مسکو د بریتانیا پر ځینو نامتو خبریالانو روسیې ته پر سفر بندیز ولګاوه

د روسیې حکومت د بریتانیا پر یو شمېر نامتو خبریالانو او دفاعي چارواکو روسیې ته پر سفر بندیز اعلان کړی دی. په دې ډله کې د بي سي سي اوسنی عمومي رئیس او یو شمېر خبریالان هم شامل دي.

مسکو دا اعلان وروسته له هغه کړی چې بریتانیا هم څه موده مخکې د اوکرایین جګړې له کبله پر یو شمېر روسي وګړو ورته بندیزونه لګولي وو.

د بي بي سي خبریالانو کې د عمومي رئیس ټېم ډېوي ترڅنګ نېک رابنسن، اورلا ګورېن او کلایو مایر هم شامل دي.

ټولټال پر ۲۹ کسانو بندیزونه لګول شوي، چې پکې د سکای نیوز خبري شبکې، ګارډین ورځپاڼې، ټایمز ورځپاڼې، چنل ۴ تلویزیون او آی ټي وي تلویزیون کارکوونکي او خبریالان شامل دي.

یاده دې وي چې روسیې له دې مخکې بریتانیا او روسیې د یو بل د پارلمانانونو پر سلګونو وکیلانو هم روسیې ته د سفر بندیز لګولی و.

د بریتانیا لومړي وزیر بورېس جانسن هغه مهال د خپل پارلمان غړو ته ویلي وو، د روسیې بندیزونه باید د ځان لپاره د ویاړ نښان وبولي.

مسکو کې د روسیې د بهرنیو چارو وزارت ویلي، په راتلونکي کې به دا لېست نور هم پراخېږي او د نورو وګړو نومونه به هم پکې شاملېږي.

یاد وزارت ویلي، په لېست کې شامل بریتانوي خبریالانو قصداً د اوکرایین جګړې او ډونباس وضعیت په اړه ناسم رپوټونه چمتو کوي او په دې کار سره په بریتانوۍ ټولنه کې د روسیې پر ضد ذهنیت ته وده ورکوي.

د بندیزونو په دې لېست کې پر خبریالانو سربېره د بریتانیا د ځمکني، هوایي او سمندري ځواکونو ځینې مشران هم شامل دي.