TOOS: Dagaal culus oo ka socda Gobolka Bakool

Tebin toos ah

1. 6 Sebtembar 2023Kooxda Kormeerta hubka wax gumaada oo warbixinteeda sannadlaha ahayd soo saartay

   Kooxda hubka wax gumaada ee Cluster Munition Coalition (CMC) ayaa soo saartay warbixinteeda kormeerka hubka Cluster ee 2023-da, taasoo muujineysa kororka khasaaraha rayidka ah ee uu sababay hubkan.

   Warbixintu waxay ku nuuxnuuxsatay baahida degdega ah ee loo qabo in la joojiyo isticmaalka hubkan, waxaana loogu baaqayaa dhammaan dalalka inay ku biiraan xayiraadda caalamiga ah ee hubkan.

   Hubkan wax gumaada ayaa dhulka laga soo tuuri karaa ama laga soo daadiyaa diyaarado, kaas oo walxo ku kala firdhiya aag ballaaran.Sidoo kale inta badan ma qarxo marka la soo tuuro,taasoo khatar joogto ah ku ah dadka rayidka ah.

   Warbixintu waxay daaha ka qaadaysaa in Ruushka, Ukrain, Suuriya, iyo Myanmar ay adeegsadeen hubkan noocyadiisa kala duwan sannadihii la soo dhaafay, inkasta oo aanay saxeexin heshiiskii 2008-dii lagu mamnuucay.

   Sannadkii 2022-dii oo keliya, ugu yaraan 1,172 dhaawacyo cusub oo uu hubkan geystay ayaa laga diiwaangeliyay siddeed waddan, iyadoo dadka rayidku ay yihiin 95% ee dhaawacyadaas. Carruurtu waxay ka ahaayeen 71% dhibanayaasha haraaga hubkan.

   Warbixintu waxay kaloo xooga saaraysaa muhiimada ay leedahay caawinta dhibbanayasha waxayna ku baaqaysaa in la wanaajiyo helitaanka adeegyada baxnaaninta ee kuwa ka badbaaday.

2. 6 Sebtembar 2023Masar oo dooneysa in heerka dhalmada hoos loo dhigo

   Madaxweynaha dalka Masar Cabadul Fattah al sisi ayaa sheegay in dalkiisu u baahanyahay inuu hoos u dhigo heerka dhalmada sibuu yiri looga baaqsado musiibo.

   Madaxweyne al-Sisi waxa uu sheegay in Masar ay ku qasban tahay inay hoos u dhigto carruurta dhalaneyso oo ay ka dhigto 400,000, halka hadda ay tahay in ka badan laba milyan sibuu yiri waddanku fursad ugu helo siinta shaqooyin iyo adeegyo kale muwaadiniintiisa.

   Mr al-Sisi ayaa khalad ku tilmaamay hadal ka soo yeeray wasiirka caafimaadka dalkaasi Khaalid Cabdel Ghaffar, oo ku saabsanaa in arrinta dhalista carruurta ay tahay arrin ay xor u yihiin dadweynuhu.

   Madaxweynaha Masar wuxuu sheegay in dadka oo xorriyad loo siyaa arrintaan ay abuuri karto dhibaato.

   Waxa uu si maldahan u sheegay in Masar ay ku dayan karto siyaasadda Shiinaha ee hal cunug, maadaama Shiinuhu "ku guuleystey siyaasaddooda xakamaynta dadweynaha".

   Tan iyo 2000, dadka Masar, oo ka mid ah dalalka ugu dadka badan Afrika, waxay kordheen 40 milyan oo qof, waxayna gaareen 105 milyan oo qof, sida uu sheegay wasiirka caafimaadku.

3. 6 Sebtembar 2023Waa kuwee aflaamta ay daawadaan siyaasiinta caanka ah, gaar ahaan taxanayaash

   Aan xoogaa ka nasanno, nolosha siyaasadda ee Westminister ee Britain, tan Maraykanka ee Wahington DC iyo daawashada wararka qaaska ah ee TV-yada, kuwaas oo aan kaa dheeraan doonin.

   Siyaasiyiinta sidoo kale waxay jecel yihiin in ay xasuusiyaan codbixiyeyaasha inay runtii leeyihiin nolol ka baxsan tan siyaasadda (daacad), oo noo caddeeyaan arrinkaas, siiba iyaga oo inoo sheegaya waxyaabaha ay saacadaha badan daawadaan - xumaan iyo samaanba.

