Iran waxay sheegtay inay mas’uul ka noqon doonto Hormuz, Putin-na wuxuu yiri waxaan ka shaqaynayaa danaha Tehran iyo gobolka

Tebin toos ah

1. 27 Abriil 2026Wasiirka arrimaha dibadda Iiraan oo ka haday xiririka Ruushka iyo Iiraan

   Wasiirka Arrimaha Dibadda ee Iiraan ayaa sheegay in xiriirka u dhexeeya Mosko iyo Tehraan uu yahay "iskaashi istiraatiijiyadeed" kaas oo "sii xoogaysan doona," sida laga soo xigtay hadallo laga baahiyay telefiishanka qaranka ee Ruushka.

   Wafdiga Iiraan ee Putin kula kulmaya dalka Ruushka waxaa sidoo kale qayb ka ah Wasiir ku-xigeenka Arrimaha Dibadda Kazem Gharibabadi iyo danjiraha Iiraan u fadhiya Mosko, Kazem Jalali.

   Af-hayeenka Kremlin-ka, Dmitry Peskov, ayaa sheegay in Ruushku uu diyaar u yahay inuu bixiyo "niyad-sami ama adeegyo dhexdhexaadin ah oo ay aqbali karaan labada dhinac" wadahadallada mustaqbalka ee lagu raadinayo xal lala gaaro.

   "Waxaan diyaar u nahay inaan samayno wax kasta si aan u xaqiijino in nabadda, nabad dammaanad leh, ay ugu dambeyntii guulaysato, iyo inaan marnaba dib loogu laaban colaad," ayuu raaciyay.

2. 27 Abriil 2026Wasiirka arrimaha dibadda Iiraan oo la kulmay madaxweyna Ruushka

   Wasiirka Arrimaha Dibadda ee Iiraan, Abbas Araghchi, ayaa dalka Ruushka kula kulmaya Madaxweynaha Ruushka, Vladimir Putin.

   Sawirro lagu baahiyay barta uu ku leeyahay Telegram-ka, ayaa laga dhex arki karay wasiirka arrimaha dibadda ee Iiraan oo gacan-qaadaya, lana hadlaya Putin iyaga oo fadhiya miis ay ku hareeraysan yihiin wefdi ka socda labada waddan.

   Putin waxaa kulanka ku weheliya Wasiirka Arrimaha Dibadda ee Ruushka, Sergei Lavrov, kaaliyaha Kremlin-ka Yuri Ushakov, iyo Igor Kostyukov oo ah madaxa hay’adda sirdoonka milatariga Ruushka ee GRU.

3. 27 Abriil 2026War ka soo kordhay ninkii weeraray xafladii cashada ee Trump ku sugnaa

   Ninka looga shakinsan yahay toogashadii habeenkii Sabtida, ayaa la filayaa inuu ka soo muuqdo maxkamad Isniinta si uu u wajaho eedeymo dambiyeed.

   Cole Tomas Allen, oo 31 jir ah kana soo jeeda Torrance, California, ayaa lagu wadaa in muuqashadiisii ugu horreyeysay ee maxkamada qabsoonto taas oo ka dhacaysa maxkamadda federaalka ee Washington, laba maalmood kadib markii mas’uuliyiintu sheegeen inay fashiliyeen weerar la qorsheeyay oo ka dhici lahaa cashada wariyaashada Aqalka Cad, oo ah munaasabad sannadle ah oo ay ka qeyb galaan suxufiyiin iyo siyaasiyiin.

   Rasaas ayaa laga maqlay huteelka Washington Hilton, halkaas oo uu Donald Trump ka qaybgalayay casho-sharafta

4. 27 Abriil 2026Madaxweynaha Lubnaan heshiis ‘Bahdil ah' ma rabno

   Madaxweynaha Lubnaan Joseph Aoun ayaa sheegay inuusan aqbali doonin in la gaaro “heshiis bahdil ah” dadaalladada lagu doonayo in lagu soo afjaro dagaalka u dhexeeya Israa’iil.

