Iiraan oo ka dalbatay Qaramada Midoobey inay tallaabo qaaddo si looga hortago hanjabaadaha milatari ee Donald Trump.

Tebin toos ah

1. 19 Febraayo 2026Amiirkii hore ee UK Andrew Mountbatten-Windsor oo la xiray

   

   Xigashada Sawirka, Bav Media

   Andrew Mountbatten-Windsor ayaa la xiray iyadoo looga shakisan yahay ku kacista fal la xiriira ku takri-fal awoodeed xafiis dowladeed, sida ay BBC u fahantay.

   Tani waa markii ugu horreysay ee amiirkii hore, oo wajahayo eedeymo badan oo ku saabsan xiriirkiisa dembiilihii galmada lagu xukumay Jeffrey Epstein

   Andrew si joogto ah oo adkaysi leh ayuu u beeniyay inuu wax khalad ah sameeyay.

   BBC-du waxay fahamsan tahay in la xiray isagoo looga shakisan yahay ku takri-fal awoodeed oo lagu sameyay xil dowladeed.

   Ma hayno faahfaahin gaar ah oo ku saabsan xiritaankan, balse marka aan helno warar dheeraad ah waan idiin soo gudbin doonaa.

2. 19 Febraayo 2026Shirkii madaxda dowladda iyo mucaaradka oo madaxtooyada ka furmay

   

   Xigashada Sawirka, VILLA SOMALIA

   Xaruunta madaxtooyada ee Villa Soomaaliya ee magaalada Muqdisho waxaa gordhowed ka furmay shirka u dhaxeeya dowladda federaalka Soomaaliya iyo Golaha Mustaqbalka Soomaaliya oo ay ku mideysanyihiin madaxda maamul goboleedyada Puntland, Jubaland iyo qaar ka mid ah siyaasiinta Mucaaradka ah.

   Dowladda Soomaaliya ayaa sheegtay in mucaaradku ajiibeen gogashii ay dowladdu fidisay, iyadoo markii hore wararku sheegayeen in culeys uu ka jiray halka shirka lagu qabanayo.

   Kulanka maanta waxaa looga hadlay xaaladaha guud ee dalka SID doorashooyinka, adkeynta midnimada iyo wadajirka Soomaaliyeed, gurmadka abaaraha iyo la dagaalanka kooxaha ka soo horjeeda dowladda.

3. 19 Febraayo 2026Xukun xabsi daa’in ah oo lagu riday madaxweyne iyo wasiirkii gaashaandhigga iyo dalka uu dhacay

   

   Xigashada Sawirka, Getty Images

   Madaxweynihii hore ee Kuuriyada Koonfureed, Yoon Suk-yeol, ayaa lagu xukumay xabsi daa’in kadib isku daygiisii fashilmay ee uu ku doonayay inuu ku soo rogo xukun milatari bishii Diseembar 2024. Ninkan 65 jirka ah ayaa lagu helay dambiga abaabulka kacdoon.

   Maxkamaddu waxay sidoo kale ku heshay Yoon, wasiirkiisii gaashaandhigga iyo taliyayaal ciidan oo dhowr ah dambiga ah inay isku dayeen inay curyaamiyaan Golaha Qaranka ee Kuuriyada Koonfureed iyagoo askar geeyay halkaas.

   Siyaasigan garabka midig ah ku dhawaaqistiisii xukunka milatariga ayaa lagu buriyay saacado gudahood kadib mudaaharaadyo waaweyn. Markii dambe waa la xil ka qaaday oo shaqada laga eryay, balse wuxuu isku xannibay hoygiisa muddo toddobaadyo ah ka hor inta aan la xirin.

   Wasiirkii hore ee gaashaandhigga waxaa lagu xukumay 30 sano oo xabsi ah, halka afar nin oo kale la siiyay xukuno ka fudud, mid kalena lagu waayay dambiga.