   Raysal wasaaraha Britain, Rishi Sunak wuxuu noqday qofkii ugu dambeeyay ee daaha ka qaadaya aragtidiisa iyo waxa uu daawado, isagoo u sheegay The Radio Times inuu wakhti badan ku qaatay "daawashada Netflix ee filimka Bridgerton, iyo sidoo kale taxanaha aadka loo dhalleeceeyey ee Emily in Paris oo soo baxay sannadkii la soo dhaafay".

   Warbixintaan oo dhameystiran halkaan ka aqriso: Waa kuwee aflaamta ay daawadaan siyaasiinta caanka ah, gaar ahaan taxanayaash

4. 6 Sebtembar 2023Ciidamada ka socda bariga Afrika ee ku sugan Congo oo waqtiga loo kordhiyay

   Madaxda dalalka Bariga Afrika ayaa Talaasadii shalay si wada jir ah isugu raacay in muddo kordhin loo sameeyo ciidamada gobolka ee ku sugan bariga Jamhuuriyadda Dimuqraadiga ah ee Congo.

   Go’aankan ayaa imaanaya todobaad kadib markii saraakiisha ciidamada DR Congo ay dileen 43 qof ayna xireen 168 dibadbaxayaal ah oo dalbanayay in ciidamada Bariga Afrika iyo kuwa nabad ilaalinta Qaramada Midoobay ay ka baxaan bariga Congo.

   Waqtiga ciidamada gobolka waxa uu ku ekaa 8 Sebtembar, laakiin kordhinta waxay ka dhigan tahay in ciidamadu ay sii joogi doonaan bariga DR Congo saddex bilood oo dheeraad ah, ilaa 8 December.

   Ururka bulshada Bariga Afrika ayaa arrintan ku dhawaaqay Talaadadii, kaddib shir madaxeed ay madaxda gobolka ku yeesheen caasimadda Kenya ee Nairobi.

   Kulanka ayaa waxaa goob joog ka ahaa raysal wasaaraha Congo Sama Lukonde, wasiirka Arrimaha Bulshada Bariga Afrika ee Uganda Rebecca Kadaga iyo Madaxweynayaasha Kenya Tanzania, Rwanda, Burundi, South Sudan.

5. 6 Sebtembar 2023Gabar caan ka ahayd barta YouTube oo aabbaheed qudha ka jaray

   Tiba al-Cali waxay ahayd gabar dhalinyaro ah oo firfircoon oo taageerayaal badan ku leh barteeda YouTube oo ay kaga hadli jirtay arrimaha bulshada.

   Waxay bilawday channel-keeda kadib markii ay ka soo guurtay dalkeeda Ciraaq iyadoo da’deedu ahayd 17 jir sannadkii 2017-ka, waxayna ka hadli jirtay arrimaha guurka, isqurxin iyo waxyaabo kale. Tiba waxay u muuqatay mid faraxsan oo soo jiidatay tobanaan kun oo daawadayaal ah.

   Bishii Janaayo ayay dib ugu laabatay Ciraaq si ay u soo booqato qoyskeeda - waxaana dilay aabbaheed. Si kastaba ha ahaatee, dilka looma maleynayo in uu ahaa mid "hore looga fikiray" waxaana aabaheed lagu xukumay lix bilood oo kaliya oo xarig ah.

   Dhimashada Tiba waxay kicisay mudaaharaadyo Ciraaq oo dhan ah, waxaana dadka ay muujinayeen sida ay arrintaan uga xunyihiin. Tiba waxaa barteeda ku xirnaa kumanaan daawadayaal ah oo geerideeda aad uga naxay.

   Waxay soo bandhigi jirtay muuqaalo maalinle ah.Muuqaalkeedii ugu horreeyay ee Noofambar 2021-kii, Tiba waxay ku sheegtay inay u guurtay Turkiga si ay u horumariso waxbarashadeeda, laakiin waxay dooratay inay sii joogto sababtoo ah waxay ku faraxsaneed nolasha ay gashay.

   Sida ay wararku sheegayaan, aabaheed, Tayyib Cali, kuma raacsanayn go'aankeeda ah in ay u guurto Turkiga niyo in ay halkaa kula midowdo ninkeeda oo u dhashay Suuriya, kaas oo ay kula nooleed Istanbul.

   Dilka gabadhaan ayaa dhacay dhowr bilood ka hor, hase yeeshee wali waxaa taagan walaacii uu falkaasi abuuray.

