Ondo State Governorship Election latest updates from di sunshine state of Nigeria 10 October vote.
Daniel Semeniworima and Helen Oyibo
IGP of police don warn politicians say dem no go tolerate violence and disruption during Ondo Governorship Election dis Saturday.
IGP Adamu Muhammed give di warning on Monday for di stakeholders meeting wey dem do today for Akure.
Police go send over 33,000 security men go tanda for di election on 10 October.
Wia dis foto come from, Other
Di tori wey dey fly upandan say ZLP govnorship candidate, wey be di deputy Govnor of Ondo state, Agboola Ajayi wan decamp to join PDP no dey true.
Na wetin ZLP spokespesin Banji Okunomo tell BBC Pidgin.
Okunomo say dia party no fit bend down for any oda 'weaker' party and di rumor na political propaganda wey no get any truth inside.
“Di popularity of di candidate of di ZLP, Agboola Ajayi dey go higher and higher every day”.
Im tok say di rumor na political propaganda wey no get any atom of truth inside.
“As far as di election dey, na two horse election between di Deputy Govnor, Agboola Ajayi and di Govnor, Rotimi Akeredolu.”
Banji Okunomo say pipo don dey even decamp from di APC and di PDP to join di Zenith Labor party.
Wia dis foto come from, Getty Images
In line with safety guidelines for Covid-19, di Nigeria election office INEC don say all voters must come wit not just dia permanent voters card but also face mask.
Dis face mask must not get branding of any political party ontop, di Di Resident Electoral Commissioner for Ondo State bin warn.
Anybodi wey turn up wit face mask wey dem write political name ontop, no go get chance to vote.
Ambssador Oloruntoyin Akeju also tok say voters must observe social distancing and wear dia face mask.
Wia dis foto come from, Getty Images
Di Resident Electoral Commissioner for Ondo State don say provision go dey for blind pipo wey wan vote during di upcoming election.
For di stakeholders meeting against di 10 October govnorship elections, Ambassador Oloruntoyin Akeju say allowance go dey for blind pipo to carri pesin wey go assist dem vote come polling station.
Dem also fit ask election officials or security personnel to assist dem, but party official dey banned to offer helep.
Our reporters for Akure sight some youths dey march for road, wit placards for hand wey get different-different messages.
Dem tell BBC say di march na to draw awareness give di Inspector General of Police to make dia vote count inside di upcoming 10 October govnorship elections for Ondo.
Some of di placards get messages like "We say no to violence, thuggery & election rigging", "Ondo no be Lagos" and "No to fake policemen".
E no be like say di youths dey represent any political party, as nobody among dem carry or wear party logo or colours.
See some photo from di Ondo Elections stakeholders meeting wey go involve security oga, traditional rulers and representatives from political parties and di election office INEC.
