قزاقستان کې د تېلو بیو لوړېدو پر ضد له احتجاجونو وروسته بېړنیز حالت اعلان شوی

له هغه وروسته چې قزاقستان کې د تېلو بیو زیاتېدو خلاف احتجاجونه تاوتریخجن شول، د دې هېواد ولسمشر په ځینې سیمو کې د دوو اونیو لپاره بېړنیز حالت اعلان کړی.

د قزاقستان په ډېری سیمو کې د پراخو مظاهرو رپوټونه ورکړل شوي دي.

تر ټولو لوی ښار الماتا کې پولیسو پر هغو مظاهرینو د اوښلن ګاز کارولی، چې ګاډو ته یې اور ورته کړی و.

د ولسمشر قاسم جمرت توکایوف لخوا یوه صادر شوي امر کې ویل شوي، چې نوموړي د نا ارامۍ له دې پېښو وروسته د حکومت استعفا منلې ده.

په امر کې ویل شوي، په موقت ډول علي خان اسماعیلوف د لومړي وزیر په توګه ګومارل شوی دی.

د سې شنبې پر ورځ یوه ویډیويي پیغام کې ولسمشر وویل، د احتجاجیانو له لوري پر دولتي ادارو بریدونه ''په غوڅ ډول غیر قانوني دي. '' نوموړي په الماتا او یوه لویدیځ ولایت مانګیستاو کې بېړنیز حالت اعلان کړ.

په رسمي اسنادو کې چې رویټرز خبري اژانس لیدلي د شپې مهاله ګرځبندیز او خلکو ګڼې ګوڼې یو ځای کېدو مخنیوي یادونه هم شوې.

د نفتو له پلوه دې شتمن هېواد کې د نفتو بیې هغه مهال لوړې شوې، چې چارواکو پر مایع ګاز د بیو لوړېدو بندیز لېرې کړ، چې په ګاډو کې د تېلو په توګه کاروول کېږي.

په الماتا کې د سې شنبې پر شپه زرګونه احتجاج کوونکي یو ځای شوي وو، چې د اې ایف پي خبري اژانس د رپوټ له مخې له بلو ضد پولیسو سره لاس او ګرېوان شول.

داسې رپوټونه هم ورکړل شوي، چې د هېواد لر او بر کې انټرنېټ شبکه غیر فعاله وه.

په قراقستان کې چې ۱۹۹۱ کال کې یې د شوروي اتحاد له منځه تلو وروسته خپلواکي ترلاسه کړه، مظاهرې او پراخ احتجاجونه ډېره مخینه نه لري.