6. 6 Sebtembar 2023Meleeshiyo beeleed iyo ciidamo uu taageero Mareykanka oo ku dagaallamaya qaybo ka mid ah Suuriya

   Tobaneeyo qof ayaa la soo warinayaa in ay dhinteen maalmo gudahood ka dib iska horimaadyo u dhexeeya maleeshiyaad Kurdiyiin ah oo taageero ka helaya Mareykanka iyo dagaalyahannada qabaa'ilka Carabta ee Suuriya.

   Dagaallada ayaa bilaawday ka dib markii ciidamada Dimuqraadiyiinta Suuriya ay xireen hoggaamiyihii maleeshiyo beeleed ay taageerayaan qabaa'ilka Carabta ee ka howl gala gobolka Deir ez-Zor, ee bariga dalkaas.

   Rabshadaha ayaa markii dambe ku fiday waqooyiga iyo galbeedka ilaa gobollada Hasakah iyo Xalab.Qaramada Midoobay ayaa sidoo kale heshay warar aan la xaqiijin oo ku saabsan dilka 54 qof oo rayid ah oo ka dhashay dagaallada.

   Mareykanka oo boqolaal askari ay kaga sugan yihiin goobaha ay maamulaan xoogaga Dimuqraadiyiinta Suuriya si ay uga hortagaan Daacish, ayaa ku booriayay dhammaan dhinacyada inay si deg deg ah u joojiyaan dagaalka, ayna gaaraan xal nabadeed.

7. 6 Sebtembar 2023Dhageyso: Maxay soo kordhin kartaa tillaabooyinka lagu xirxiray saraakiil ka tirsan ciidamada Soomaaliya?

   Madaxaweynaha Soomaaliya ayaa sheegay in saraakiil milateri loo xirxiray tillaabooyinkii ay dhawaan ciidamadu uga soo baxeen saldhigyo ku yaal deegaanno ka tirsan Galmudug oo markii hore ciidamadu ka qabsadeen Al-shabaab.

   Madaxwayne Xasan Sheekh Maxamuud oo shalay kula hadlayay duleedka Maxaas oo ka tirsan gobolka Hiiraan, ciidamo ka tirsan kuwa xoogga dalka ayaa sheegay in saraakiisha la xirxiray la soo taagi toono maxkamad ciidamada, lagulana xisaabtami doono dambiga ay galeen, isla markaana la marsiin doono waxa uu sharcigu ka qabo.

   Balse falanqeeyaasha arrimaha amniga Soomaaliya ayaa qaarkood qaba in ay tahay in halkii saraakiil la xirxiri lahaa ay tahay in si dhab ah loola xisaabtamo hoggaanka ciidamada.

8. 5 Sebtembar 2023

   Tebinta tooska ah ee BBC Somali caawa intaas ayey inoogu egtahay. Si aad u akhrisato wararkii maanta, hoos u deg. Waa inoo berri Subax iyo kulan dambe akhyaareey.

9. 5 Sebtembar 2023Cillad kusoo baxday 'nidaamka teknoolajiga' ee diyaaradda United iyo dhamaan duulimaadyada oo la hakiyey

   Shirkadda diyaaradaha Maraykanka ee United Airlines ayaa soo saartay amar guud oo ay ku joojinayso dhammaan duullimaadyadeeda gudaha, maamulka duulista ee federaalka ayaa xaqiijiyay.

   War qoraal ah oo ay shirkaddu soo saartay ayay ku sheegtay in dhammaan duullimaadyadii la joojiyay sababo la xiriira "cillad dhanka nidaamka teknoolajiga ah".

   Duulimaadyada hawada ku jiray amarka ka hore ayaa ku sii socon doona halka ay u socdeen sidii qorshuhu ahaa, ayay shirkaddu sheegtay.

   United waxa ay sheegtay in tafaasiil dheeri ah la soo saari doono gelinka dambe ee maanta.

10. 5 Sebtembar 2023Qisada Wiil isaga iyo qoyskiisaba Soomaaliya lagu takooray midabka maqaarkooda

    Cilmi Bile Maxamed oo 25 jir ah oo ka hadlayay takoorka uu kala kulmayo Soomaalida xaaladda caafimaad ee loo yaqaan Albino awgeed ayaa yiri: “Dadku waxay igu dhahaan waxaa tahay dad qalato caruurta cuna, way iga argagaxeen”.