4. 19 Febraayo 2026Muxuu yahay warka argagaxa leh ee ay Qaramada Midoobay ka soo saartay meel ay Soomaalidu u tahriibto

   

   Xigashada Sawirka, Getty Images

   Warbixin cusub oo ay soo saareen Qaramada Midoobey ayaa muujisay in muhaajiriin ka kala yimid dalal badan, oo ay ku jirto Itoobiya, kuwaas oo sii mara Liibiya iyagoo u socda Yurub, lagula kaco kufsi qasab ah, ka ganacsi galmo oo qasab ah, shaqo adag oo khasab ah iyo jirdil.

   Warbixintu waxay sheegtay in “xadgudubyada naxariis darrada ah ee nidaamsan ee ka dhanka ah xuquuqda aadanaha” ee loo geysanayo muhaajiriinta ay ka dambeeyaan shabakado ka ganacsada dadka si sharci darro ah wax u tahriibiya, kuwaas oo inta badan lala xiriirinayo mas’uuliyiin Liibiyaan ah.

   Qaramada Midoobey iyo hay’adaha kale ee udooda xuquuqda aadanaha ayaa si wadajir ah u soo saaray warbixinta 18-kii Janaayo 2026-ka, taas oo faahfaahin ka bixisay dhibaatada ay muwaadiniinta Itoobiya ku wajahayaan Liibiya.

   Warbixintu waxay muujisay xaaladda labadii sano ee la soo dhaafay ay tahriibayaashu ku wajahayeen dalkaas, waxaana la waraystay 100 muhaajiriin ah oo ka kala yimid Suudaan, Eritrea, Koonfurta Suudaan iyo dalal kale oo ay ku jirto Itoobiya.

   Sida lagu sheegay warbixinta, muhaajiriinta, magangelyo-doonka iyo qaxootiga yimaada Liibiya waxaa badanaa lagu weeraraa qoryo, si khasab ahna waa loo xiraa, loo afduubaa, loogana soocaa qoysaskooda. Kadibna waxaa loo taxaabaa xabsiyo sharci ah iyo kuwo aan sharci ahayn.

   Warbixintu waxay sheegtay inay bixiyaan lacago aad u badan si ay uga baxsadaan jirdilka iyo xadgudubyada xuquuqda aadanaha ee halkaas ka jira.

   Waxay sidoo kale tilmaantay warbixintu in dadka wax tahriibiya ay muhaajiriinta ku khasbaan ka ganacsi galmo, shaqo khasab ah iyo addoonsi si ay dhaqaale uga sameeyaan.

   Intii warbixinta la diyaarinayay, waxaa la wareystay 45 haween iyo gabdho da’doodu u dhaxaysay 17 ilaa 43 sano, oo ay ku jiraan Itoobiyaan.

   Warbixintu waxay sheegtay in dhammaan haweenkaasi ay sheegeen inay la kulmeen “xadgudub galmo, oo ay ku jiraan kufsi, isku day kufsi iyo faraxumayn” goobahooda shaqo iyo xarumaha tahriibinta.

   Sidoo kale, warbixintu waxay xustay in gabadh Itoobiyaan ah oo 19 jir ah ay sanadkii hore u geeriyootay kadib markii loo diiday daryeel caafimaad, iyadoo la kulantay “xadgudubyo argagax leh oo ay ku jiraan garaacid, gaajo iyo kufsi.”

   Warbixinta Qaramada Midoobay waxay ugu baaqday mas’uuliyiinta Liibiya inay si degdeg ah u sii daayaan dhammaan dadka si sharci darro ah loogu xiray xabsiyaasha sharciga iyo kuwa aan sharci ahayn, waxayna ugu baaqday ciidamada amniga Liibiya inay joojiyaan “afduubka khatarta ah” ee lagu hayo dadka isku dayaya inay ka gudbaan Liibiya una gudbaan Yurub.

