تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د اسراییل او حماس اوربند پیل شو
د اسراییل او فلسطینۍ ډلې حماس اوربند د جمعې ورځې لومړیو ګړیو کې پیل او ور سره د دواړو لورو ۱۱ ورځنۍ نښته پای ته ورسېده چې تر ۲۴۰ ډېر کسان پکې ووژل شول.
د اوربند پیلېدو سره فلسطینیان سړکونو ته ووتل او خوشالي یې پیل کړه.
د امریکا ولسمشر جو بایډن دا اوربند د پرمختګ لپاره "ریښتونی چانس بولي.
جو بایډن سپینه ماڼۍ کې د اوربند لپاره د اسراییل پرېکړه وستایله او زیاته یې کړه چې واشنګټن د ترهګرو دلو مقابل کې د ځان د دفاع لپاره د اسراییل د حق ملاتړ کوي.
هغه وویل، د اسراییل د توغندیز ضد سیستم سره به مرسته وکړي چې راتلونکي کې هم ښه کار وکړي.
اسراییل د پنجشنبې په ورځ هم د غزه شمال ته د حماس پر ودانیو تر سلو ډېرو بریدونو دعوه وکړه او ځواب کې حماس هم اسراییل ته توغندي وتوغول.
تر اوربند مخکې د اسراییل امنیتي کابینې په دې تړاو پرېکړه تایید کړه خو ویې ویل د اوربند پلي کېدو پر وخت تر اوسه پرېکړه نه ده شوې.
په اعلامیه کې ویل شوي د اوربند وړاندیز مصر کړی چې ''دوه اړخیز او هممهال '' به وي.
د مصر دولتي ټلویزیون رپوټ کې ویل شوي، ولسمشر عبدالفتاح السیسي دوه ډلې اسراییل او د اسراییل تر ولکې لاندې فلسطیني سیمو ته استولې چې د اوربند عملي کېدو چارې وڅاري.
اسراییل او حماس څه وايي؟
اسراییل او حماس دواړه اوسني ټکر کې د بریالیتوب دعوه کوي.
د اسراییل حکومت وايي، له حماس او نورو وسلوالو ډلو سره اوسنۍ نښتو کې یې بریا بې مخینې ده.
خو د حماس یو چارواکی علي برکه دا اوربند د فلسطیني ولس بری او د نتنیاهو ماتې بولي.
نوموړی له اسوشېټېډ خبري اژانس سره مرکه کې وايي، دوی به تر هغه پوځي تیارسي کې اوسي، چې د هوکړې پوره جزیات چې بشپړ شوي نه وي.
د اوربند لپاره د مختلفو لورو هڅې
د ملګرو ملتونو عمومي اسمبلۍ هم پرون څو ساعته ځانګړې غونډه وکړه او د اوربند غږ یې وکړ، چې ورسره پر اسراییل فشارونه ډېر شول.
د ملګرو ملتونو سرمنشي له ښکېلو لورو وغوښتل چې سملاسي جګړه ودروي.
انتونیو ګوتېرش غزه کې د روان کړکېچ ارزولو لپآره د ملګرو ملتونو د عمومي اسمبلۍ ځانګړې ناسته جوړه کړه.
د جرمني د بهرنیو چارو وزیر هایکو ماس هم د پنجشنبې په ورځ اسراییل ته لاړ. دغه هېواد هم سیمه کې د سملاسي اوربند غوښتنه کوله.
قطر هم د حماس او اسراییل ترمنځ د اوربند هڅه کړې ده.
مخکې په غزه کې د بي بي سي خبریال رشدي ابولوف وویل، اسراییل حکومت به د امنیتي کابینې له دې غونډې وروسته پر اوربند هوکړه وکړي.
نوموړی د اوربند خبرو کې د ښکېلو سرچینو له قوله وویل، اسراییل مصر ته خپل دریځ څرګند کړی دی. مصر د اوربند خبرو کې د منځګړي رول درلود.
د اسرائیل او حماس تر منځ دې ۱۱ ورځنۍ جګړه کې د ۶۵ ماشومانو په ګډون ۲۴۰ فلسطینیان ووژل شول او د دوو ماشومانو په ګډون ۱۱ کسان اسرائیل کې ووژل شول.
غزه کې دغه ټکر په ختیځ بیت المقدس کې پر یوه سپېڅلي ځای- چې مسلمانانو او یهودانو ته محترم دی- د اسراییلو او فلسطینیانو ترمنځ د اونیو جنجال وروسته پیل شو.
د ملګرو ملتونو شمېرې ښيي چې د دې کړکېچ له کبله غزه کې نور فلسطینیان له خپلو مېنو تېښتې ته اړ شول او هلته د بې ځایه شویو کسانو شمېر ۹۱ زره تنو ته رسېدلی.
په غزه کې د کور جوړولو وزرات مسوولین وايي، په دې سیمه کې ۱۶۰۰۰ کورونو ته زیان اوښتی، ۱۸۰۰ کورونو ته داسې زیان اوښتی چې د اوسېدو وړ نه دي او ۱۰۰۰ کورونه په بشپړ ډول ویجاړ شوي دي.
د حماس رسنیزې څانګې په وینا غزه کې کارځایونو او کاروباري مرکزونو ته د اوښتي زیان کچه ۴۰ میلیونو ډالرو ته رسېږي.
بل لور ته اسراییل پوځ وايي، له غزه سیمې د اسرائیلي ښارونو لور ته ۴۳۰۰ توغندیو ګوزارونه شوي دي، چې نوې سلنه یې پر هدف له لګېدو مخکې د اوسپنیز چتر په نامه د اسرائیل دافع هوا سسټم پر مټ له منځه تللي.
په اسرائیل کې د صنعت کارو ټولنې د لومړیو دریو ورځو جګړې اقتصادي زیان کچه ۱۶۶ میلیونه امریکايي ډالر اټکلوي.