmashauri ya kijiji ilitoa hati ya kifo kulingana na nyaraka za kughushi, na kwamba inapaswa kuchunguzwa.

Mambo yalianza kwenda haraka baada ya hapo.

Afisa huyo aliamuru uchunguzi ufanywe na kutoa taarifa kwa halmashauri ya kijiji. Maafisa wake walitafuta ushahidi zaidi kutoka kwa Rajaram Modi kuhusu kifo cha mwanawe: picha za "marehemu baada ya kifo chake, za kuchoma maiti, tambiko la mwisho na ushuhuda [mpya] wa mashahidi watano".

Wajumbe wa baraza la kijiji walikutana na wakazi wa kijiji hicho chenye nyumba 250 hivi. Hakuna mtu aliyeonekana kusikia juu ya kifo cha Niraj Modi. Kunyoa kichwa ni desturi ya kuomboleza ya Wahindu ambayo kawaida huwekwa kwa ajili ya kifo cha jamaa wa karibu. Hatahivyo hakuna hata mmoja wa wanafamilia wa Modi ambaye alikuwa amenyoa vichwa vyao.

"Hata jamaa za Niraj Modi hawakuwa na habari kuhusu kifo chake au aliko.

Waliendelea kusema kama kungekuwa na kifo sherehe za mwisho zingefanyika nyumbani," alisema Rohit Kumar Paswan, afisa wa polisi anayechunguza.

Wajumbe wa baraza la kijiji walimhoji tena Rajaram Modi. Alikuwa ameshindwa kutoa ushahidi mpya wa kifo cha mwanawe. "Tulipomuuliza maswali zaidi, hakutoa jibu lolote la kuridhisha," alisema Dharmendra Kumar, katibu wa baraza hilo.

Uchunguzi ulihitimisha kuwa Niraj Modi alighushi kifo chake na baba na mwanawe walighushi nyaraka ili kupata cheti cha kifo.

Polisi waligundua kuwa mwalimu huyo wa shule alikuwa amechukua nambari za utambulisho wa kibayometriki za wazazi wa wanafunzi wake watano na kughushi saini zao kwenye karatasi wakitaka cheti chake cha kifo. Aliwaambia wazazi hao kuwa anahitaji namba zao za utambulisho kwa ajili ya ufadhili wa masomo aliokuwa akiwaandalia wanafunzi hao.

Mnamo Mei 23, maafisa walikifuta cheti cha kifo cha Niraj Modi. Polisi walimkamata babake na kumfungulia mashtaka ya kughushi. "Sijawahi kabisa kuchunguza kesi kama hii katika taaluma yangu," alisema Bw Paswan.

Mnamo Julai, mahakama ilifungua tena kesi hiyo, ikisema "imedanganywa na kupotoshwa" ili washtakiwa "kuepuka adhabu". Mama huyo, bila kuchoka katika vita vyake vya kumsaka mwalimu huyo, alienda mahakamani kutaka kumkamata.

Mnamo Oktoba, Niraj Modi alijisalimisha kortini, miezi tisa baada ya kutangazwa kuwa amekufa. Wakati wa kesi alikuwa amejitetea, akikana madai ya ubakaji.

Mwezi uliopita, mahakama ilimpata Niraj Modi na hatia ya kumbaka msichana huyo na kumhukumu kifungo cha miaka 14 jela. Ilitoa fidia ya rupia 300,000 ($3,628; £3,009) kwa mwathiriwa. Rajaram Modi pia yuko jela akikabiliwa na mashtaka ya udanganyifu na kutokuwa mwaminifu, ambayo yana adhabu ya juu ya miaka saba jela. Baba na mwanawe sasa wanakabiliwa na mashtaka yanayohusiana na cheti cha kifo.

"Kwa zaidi ya miaka mitatu nilisafiri kwenda kortini ili kuhakikisha kuwa mtu aliyemshambulia binti yangu ataadhibiwa. Na kisha siku moja wakili wake aliniambia kuwa amekufa. Mtu anawezaje kutoweka hewani namna hiyo?" mama anasema.

“Wakili aliniambia itagharimu fedha nyingi kupigana na kesi mpya ili kuthibitisha kifo hicho ni cha uongo, wengine waliniambia kuwa mshtakiwa atatoka jela na kulipiza kisasi.

"Sikujali. Nilisema nitapanga pesa. Siogopi. Nilimwambia hakimu na viongozi: 'Tafuteni ukweli'."