   Laamaha ammaanka Libya oo tahriibayaal kasii daayay 'xabsi qarsoodi ah'

   Kumuu ahaa Sayful-Islaam wiilkii Qadaafi uu ilmihiisa ugu jeclaa ee hadda la dilay?

5. 19 Febraayo 2026Sida bangi Jarmal ah afar saacadood gudahood looga dhacay 100 milyan oo Yuuro

   

   Xigashada Sawirka, Getty Images

   Waxaa lagu tilmaamay mid ka mid ah dhacii bangi ee ugu "yaabka badnaa" ee ka dhaca Jarmalka sanadihii u dambeeyay.

   Dhammaadka toddobaad xaaladdu degganayd, wax yar kadib Kirismaska, koox tuugo ah ayaa jabsaday bangi ku yaalla waddo ganacsi (High Street) oo ku yaalla magaalada Gelsenkirchen ee galbeedka dalkaas, iyaga oo dalool ku sameeyay gidaarkiisa, iyaga oo adeegsanaya qalab warshadeed oo ah kuwa wax dalooliye.

   Waxay fureen in ka badan 3,000 sanduuq oo kayd ammaan ah (safe deposit boxes), iyagoo la baxsaday malaayiin yuuro.

   In ka badan bil kadib, boolisku weli ci duma soo xidhin dhacdadaas

   Macaamiisha bangiga, oo qaarkood sheegeen inay waayeen kaydkii noloshooda, dahab iyo agab qiimo leh oo qoysaskoodu lahaayeen, ayaa arrintan waxay u noqotay waqti cadho, jahawareer iyo naxdin leh.

   Waxaa si weyn loo dareemayaa in kalsoonidii lagu qabay hay'adaha bangiyadadu ay wiiqantay.

   Kiiskan ayaa dhaliyay su'aalo adag oo badan, qaar ka mid ahna waxaa si cad u soo bandhigay wasiirka arrimaha gudaha ee gobolka galbeedka North Rhine-Westphalia, Herbert Reul.

   Sidee ayay suuragal u noqotay in cidina aysan ogaan waxa socday? Ma waxa uu ahaa fal ay ku lug lahaayeen dad gudaha ka tirsan?

   Sii akhri

6. 19 Febraayo 2026Senetar Mareykan ah oo ka hadlay caafimaadka madaxweynaha Imaaraadka ee la hadal hayay

   

   Xigashada Sawirka, Getty Images

   Madaxweynaha Imaaraadka Carabta, Sheikh Mohammed bin Zayed Al Nahyan, ayaa Arbacadii kula kulmay magaalada Abu Dhabi, Senator Lindsey Graham, oo ka tirsan Mareykanka, sida uu senator-ku ku sheegay qoraal uu ku daabacay boggiisaX, isaga oo sidoo kale cambaareeyay wax uu ku tilmaamay “warar been abuur ah” oo laysla dhex marayo oo ku saabsan Imaaraadka iyo hoggaamiyahooda.

   Horraantii toddobaadkan, baraha bulshada ayaa si weyn looga hadal hayay xaaladda caafimaad ee Sheekh Maxamed.

   Hadal heynta ayaa sii xoogeysatay markii Madaxweynaha Turkiga Recep Tayyip Erdogan uu dib u dhigay safar uu ku tagi lahaa Imaaraadka, sababo lagu sheegay dhibaato caafimaad oo soo wajahday hogaamiyaha Imaaraatka, inkastoo Madaxtooyada Turkiga ay saacado ka dib tirtirtay qoraalkaas oo la soo dhigay barta X.

   Senetor Graham, ayaa sheegay inuu kulan saacad iyo bar socday la yeeshay madaxweynaha Imaaraadka, isagoo dhanka kalena “been” ku tilmaamay warka la sheegayo ee la xirriira caafimaadka madaxweynaha.