    Cilmi ayaa tan iyo markii uu ka soo tagay hoygiisa miyiga ah ee gobolka Hiiraan waxa uu la tacaalayay sidii uu u heli lahaa deegaan uu ku noolaado. Walaalihiis ayaa sidoo kale la ildaran xaaladda.

    "Si joogto ah ayey dadkayagu noo aflagaadeeyaan noona jirdilaan. Waa nala garaacay oo nalagu jeesjeesay midabka maqaarkayaga, timahayaga iyo indhahayaga awgii," ayuu yiri.

    "Waxa aan moodayay in aan Muqdisho ka heli doono nolol dhaanta tan laakiin waan qaldanaaa."

    Cilmi Bile waxa uu raadiyay qol uu dad la wadaago uu la dego balse waa la diidaa mar kasta.

    Ugu dambeyn wuxuu ku qasbanaaday inuu bixiyo $30 doolar bishii si uu ugu noolaado qol bakhaar ah oo ku yaal degmada Xamar Weyne, oo ah qaybta ugu qadiimsan magaalada.

    "Dadku waxay aaminsan yihiin inaan inkaar qabo,” ayuu yiri. "Waxay inta badan ku soo tuuraan albaabkayga cusbo iyo ukun lagu qasay biyo sababtoo ah waxay aaminsan yihiin in tani ay iga ilaalinayso iyaga."

    Cilmi ayaa ugu dambayntii ka helay shaqo nadiifiye ah makhaayad uu ka helo inta u dhaxaysa $1.40 iyo $4 maalintii.

    Ma sii waarin.

    Waxa shaqada laga eryay ka dib markii macaamiishu ay joojiyeen inay halkaas wax ka cunaan, iyagoo sheegay inay ka baqayaan inuu qaadsiiyo albinism-ka inkasta oo aanu ahayn cudur la kala qaado, balse ay tahay xaalad hidde-side ah.

    "maqaayadaha badan ayaan isu maray anigoo shaqo kale raadsanaya laakiin qofna ima shaqaaleysiin," ayuu yiri. "Waxaan ku dambeeyay inaan wadooyinka ka dawarsado, anigoo kor u haya boodh uu ku qoran yahay teleefankayga si ay dadku kaalmayeen lacag."

    Lacagta uu tuugsiga ka helo waa ayaa adag in uu ku daboolo cuntadiisa iyo kiradiisaba, iskaba daayee in uu iibsado muraayadaha uu u baahan yahay si uu maqaarka iyo indhaha cadceedda u nugul u ilaaliyo. Dadka qaba albinism-ka waxay leeyihiin wax yar ama maba laha waxa loo yaqaan melanin oo ah waxa midabka siiya indhaha, timaha iyo maqaarka oo inaga ilaaliya kulaylka qorraxda.

    "Ma awoodo inaan iibsado muraayadaha," Cilmi ayaa yiri. "Suuqa aan ka tuugsado waxaa ka jira boor aad u badan iyo gaadiid aad u wasakhaysan. Si joogta ah ayaan indhaha uga xanuunsadaa, aragayguna si xawli ah ayuu u sii xumaanayaa."

    "Mararka qaar dadku waxay i siiyaan hambo si aan u cuno, mararka qaarkoodna waxba ma helo."

    Waxaa burburtay riyadii Cilmi Bile Maxamed ee ahayd in uu Muqdisho u baxsado si uu lacag ugu soo celiyo qoyskiisa gaar ahaan walaalihiis oo iyaguna Albino ah.

11. 5 Sebtembar 2023Warar dheeraad ah oo kasoo kordhay dableydii ku jirtay buurta Gacan-libaax

    Shalay ayay ahayd markii loo qabtay in jabhadda ku sugan buurta gacan Libaax lagu kala diro, taas oo kamid ahayd qodobadii dhawaan ka soo baxay ergadii ku howlanaa dhexdhexaadinta arrintaasi iyo arrimaha doorashooyinka.

    Hadaba warar soo baxay ayaa sheegaya in la kala diray saraakiishii ugu saraysay iyo qaar badan oo ka mid ah dableydii buurtaas ku jirtay. Warkaas waxaa si dhow ula socday wariyaha BBC-da ee Hargeysa Saddiiq Burmad oo inooga waramaya.

12. 5 Sebtembar 2023Marwada Kowaad ee Maraykanka oo Covid19 laga helay

    Marwada koowaad ee Mareykanka Jill Biden ayaa laga helay Covid-19 isniintii waxayna la kulantay astaamo fudud, Aqalka Cad ayaa sidaas sheegay.

