Madaxda Yurub oo ka xaajoonaya soo galootiga

Tebin toos ah

1. 8 Luulyo 2023labo dumar ah oo lagu kala xukumay 34 sano iyo 45 sano oo xabsi ah kadib markii ay ka dhaleeceeyeen dowladda Sacuudiga

   Khubarada xuquuqul insaanka ee Qaramada Midoobay ayaa ku baaqay in la sii daayo laba dumar ah oo Sucuudiyaan ah oo tobanaan sano oo xabsi ah lagu xukumay, kadib markii ay baraha bulshada ku dhaleeceeyeen dowladda.

   Salma al-Shehab oo barteeda twitter-ka ay ku soo bandhigtay xuquuqda haweenka ayaa bishii Agoosto lagu xukumay afar iyo soddon sano.

   Nourah al-Qahtani oo ah hooyo leh laba caruur ah ayaa lagu xukumay afartan iyo shan sano oo kadib markii ay dhaleeceysay dhaxal sugaha Sacuudiga Mohammed bin Salman iyo Boqor Salmaan.

   Kooxda shaqada ee Qaramada Midoobay u qaabilsan Xarigga Sharci darrada ah ayaa sheegay in ay jiraan cadaymo muujinaya in Salma al-Shehab ay la kulantay dhaqmo naxariis darro ah oo bini’aadannimada ka baxsan iyo sharaf dhac intii ay ku jirtay xabsiga.

   Maamulka Sacuudiga ayaa beeniyay in si xun loola dhaqmay waxayna sheegeen in hannaanka garsoor uu ahaa mid cadaalad ah labada kiisba.

2. 8 Luulyo 2023Dhimasho iyo dhaawac ka dhashay madaafiic maanta lagu weeraray Laascaanood

   Wararka aan ka heleyno magaalada Laascaanood ayaa sheegay in abbaare salaaddii duhur ay madaafiic ku dheceen qaybo kamida magaalada kuwaasi oo dhaliyay tiro dhimasho iyo dhaawac ah.

   Mid kamida madaafiicda ayaa ku dhacay goob maqaaxi ahayd oo ay dad badan ku sugnaayeen.

   Sisoo kale isbitaalka guud ee ee qaybta shaybaarka ee magaalada ayaa lagusoo warramayaa in madaafiicdu ay waxyeelleeyeen kaddib markii mid kamida uu ku dhacay.

   Isbitaalka ayaa horraan waxa bur buriyay dagaallaadii cuslaa ee ka dhacay Laascaanood iyadoo dib loo dayac tiray.

   Haatan ayaa sidoo kale lagusoo warramayaa in dagaal uu ka socdo duleedka magaalada kaasi oo u dhexeeya ciidamada Somaliland iyo ciidamada deegaanka.

3. 8 Luulyo 2023Maxay heesaha qaar maskaxdeena ugu sii jiraan?

4. 8 Luulyo 2023Dibad baxyo kale oo maanta ka dhacay Nairobi

   Booliska dalka Kenya ayaa sunta dadka ka ilmeysiisa u adeegsaday si ay u kala eryaan dad u dhaq dhaqaaqa xuquuqul insaanka oo ku baaqaya in la sii daayo tobaneeyo qof oo lagu xiray dibadbaxyo looga soo horjeedo dowladda oo dhacay Jimcihii shalay.

   Muuqaal la soo duubay ayaa muujinaya qiiqa sunta dadka ka ilmeysiisa ah oo laga arkayay gudaha saldhigga dhexe ee booliska ee magaalada Nairobi.

   Dibad baxayaasha maanta waxaa ka mid ahaa guddoomiyihii hore ee maxkamadda sare Willy Mutunga.

   Hoggaamiyaha mucaaradka Raila Odinga ayaa ku baaqay dibadbaxyada Jimcaha oo looga soo horjeedo kororka canshuurta shidaalka iyo qiimaha maciishada.

   Ugu yaraan hal qof ayaa lagu soo waramayaa in uu ku dhintay markii booliska ay ka jawaabeen mudaaharaadyadii ka dhacay Nairobi, Mombasa iyo Kisumu.

   Ugu yaraan 28 qof ayaa la xiray.