   Bayaan uu soo saaray ayuu ku sheegay inuu Maraykanka u sheegay tan iyo bilowgii wada-xaajoodyada in “xabbad-joojin ay tahay tallaabada koowaad ee lama huraanka ah.”

   Wuxuu intaas ku daray in koonfurta Lubnaan ay “bixinayso qiimaha dagaal oo ay dad kale ku wadaan dhulkeenna.”

   Xabbad-joojinta ay ku heshiiyeen Israa’iil iyo Lubnaan ayaa lagu kordhiyay saddex toddobaad, inkastoo weerarro u dhexeeya Israa’iil iyo kooxda Xisbullah ee ay Iiraan taageerto ay sii socdeen maalmihii u dambeeyay. Xisbullah kama mid ahayn wada-xaajoodyada lagu doonayay in nabad lagu gaaro gobolka.

   Aoun wuxuu sheegay in haddii dagaalku uu “u daneynayo Lubnaan” uu taageeri lahaa, balse wuxuu yiri, “marka ujeeddada dagaalku tahay in lagu gaaro danaha dad kale, si buuxda ayaan u diidanahay dagaalka.”

   Hadallo u muuqda weerar uu ku qaaday kooxda hubeysan ee Hezbollah, oo sheegtay inay xaq u leedahay inay ka jawaabto hanjabaadaha Israa’iil ayuu Aoun yiri: “Waxa aan sameyneyno khiyaano ma aha; balse khiyaanada waxaa sameeya kuwa dalkooda u gelinaya dagaal si ay u gaaraan danaha shisheeye.”

5. 27 Abriil 2026Xog cusub oo ka soo korortay xaaladda hoggaamiyaha sare ee Iran Mojtaba Khamenei

   Hoggaamiyaha cusub ee sare ee Iran, Mojtaba Khamenei, ayaa wali ka kabanaya dhaawacyo darran oo wejiga iyo lugaha ah oo ka soo gaaray weerarkii cirka ahaa ee lagu dilay aabbihii billowgii dagaalka, sida ay saddex qof oo u dhow saaxiibbadiisa gaarka ah u sheegeen wakaaladda wararka ee Reuters.

   Wejiga Khamenei ayaa ku doorsoomay weerarkii lagu qaaday xarunta hoggaamiyaha sare ee bartamaha Tehran, wuxuuna dhaawac weyn ka soo gaaray mid ama labada lugoodba, sida ay sheegeen dhammaan saddexda ilood.

   Si kastaba ha ahaatee, 56-jirkan ayaa ka kabanaya dhaawacyadiisii, maskaxdiisuna wali waa mid firfircoon, sida laga soo xigtay dadkan codsaday in aan magacyadooda la sheegin.

   Wuxuu ka qayb qaadanayaa kulamo uu la leeyahay mas'uuliyiinta sare isagoo adeegsanaya shirarka cod ahaan, wuxuuna ku lug leeyahay go'aan ka gaarista arrimaha waaweyn oo ay ka mid yihiin dagaalka iyo wada-xaajoodyada lala leeyahay Washington, sida ay sheegeen laba ka mid ah ilahaas.

   Su'aasha ku saabsan in caafimaadka Khamenei ee u oggolaanaysa inuu maamulo arrimaha dawladda ayaa timid xilli Iiraan ay ku jirto xilligii ugu xasaasisaneed muddo tobanaan sano ah, iyadoo wadahadallo nabadeed oo xasaasi ah ay Islamabad ugu soo dhammaadeen Maraykanka kuwaas oo furmay shalay.

   Halkan ka sii akhri sheekada oo dhamaystiran

6. 27 Abriil 2026Ruushka oo sheegay inaan la dhayalsan karin muhiimada wadahadallada Iiraan

   Madaxweynaha Ruushka Vladimir Putin ayaa la kulmi doona Wasiirka Arrimaha Dibadda ee Iiraan, Abbas Araghchi, magaalada St Petersburg maalinta Isniinta, sida uu sheegay Kremlin-ka.

   Afhayeenka Kremlin-ka Dmitry Peskov ayaa laga soo xigtay isagoo u sheegay wakaaladda wararka ee dawladda ee Tass in “ahmiyadda wada-hadalkan ay adag tahay in la dhayalsado marka la eego sida ay u socoto xaaladda ku xeeran Iiraan iyo Bariga Dhexe.”

