ایټالیا کې وچکالي؛ سیند کې له دویمې نړیوالې جګړې راپاتې ناچاوده بم موندل شوی
د عکس سرچینه، Reuters
ایټالیا کې سختې وچکالۍ له کبله د یوه سیند د اوبو کچې کمېدل د دې لامل شول د دویمې نړیوالې جګړې یو ناچاودلی بم وموندل شي.
د ایټالیا پوځ اعلان کړی دا ۴۵۰ کیلوګرامي بم کب نیوونکو لومبارډي سیمه کې د پو سیند کڅ کې موندلی دی.
د پوځي چارواکو پر بنسټ ددغه بم جوړېدو کې ۲۴۰ کیلوګرامه چاودېدونکي توکي کارېدلي دي.
ځايي چارواکو ویلي دغه ستر بم ته وروسته په کنټرول شوې بڼه چاودنه ورکړ شوه، خو چاودولو لپاره یې د سیمې ۳۰۰۰ اوسېدونکي خوندي ځای ته ایستل شوي وو.
دې چاودنې لپاره ان د سیمې اسمان کې په لنډمهاله توګه الوتنې هم بندې شوې وې.
د عکس سرچینه، Italian army
ایټالیا تېرو ۷۰ کلونو کې تر ټولو سختې وچکالۍ سره لاس ګریوان ده.
د دې وچکالۍ له کبله د پو سیند ستره برخه وچه شوې.
پو د ایټالیا تر ټولو اوږد سیند دی چې اوږدوالی یې ۶۵۰ کیلو مترو ته رسېږي.
دا سیند له الپ غرونو سرچینه اخلي او ادریاتیک سمندر ته بهېږي.
ایټالیا کې دا سخته وچکالي د دې لامل شوې چې د پو سیند غاړو ته په ځینو پرتو سیمو کې بېړنی وضعیت اعلان شي.