    Haweenaydan 72 jirka ah oo la tallaalay, waxay sii joogi doontaa guriga Rehoboth Beach, Delaware, halkaas oo iyada iyo Madaxweyne Joe Biden ay ku qaateen qayb ka mid ah dhamaadkii todobaadka.

    Madaxweynaha oo marka xaaskiisa laga helay kadib laga baaray cudurka ayaa laga waayey.

    Kadib wuxuu dib ugu noqday magaalada Washington habeenkii Isniinta.

    Joe Biden, oo 80 jir ah, "ayaa mari doona baaritaanno joogta ah usbuucan waxaana lala socon doonaa caafimaadkiisa", ayey tiri afhayeen u hadashay.

13. 5 Sebtembar 2023Faransiiska: Gabdho Iskuulka lagasoo celiyay kadib markii ay ku adkeysteen in ay cabaayado ku tagaan

    Tobaneeyo gabdhood ayaa laga soo celiyay iskuul ku yaala dalka Faransiiska kadib markii ay ku adkeysteen xirashada cabaayadaha asturaadda hablaha Muslimiinta ah.

    Dowladda Faransiiska ayaa bishii hore ku dhawaaqday in xirashada cabaayadaha laga mamnuuci doono dhammaan iskuullada, iyadoo ku doodday inay jabinayaan shuruucda ku aaddan in waxbarashadu ahaato mid diin ka madhan.

    khimaarka ayaa horeyba loo mamnuucay, iyadoo loo cuskanayo inuu muujinayo xiriir diimeed.

    Maalinta Isniinta ayaa ahayd maalintii ugu horeysay ee sanad dugsiyeedka, sida uu sheegay wasiirka waxbarashada Faransiiskuna, ku dhawaad saddex boqol oo gabdhood ayaa cabaayado ku yimid iskuulada, inkastoo intooda badan ay ogolaadeen in ay iska bedelaan.

14. 5 Sebtembar 2023Maxaad ka taqaan taariikhda Axmed Naaji Sacad

15. 5 Sebtembar 2023Saraakiil sarsare iyo ciidamo loosoo qabtay dilka dibadbaxayaal loogu geystay Jamhuuriyadda Dimuqraadiga Kongo

    Laba sarkaal oo sare oo ka tirsan militariga Jamhuuriyadda Dimuqraadiga ah ee Congo ayaa la xiray ka dib markii lagu eedeeyay in ay amreen in awood wax lagu dilo loo adeegsado dibadbax la mamnuucay.

    Ciidamada ammaanka ayaa soo farageliyay markii uu dhacay banaanbaxa looga soo horjeeday ciidamada nabad ilaalinta Qaramada Midoobey Arbacadii lasoo dhaafay, waxaana ku dhintay 43 qof 56 kalena waa ay ku dhaawacmeen.

    Dibad-baxayaashu waxay ka soo jeedeen koox diimeed, waxayna dalbanayeen in ciidamada nabad ilaalinta ee Qaramada Midoobay iyo kuwa Bulshada Bariga Afrika laga saaro dalkooda.

    Saraakiisha la xiray ayaa kala ah Mike Mikombe, oo ah madaxa ilaalada Jamhuuriga ee Goma, iyo Donat Bawili, oo ah hogaamiyaha militariga fadhigoodu yahay magaalada, sida uu sheegay wasiirka arrimaha gudaha Peter Kazadi.

    Ma cadda dacwadda ay la kulmi doonaan.

    Wasiirka ayaa balan qaaday in baaritaanada lagu samaynayo dilalkaasi oo dhaliyay caro qaran iyo mid caalami ah ay noqon doonto mid hufan.

16. 5 Sebtembar 2023Maxay ku heshiiyeen Madaxweyne Xasan iyo Cali Jeyte?

17. 5 Sebtembar 2023Qarax ka dhacay duleedka degmada Maxaas oo madaxweynaha Soomaaliya ku sugan yahay

    Warrarka ka imaanaya Gobolka Hiiraan ayaa sheegaya in gaari waxyaabaha qarxa laga soo buuxiyay uu ku qarxay meel qiyaastii 5 km u jirta degmada Maxaas oo uu hadda ku sugan yahay madaxweynaha Soomaaliya Xasan Sheekh Maxamuud.