   Araghchi ayaa Ruushka subaxnimadii Isniinta isagoo taageero ka raadinaya Moscow, xilli ay hakad galeen dadaalladii diblomaasiyadeed ee lagu soo afjari lahaa dagaalka u dhexeeya Maraykanka iyo Iiraan.

   Rajadii laga qabay dib u bilaabista wada-hadallada ayaa yaraatay Sabtidii, markii Madaxweynaha Maraykanka Donald Trump uu baajiyay safar qorshaysnaa oo ay ergooyinkiisa Steve Witkoff iyo Jared Kushner ku tegi lahaayeen magaalada Islamabad ee dalka Pakistan.

7. 27 Abriil 2026Ciidanka Milatariga Israa'iil oo duqeyn ku dilay xubno ka tirsan Xisbullaah

   Ciidamada milatariga Israa’iil ayaa sheegay in ay dileen saddex xubnood oo ka tirsan Hezbollah intii lagu jiray hawlgallo ka dhacay koonfurta Lubnaan maalintii Axadda.

   Israa’iil waxay leedahay waxa ay ugu yeerto “aag go’doon ah” oo ku fidsan qiyaastii 10 kiiloomitir gudaha dhulka Lubnaan, taas oo ay sheegtay in loo baahan yahay si loo yareeyo khatarta ka timaadda Hezbollah.

   Tani waxay ka dhigan tahay in ku dhowaad 5% dhulka Lubnaan uu hadda ku jiro gacanta milatariga Israa’iil.

   “Kadib markii la aqoonsaday, Ciidamada Cirka Israa’iil ayaa duqeeyay oo baabi’iyay argagixisada si loo tirtiro khatarta,” ayay IDF sheegtay, iyada oo ku dartay in kaabeyaasha Hezbollah ee Bint Jbeil sidoo kale lagu beegsaday duqeymo.

   Hadda waxaa jira xabbad-joojin u dhexeysa Lubnaan iyo Israa’iil. Hezbollah ma ahan dhinac saxiixay heshiiskaas, balse heshiiska waxaa loogu talagalay in lagu joojiyo dagaalka u dhexeeya Israa’iil iyo kooxda.

   Si kastaba ha ahaatee, Ra’iisul Wasaaraha Israa’iil Benjamin Netanyahu ayaa amar ku siiyay ciidamadiisa in ay weeraraan bartilmaameedyada Hezbollah ee Lubnaan, kadib markii uu sheegay in falalka kooxda ay “burburinayaan xabbad-joojinta”.

   Hoggaamiyaha Israa’iil ayaa sheegay in heshiisku uu siinayo Israa’iil “xorriyad ay ku weerari karto meelaha ay rabto, ma aha oo kaliya in ay ka jawaabto weerarrada, taas oo cad, balse sidoo kale in ay ka hortagto khataraha degdegga ah iyo in ay meesha ka saarto khataraha soo baxaya.”

8. 27 Abriil 2026Kooxda Xisbullaah oo war cusub kasoo yeeray

   Xoghayaha Guud ee ururka Xisbullaah ayaa ku tilmaamay wadahadallada tooska ah ee u dhexeeya Lubnaan iyo Israa’iil “dambi weyn” oo keeni kara “xasillooni darro” ku timaadda Lubnaan.

   Bayaan uu soo saaray, oo qaybo ka mid ah lagu daabacay shabakadda Al-Manar ee kooxda hoos tagta, Naim Qassem ayaa ku dhaliilay dowladda Lubnaan wadahadallada ay la gashay Israa’iil, isagoo yiri: “nidaamka ay mareyn wax faa’iido ah uma leh Lubnaan, mana u adeegayo dalka iyo naftooda midna.”

   Xoghayaha ayaa sidoo kale sheegay in “madax-bannaanidu aanay sii jiri karin iyadoo la halis gelinayo xuquuqda Lubnaan lana dhiibayo dhulkeeda.”

