Ghana 0-0 England World Cup match live updates

Second Half

53" Di corner be too deep, las las Yirenkyi cause foul for di England keeper Pickford.

52" Corner kick to Ghana. Dem fit take dis one create any chance?

51" Madueke im pass through di Ghana backline be too hard, e comot for goalkick.

50" Freekick to England. Jordan press Guehi wey im foul am in di process in front of dia box.

49" Chance! Marvin Senaya meet one long ball inside di England area wit im chest bifor im try to cross to any yellow shirt but England don clear.

47" England pick up from wia dem end di first half. Semenyo get one ball wey im try to enta di England area bifor Bellingham track back to block di ball.

46" Freekick to England. Marvin Senaya foul Rice.

45" Di second half don start, Ghana try to enta di England area quick. Di English blakc di ball wey di pass to Declan Rice comot for throw-in

If you just dey join us, di second half for dis Group L game dey come start. Di scores be 0-0.

Make we see how dis second 45 minutes go end.

For Ghana, afta di first 45, dia coach go decide to carry one creative player enta di game to give di England players somtin to tink about.

Thomas Tuchel go make some changes so say im team fit break down di tough Ghanaian rearguard.

Between di two coaches, na Ghana coach Carlos Queiroz go dey happy sake of im defensive display shut out England and dia deadly attacks.

First Half

HALFTIME!

45+5" Freekick to Ghana afta Bellingham block Jerome opoku as im dey try to play one cross-field ball.

45+ 4" Madueke enta di box to try and create sometin, Ghana defenders steal di ball. For di counter attack, Ghana don lose di ball again.

Marvin Senaya don rise to head away di corner. Ghana dey hold on

45+3" Corner to England. Harry Kane get di ball wey im turn to try to shjoot. Ghana defenders block di ball.

45+2" Pressure don dey for di Ghana side - di Three Lions wan get late chance for dis game bifor di break but di ball comot for goalkick to Ghana.

Dem don add six minutes to dis first half. Ghana dey hold on for di next few minutes bifor halftime.

+6 mins

England attack for di oda end and get corner

44" Thomas Partey do one skill to turn di England midfielder wey im raise one fine ball ova di top for Jordan Ayew. Reece James pressure di Ghana captain wey di ball comot

42" First time Ghana enta di England box wit Semenyo but di Manchester City man delay im pass, but di chance fall to Jordan, im try to win throw-in for di far corner.

Yellow card! Declan Rice catch Jerome Opoku late, wey im collect dim first yellow for di game.

40" So far England dey get all di ball but dem no fit break down di Ghana defence.

39" Jordan Ayew win freekick i nside di Ghana area, once again di ball dey wit di England players.

37" Ghana win freekick for di middle of di park. Dem no fit keep di ball up to one minute. England don dey in control again.

Ghana play di ball straight back to England

36" Ova di top! Arsenal midfielder Rice meet one cross by Madueke for di backpost. But im no fit direct di header on target.

35" England try to attack again, di defenders clear dia lines bifor dem give di ball to Gideon Mensah but di left-back lose concentrationn wey di ball comot for throw-in to England.

33" Gideon Mensah now win freekick. But no threat, di ball go back straight to England

32" Madueke cross di ball into di box, nobody wit white short fit meet di ball, Ghana don clear am.

Freekick to England. Referee bin blow whistle for foul by Jerome Opoku.

31" Dis be di first time for about 30 minutes when Ghana try to play di balkl from dia area to attack England. Dem win freekick

Freekick to Ghana, Marvin Senaya win di ball wey im try to run out of di Ghana area bifor Anthony Gordon foul am.

29" Ghana try to press wit Semenyo, Sibo and Jordan.

28" Gordon no fit reach one pass when England try to attack immediately.

Di game don restart now.

WATER BREAK!

25" Di ball just dey for di Ghana area wey dem dey clear every cross and pass into di box.

Ghana try to enta di England area wit Yirenkyi. Guehi black am wey di ball comot for throw-in

Di game finally restart.

Dem bin dey bandage Jordan Ayew im head as di medics still dey try to see if Reece JAMES fit see beta.

Referee don blow whistle for medical team to enta di park to treat dem.

20" Injury! Clash of heads between Ghana captain Jordan Ayew and Reece JAMES

19" Goalkeeper Asare collect one cross from Reece James.

18"Di possession all bin dey wit England, Ghana dey defend deep.

17" Freekick to Ghana for dia defence - Ayew chest di ball wey im wan turn but dem hack am down.