    Qof ku sugan gudaha Maxaas ayaa BBC-da u sheegay in qaraxa uu ka dhacay dibadda magaalada kaddib markii ciidamada deegaanku ay rasaas ku fureen gaariga uu qaraxu saarnaa.

    wixii warar kasoo kordha halkan ayaan idiinkusoo gudmin doonnaa.

18. 5 Sebtembar 2023Sawirka nin muddo la' laa oo ay aad isugu dhawaayaan hoggaamiyihii Wagner oo la baahiyay

    Sawir la soo dhigay baraha bulshada ayaa u muuqda mid muujinaya Jeneraal Ruush ah oo aan lagu arag meel fagaare ah tan iyo markii kooxda calooshood u shaqeystayaasha ah ee Wagner ay dalka Ruushka ka sameeyeen amar diido bishii June.

    Sergei Surovikin ayaa la sheegay inuu aad ugu dhawaa madaxii Wagner Yevgeny Prigozhin, kaasoo ku dhintay shil diyaaradeed bishii hore.

    Waxaa jiray warar sheegaya in Jeneraal Surovikin lagu hayo baaitaan ku saabsan suurtagalnimada ah inuu ku lug lahaa rabshaddii dhacday.

    Laakiin sawir la sheegay in uu muujinayo taliyihii hore ee ciidamada Ruushka ee k usgan gudaha Ukraine ayaa hadda lagu daabacay baraha bulshada.

    Qaar ka mid ah warbaahinta Ruushka ayaa barahooda Telegram ku daabacay Isniintii in Jeneraalku uu caafimaad qabo oo u uku suganyahay gurigiisa.

    BBC-du wali ma aysan xaqiijin dhabnimada sawirkan oo muujinaya nin xiran ookiyaalaha qoraxda oo lugaynaya gacanna ku haysta haweenay timo cad oo loo maleynayo in ay xaaskiisa tahay.

    Suxufiga Ruushka u dhashay ee Alexei Venediktov ayaa ku qoray bartiisa Telegram: "General Surovikin waxa uu ku sugan yahay guriga isaga iyo qoyskiisa. Waxa uu ku maqan yahay fasax,".

19. 5 Sebtembar 2023Muxuu dareemaa qofka jaceyl xad-dhaaf ah u qaada qof kale?

    Jaceylku waa wanaagsanyahay, waxaase uu ka sii wacanyahay marka labada qof ee is qaba amba is doonayaa ay is jecelyihiin, balse wali ma is waydiinnay dhibaatada uu dareemo qofka qof kale u qaada jaceyl xad-dhaaf ah.

    Suugaanyahannada qaarkood ayaana qaba in jaceylka oo la dhaafiyo heerkii caadiga ahaa uu keeno dhibaato maadama qofka la jeclaanayo uu yahay insaan oo wax badan ka suurtoobaan amba qadar kale imaan karto.

    Abwaan Xamse Xaddaari oo ku nool magaalada Hargeysa ayaa arrintaa 'Maanso' ka sameeyay waxaana uu xoogga ku saarayaa dhibta uu muto qofka jaceylka xadkiisa dhaafiya

20. 5 Sebtembar 2023Putin iyo Kim oo qorsheynaya kulan ay kaga hadli doonaan arrin xasaasi ah

    Hoggaamiyaha Kuuriyada Waqooyi Kim Jong Un ayaa qorsheynaya inuu bishan u safro Ruushka si uu ula kulmo madaxweyne Vladimir Putin, sida uu sarkaal Mareykan ah u sheegay warbaahinta wada shaqeynta la leh BBC-da ee CBS.

    Labada hoggaamiye ayaa ka wadahadli doona suurtagalnimada in Kuuriyada Waqooyi ay Moscow siiso hub ay ku taageerays dagaalka ay ka waddo Ukraine, ayuu yiri sarkaalku.

    Ma cadda goobta rasmiga ah ee lagu wado in kulankoodu uu ka dhaco.

    Ma jiro wax hadal ah oo degdeg ah oo ku saabsan warbixinta, oo ay sidoo kale baahisay warbaahinta kale ee Mareykanka, ee Waqooyiga Kuuriya ama Ruushka.

    Ilo wareedyo ayaa u sheegay New York Times in Mr Kim ay u badan tahay inuu ku safro tareen nooca gaashaaman ah.

    Kulanka suurtogalka ah ayaa yimid ka dib markii Aqalka Cad uu sheegay in uu hayo xog cusub oo ku saabsan in wada xaajoodyada hubka ee u dhexeeya labada dal "uu si firfircoon horumar u sameeynayo