   Wuxuu ugu baaqay dowladda Lubnaan inay joojiso “wadaxaajoodyada tooska ah” ee ay la leedahay Israa’iil, isla markaana “dib ugu noqoto wadaxaajoodyadii dadbanaa.”

   Naim Qassem ayaa sidoo kale dhaliilay qorshaha hub ka dhigista xisbullaah, isagoo yiri: “Hubka iska caabintu wuxuu u jiraa in laga hortago gardarrada oo la difaaco jiritaankeena, mana dhiibi doonno.”

   Xoghayaha Guud ee Xisbullaah ee Lubnaan ayaa sidoo kale ammaanay doorka Iiraan ee xabbad-joojinta, isagoo sheegay in haddii aanay jirin doorka Jamhuuriyadda Islaamiga ah ee wadahadallada, xabbad-joojintu suurtagal ma noqon lahayn.

   Sii akhri:

   Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

   Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

   Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

9. 27 Abriil 2026Nidaamka caafimaadka Lubnaan oo culeys badan wajahaya

   Wasiirkii hore ee caafimaadka Lubnaan, hadana ah Dhaqtar Dr Firass Abiad ayaa u sheegay BBC-da shaqo-joojinta joogtada ah ay ee haysta shaqaalaha "culays badan ku keenayso" nidaamka caafimaadka dalka.

   Isbitaallada Lubnaan waxaa la keenaa "maalin kasta, tiro badan oo dhaawacyo ah," oo ay weheliso tiro badan oo barokac gudaha ah, ayuu yiri.

   In kasta oo ay jiraan cadaadisyadaas, dhakhaatiirta iyo kalkaaliyayaasha caafimaadku waa "wax la yaab leh" in ay weli shaqada yimaadaan oo ay shaqeeyaan, Abiad ayaa u sheegtay barnaamijka Newsday ee BBC

   Axadii, wasaaradda caafimaadka ee Lubnaan ayaa sheegtay in duqaymaha Israa'iil ay ku dhinteen 14 qof oo ay ku jiraan laba carruur ah.

   Milateriga Israa'iil ayaa sheegay in ay beegsadeen xubno ka tirsan ururka Xisbullah iyo goobo ay ku sugnaayeen, waxayna goor sii horreysay oo Axaddii ah soo saareen amar ay dadka uga guurayaan tuulooyin dhowr ah oo ku yaalla koonfurta Lubnaan.

   Sii akhri:

   Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

   Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

   Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

10. 27 Abriil 2026Wadahadallada nabadeed oo hakad ku jira, iyadoo Trump uu sheegay in Iiraan ay 'waci karto' haddii ay doonayaan inay wada hadlaan

    Wadahadalladii u dhaxeeyay Mareykanka iyo Iriaan ayaa guul darreystay dhamaadkii isbuucaan, kadib markii madaxweyne Donald Trump uu baajiyay safar la qorsheeyay oo saraakiisha Mareykanka ay ku tagi lahaayeen Pakistaan.

    Wax yar ka dib markii wafdiga Tehraan ay ka soo ambabaxeen Islamabad, Trump wuxuu ku dhawaaqay Sabtidii in ergeyga gaarka ah Steve Witkoff iyo Jared Kushner ay "waqti badan lumin doonaan" iyagoo u duulaya caasimadda Pakistan.

    Wasiirka arrimaha dibadda ee Iiraan Cabbaas Araghchi ayaa kulan la yeeshay masuu;iyiinta Pakistaan dhamaadkii asbuucii hore, isaga oo sheegay in uu markale la wadaagay mowqifka Iiraan ee joojinta dagaalka laakiin weli ma uusan arkin in Maraykanku "run ahaantii ay dhab ka tahay diblomaasiyadda".

    "Haddii ay rabaan inay hadlaan, waxa kaliya ee ay tahay inay sameeyaan waa inay isoo wacaan," ayuu yiri Trump Sabtidii. Waxa uu soo jeediyay in Maraykanku haysto "dhammaan kaadhadhka" halka Iran "uu ka jiro dagaal weyn iyo jahawareer ka dhex jira 'hoggaamintooda'".

