کورونا وېروس: هند دوه نوي واکسینونه تایید کړل، امریکا کې د ګوښي کېده موده نیمايي شوه

د کورونا وېروس اومېکرون بڼې له خپرېدو سره هممهاله هند حکومت د کووېډ مخنیوي دوه نوي واکسینونه تایید کړي دي.

د سیروم انسټیټیوټ کوواکس او د بایلوجیکل اي کوربیواکس نومي واکسینونو ته په ''سخت بېړنیز وضعیت '' کې د کارولو اجازه ورکړل شوې ده.

هند اوس د کورونا مخنیوي اته ډوله واکسین تایید کړي دي چې درې ډوله یې خپله هند کې جوړ شوي دي.

په هند کې تر اوسه د کورونا وېروس مخنیوي واکسین یو اعشاریه څلور میلیارده خوراکه وړاندې شوي دي.

هند حکومت غواړي د سږ کال تر پایه پورې ټولو هندیانو ته د کورونا ضد واکسین ورکړي، خو تر اوسه دې لړ کې پاتې راغلي.

لږ تر لږه ۶۲ سلنه لویانو ته د کورونا ضد واکسین ورکړل شوي دي او د تېر کال په جنورۍ کې د واکسین لړۍ له پیلولو راهیسې تر اوسه پورې لږ تر لږه نوي سلنه کسانو ته یو خوراک ورکړل شوی دی.

لومړي وزیر نرېندرا مودي ویلي هند حکومت به د روغتیايي کارکوونکو او هغو کسانو لپاره چې مهمې ورځنۍ دندې او دغه راز تر ۶۰ کلنۍ پورته کسانو لپاره د کورونا ضد واکسین اضافي خوراک یا بوسټر چې لومړی وزیر مودي یې 'احتیاطي خوراک ' بولي، ورکړه پیل کړي.

نوي تایید شوي کوربیواکس واکسین د امریکا ډیناواکس کالج په اشتراک چمتو شوي دي.

د هند عامې روغتیا وزیر مانسوک مانداویا وايي، دا واکسین کورونا وېروس له هغه ''وتلي پروټینه '' چمتو شوي چې وېروس یې د انسان بدن ته د ننوتو لپاره کاروي.

کوواواکس بیا د نواواکس ځايي بڼه ده چې د هند سیروم انسټیټوټ به یې چمتو کوي چې د اکسفورډ استرازینیکا واکسین هم چمتو کوي او په ځايي توګه د کوواشیلډ نوم ورکړل شوی دی.

د یاد شرکت په وینا په امریکا کې د کلینیکي تجربې پر مهال دا واکسین له نوې سلنې زیات ګټور ثابت شوي دي.

د ګوښي کېدو نیمايي موده

بل لور ته د امریکا متحدو ایالتونو روغتیايي چارواکو د کووېډ ناروغانو شمېر له ډېرېدو سره هممهاله د هغو ناروغانو لپاره چې د ناروغۍ نښې، نښانې نه لري، د ګوښي کېدو موده له لسو ورځو پنځو ورځو ته نیمايي کړې ده.

د دې چارې هدف په بېلا بېلو برخو کې د کارکوونکو لږوالي له کبله د رامنځته شویو ګډوډویو کمولو هڅه بلل کېږي.

په امریکا کې د ناروغیو کنټرول او مخنیوي مرکز 'سي ډي سي ' چارواکي وايي، ډېری وخت وېروس د ناروغانو بدن کې د ناورغۍ نښو نښانو برالا کېدو دوې ورځې مخکې او درې ورځې وروسته نورو ته خپرېږي.

خو معترضین بیا د ګوښي کېدو پای ته رسېدو په پار د معایناتو کموالي له کبله پر دې پرېکړه نیوکې کوي.

په امریکا کې د کووېډ نویو ناروغانو شمېر ډېرېدو لوی لامل اوس د کورونا وېروس اومېکرون بڼه بلل کېږي، چې اوس په دغه هېواد کې پرې د اخته کسانو شمېر تر ټولو ډېر دی.

له دې مخکې موندنو ثابته کړه چې اومېکرون بڼه د نورو هغو پرتله ډېره په چټکۍ سره خپرېږي، خو نښې نښانې یې سختې نه دي.