Nigeria presidential inauguration 2023 live as e happun

Live Coverage

Jelilat Olawale

1. 29 May 2023Wetin don happun so far

   

   Activities don waka far for Eagles Square wia di Chief Justice of Nigeria bin give oath of office to di president Bola Ahmed Tinubu and In vice Kashim Shettima.

   Di man of di moment Bola Ahmed Tinubu bin take im oath after im vice, Kashim Shettima don do im own.

   Buhari handover leadership of Africa most populous kontri give Bola Tinubu, wey win di February 25 general elections.

   Now former president, Muhammadu Buhari comot di Eagles Square immediately Tinubu take oath of office to gbab di seat of power.

   Former Vice President Yemi Osinbajo don also comot di Eagles Square for Abuja.

   Several African presidents plus oda foreign dignitaries present for Nigeria for di inauguration of Bola Tinubu as di 5th president of di continent most populous nation.

2. 29 May 2023Breaking, Dapo Abiodun take oath of office for di second time for Ogun

   

   Dem don swear-in Dapo Abiodun as di govnor of Ogun state.

   Abiodumn dey start im second term for office today after di event wey take place of di MKO Abiola stadium for Abeokuta, di state capital.

   Na di Chief Judge of di state, JUstice Mosunmola Dipeolu oversee di oath taking by Abiodun and im deputy.

3. 29 May 2023Outside di Eagles Square, na singing and drumming

   

   Heavy rains wey fall for di early hours of di inauguration morning don give way to bright sunshine for Abuja wia di inauguration dey happun.

   Di place no dey too jam packed – na only invited dignitaries dem allow to enta di Eagle Square venue but supporters of di new administration full outside di gates, many of dem dey sing, drum and dance.

   Afta di oath of office wey seal, many pipo dey wait di presidential speech of Bola Tinubu to see if e go make any big pronouncements on im first day in office.

4. 29 May 2023Seyi Makinde don begin im second term as Oyo govnor

   

   Wia dis foto come from, Seyi Makinde

   As di inuaguration of di new president of Nigeria dey happun for Abuja, di nation capital, Seyi Makinde dey also take oath of office as di govnor of Oyo state.

   Dis na di second time wen Makinde of di Peoples Democractic Party (PDP) go dey go through dis process.

   Makinde bin win re-election during di 18 March, 2023.

5. 29 May 2023Muhammadu Buhari tenure don end

   

   Wia dis foto come from, Bashir Ahmad

   Di era of di immediate-past President of Nigeria Muhammadu Buhari don end.

   To signify di process, dem remove di old flag and put a new defence flag wey go signify di beginning of a new administration of Bola Ahmed Tinubu

   Buhari bin rule Nigeria from 2015 to 2023.

   Di former president military ruler become president afta e win historic election wey see di defeat of underperforming incumbent Goodluck Jonathan.

   Di heavy rain wey fall earlier dis morning don give way to bright sunshine for Abuja, di kontri capital wia di inauguration dey happun.

   E ride on di wave of hope say change dey possible, powerful coalition support am and e get reputation say e be hard-man soja, wey go get tins done.

   Afta oga Buhari small taste of power for di 1980s, im second coming na on di back of promises say e go deal wit di dangerous Islamist insurgency for di north-east and tackle widespread corruption.

   E be di last of a generation of military men wey British soja train wey later rule di kontri.

   Read also: Di five test wey dey wait Nigeria new president

6. 29 May 2023Breaking, Bola Ahmed Tinubu don officially become Nigeria President

   Bola Ahmed Tinubu don officially become become di 16th President of Nigeria.

   Di 71-year-old take di oath of office for di presence of im wife, children and di outgoing president, Muhammadu Buhrai.

   E swear im allegiance and promise to deliver im duties and perform im functions in accordance wit di constitution of Nigeria and di law.

   E say im go abide by di code of conduct and no go allow im personal interest influence im official conduct or decision.

7. 29 May 2023Breaking, Kashim Shettima take oath office as Nigeria vice-president

   Kashim Shettima don become di Vice President of Nigeria.

