ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
පාසල් විද්යාගාරයක සිදු වූ අනතුරකින් දැඩි පිළිස්සුම් තුවාල ලැබූ දැරිය: 'දුව මගෙන් ඇහුවා මගේ මූණ හැමදා ම මෙහෙම ද තියෙන්නේ කියලා'
බණ්ඩාරවෙල ධර්මාශෝක විද්යාලයේ 11 වන ශ්රේණියේ ඉගෙනුම ලබමින් සිටි දැරියක පසුගිය මාර්තු 23 දින පාසලේ විද්යාගාරයේ සිදු වූ අනතුරකින් "දැඩි පිළිස්සුම් තුවාල" ලබා තිබුණා ය. මෙම අනතුරින් දැරියගේ මුහුණට, වම් අතට සහ දකුණු අතට පිළිස්සුම් තුවාල සිදුව තිබිණි.
දැරියගේ මව මල්ලිකා අත්තනායක බීබීසී සිංහල වෙත අදහස් දක්වමින් පැවසුවේ පාසල් විද්යාගාරයේදී පරීක්ෂණයක් සිදු කරමින් සිටි අවස්ථාවක තම දියණියට එම අනතුර සිදු වී ඇති බවයි.
"මගේ දරුවට ගොඩක් පිළිස්සුම් තුවාල තියෙනවා. ඒගොල්ලෝ බණ්ඩාරවෙල රෝහලට අරගෙන ගිහිල්ලා තමයි මට කෝල් කළේ," මල්ලිකා තම දැරිය මුහුණ දුන් අවාසනාවන්ත සිදුවීම ගැන විස්තර කළා ය.
කෙසේ නමුත් දැරිය මෙවර සාමාන්ය පෙළ විභාගයට මුහුණ දීමේ දැඩි අධිෂ්ඨානයෙන් පසුවන බව ද ඇය වැඩිදුරටත් බීබීසීයට පැවසුවා ය.
මෙම සිද්ධිය සම්බන්ධයෙන් බීබීසී සිංහල ඌව පළාත් ආණ්ඩුකාර නීතිඥ ජේ.එම්. කපිල ජයසේකරගෙන් විමසූ අතර ඔහු සඳහන් කළේ, මෙම සිද්ධිය පිළිබඳව පරීක්ෂණයක් සිදු කරන බව ය.
"හොස්පිටල් එකේ හිටපු නිසා අපිට ඒ ළමයාගෙන් කට උත්තරයක් ගන්න බැරි වුණා. කට උත්තරේ අනුව අපි කටයුතු කර ගෙන යනවා."
එමෙන් ම ඔහු පැවසුවේ, විභාගයට මුහුණ දීමට හැකි වන පරිදි දැරියගේ නිවසට ගොස් හෝ ඉගැන්වීම් කටයුතු සිදු කරන ලෙස තමන් කලාප අධ්යාපන අධ්යක්ෂවරයා වෙත උපදෙස් ලබා දුන් බව ය.