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

11. 27 Abriil 2026Arrimaha dibadda Iiraan oo Maraykanka ku eediyey fashilka wada-xaajoodka, kadib markii uu ka degay Ruushka

    Wasiirka arrimaha dibadda Iiraan Cabbaas Araghchi ayaa sheegay in dalabaadka xad dhaafka ah ee Mareykanka ay sababeen in wada xaajood nabadeed ee ka dhacayey Islaaamabaaad uu ku guuldareysto, sida uu hadalka u dhigay mar uu la hadlayey warbaahinta kadib safarka uu Ruushka u joogo.

    Carakchi wuxuu sheegay inuu saaxiibkooda Ruushka uu kala tashan doono dagaalka Bariga Dhexe, isagoo ku hadlaya afka Persian oo uu la wadaagay kanaalkiisa Telegram.

    Sida aan soo tabinnay, imaatinka Araghchi ee Ruushka ayaa yimid ka dib kulan uu madaxda Pakistaan ka hor inta uusan iman.

    Wasiirka arrimaha dibadda ayaa sidoo kale ka hadlay xiritaanka socda ee Iiraan ee marin biyoodka Hormuz. Waxa uu sheegay in marin biyoodka bad-qabkiisa ay tahay arrin caalami ah, wuxuuna ugu baaqay dalalka deriska ah oo ay ku jirto Cumaan in ay si dhow uga wada shaqeeyaan danta labada dhinac ee cidhiidhiga.

    Araghchi waxa uu soo jeediyay inuu jiro wax badan oo ay wadaagaan Iran iyo Cuman, waxaana uu intaa ku daray in la isku afgartay in wadahadalo dheeraad ah laga yeesho xaalada cakiran ee labada dhinac.

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

12. 27 Abriil 2026Cumaan iyo Iiraan oo ka wada hadlay marin biyoodka Hormuz

    Wasiirka arrimaha dibadda Iiraan ayaa ka hor inta uusan u safrin Pakistaan iyo dalka Ruushka oo uu hadda joogo, waxa uu axadii booqasho ku tagay dalka Cumaan oo uu kulamo la qaatay dhiggiisa iyo hogaamiyaha dalkaasi.

    Qoraal uu soo dhigay X, Wasiirka Arrimaha Dibadda ee Cumaan Badr Albusaidi ayaa sheegay in isaga iyo Cabbaas Araghchi ay si wanaagsan uga wadahadleen marin biyoodka Hormuz, halkaas oo ay kaga hadleen "mas'uuliyadda ay wadaagaan beesha caalamka iyo baahida degdegga ah ee bini'aadantinimo ee lagu sii dayn karo badmaaxiinta la haysto muddada dheer".

    Wasiirka arrimaha dibadda Iiraan ayaa u mahad celiyay "marti qaadka uu ka helay inta uu ku sugnaa Cumaan".

    Qoraal uu soo dhigay baraha bulshada, Cabaas wuxuu sidoo kale ku xusay marinka muhiimka ah ee maraakiibta, isagoo sheegay in wada hadaladooda "ay ku jireen habab lagu xaqiijinayo bad-qabka gaadiidka" ee marinka cidhiidhiga ah ee Hormuz.

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

13. 27 Abriil 2026Maxay tahay Ujeedada booqashada Boqorka Ingiriiska ee Maraykanka

    Qasriga boqortooyada Buckingham ayaa sheegay in booqashada rasmiga ah ee Boqor Charles III uu ku tagayo Mareykanka ay bilaabanayso gelinka dambe ee maanta “u socon doonto sidii qorshuhu ahaa”, iyadoo la sameynayo wax ka beddello yar yar.

    Qasrigu wuxuu sheegay in Boqorku “aad ugu farxay" in madaxweynaha Mareykanka, Melania Trump iyo martidii kale aysan waxyeello soo gaarin, kadib rasaastii ka dhacday xafladdii ay ka qeyb-galayeen.

    Waxaa la filayaa in Boqor Charles uu khudbad ka jeediyo labada aqal ee Kongareeska, uu booqdo xusuusta 9/11 ee New York, isla markaana ka qayb galo munaasabad ubax lagu dhigayo oo lagu maamuusayo askartii Mareykanka iyo UK ee ku dhintay Virginia. Weli ma cadda waxa saxda ah ee wax ka beddelka lagu sameeyay safarka.

