تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
زېلېنسکي: دونباس سیمه په بشپړ ډول ویجاړه شوې
د اوکرایین ولسمشر ولودومیر زېلېنسکي روسیه تورنه کړې چې د دغه هېواد ختیځ کې یې دونباس سیمه "دوزخ" ګرځولی دی.
ښاغلي زېلېنسکي کیېف کې خپل شپني خبري کنفرانس کې ویلي چې روسي ځواکونو دا سیمه هواره کړې ده.
هغه وویل: "پر اودېسا سیمې، د اوکرایین پر مرکزي ښارونو پرله پسې ګوزارونه کېږي. دونباس په بشپړ ډول ویجاړ شوی."
د اوکرایین ولسمشر زیاته کړې دا د دې لپاره قصدي او جرمي هڅه ده چې د امکان تر حده ډېر اوکرایینیان ووژل شي او د امکان تر حده ډېر کورونه، ټولنیز تاسیسات او تشبثات لمنځه یوړل شي.
د پنجشنبې پر ورځ د اوکرایین دفاع وزارت روسیه تورنه کړه چې پر دونباس سیمه یې بریدونه سخت کړي او د خلکو د تښتېدو مخه نیسي.
مسکو تېره میاشت د اوکرایین پلازمینې کیېف ته له څېرمه سیمو د خپلو ځواکونو د ایستلو د اعلان پر مهال وویل غواړي جګړه د دغه هېواد پر ختیځ متمرکزه کړي.
د دونباس جګړه چې د اوکرایین پخوانی صنعتي زړه بلل کېږي د روسیې یرغل د برخلیک ټاکلو لپاره مهمه ده.
د دې سیمې چې لوهانسک او ډونېڅک هم ځان کې رانغاړي، اکثریت اوسېدونکي روسي ژبې دي او مسکو یې د ازادۍ شعار زمزمه کوي.
له دې سره د بریتانیا د دفاع وزارت یوه تازه ارزونه ښيي چې روسیه ښايي د اوکرایین سویل کې د ماریوپول تر بشپړ کنټرول او هلته د وضعیت له ارامېدو وروسته خپل یو شمېر ځواکونه دونباس کې د خپلو عملیاتو ملاتړ او تقویې ته واستوي.