Facal Oirbh, BBC Radio nan Gàidheal, 7 Giblean 2009

Croitearachd

An t-sreath bhàn

Bha cuimhne aig Iain nuair a bhathas a' cur a' bhuntàta bhathas gu follaiseach a' fàgail sreath bhàn. Bha thu a' tionndadh 's a' cur a' bhuntàta agus an uairsin a' tionndadh sreath eile 's cha robh càil a' dol dhan tè sin. 'S ann dhan ath thè a-rithist 's docha a dheigheadh am buntàta. Bha dà dhòigh air a dhèanamh. Dh'fhaodadh tu bhith a' cur an todhar dhan an t-sreath bhàn no dìreach a' sgaoileadh an todhair air uachdar na feannaig mas tòisicheadh tu. Ach cha bhiodh iad a' moladh gum biodh an fheamainn no an todhar cus a' suathadh anns na sgealban buntàta a bhiodh tu a' cur dhan an t-sreath. Bhathar ag ràdh nan cuireadh tu cus feamainn air an talamh gum biodh am buntàta buailteach a bhith bog. Bha daoine airson gum biodh am buntàta aca tioram.

Feamainn dhubh is feamainn dhearg

Bhathar a' cumail a-mach gu robh an fheamainn dhubh a bhathar a' gearradh air an taobh an ear math airson talamh an taobh an ear agus gu robh an fheamainn dhearg math airson machair.