Facal Oirbh, BBC Radio nan Gàidheal, 03 Màrt 2009

An Tilley

Tha Fionnlagh MacLeòid còmhla ri Iain MacIlleathain agus Flòraidh NicIlleathainn 's iad a' cuimhneachadh air linn an Tilley.

Fionnlagh: 'S e comharra uabhasach math air a' gheamhradh dhòmhsa a bh' as an Tilley. Bhon bha i toirt a-steach a bhith a-staigh 's a bhith blàth 's srann aice man seillean 's i uabhasach brèagha air a cuir ri chèile, a h-uile pàirt dhith man a bha sibh ag ainmeachadh. Fiù nach robh am pump aice brèagha is math air a dhèanamh agus iad uabhasach làidir cuideachd.

'S man a bha sibh a' dèanamh ann a siud na bha timcheall oirre ... ga gaothadh 's a' chìoch bheag a bh'air a' chliathaich aice a bha thu cumail sùil air airson faicinn a robh thu air gaoth gu leòr a chuir innte, vaporiser, a h-uile pìos. Agus man a thuirt e, cho mìorbhaileach 's a bha am mantle. Cha robh sinn a' tuigse dè man a bha i a' dol 's cha do rinn sgoil fuasgladh sam bith air dè seòrsa gnè lampa a bh'ann. Shaoileadh tu gum biodh e air leasan math a dhèanamh. Bha e uabhasach math sibh a' cuir thuige sin.

Iain: Bha, agus mhothaich thu man a chleachd e cuideachd cho foidhne 's cho furasta sa bha mantle cron sam bith a dhèanamh air.

Fionnlagh: O bha, bha sin math. Eil fhios agad, ma bha droch agalladh sam bith air a dhèanamh, 's thuirt esan ma bha dubhais sam bith air a dhèanamh air. Nis, chan e facal a tha sin a tha agamsa idir, agus nam biodh toll air thigeadh a' lasair a-mach air an toll ach dh'fhaodadh a' mantle cumail a' dol greis ged a bhiodh toll gu math mòr air. Uaireannan ged a bhiodh a' chliathaich a dhìth air.

Iain: 'S iomadh fear a thàinig air cumail a' dol.

Fionnlagh: Thàinig.

Iain: Agus mhothaich mi gun tuirt Seòras cuideachd ann a shin gun mhothaich e fhèin an t-eadar-dhealachadh bu mhotha as an dachaigh 's e air falbh is 's e lampa-siofaig a bh' ann nuair a dh'fhalbh e 's an uair a thill e bha 'n Tilley ann agus thuirt mi ris "Dè an t-eadar dhealachadh dha na mhothaich sibh?" 's thuirt e rium "A bhròinein, a' solas a bh'ann, 's am blàths."

Fionnlagh: O a' solas a bh' ann, 's e. Ach tha e toirt a-steach ormsa làr le wax air 's daoine ag ràdh riut, "Thalla 's faigh deoch 's dùin an doras sin 's seub a' tighinn troimhe!" 'S eil fhios agad dìreach a h-uile càil a tha timcheall air, 's tha an Tilley aig teis-mheadhan sin. Bha sinne rudeigin na b'adhartaiche na sibhse, 's e toirdse a bh' againn air am peana a bha sinn a' cuir le meth. Agus bhiodh sinn a' cuir uaireannan nuair a bhiodh an toirdse a' fàs rudeigin aosta is baoill a' tighinn oirr', bhiodh sinn a' cuir pean-aodaich fòidhpe airson a' cumail air a' vaporiser.

Iain: Well, feumaidh mi an fhìrinn innse dhut! An oidhche a bha sinn fhìn ag obair leis an Tilley gu robh an clobha no an toirdse air ruighinn an ìre gur e sin an dearbh rud a bha againn ga chumail an àrda.