   Dis na as e take di oath of office wey di Chief Justice of Nigeria administer on am.

   E go work alongside wit Bola Tinubu for di capacity of di second in command for Nigeria.

8. 29 May 2023Muhammadu Buhari dey witness di inauguration for Eagles Square

   

   Wia dis foto come from, Bashir Ahmad/Twitter

   Plenty sirens and long convoy usher di 4th democratically elected President of di Federal Republic of Nigeria, Muhammadu Buhari enta di venue of di 29 May inauguration.

   Buhari dey handover leadership of Africa most populous kontri give Bola Tinubu, wey win di February 25 general elections.

   As e arrive, di handing over ceremony officially start wit opening prayers.

9. 29 May 2023As e dey go for Lagos

   Di inauguration ceremony don begin go proper for Lagos state.

   Govnor Babajide Sanwoolu bin win di second term for office afta one tight race wey see di state for tense mood during di election.

   

   

   

10. 29 May 2023Wetin don happun so far

    So far, activities don dey go on for Eagles Square wia di Chief Justice of Nigeria go administer oath of office to di president elect and im vice.

    Already, di man of di moment Bola Ahmed Tinubu don ready to take im oath after im vice, Kashim Shettima don do im own.

11. 29 May 2023Watch di inauguration live hia

12. 29 May 2023Tinubu children face show for di inauguration

    Son of di President-elect Seyi Tinubu, im daughter Folashade Tinubu-Ojo plus im oda close family don land for Eagles Square for di inauguration.

    Seyi and Folashade dey very prominent for dia father campaign. Seyi dey very visible during di primaries and till di very moment wey im papa go take di oath of office.

    

    

    

    

13. 29 May 2023African leaders in Nigeria for Tinubu inauguration

    

    Wia dis foto come from, Presidency of Niger/Twitter

    Several African presidents plus oda foreign dignitaries don land Nigeria for di inauguration of Bola Tinubu as di 5th president of di continent most populous nation.

    Local media say about 20 African leaders dey expected for Abuja.

    Rwanda President Paul Kagame, Cyril Ramaphosa of South Africa and Algerian President Abdelmadjid Tebboune dey among di leaders wey arrive on Sunday.

    Also for Abuja na di president of Tanzania, Samia Suluhu Hassan, di president of di Republic of Congo Brazzaville, Denis Sassou Nguesso, di president of Guinea Bissau, Umaro Sissoco Embaló and Sierra Leone President Julius Maada Bio.

    Di president of Burundi, Évariste Ndayishimiye, di transitional President of Chad Mahamat Déby, di president of Niger Republic, Mohamed Bazoum and President Nana Akufo-Ado of Ghana also dey Nigeria for di ceremony.

    Di prime cabinet secretary of Kenya, Musalia Mudavadi, go represent President William Ruto.

    One nine-member delegation from di US and Chinese officials wey one Communist Party senior member lead don also arrive for di event.

    Opposition rivals dey challenge oga Tinubu electoral victory for Tribunal.

    On Tuesday, tribunal go begin hear di main arguments for di election petition.

14. 29 May 2023How di govnorship elections happun for Kano

    

    Di March 18 2023 govnorship elections for Kano na one wey see two godsons battle in place of dia political godfathers.

    All Progressives Congress candidate Nasiru Gawuna wey be deputy to Govnor Abdullahi Ganduje square off against Abba Kabir Yusuf wey former commissioner and candidate of former govnor Rabiu Kwankwaso New Nigeria Peoples Party.

    Kwankwaso and Ganduje wey bin serve together as govnor and deputy separate long ago due to politics.

    After di elections, di Independent Electoral National Commission, Inec, declare Abba winner afta e poll 1,019,602 votes to beat im closest challenger, di ruling party APC candidate Nasiru Gawuna wey poll 890,705 votes.

    Na millions of pipo comot to vote for di historic Kano govnorship elections.