5. 8 Luulyo 2023Xog ku saabsan waxa uu Soomaaliya ka doonay madaxa sirdoonka Kenya

6. 8 Luulyo 2023Daawo: Kulankii baarlamaanka Soomaaliya ee maanta

7. 8 Luulyo 2023Waa maxay caabuqan inagu badan ee kaadi mareenku? maxaa lagu gartaa?

   Melissa Wairimu waa muuqaal sameyso deggan magaalada Nairobi ee dalka Kenya. Wuxuu caabuqa kaadida mareenku ku bilowday Markay ahayd da’da 21 jir. Waxay isku aragtay kaadi joogta ah, olol marka ay kaadineyso, iyo dhabarka oo xanuuna.

   Markii ay martay baaritaanka caadiga ah, waxaa laga helay caabuqa kaadi mareenka oo afka qalaad loo yaqaan ‘Urinary Tarct Infection’. “Waligey ma maqal magacan wax la yiraah” ayey tiri Melissa oo ay kedis ku noqotay.

   Waxaa la siiyey dawooyinka Antibayootigga oo toddobo maalmood ay isticmaaleyso, waxaana loo sheegay inay cabto biyo aad u badan.

   Balse astaamihii cudurku waa ay sii socdeen. Mararka qar iyaga oo aad u daran. Hadda waxay la qabsatay in dhabarka iyo calooshu xanuunaan. Waxay dareentaa daal joogta ah. Hase ahaatee, hurdadana way kaseexan weyday xanuunka... sii akhri

8. 8 Luulyo 2023Wararkii u dambeeyay ee dabkii burburiyey suuqa Jigjiga

   Waxaa lagu guuleystay in saaka lasoo afjaro dab xalay ka kacay suuq weyn oo ku yaal magaalada Jigjiga ee xarunta Dawlad Deegaanka Soomaalida kaas oo geystay khasaara badan oo aan weli la tira koobin.

   Madaxweynaha DDS, Mustafe Muxummed Cumar oo ay weheliyaan masuuliyiin heer fadaraal iyo deegaan isugu jira ayaa sida lagu sheegay warbaahinta dowlad deegaanka waxay gaareen suuqa magaalada Jigjiga ee xalay gubtay.

   Masiibaddan dabiiciga ah oo keentay khasaare hantiyeed oo badan ayaysan cidina ku dhiman sida ya dowladdu xaqiijisay, waxa uuna madaxweynuhu sheegay in ay dowlad ahaan taageeri doonaan dadka ku hanti waayey suuqa.

   Waxaa xalay suuqa usoo gurmaday dadweynaha magaalada Jigjiga iyo sidoo kale gurmad kasoo gaaray magaalooyinka soomaalida ee deegaanka iyo meela kale. Duqa magaalada Hargeysa ayaa keenay ciidan iyo gaadiid gurmad ah isaga oo Jidjiga yimid xalay.

9. 8 Luulyo 2023Muxuu yahay 'dhaqanka' gaamuray ee duq magaalo ula aqalgalay Yaxaas?

   Nin duq magaalo ka ah dal marin u ah dadka tahriibeya ee Soomaalida ah ayaa la aqalgalay yaxaas dhedig. Aqalgalkaas ayaa dhacay dhammaadka toddobaadkii hore iyada oo loo dhigay xaflado la mid ah kuwa loo qabto lammaaneyaasha isguursanaya. Arrinkan ayaa ah caado dhaqameed ay leeyihiin bulshada dalkan, oo aaminsan yihiin in uu horseedi nasiib wanaag.

   Ninkan oo lagu magacaabo Victor Hugo Sosa oo duqa ka ah magaalo yar oo ku taal Mexico ayaa ugu magacdaray yaxaaska dhedig ee uu la aqalgalay Alicia Adriana. Waxa uu u sababeeyay ujeedka arrinkan soo nooleynta dhaqankii awooweyaal.