14. 27 Abriil 2026War deg deg ah, Maxkamadeynta Netanyahu oo markii sadexaad baaqatay.

    Warbaahinta The Jerusalem Post ayaa sheegtay in qiyaastii 90 daqiiqo ka hor waqtiga ay bilaaban lahayd maxkamadda ra’iisul wasaaraha Israa’iil Benjamin Netanyahu, “si kedis ah loo baajiyay”, iyadoo uu codsaday qareenkiisa.

    Mudane Netanyahu waxaa loo qorsheeyay inuu maanta ka markhaati furo dhageysi maxkamadeed oo ciqaabeed kadib dib u dhac ku dhowaad lix toddobaad ah.

    Tani waa markii saddexaad ee dhageysiyada maxkamadda dib loo dhigo sababo la xiriira colaadda Israa’iil ee Gaza iyo dagaalka ay kula jirto Xisbullaah.

    Weli si rasmi ah looma shaacin sababta keentay dib u dhaca dhageysiga maxkamadeed ee maanta.

    Kiiskaan Netanyahu ee maxkamadeynta ayaa socda muddo shan sano ah, isaga oo salka ku haya saddex dacwadood oo kala duwan oo lagu eedeeyay oo kamid yihiin laaluush, khiyaano iyo ku takri-fal awood.

    Ra’iisul wasaaraha Israa’iil ayaa dayrtii hore ka codsaday madaxweynaha Israa’iil cafis arrintan la xiriira.

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

15. 27 Abriil 2026Eedeysananaha weerarkii xafaldda Cashada oo maanta lagu wado in Maxkamad la soo taago

    Waxaa maanta lagu wadaa in maxkamad la soo taago Eedeysanaha weerarkii ka dhacay Maqaaxi ay ku sugnaayee Wariyayaal ka tirsan Aqalka Cad ee Magaalada Washington DC ee dalka Mareykanka habeenkii Sabtida.

    Eedaysanaha ayaa warbaahinta Maraykanku waxa ay magaciisa ku sheegeen Cole Tomas Allen oo 31 jir ah, kana soo jeeda magaalada Torrance ee gobolka California.

    Xeer Ilaaliyaha Guud ee Mareykanka Todd Blanche ayaa sheegay in "natiijooyinka hordhaca ah" ay muujinayaan in eedeesanaha uu bartilmaameedsanayay madaxdii ku sugneyd goobta, gaar ahaan Trump laftiisa inuu ahaa bartilmaameedka " ayaa suurtagal ah ".

    Wax ka yar hal saac ka dib dhacdada, Trump wuxuu ku sheegay qoraal uu soo dhigay Truth Social, "Qofkii toogashada geystay waa la qabtay", isaga soo raaciyey masswirka kore.

    Waxaa la filayaa in maanta uu kasoo muuqdo maxkmadda isaga oo lagu qaadayo dacwad la xiriira weerar uu u geystay sarkaal ka tirsan dowladda federaalka iyo in uu isticmaalay qoriga uu watay xilli uu ku jiray fal-dembiyeed. Eedaymo kale oo federaali ah oo gadaal laga sheegi doono, ayuu yiri Blanche.

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

16. 27 Abriil 2026War deg deg ah, Madaxweynaha Soomaaliland oo cambaareeyey weerarkii ka dhacay xafladii cashada ee Trump

    Madaxweynaha jamhuuriyadda madax bannaanideyda ku dhawaaqday ee Soomaaliland Maxamed Cabdullaahi Cirro ayaa qoraal uu ku daabacay bartiisa X, ku dhaleeceeyey wararkii ak dhacay xafladdii cashada ahayd ee Trump uu u sameeyey weriyeyaasha.