   Kulanka Arbacada ayaa ka dhacay Qasr Al Shati, sida ay ku warantay wakaaladda wararka ee Imaaraadka, WAM, iyadoo daabacday sawirro iyo muuqaal muujinaya Sheekh Maxamed iyo saraakiil sare oo Emirati ah oo kulan la leh senator-ka Mareykanka.

   Faahfaahin kale waxaad ka akhrisan kartaa:

   Maxaa ka jira warka la xiriira caafimaad darrada madaxweynaha Imaaraatka ee faafay?

7. 19 Febraayo 2026Nin toogasho lagu xukumay kadib fal halis ah oo uu ku sameeyay saaxiibtiis

   

   Xigashada Sawirka, Www.foto-webcam.eu

   In ka badan hal sano kadib markii haweeney 33 jir ah ku dhimatay qabow daran oo ka jiray buurta ugu dheer Austria, ninka ay saaxiibbada ahaayeen ayaa maxkamad la soo taagayaa Khamiista, isagoo lagu eedeeyay dil khatar ah oo dayacaad ka yimid. Kerstin G ayaa u dhimatay hypothermia intii ay ku jireen safar buur fuulid ah oo ku wajahnaa buurta Grossglockner, kaas oo ahaa qorshe si xun u qaldamay.

   Ninkeeda waxaa lagu eedeeyay inuu ka tagay iyadoo daallan oo aan haysan wax ilaalin ah meel u dhow buurta dusheeda, xilli ay roobab iyo dabaylo xoog leh jireen habeennimadii 19 kii Janaayo 2025, isaga oo sheegay in uu baadidoon ugu baxay si uu caawimaad ugu raadiyo.

   Kiiskan ayaa si weyn u soo jiitay dareenka Austria iyo bulshooyinka buur fanashada jecel ee dalal badan, maadaama uu taabanayo mas'uuliyadda qofka khibradda leh marka uu safar la galo qof ka tabar yar.

   Dacwad oogayaashu waxay leeyihiin ninka la eedeynayo ayaa ahaa kii khibrad badnaa, sidaas darteedna wuxuu ahaa "hogaamiyihii mas'uulka ka ahaa safarka", balse wuxuu ku guuldarreystay inuu dib u laabto ama caawimaad waco waqtigii ku habboonaa si uu gabadha u badbaadiyo.

   Warbaahinta Austria waxay ninka ku magacaabeen Thomas P. Isagu dembiga lagu eedeeyey wuu diidan yahay, waxaana qareenkiisa Kurt Jelinek uu sheegay in geerida haweeneydu ahayd "shil murugo leh".

   Sii akhri

8. 19 Febraayo 2026Milatariga Mareykanka oo sheegay maalinta ay diyaar u yihiin inay weeraraan Iran

   

   Xigashada Sawirka, Getty Images

   Saraakiisha ugu sareysa amniga qaranka ayaa madaxweyne Donald Trump ku war geliyay in ciidamada Mareykanka ay diyaar u yihiin weerar suurtagal ah oo ka dhan ah Iiraan Sabtida, laakiin ma jiro go'aan kama dambays ah oo uu Trump ka gaaray weerarka.

   Ilo wareedyo ayaa u sheegay CBS Newsee Mareykanka, oo bah wadaag la ah BBC-da, in waqtiga kama dambaysta ah ee tallaabada suurtagalka ah aan la go'aamin oo ay xitaa dhaafi karto Sabtida.

   Saraakiisha ayaa sidoo kale u sheegay CBS, in Madaxweyne Trump uusan weli gaarin go'aan kama dambays ah oo uu ku weerarayo Iiraan, halka Aqalka Cad uu si joogto ah ugala tashanayo arrinta, halkaas oo la tixgelinayo khataraha la xiriira tallaabadan, jawaabaha suurtagalka ah, iyo cawaaqib xumada siyaasadeed iyo militari ee ka dhalan karta weerarka.