    And na first time wey opposition party go win di govnorship seat since 2011 when former govnor Kwankwaso defeat then govnor Ibrahim Shekarau candidate Mallam Ibrahim Shekarau.

15. 29 May 2023President-elect Bola Tinubu don arrive Eagles Square

    

    Nigeria president-elect Bola Ahmed Tinubu don land for di Eagles square Abuja.

    Tinubu bin arrive wit im wife Senator Oluremi Tinubu and some of im pikin dem.

    For 1 March, Bola Ahmed Tinubu bin dey declared winner of Nigeria presidential election for one of di most competitive polls since di kontri go back to civilian rule for 1999.

    Plenti controversy don follow im win and two major opposition candidates don file lawsuits against im victory.

    But Tinubu for all im tok-tok afta e dey declared winner be dat of hope for Nigerians.

    E don repeat for different times say e go serve Nigerians wella.

    

16. 29 May 2023Vice President-elect land Eagles Square for di inauguration

    

    Wia dis foto come from, Buhari Sallau

    Di Vice President-elect Kashim Shettima don arrive di Eagles Square for di inauguration.

    E dey expected to take di oath of office to serve Nigeria for di next four years alongside Bola Tinubu afta di swearing-in.

    Shettima na one former govnor of Borno state wey govern di state from 2011 to 2019.

    Im nomination as di vice presidential candidate of di All Progressives Congress bin generate plenty reaction sake of say im religion.

    E be Muslim and di APC presidential flagbearer, Bola Tinubu also na Muslim wey no go well wit plenty Nigerians wey see di kontri as a secular state.

    Many Nigerians especially Christians bin kick against di Muslim-Muslim ticket.

    However Tinubu insist say Shettima na im choice as running mate and religion no get anytin to do wit am.

17. 29 May 2023Wetin be di role of di CJN for di inauguration

    

    Wia dis foto come from, Presidency

    Di Chief Justice of Nigeria, Justice Olukayode Ariwoola dey very important to di event of today.

    Na im go administer di oath of office to di president-elect and im vice.

    Justice Olukayode Ariwoola na one of di Supreme Court Justice and na di next highest pesin among Nigeria Supreme Court Justice dem.

    Di 68-year-old become di CJN for 2022 after Justice Ibrahim Tanko Muhammad put in im resignation.

    Dem appoint am as Justice of di Supreme Court for 2011.

    Between 2005 and 2011, im bin be Justice of di Court of Appeal afta dem change im level from dat of State High Court for Oyo state, southwest Nigeria.

18. 29 May 2023Red caps everywhere for Kano as Abba take oath of office as govnor

    

    For inside Sani Abacha stadium wia Abba Kabir Yusuf dey colect oath of office and outside na di Kwankwasiya red cap dey reign as many supporters troop in to witness di occassion.

    Di event slated for 9:00am dis morning go see many top dignitaries from Kano and outside in attendance including some royal title holders.

    Na during di elections two months ago Abba of di New Nigeria Peoples Party defeat Nasiru Yusuf Gawuna of di ruling All Progressives Congress to emerge govnor elect for di northwest state.

    Political godfather of di new govnor Rabiu Musa Kwankwaso dey among pipo expected to attend.

19. 29 May 2023Sanwo-Olu, Hamzat prepare to take oath of office today for Lagos

    

    Wia dis foto come from, Babajide Sanwo-olu

    Di Govnor of Lagos State Babajide Sanwo-Olu and im deputy Obafemi Hamzat go take oath of office today to begin dia second tenure.

    Heavy rain don begin fall as party pipo, guests, tori pipo and odas arrive for Tafawa Balewa Square wey be di venue of di inauguration.

    Dis dey come afta di Independent National Electoral Commission (Inec) declare Babajide Sanwo-Olu of di All Progressives Congress winner of di March 18 and 19 govnorship election.

    Sanwo-Olu score 762,134 votes to beat im closest rival Gbadebo Rhodes-Vivour of Labour Party wey get 312,329 votes.

20. 29 May 2023Watch di inuaguration live here