    Qoraalka ayuu ku yiri Cirro, “Aad ayaan uga xumahay isku daygii weerar ee Maraykanka Madaxweyne Donald Trump, waana ku faraxsanahay in Madaxweynaha, Madaxweyne ku xigeenka, Marwada Koowaad, iyo dhammaan inta kale ay nabad qabaan, Somaliland waxay si aan gabasho lahayn u cambaareeneysaa dhammaan nooc kasta oo rabshad ah, waa ay ka reeban yihiin dimoqaraadiyadda”.

    Qoraallka uu madaxweynuhu soo dhigay ayaa lagu soo gababeeyey “Waxaan si garab taaganahay Maraykanka”.

    Warbaahinta Mareykanka ayaa ku sheegtay Cole Tomas Allen, oo 31 jir ah, inuu yahay eedeesanaha loo xiray falkaan, ka dib markii ay booliisku sheegeen inuu rasaas ku furay meel u dhow bar koontarool oo ciidamada ammaanka ay ku sugnaayeen intii ay socotay dhacdada. Waxaa lagu wadaa in maanta oo isniin ah la soo taago maxkamada.

    Sii akhri:

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

    Weriyaha BBC oo ka sheekeeyay wixii xalay ka dhacay qolka ay ka socotay xafladda weriyeyaasha Aqalka Cad

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

17. 27 Abriil 2026War deg deg ah, Muxuu yahay qorshaha cusub ee Iiraan ee ku aadan wada-hadallada?

    Sida ay qoreyso warbaahinta Axios: dowladda Iiraan ayaa Maraykanka usoo bandhigtay soo jeedin iyo dalabaad cusub, kuwaas oo ku dalbaneyso in ugu horreyn la furo 'marinka Hormuz, la soo afjaro dagaalka, dibna loo dhigo wada-hadalllada Nukliyeerka'.

    Axios, oo soo xiganaya sarkaal Maraykan ah iyo laba ilo oo arrintan la socda, iIraan ayaa qodobbadaan usoo bandhigtay Maraykanka iyada oo u sii marinaysa Pakistan oo gar wadeen ka ahayd wada-xaajoodka Iiraan iyo Maraykanka, si dib loogu furo marinka Hormuz loona soo afjaro dagaalka.

    Sii akhri:

    Burcad-badeed xeebaha Soomaaliya ku afduubtay markab shidaal siday

    Trump soo ka hadlay waxa uu dareemay markii la soo weeraray xafladii cashada ee uu goobjooga ka ahaa

18. 27 Abriil 2026Wasiirka arrimaha dibadda Iiraan oo ka warbixiyey safarka uu ku joogo Ruushka

    Markii uu gaaray St. Petersburg, Wasiirka Arrimaha Dibadda ee Iiraan, Cabaas Araghchi, wuxuu sheegay in “mar walba waxaan la leenahay wadatashi dhow iyo xiriir laba geesood ah oo joogto ah Ruushka, balse waxaa jiray hakad ku yimid kulamada sababo la xiriira dagaalka mudada socda”, ayuu Cabaa.

    Isaga oo intaas ku daray in ay hadda timid fursad ay kula tashadaan oo ay isku arkaan iyaga iyo saaxiibkooda Ruushk.

    wasiirka ayaa hore safari ugu soo maray dalalka Pakistaan iyo Cumaan, isaga oo intii uu ku sugnaa Pakistaan wasiirka Arrimaha Dibadda ee Iiraan sheegay in Pakistaan ay door muhiim ah ka qaadatay dhex-dhexaadinta wadahadallada Iiraan iyo Maraykanka, waxaana muhiim ahayd in laga wada hadlo horumarradii ugu dambeeyay, wuxuuna yiri “waxaan la yeelanay kulan wanaagsan saaxiibadeenna Pakistan, taas oo Ilaahay mahaddii ahayd iyo safar aad u guuleystay. Waxaan dib u eegnay wixii dhacay, waxaana ka wada hadalnay waddada iyo shuruudaha ay wadahadalladu ku sii socon karaan”.