   Bulshada deegaankan ayaa yaxaaskan dhegid ugu yeera ‘gabadhii boqoradda’ ahayd. Duqa magaalada waxa uu sheegay inay is jecel yihiin labadooda, isaga oo tilmaamaya yaxaaska. Waxa uu intaa...Sii akhri

10. 8 Luulyo 2023Afar arrin ka ogow kiiska musuqmaasuq ee la shaaciyay

    Dowladda Soomaaliya ayaa shaacisay magacyada Sideed iyo toban qof oo saraakiil dowladeed ah, kuwaas oo ku eedeysan musuqmaasuq iyo lacago ka maqan dowladda. Sagaal ka mid ah dadkaas ayaa eedeysan hadda, halka sagaal kale na la eedeeyay iyaga oo dalka ka maqan.

    Dadkaas waxay ku eedeysan yihiin lacag dhan kow iyo labaatan malyan oo doolar, sida uu shaaciyay hantidhowrka iyo xeer-ilaaliyaha Soomaaliya... sii akhri

11. 8 Luulyo 2023Al Shabaab oo weerar la beegsaday ciidamada Itoobiya

    Wararka ka imaanaya gobolka Bakool ee ismaamulka Koonfur Galbeed Soomaaliya ayaa sheegaya in dagaalmeyaal ka tirsan kooxda Al Shabaab ay weerar la beegsadeen ciidamo Itoobiyaan ah.

    Weerarka oo ka dhacay inta u dhaxaysa Magaalooyinka Rabdhuure iyo waajid ayaa la sheegay in uu ku bilowday qarax lala eegtay kolonyo ay leeyihiin ciidamada Itoobiya, balse warbaahinta ku hadasha afka Al shabaab ayaa sheegtay in ay weerareen "saldhigyo ay ciidamada Itoobiya iyo kuwa Maamulka Koonfur Galbeed ku lahaayeen degmada Xudur." ayey sheegteen Al Shabaaab.

    Dhinaca kale waxay sheegteen in ay weerarro ku qadeen saldhigyo ay ciidamada dowladda iyo ATMIS ku leeyihiin degmooyinka Qoryooleey, Janaale iyo Baraawe oo kawada tirsan Sh/hoose.

    Ma jiro wax war ah oo kasoo baxay dhanka dowladda, balse wixii kasoo kordha halkan ayaan idiinkusoo gudbin doonnaa.

12. 8 Luulyo 2023Nuuradiin Xaaji: Waa kuma madaxa sirdoonka Kenya?

    • 17 Maajo 2023

    Madaxweynaha Kenya William Ruto ayaa shalay agaasimaha guud ee Hay'adda Sirdoonka Qaranka Kenya u magacaabay Nuuradiin Xaaji, oo hore u ahaa dacwad-oogaha guud ee Kenya.

    Tallaabadan ayaa imaaneysa kaddib markii uu howlgab noqday janaraal Philip Kameru, oo xilkan hayay tan iyo sanadkii 2014.

    Madaxweynaha Kenya ayaa magacaabidda kaddib u gudbiyay baarlamaanka si ay u ansixiyaan, kaddib marka uu kalfadhigoodu dib u furmo bisha soo socota.

    Haddii ay xildhibaannada Kenya ansixiyaan magacaabidda, wuuxu Nuuradiin dib ugu laabanayaa waaxdan NIS kaddib shan sano oo waaxda dacwad-oogidda uu ka shaqeynayay... sii akhri sheekadan

13. 8 Luulyo 2023Gurmad uu hor kacayo duqa magaalada Hargeysa oo Jigjiga gaaray

    Kadib markii uu xalay dab weyn ka kacay suuq ku yaal magaalada Jigjiga waxaa gurmad la gaaray qaar ka mid ah magaalooyinka ay Soomaalidu degto ee soo gaari karay sida Herar iyo Magaalada hargeysa oo duqeeda soo garay Jigjiga.

    Waxaan rajeynaan in woxoogaaga ciidanka ah iyo gaadiidka aanu keennay in ay gacan ka geystaan bakhtiinta dabka," ayuu yiri Maayar Cabdikariim Axmed Mooge mar uu la hadlayey warbaahinta DDS.

    Dabka ayaa lasoo werinayaa in lagu guuleystay xakameyntiisa balse waxaan weli la sheegin inta uu la egyahay khasaaraha uu geystay.

    Wararka kasoo kordha halka ayaan idiinkusoo gudbin doonnaa.