16" Di corner neva trouble Ghana. Gideon Mensah clear di ball away.

All di pressure dey on top di Ghana team now as England dey pepper dia defence . Jonas Adjetey bin clear one dangerous cutback for corner.

15" Gideon Mensah bin clear one ball wit im lace, afat England try to create chance inside di Ghana box

14" Harry Kane dey for ground afta im clash head wit Ghana defender Jonas Adjetey. Freekick to England for di Ghana area

13" Ova di bar! Rice don smash di ball but di Ghana keeper Asare cover im area well.

12" Freekick to England afta Senaya foul Gordon from behind. Dangerous position for Reece James or Rice

11" Madueke don beat Gideon Mensah for di back wey im try to square di ball for gordon but Ghana manage to clear am.

10" England try to create first chance but di final pass for di edge of di box dey blocked by Ghana.

9" Madueke try to collect one long ball across di park, di ball comot for throw-in afta Gideon Mensah block am

8" Goalkick! Ghana try to enta di England area for di first time thru dia right back Marvin Senaya but im no fit cross di ball wey e comot for goalkick.

6" Ghana try to break for di counter attack wit Jordan Ayew, but di cpatain im pass to Semenyo be too hard, di attack don break down.

5" Freekick to England for di edge of di Ghana area, but dem don clear Rice im freekick

England fans dey boo every touch by black Stars midfielder Thomas Partey to put am under pressure

4" Ghana now begin to dey play some passes wey start wit Partey, to Gideon Mensah bifor di linesman catch Inaki Williams offside.

3" Bellingham im pass to Declan Rice be too hard, di ball comot for throw-in.

2" Di ball bin dey di midfield area as England continue to dey size di Ghana team, di Black Stars also just sit for back dey allow England to pass di ball.

Di Three Lions begin to dey pass di ball around

1" England pass di ball to start

Referee don blow whistle for di game to begin

Di countdown for di stadium begin from 10, 9, 8, 7, 6, 5, 4, 3, 2, 1

Wetin go be di result for dis one? Time go tell.

As we tok am, di last time dis two teams jam na 2011 wey end for 1-1 draw.

Di teams go sing dia national anthem, afta dat dem go shake hands for di game to start well well.

Fans don gather for di Boston stadium under wet conditions for dis game.

England dey wear dia traditional white jersey wey Ghana dey wear dia yellow jersey as both teams waka onto di pitch.

Once again, welcome to our live coverage for dis Ghana v England game

Welcome everibodi to dis Group L clash between Ghana and England for di Boston Stadium.

Di stake dey high and two teams wey get di chance to progress to di R32 stage wit a win for hia, dey jam wit each oda.

A win for di Three Lions of England qualify dem for di next stage wit one game to spare.

Same wit Ghana, wey beat Panama 1-0 for dia first game.

Center referee be Said Martinez from Honduras togeda wit im two assistants Walter Lopez nd Christian Ramirez.

Di fourth official na Ning Ma from China, VAR ref na Guillermo Pacheco from Mexico, assistant na Fei Zhou from China.

Andy Caroll bin score first for di game bifor Asamoah Gyan equalize for di 90th minute for dat game.

Now all to play for in dis one.

Both coaches release dia lineup for dis cracker, remember say di last time dis two kontris face each oda na 2011 when dem play 1-1 draw.

Ghana XI: Benjamin Asare (GK); Gideon Mensah, Jerome Opoku, Jonas Adjetey, Marvin Senaya, Thomas Partey, Caleb Yirenkyi, Kwasi Sibo, Inaki Williams, Jordan Ayew, Antoine Semenyo

England XI: Jordan Pickford (GK); Djed Spence, Marc Guehi, Erik Konsa, Reece James, Declan Rice, Elliot Anderson, Noni Madueke, Anthony GFordon, Jude Bellingham, Harry Kane

Buildup to di game

Di Black Stars of Ghana dey prepare to jam wit di Three Lions of England for dia second Group L match on Tuesday 23 June.

Both teams win dia first game wey each of dem get three points ahead of dis game.

Ghana beat Panama 1-0 wey England sama Croatia 4-2.

Di team wey go win dis game go automatically qualify for di R32 stage of di World Cup wey dey happun for di US, Canada and Mexico.

But di game no go dey easy as tension already dey bifor di match go even begin wit off-di-pitch issues wit Ghana midfielder Thomas Partey.