    Waxa uu sidoo kale, safarkiisii Cumaan ku tilmaamay mid lagama maarmaan u ahaa xiriirka ay la leeyihiin waddamada Khaliijka, “Annaga iyo Cumaan waxaan nahay laba dal oo xeeb ku leh Marinka Hormuz, waxaana lagama maarmaan ahayd in arrintan laga tashado, bad-qabka isku socodka Hormuz waa muhiim, waxaana u baahanahay inaan yeelanno isku-duwid dhow si loo xaqiijiyo danaha wadajirka ah, ee Cumaan, Iiraan iyo dalalka kale ee ku teedsan Hormuz”.

    Waxaa kale oo aad akhrin kartaa:

    Sidee u dhacay dilka Wasiirkii Difaaca Mali, maxaase ka jira inuu dagaallamay?

    Netanyahu oo amray in ciidamadiisa ay qaadaan "tallaabo adag" oo ka dhan ah Xisbullah

19. 27 Abriil 2026Muxuu Barack Obama ka yiri weerarkii casho sharafta Trump u sameeyey weriyeyaasha?

    Madaxweynihii hore Barack Obama ayaa ka falceliyay weerarkii dhacay intii lagu jiray xaflad casho ahayd oo madaxweynaha Maraykanka Donald Trump u sameeyey weriyeyaasha.

    “Weli si cad looma oga waxa sababay toogashada ka dhacday Cashadii Wariyeyaasha Aqalka Cad, laakiin dhammaanteen waxaa na saaran mas’uuliyad ah inaan hubinno in rabshaduhu aysan boos ku lahayn dimuqraadiyadda.” ayuu Barack Obama ku qoray bartiisa X.

    Waxaa xusid mudan in kadib rasaasta uu jiro nin tuhmanaha oo loo xiray

    Dhacdada kadib, Donald Trump ayaa wariyeyaasha la hadlay, isaga oo eedeesanaha ku tilmaamay “mid xanuunsan.”

    Xafladaan ayaa waxaasugnaa madax sare oo ka tirsan maamulka Trump iyo boqolaal weriyeyaal ah.

20. 27 Abriil 2026Sidee warbaahintu uga hadlayesaa diyaaraddii Iiraan ee Weerartay saldhiga Mareykanka ee Kuwait?

    Warbixin gaar ah oo ay baahisay shabakadda warbaahinta Mareykanka ee NBC ka diyaarisay hawlgalka diyaarad dagaal oo Iiraan leedahay nooca F-5 maalmihii ugu horreeyay ee dagaalkii u dhexeeyay Mareykanka-Israa’iil iyo Iiraan, iyo faahfaahinta khasaaraha uu geystay weerarkan, ayaa si weyn u soo jiidatay dareenka warbaahinta.

    Warbixintan, NBC oo soo xiganaysa ilo kala duwan iyo saraakiil militari oo Mareykan ah, ayaa qortay in qiimeynta sirdoonka iyo falanqaynta la daabacay ay muujinayaan in diyaarad duug ah oo Iran leedahay nooca F-5 ay ku guuleysatay inay ka gudubto nidaamyada difaaca hawada ee heerarka badan leh ee Mareykanka, isla markaana ay beegsato saldhig militari oo Mareykan ah oo ku yaal Kuwait; waa arrin , sida warbixintu sheegtay, wax ka beddeleysa aragtida laga haysto awoodda militariga Mareykanka ee gobolka.

    Warbixintu waxay sheegaysaa in weerarkan uu qayb ka ahaa weerarro taxane ah oo lagu qaadayey in ka badan 100 bartilmaameed oo ku kala yaallay dalal dhowr ah oo gobolka ka tirsan, kuwaas oo sababay khasaare soo gaaray kaabeyaasha militari sida warshadao, raadeerrada diyaaradaha, iyo xarumaha ciidamada

    Qaar ka mid ah falanqeeyayaasha ayaa sheegay in gelitaanka diyaarad dagaal oo duug ah ee nidaamyada difaac ee casriga ah ay dhalisay su’aalo cusub oo ku saabsan nuglaanta ciidamada Mareykanka ee saldhigyada ku yaal Gacanka Faaris.

    Si kastaba ha ahaatee, saraakiisha Mareykanka weli si madax-bannaan uma xaqiijin mana beenin faahfaahinta buuxda ee warbixinnadan, baaritaannaduna weli way socdaan.