   Waaxda difaaca ee Mareykanka (Pentagon) ayaa si ku meel gaar ah u rari doonta qaar ka mid ah shaqaalaha ka jooga Bariga Dhexe una wareejin doonta Yurub ama Mareykanka saddexda maalmood ee soo socota si looga fogaado aargoosiga Iiraan haddii tallaabo la qaado.

   Tallaabadan ayaa qayb ka ah diyaargarowga caadiga ah mana aha macnaheedu in weerar uu soo socdo, sida ay ilo-wareedyadu sheegeen.

   Afhayeen u hadlay Pentagon-ka ayaa diiday inuu ka hadlo arrintan.

   Si kastaba ha ahaatee, xoghayaha saxaafadda ee Aqalka Cad, Caroline Levitt, ayaa tiri, "Waxaa jira cudurdaarro badan oo lagu weerarayo Iiraan, laakiin mudnaanta koowaad ee madaxweynuhu had iyo jeer waa diblomaasiyadda”

   Waxay diidday inay sheegto in hawlgalkan lagu fulin doono iskaashi lala yeesho Israa'iil iyo in kale

   Levitt waxay intaas ku dartay in "bishii Juun, Mareykanka uu qaaday howlgal guuleystay oo lagu bartilmaameedsanayo xarumaha nukliyeerka ee Iiraan." Waxay tiri: "waxaa ka wanaagsanaan lahayd in Iiraan ay heshiis gaarto oo ay la shaqeyso Madaxweyne Trump iyo maamulkiisa.

   Sida laga soo xigtay ilo wareedyo, Iiraan ayaa si qooto dheer looga hadlay Aqalka Cad Arbacadii.

   Dhammaan ciidamada militariga Mareykanka ayaa ku sugnaan doona gobolka ilaa bartamaha bisha Maarso.

   Waxaad sidoo kale akhrisan kartaa:

   Wadahadalkii Maraykanka iyo Iran ee Nukleerka oo haatan ku soo dhamaaday Geneva

   Soo saarihihii taxanaha 'Tehran' oo maydkeeda laga helay qol hotel ku yaalla Giriigga

   Maraakiibta iyo diyaaradaha dagaalka Mareykanka oo lagu arkay meel u dhow Iiraan

9. 19 Febraayo 2026Sahwa Mukhtaar: Gabar ay si xun u gaeen rag ay caweys u raacday

   

   Xigashada Sawirka, Metropolitan Police

   Haweeney dhagool ah ayaa lagu dilay "weerar ba'an" kadib markii ay caweys u raacday dad aysan aqoon, sida ay maxkamaddu sheegtay.

   Zahwa Mukhtar, oo 27 jir ahayd, ayaa waxaa gaariga ka tuuray oo weeraray Duane Owusu Romford, mar ay marayeen bariga London, saacadihii hore ee 16kii August sanadkii hore, ayay tiri maxkamadda Old Bailey.

   Mar ay fureysay dhegeysiga, ayay dacwad-ooge Henrietta Paget KC waxay sheegtay in kiiskan uu ku lug leeyahay "dil arxan darro ah oo loo geystay haweeney da' yar oo nugul".

   Owusu, oo lagu naaneyso Nasty, kana soo jeeda Dagenham, ayaa dafiray inuu dilka geystay iyo xukunka.

   "Kan wuxuu ahaa weerar arxan-darro ah," ayay Paget u sheegtay xeerbeegtida.

   "Dhaqanka uu Mr Owusu soo bandhigay ee ku aaddanaa dhibbanihiisa wuxuu ahaa mid quursi ah, sida ficilladiisii ​​iyo hadalladiisii ​​dambe ay caddeeyeen

   Sii akhri

10. 19 Febraayo 2026Turkiga iyo dalalka kale ee muslimka ah ee maanta u tahay maalinta koowaad ee Ramadan

    

    Xigashada Sawirka, Getty Images

    Dalal badan oo caalamka ah waxay maanta u tahay maalinkii labaad ee bisha Ramadan.

