تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
لبنان کې پر احتجاجیانو له ډزو وروسته د ویر ورځ اعلان شوې
لبنان کې چارواکو د پلازمېنې بیروت له خونړۍ پېښې وروسته چې یوه مظاهره کې د ډزو له کبله شپږ کسان ووژل شول، نن د ویر ورځ اعلان کړې.
د شیعه ګانو ځینې ډلو پرون د هغه قاضي پر ضد احتجاجي مظاهره کوله چې پروسږ کال د بیروت پر ساحل د یوې درنې چاودنې پېښې څېړنه کوي.
حزب الله ډله چې دا مظاهره یې تنظیم کړې وه، تور پورې کوي چې د ودانیو له چتونو پر احتجاج کوونکو ډزې شوې دي.
د دوې د عیسویانو پر یوې ډلې د برید تور پورې کوي، خو یادې ډلې دا تورونه رد کړي دي.
د یادونې ده، چې د کیمیاوي مواده زېرمه کې د ۲۰۲۰ کال اګست میاشتې هغې چاودنې له کبله ۲۱۹ کسان وژل شوي وو او اوس یې د څېړنې په تړاو پراخې ناندرۍ رامنځته شوې دي.
د هغې چاودنې په تړاو چې له کبله یې د ښار ډېرې برخې ویجاړې شوې، تر اوسه څوک نه دي نیول شوي.
حزب الله ډله تور پورې کوي چې د پېښې قضیې څېړونکی قاضي بې پرې نه دی، خو د پېښې قربانیانو کورنۍ د هغه د کار ملاتړ کوي.
پرون پنجشنبه همدې لړ کې د لبنان محاکمو مرکزي ودانۍ مخې ته احتجاجیان راټول شوي وو، تور یې پورې کاوه چې محاکمه سیاسي شوې ده او د قاضي طارق بیطار د ګوښه کېدو غوښتنه یې کوله چې ډزې وشوې او لږ تر لږه شپږ کسان ووژل شول.
تر څو ساعتونو پورې د پېښې ځای په شاوخوا لارو کوڅو کې وسله وال کسان لیدل شوي چې پر یوه بل یې د سپکو او درنو وسلو ډزې کولې.
داسې باور کېږي چې وسله وال کسان د شیعه ګانو او عیسویانو د بېلا بېلو ډلو اړوند وو، چې د پېښې ځای ته د پوځیانو له رسېدو وروسته وتښتېدل.
روغتیا پالان وايي، د پېښې له ځایه داسې مړي هم وروړل شوي چې پر سرونو په ډزو ویشتل شوي.