14. 8 Luulyo 2023Suuq lagu tilmaamay kii ugu weynaa magaalada Jigjiga oo uu dab burburiyey

    Dab ka kacay suuqa tayeynta cusub ee magaalada Jigjiga fiidnimadii dambe ee xalay ayaa geystay khasaare hantiyeed oo xooggan walow an wali la sheegin inta uu la egyahay khasaaruhu.

    Dabkan qasaday suuqa ayaan la xaqiijin khasaaraha rasmiga ah ee uu geystay, halka uu ka bilowdday iyo sababta intaba.

    "Shacab iyo dawladba waa la dadaalayaa masiibadani dabkuna ma sahlana hadana waa la dadaali anagoo Allaah la kaashanayna" waxaa sidaasi tiri Marwo. Xaliimo xasan, Wasiirka Xafiiska Arrimaha haweenka & caruurta ee dawlad deegaanka Soomaalida.

    Wararka kasoo kordha halkan ayaan idiinkusoo gudbin doonna.

15. 8 Luulyo 2023Maraykanka oo sheegay in uu burburiyey hub halis ah oo uu hore u samaystay

    Madaxweynaha Maraykanka Joe Biden ayaa xaqiijiyey in uu dalkiisu burburiyey hubkiisii kiimikada ahaa ee ugu dambeeyay.

    Tallaabadan ayaa daba socotay dedaal tobanaan sano socday oo lagu doonayey in dunida looga cirib tiro hubkan halista ah, kadib markii dagaalkii kowaad ee aduunka si xad dhaaf ah loo isticmaalay, markaas oo loo arkay mid dabar goyn kara aadmiga.

    Heshiis ay wada gaareen dalalka hubkan samaystay kaas oo dib u sixid lagu sameeyay sanadkii 1977 ayaa dalbanaya in hubkan caalamka laga cirib tiro halka lagu gaaro bisha sagaalaad ee sannadkan 2023.

    "Maanta, waxaan ku faraxsanahay inaan ku dhawaaqo in Maraykanku uu si badbaado leh u burburiyay hubkii ugu dambeeyay ee kaydkaas ku jiray - taasoo noo soo dhawaynaysa hal tallaabo oo dunidu kaga xorowday argagaxa hubka kiimikada," ayuu Biden ku yiri hadal qoraal ah oo uu sii daayay Aqalka Cad. . Maraykanku waxa uu burburiyay kaydkiisii hadhay ee Keydka Kiimikada ee Pueblo ee goblka Colorado, iyo Blue Grass Army Depot (BGAD) oo ku taal gobolka Kentucky.

16. 7 Luulyo 2023Mbappé: 'Dadka aan asal ahaan ka soo jeedo ee Cameroon jacayl ayay i tuseen

    Ciyaariyahanka u dhashay Faransiiska ee Kylian Mbappé ayaa sheegay in uu aad ugu faraxsan yaay booqashada uu ku yimid dalka uu ka soo jeedo asal ahaan ee Cameroon.

    "Aad aayaan u faraxsanahay" ayuu yiri "dadku waxay i tuseen jacayl farabadan".

    Goor sii horeysay ayaa taageeriayaashiisu waxay BBC da u sheegeen sida ay ugu faraxsan yihiin imaanshaha Mbappé

    "Arrintaan muddo ayaan sugaynay ugu dambeyna waa tan na hortaalla" sidaas waxaa yiri nin uu wareysatay barnaamija wararka ee BBC.

    24 jirkaan u ciyaara kooxda PSG ee Faransiiska ayaa la kulmay ra'iisul wasaaraha dalkaas Joseph Ngute oo ay wehliyeen saraakiil kale oo dawladeed.

    Waa socdaalkii ugu horeeyay ee uu ku tago Cameroon tan iyo kuraynimadiisii.

17. 7 Luulyo 2023Tunisa oo lagu waaniyay inay joojiso musaafurinta Afrikaanta

    Dawladda Tunisia waa in ay si degdeg ah u joojisaa waxay ku tilmaantay musaafurinta wada jirka ee ka dhanka ah dadka Afrikaanta ee madow. Sidaas waxaa tiri hay'adda u dooda xuquuqda aadanaha ee HRW.

