د پاکستان حکومت پر ضد احتجاج؛ فضل الرحمن اسلام اباد ته د لاریون اعلان وکړ

د پاکستان دېموکراسۍ غورځنګ یا (پي ډي اېم) د یکشنبې پر ورځ د پنجاب مرکز لاهور ښار کې خپله وروستۍ ولسي غونډه وکړه. په دې غونډه کې د (پي ډي اېم) مشر مولانا فضل الرحمن اعلان وکړ چې د راتلونکي کال پیل کې به د عمران خان حکومت پر ضد اسلام اباد ته لاریون کوي او له پارلمانه به هم استعفاوې کوي.

مولانا فضل الرحمن دې ولسي غونډې ته وویل چې دا لاریون به د جنورۍ میاشتې په وروستیو او یا هم د فبرورۍ په لومړیو ورځو کې کېږي.

نوموړي همدا راز ویلي چې د اپوزیسیون ګوندونو غړي به د واکمن تحریک انصاف ګوند پر ضد د خپل احتجاج په لړ کې له پارلمانه هم استعفاوې کوي.

مولانا فضل الرحمن یو ځل بیا تور پورې کړ چې د عمران خان په مشرۍ د تحریک انصاف ګوند اوسنی حکومت د پوځ په مرسته او د درغلۍ له لارې جوړ شوی او نور د زغملو نه دی.

د پاکستان دېموکراسۍ غورځنګ د اپوزیسيون له شاوخوا ۱۱ ګوندونو جوړ دی، او مشري يې مذهبپال سیاستوال مولانا فضل الرحمان کوي.

خو پخوانی لومړی وزیر نوازشریف او د پخوانۍ لومړۍ وزیرې بېنظیر بهټو د زوی - بلاول بوټو زرداري په ګډون پښتانه او بلوڅ ملتپال ګوندونه هم د دغه غورځنګ برخه دي.

د پاکستان دېموکراسۍ غورځنګ چې د روان کال په سپتمبر میاشت کې د اپوزیسیون تر ټول ګوندیز کنفرانس وروسته جوړ شو، تر دې دمه يې په ګوجرات، کراچۍ، کوټه، پېښور او ملتان کې لویې ولسي غونډې کړې دې.

د "پي ډي اېم" مهمې څېرې څوک دي؟

د لاهور په نننۍ ولسي غونډه کې به پخوانی لومړی وزیر نوازشریف له لندنه د ويډیو له لارې وینا کوي او په غونډه کې به يې لور - مریم نواز شریف او د ګوند نور مهم مشران هم ګډون کوي.

د اپوزیسيون د دویم لوی ګوند، پاکستان پيپلز پارټۍ مشر بلاول بهټو زرداري، پښتون ملتپال سیاستوال محمود خان اڅکزی، افتاب احمد خان شېرپاو، میا افتخار حسین، د بلوڅو ملتپال سیاستوال سردار اختر مېنګل، ډاکټر عبدالمالک بلوڅ او د ځينو نورو ګوندونو مشران هم ویناوي وکړي.

د پښتون ژغورنې غورځنګ یو مشر او د پاکستان د قامي اسمبلۍ غړی محسن دوړ هم په پیل کې د (پي ډي اېم) ځینو جلسو کې ګډون وکړ.

خو ویل کېږي چې وروسته د (پي ډي اېم) ځینو غړو، په ځانګړې توګه د دې غورځنګ مشر مولانا فضل الرحمن د ښاغلي دوړ له ګډون سره مخالف پیل کړ.

له دې مخالفتونو وروسته محسن دوړ اعلان وکړ چې له دې وروسته به د پي ډي اېم په غونډو کې ګډون نه کوي، خو د دې غورځنګ د غوښتنو ملاتړ به کوي.

د پنجاب ایالتي حکومت د لومړي وزیر عمران خان د ګوند تحریک انصاف په واک کې دی، او د دېموکراسۍ غورځنګ ته يې د ولسي غونډې اجازه نه ده ورکړې.

خو د اپوزیسيون ګوندونو پلویانو په زوره هلته څوکۍ ايښې او د منار پاکستان میدان يې د دغې ولسي غونډې لپاره برابر کړی دی.

د پاکستان دېموکراسۍ غورځنګ غوښتنه کوي چې د لومړي وزیر عمران خان حکومت دې ختم کړل شي او په هېواد کې دې له سره ټولټاکنې وشي.

دوی تور پورې کوي چې د تېر ۲۰۱۸م کال په ټولټاکنو کې درغلي شوې او د دغې درغلۍ تور دوی پر پوځ او استخباراتو پورې کوي.

خو د پاکستان پوځ او واکمن تحریک انصاف ګوند تل دا تورونه رد کړي دي.