Facal Oirbh, BBC Radio nan Gàidheal, 21 Iuchar 2009

Cairtean

Cairt-chopaig

'S e cairt-taomaidh a bha seo. Dhòrtadh a' chairt-chopaig a luchd mòine no todhar chionns gu robh cùl-cheanglaichean no lùdagan oirre. Chan fheumadh duine a falamhachadh len làmhan no le gràp.

Càrn

Nuair a thòisich daoine a' frithealadh bùithtean Steòrnabhaigh bha iad airson na cairtean a dhèanamh na b' aotroma le bhith a' gearradh asta am pìos far an robh i a' lùbadh agus as an robh na cùl-cheanglaichean no na lùdagan. Cha chopadh càrn is dh'fheumte an luchd a thoirt dheth.

Cairt nan ceàrd

Seo spring cart as a' Bheurla, cairtean aotrom a bha air an dèanamh le fiodh cruaidh agus saothair mhòr air a ghabhail riutha.

Rèim / Cearcall na cuibhle

Bha an rèim a-muigh de chuibhle na cairte air a dhèanamh de shia pìosan fiodha air an cumail ri chèile le pinnichean fiodha agus an uairsin bann iarainn ris an cante cearcall na cuibhle.

Cìoch na cuibhle

B' e seo a bha an teis mheadhan na cuibhle.

Spògan / Tarsannan

Bha spògan no tarsannan na cuibhle eadar cìoch na cuibhle agus an rèim. Bhite a' cleachdadh darach airson nan spògan agus leamhan airson an rèim ma dh'fhaodte chionns gu robh leamhan math ann an uisge.

Each crosta

Nuair a bhite a' feuchainn ri each crosta a thoirt à cairt, cho luath agus a dh'fhidreadh e gu robhas a' fosgladh an uidheam dheth, bha e buailteach feuchainn às. Airson dèiligeadh ri seo, bhathas ga thoirt suas gus am biodh aghaidh ri balla agus duine air gach taobh dheth gus nach fhaigheadh e air tionndadh taobh seach taobh.