    HRW ayaa sheegtay in todobaadyadii la soo dhaafay ay Tunisia musaafurisay boqolaal Afrikaan madow ah oo doonayay in ay iska dhiibaan wadankeeda. Waxaa ka mid ahaa dadkaas caruur iyo haween uurleh.

    Waxaa la sheegay in dadkaas looga tagay goob saxre ah oo ay ku go'doonsan yihiin.

    HRW waxay ku boorisay dawladda Tunisia in ay baaritaan ku sameyso xadgudubyada laga soo tabinayo waddankeeda lalana xisaabtamo dadka ka masuulka ah.

18. 7 Luulyo 2023Aljeria oo malaayiin doolar u yaboohday Falastiin

    Dawladda Aljeeriya ayaa soddon malyan oo doolar ugu yaboohday maamulka falastiin taas oo qorshuhu yahay in lagu dayactiro magaalada Jenine ee ku taalla daanta galbeed ee la haysto.Warkaan ayaa lagu soo daabacay bogga madaxweynaha Aljeeriya iyo sidoo kale website ka dawladda.

    Go'aankaan ayaa waxaa qaatay madaxweynaha Aljeeriya Abdelmadjid Tebboune 'iyada oo lagu baraarugayo weerarada bahalnimada ah ee israa'iil ku qaadeyso xarada Jenin' ayaa lagu yiri warkaan.

    "Aljeeriya waxay markale cabireysaa dereenkeeda garab istaagga ah ee ay u muujineyso reer falastiin" ayaa warka lagu daray.

    Dawladda Israa'iil ayaa ku tilmaantay ficiladeeda ay ka waddo Jenine 'kuwo argagixiso la dagaalan ah' iyaga oo sheegay in bartilmaamoodkoodu yahay baqaaro hub ku kaydsan yahay oo ay leeyihiin kooxo hubaysan.

19. 7 Luulyo 2023Sidee nin beeraleey oo adeegsaday calaamad suulka loogu ganaaxay $61,000

    Adeegsiga calaamaddaaan ayaa cawaaqib xun ku yeelatay nin beeraleey ah oo ku nool waddanka Canada, kadib markii uu uga jawaabay heshiis loo soo diray.

    Chris Achter ayaa ku guul daraystay inuu daabulo 86 tan oo ah xabuubka qamadiga taas oo Kent Mickleborough oo iibsada amadiga uu doonayay inuu iibsado sanadkii 2021 kii taas oo keentay in laga qaado tallaabo sharci.

    Mickleborough ayaa usoo diray ninkaan beeraleyda ah qoraal heshiis oo dhahayay: " Fadlan xaqiiji heshiiska xabuubka qamadiga" taas oo uu Achter ugu jawaab celiyay calaamadda suulka.

    Mickleborough wuxuu u qaatay in ay calaamaddu ay ka dhigan tahay in heshiiska uu aqbalay Achter, balse Acchter ayaa marnaba gayn xabuubkii laga sugayay.

    Inkasta oo ninka beeraleyda ah uu ku doodayo in calaamadaas aysan ka dhignayn aqbalaad haddana garsoore ayaa ku xukumay inuu bixiyo $61,000 oo doollar Maraykanka ah.

20. 7 Luulyo 2023Maraykanka oo Ukraine siinaya hub mamnuuc ka ah 100 waddan

    Maraykanka ayaa qorsheynaya inuu xirmo gantaalo ah u diro Ukraine si uu uga caawiyo dagaalka ay kula jiraan Ruushka, sida ay sheegtay warbaahinta Maraykanka.

    Ukraine ayaa hubkaan dalbaneysay muddo bilooyin ah oo ay ay haystay rasaas yari.

    Hubkaan oo laga mamnuucay in ka badan 100 waddan ayaa ah nuuc hub oo ka kooban babooyin dhawr jeer laba qarxa.

    Madaxweyne Biden ayaa la filayaa inuu goor dhaw ku dhaaqo bixinta xirmadaan, sida ay sheegatay warbaahinta CBS ee ay wada shaqaynta leeyihiin BBC da.

    Saraakiisha Maraykanka ayaa muddaba ka caga jiday in ay hubkaan bixiyaan maadaama ay ka baqdin qabeen in uu dad shacab ah waxyeelo.