Koobka Adduunka oo Mexico ka furmay lana kowsaday qoob ka ciyaarka Shakira iyo mudaaharaadyo

Koobka Adduunka 2026 ayaa ka furmay Magaalada Mexico iyadoo xafladdii furitaanka ay ahayd mid ay ka buuxeen midabbo qurux badan, qoob-ka-ciyaar iyo bandhig ay sameysay fannaanadda caalamiga ah ee Shakira.

Kumannaan taageerayaal ah ayaa soo buux-dhaafiyey garoonka caanka ah ee Azteca ee Magaalada Mexico, iyagoo muujinayey farxad iyo xamaasad weyn maaddaama tani ay tahay Koobkii Adduunka ee ugu horreeyey ee lagu qabto dalkooda muddo 40 sano ah.

Hase yeeshee, bannaanka garoonka waxaa ka dhacay iska horimaadyo rabshado wata oo goos-goos ah, kadib markii dibad-baxayaal xagjir ah ay isku dayeen inay carqaladeeyaan munaasabadda, waxaana ka hortagay ciidamo amni oo aad u badan.

Si kastaba ha ahaatee, kubbadda cagta ayaa ahayd waxa ugu muhiimsan ee la hadal hayey, waxaana dhacay dabaaldegyo waaweyn markii Mexico ay bilowday tartankeeda iyadoo 2–0 kaga adkaatay Koonfur Afrika.

Javier Pérez ayaa la yimid qoyskiisa ciyaartii furitaanka, wuxuuna u sheegay BBC-da in xamaasadda iyo farxadda hadda jirta ay ka badan tahay dhibaatooyinkii ama caqabadihii ay hore ula kulmeen.

"Waxaan nasiib u yeelannay inaan helno tigidhada marti-sharafta, waana waayo-aragnimo gaar ah. Weligay hore uguma aanan qaybgelin Koob Adduun, sidaas darteed inaan qoyskayga keeno waa arrin aad u farxad badan," ayuu yiri.

"Waxaan kaliya rabaa in Mexico ay si wanaagsan ku billowdo, maanta guuleysato oo ay dhaliso goolal badan! Markaas ayaan arki doonnaa inta aan gaari karno!"

Inkastoo ammaanka si weyn loo adkeeyey hareeraha garoonka oo qaadi kara 82,000 oo qof, haddana iska horimaadyadii u dhexeeyey booliska iyo dibad-baxayaasha ayaa si ku-meel-gaar ah u hakiyey adeegyada saldhigyada tareennada dhulka hoostiisa mara ee ku dhowaa.

Mas'uuliyiinta Mexico ayaa sheegay in ku dhowaad 200 qof oo wejiyada qarsaday ay ka go'een laba kooxood oo ka koobnaa qiyaastii 800 dibad-baxayaal ah, isla markaana ay isku dhaceen ciidamada ammaanka. Waxay intaa ku dareen in xaaladda ay boolisku "si buuxda gacanta ugu dhigeen."

Dhanka kale, macallimiin iyo qoysaska dadka lagu la'yahay dagaalka mukhaadaraadka ee Mexico ayaa sameeyey dibad-baxyo kala duwan si ay u muujiyaan cabashooyinkooda iyo arrimahooda, xilli dalku uu ku jiro indhaha caalamka.

Mexico ayaa si wadajir ah ula martigelinaysa Koobka Adduunka 2026 dalalka Maraykanka iyo Kanada, iyadoo labadaas dalna ay Jimcaha qabteen xafladahooda furitaanka.

Ka hor ciyaarta, taageerayaashii garoonka joogay ayaa lagu maaweeliyey bandhigyo ay soo bandhigeen fannaanadda caalamiga ah Shakira, fanaanka reer Kolombiya J Balvin, xiddiga Afrobeats-ka Burna Boy, iyo fanaanka muusigga Latin-ka Danny Ocean.

Sidoo kale, fannaan-ka-heesaa iyo qoraaga heesaha reer Mexico Fher Olvera oo ka tirsan kooxda pop-rock/punk ee Maná ayaa masraxa ka qaaday heesta caanka ah ee "Oye Mi Amor."

"Ku soo dhowaada Mexico. Welcome to Mexico," ayuu ku dhawaaqay mid ka mid ah bandhig-faneedyadii si uu si rasmi ah ugu bilaabo tartanka.

"Waxaan nahay qaran ay ku mideysan yihiin kala-duwanaansho, hidde iyo sharaf. Kubbadda cagtuna waxay siddaa garaac isku mid ah oo mideeya jiilal kala duwan."

Bandhig-faneedyada qaar waxay xirnaayeen dhar dhaqameedyo asal ahaan ka soo jeeda bulshooyinka waddaniga ah, halka kuwo kalena ay ku lebisnaayeen dhar dahab ah oo dhan, iyagoo madaxyadooda kor ugu haya kubbado waaweyn oo dahab ah.

Garoonka oo ay buuxiyeen taageerayaal aad u tiro badan ayaa isaguna ahaa mid midabbo kala duwan leh, maaddaama taageerayaashu ay xirnaayeen dharkooda iyo astaamahooda gaarka ah, iyadoo badankood ay ku labisnaayeen midabbada xulka qaranka Mexico.

Tyla ayaa qaaday heesta calanka qaranka Koonfur Afrika

Xiddiga caanka ah Andrea Bocelli iyo fannaanadda K-Pop-ka Ejae ayaa qaaday heesta rasmiga ah ee tartanka ee lagu magacaabo DNA, taas oo si rasmi ah loo sii daayay Arbacadii.

Fannaanka reer Mexico Alejandro Fernández, oo ah wiilka fannaankii caanka ahaa ee Vicente Fernández, ayaa qaaday heesta calanka qaranka Mexico, iyadoo ay cod ahaan kula midoobeen kumannaanka taageerayaal ah ee ku sugnaa garoonka, kuwaas oo tiradoodu gaareysay ku dhowaad 80,000.

Fannaanadda Koonfur Afrika ee ku guuleysatay abaalmarinta Grammy-ga, Tyla, ayaa iyaduna qaadday heesta calanka qarankeeda.

Tyla, oo caan ku ah heesaha Water iyo heesta FIFA-da ee Game Time, ayaa mar kale kasoo muuqan doonta masraxa Koobka Adduunka Jimcaha, iyadoo ka qeyb geli doonta xafladda furitaanka ee Maraykanka lagu qabanayo Magaalada Los Angeles, halkaas oo ay masraxa kula wadaagi doonto Katy Perry, Future, Lisa iyo Anitta.

FIFA ayaa xafladaha furitaanka u xulatay fannaaniin badan oo caalami ah, kuwaas oo qaar badan laga dhex helayo albamka rasmiga ah ee Official FIFA World Cup 2026 Album, kaas oo ka kooban 18 heesood.