د نړۍ تر ټولو قیمتي کور د ننه منظره

د لومړي ځل لپاره د نړۍ تر ټولو قیمتي کور د ننه ډیزاین په ډاګه شوی دی.

راپورونه وايي چې ددغه کور ارزښت، چې څښتن یې یو هندی شتمن موکیش امباني دی، تر یو میلیارد ډالرو اوړي.

دغه کور ته د "اسطوري ټاپو" نوم هم ورکړل شوی دی.

د امباني ښځې، نیتا له یوې مجلې سره په مرکه کې ویلي چې "دا لومړی ځل دی چې د خپل کور په اړه غږېږم. "

هغې دا هم ویلي چې د کور په اړه یې رسنۍ له حقیقت ډېر څه خپروي.

ځینو رسنیو دا پوښتنه هم کړې ده چې ایا ددې کور د ننه خپله د کور څښتن اوسېږي او که څنګه.

په تېر نومبر کې د امباني ښځې دا هم ویلي چې دواړه په تېر سپتمبر کې په دې کور کې اوسېدلي دي.

هغې جیمز ریجیناتو ته چې دغه کور ته د ننوتلو اجازه ورکړل شوې، ویلي چې "دوه میاشتې وړاندې دغه کور ته راغلو... هغه وخت راته ویل شوي وو چې نه ورځو. "

په یوه اخیستل شوي عکس کې د کور د یوې خونې کړکۍ له ځمکې تر چت پورې ښودل شوې، چې پر دېوال یې د پنځو ستورو مجسمې هم کښل شوې دي.

امباني وايي: "د هندوانو په خبره، دا یو عصري کور دی. "

دا ۲۷ پوړیزه کور دی، جې ریجیناتو وايي چې د کور لوړوالی ۵۷۰ ګامه دي چې ۴۰ پوړه پوره کوي.

د ریجیناتو په وینا، په ودانۍ کې د ګاډو ګراج، د نڅا لوی سالون، روغتیايي مرکز او د ساتېرۍ ځایونه او د مېلمه پالنې ځانګړې خونې شته.

د امباني ښځې دا هم ویلي چې د کور په جوړولو کې له هغو کم سارو لرګیو او کریسټال مرمر څخه ګټه اخیستل شوې، د هندي توږونکو په لاس جوړ شوي دي.

دا وايي چې په هندي سبک دغه جوړ شوي کور کې د هندي عبادت ځای هم شته.

خو ځینې کسان ددغه کور په جوړېدو نیوکه کوي او وايي چې ډېر لوی دی، هومره چې ان د ممبۍ ښار نژدې ټول اوسېدونکي په کې ځایېدلی شی.

د ودانۍ په ځمکني پوړ کې یو معبد او په وروستي هغه کې یو کتابتون هم شته.

امباني "ریلایانس" ادارې غړی او اداري مشر هم دی، خو د هغه خور انیل امباني بیا د دغې ودانۍ په ۱۴ پوړونو کې د کورنۍ له نورو غړو سره یوځای اوسېږي.

د ورور او خور ترمنځ په ۲۰۰۲ کال کې هغه مهال د خپل پلار تر مړینې وروسته د هغه د میراث پر سر یوه شخړه هم رامنځ ته شوې وه.