Afta im miss di first game wey dem play for Canada sake of dem deny am visa, di ex-Arsenal midfielder dey ready to play for dis game for di US.

Di two teams jam once for 2011 for friendly game wey end 1-1. Andy Caroll bin score bifor halftime for dat game bifor Ghana all-time highest goalscorer Asamoah Gyan bin equalize for di 90th minute.

15 years later, di two teams go jam each oda for di World Cup for di Boston Stadium wey di stakes dey high.

Pundits say dem expect England fans to create hostile atmosphere for Thomas Partey for dis game as im continue to face criminal charges for rape for di UK.

Di player bin deny all di allegations wey im plead not guilty for court, di trial go begin for June 2027.

But wit experience for dis kain tin, football fans get how dem dey treat players wey go make dem shake for di pitch when dem dey paly against dem.

Earlier Scotland fans bin boo Morocco captain Achraf Hakimi when dem meet for dia Group C game.

Morocco win dat game 1-0 but di Scottish fans bin boo every touch of di PSG and Morocco captain wey dey face rape charges.

Hakimi also bin deny di allegations wey one French court tok say dem go soon begin trial for im case.

Dat kain treatment dey expected for Thomas Partey if dem select am for dis game but sabi pipo say dem trust say di 33-year-old get di mental capacity to deal wit di hostile atmosphere.

Apart from dis mata, everytin dey set for di Black Stars to face di Three Lions of England.

Wetin di coaches and key players tok

England Coach Thomas Tuchel say im dey aware of di strength of di Ghana team wey im go select team wey go compete wit dem.

"One of Ghana strength na di counter attacks, sake of Ghana dey play wit physicality, speed and individual quality."

Thomas Tuchel say "Ghana neva dey mind say dem no get too much of di ball, sake of dem fit hit you for di counter, dem also dey direct, dem neva dey shy to use long balls."

For di pre-match press conference di 52-year-old coach add say "na different approach dem dey use for dis game, dat na di beauty of di game, different cultures and different approach."

"We gatz adapt and use our own strength to meet di approach of our opponent and put in top performance if we want to win."

Di Three Lions coach get positive news as Arsenal winger Bukayo Saka dey recover from im injury scare.

"Saka no dey feel any more pain, im dey get beta wey im dey feel more free for im movement."

"Im train for di last two days for di highest level, na so im dey ready to go."

Arsenal midfielder Declan Rice say England gatz pick up from dia 4-2 win against Croatia when dem meet di black Stars of Ghana.

"We gatz build on top dat performance, also we don watch Ghana games wey we prepare for dem like we dey prepare for every team."

Rice add say "even though dem bin change dia coach, dem still get very good players so if we no play our own game for 100%, dem go punish us."

Ghana coach Carlos Queiroz tok journalists say im get gat just one objective – to find di way to win, to fight for di win.

"I dey confident say di team we go select for dis game go dey ready and motivated. Dat team go fight for di win, dem go be strong, dem go dey enthusiastic."

Di 73-year-old Portugues coach say football don change well well but di DNA of teams still dey.

"England gatz great team and coach wit big profiles but we go also play wit our own style and our DNA, dem get dia culture, we too we get our own."

Carlos Queiroz dey under pressure to deliver afta im take ova di Ghana job wit only two months to di tournament.

Im no also get enough time to train wit di squad but di gaffer say im dey trust im team well well.

"I want make my players enjoy diasef for dat game and dey true to di African football DNA just like di way di English team go also use dia own identity."

Ghana captain Jordan Ayew say di team go dey togeda to deliver di result for Ghana fans.

"We go make Ghana proud afta dis game, I fit promise you dat. We go work as one team and without di fans we no be anybody so e dey important say di fans go come support us."

Di ex-Crystal Palace striker tok say "di fans gatz continue to push us wey you go see di effect."

On im role as captain and leader for di team wit many young players, Jordan Ayew say "I dey try my best to guide di boys to make dem feel comfortable and take di pressure off dem so say dem fit deliver."

"I gatz perform, di boys also gatz perform, na teamwork."

Possible lineups

England XI: Pickford (GK); James, Konsa, Stones, O'Reilly; Rice, Anderson, Bellingham; Madueke, Kane, Rashford

Ghana XI: Asare; Adjetey, Mensah, Opoku, Senaya; Yirenkyi, Semenyo, Partey; Ayew, Sibo, Fatawu

Di game go happun for di Boston Stadium at 8 PM GMT (9 PM WAT).

Make you join us for commentary for dis game.