    Sacuudiga ay Talaaladii ku dhawaaqday in Arbacada shalay ahayd tahay maalinta koowaad ee soonka.

    Toban waddan oo Islaam ah ayaa ku dhawaaqay in la arkay bisha Ramadaan fiidkii Talaadada, taasoo Arbcada ka dhigatay maalinta ugu dambeysa ee Shacbaan, iyo maalinta ugu horreysa ee soonka bisha Ramadaan sanadka 1447 Hijriga,

    Dalalkaas waxaa kamaid ah Imaaraadka Carabta, Sacuudi Carabiya, Qadar, Baxrayn, Kuwait iyo Yemen.

    Ciraaq iyo Lubnaan ayaa sidoo kale kamid ah.

    Dalka Suudaan, Golaha Fiqiga Islaamka ayaa ku dhawaaqay in Arbacada ay tahay maalinta koowaad ee Ramadaan.

    Soomaaliya ayaa sidoo kale kamid ah dalalka shalay laga soomay.

    Dalal kala ayaa ku dhawaaqay in aanan la arkin bisha, sidaa awgeed, waxay ku dhawaaqeen in Khamiista maanta ay tahay maalinta koowaad ee soonka.

    Dalalkaas waxaa ka mid ah Suuriya, Turkiga, Masar iyo Singapore, Masar, Urdun, Liibiya iyo Algeeriya.

    Dalka Indonesia, Wasaaradda Arrimaha Diinta ayaa ku dhawaaqday in Khamiista maanta ay noqon doonto maalinta koowaad ee Ramadaan.

    Cumaan, todobaad ka hor ayay ku dhawaaqday in soonku bilaaban doono Khamiista.

    Morocco iyo Mauritania ayaa kamid ah dalalka aan shaacin taariikhda laga soomayo dalalkooda.

    Waxaad sidoo kale akhrisan kartaa:

    Ramadan: Maxay tahay sababta aan ugu afurno timirta?

    Ramadan 2026: Maxaa ku dhacaya jirkaaga marka aad saacado badan soonto 30 maalmood?

    Ramadan 2026: Sidee adiga oo soomman ula tacaaleysaa madax-xanuunka?

11. 19 Febraayo 2026Ingiriiska oo soo saaraya baaq la xirriira isla xisaabtanka falalka xadgudubyada ah ee Suudaan

    

    Xigashada Sawirka, Getty Images

    Ingiriiska ayaa Khamiista maanta ah soo saari doona baaq la xirriira isla xisaabtanka falalka xadgudubyada ah ee ka dhacaya dalka Suudaan

    Qaramada Midoobey ayaa sheegtay inay si weyn uga walaacsan tahay isticmaalka sii kordhaya ee diyaaradaha aan duuliyaha lahayn (drones) ee lagu beegsanayo goobaha ay dadku ku nool yihiin, taasoo ay adeegsadeen labada dhinac ee dagaalka sokeeye ee Sudan.

    Tani waxay timid kadib weerar Arbacadii horeka dhacay magaalada El Sunut ee gobolka Kordofan, halkaas oo dad rayid ah lagu dilay laguna dhaawacay.

    Isuduwaha arrimaha bani’aadamnimo ee Qaramada Midoobay ayaa sheegay in weerarradii u dambeeyay ee drones-ka ay beegsadeen kaabayaal rayid, taasoo sababtay khasaare naf iyo maalba leh isla markaana sii xumeysay xaaladda bani’aadamnimo.

    Toddobaadkii la soo dhaafay oo keliya, suuq, dugsi hoose iyo xarun kaydinta shidaalka ah ayaa lagu weeraray gobollada Kordofan iyo Darfur.

12. 19 Febraayo 2026

    Ramadan wanaagsan akhyaarta, ku soo dhowaada tebinta tooska ah ee maanta. Halkan ayaad kala socon doontaan wararkii ugu dambeeyay