اېف بي ای: کورونا وېروس ښایي د چين لابراتواري تولید وي، چين: امریکا مو نه شي بدنامولی

د امریکا د څېړنو فدرالي ادارې اېف بي ای مشر کریسټفر وریي وايي ډېره شونتیا شته چې د کورونا وېروس په چین کې له یوه لابراتوار نه نورې نړۍ ته خپور شوی وي.

د ایف بي ای مشر له فاکس نیوز ټلویزیوني شبکې سره په مرکه کې ويلي د دوی څېړنې د کورونا وېروس په اړه متفاوتې پایلې لري.

د ښاغلي کریسټفر وریې په وینا د دوی ادارې له څه مودې راهیسې په دې اړه څېړنې کولې خو چین په دې برخه کې د څېړنو د مخنیوي لپاره خپل ټول وس وکړ.

دا لومړی ځل دی چې د امریکا د تحقیقاتو فدرالي ادارې مشر دغه خبره په ډاګه کړې ده.

خو چین بیا تل په وهان ولایت کې له یوه لابراتوار نه د کورونا وېروس د خپرېدو خبره رد کړې او دا ډول تورونه یې چین ته سپکاوی بللی دی.

د چین بهرنیو چارو وزارت ویاندې ماو نینګ په بېجېنګ کې د خبرو پرمهال د امریکا د تحقیقاتو د فدرالي ادارې د مشر ادعاوې خپله د امریکا په زیان وبللې.

نوموړې زیاتوي: " چین له هر ډول او هرې بڼې سیاسي لاسوهنې سره مخالفت لري. د ساینسي مسایلو په اړه د پلټنې لپاره د استخباراتو د ادارې د کارکوونکو ګومارل په خپله د دې موضوع د سیاسي کولو ثبوت دی."

د چین حکومت دغه ویانده وایي له لابراتوار نه د وېروس د خپرېدو تیورۍ له تکرارولو سره به امریکا د چین په بدنامولو کې بریالۍ نه شي.

ګڼو نورو ساینسپوهانو هم له لابراتوار نه د وېروس د لیک کېدو تیوري رد کړې او وايي چې په دې اړه کافي شواهد نشته.

په ورته مهال د ځینو نورو امریکايي ادارو لخوا څېړنو کې مختلفې پایلې ترلاسه شوي چې ځینې یې په لږ باور وايي چې د کورونا وایرس له لابراتوار نه دی خپور شوی بلکې له نورو موجوداتو نه انسانانو ته لېږدېدلی دی.

بل خوا د سپینې ماڼۍ ویاند جان کربي ویلي ولسمشر جوبایډن د ټولو هغو هڅو ملاتړ کوي چې معلومه کړي کورونا وبا څنګه پیل شوه.

خو په وینا یې تراوسه په دې تړاو کومې پایلې ته نه دي رسېدلي او که داسې څه د ویلو لپاره ولري نو هغه به د امریکا له خلکو او کانګرېس سره شریک کړي.

دا په داسې حال کې ده چې د روغتیا نړیوال سازمان او چین له خوا په ۲۰۲۱ کال کې ترسره شوې یوې ګډې څېړنې موندلې چې د دې امکان بیخي کم دی چې د کورونا وېروس له لابراتوار نه خپور شوی وي.

خو د روغتیا د نړیوال سازمان پر څېړنو له پراخو نیوکو وروسته د دې سازمان مشر د یوې نوې څېړنې غوښتنه وکړه.