تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
شاهد اپريدی د پاکستان کرېکټ بورډ د غوراوي کمېټې مشر شو
د پاکستان کرېکټ بورډ په وينا د دغه هېواد د ملي لوبډلې پخوانی لوبغاړی او لوبډلمشر شاهد اپريدی د کرېکټ بورډ د غوراوي کمېټې لنډمهالی مشر نومول شوی دی.
د پاکستان د کرېکټ بورډ د خبرپاڼې له مخې شاهد اپريدی به د نيوزيلنډ پر وړاندې د لوبلړۍ لپاره د غوراوي کمېټې دنده پر غاړه ولري.
د پاکستان کرېکټ بورډ نوي مشر نجم سېټي د غوراوې نوې کمېټه اعلان کړې چې د شاهد اپريدي په مشرۍ به يې عبدالرزاق او راو افتخار غړي وي.
شاهد اپريدي چې په ۸۳ لوبو کې د پاکستان کپتانۍ کړې په خپل لوبيز ژوند کې يې ۲۷ ټېسټ ، ۳۹۸ يو ورځنۍاو ۹۹ شل اوريزې نړيوالې سيالۍ کړې دي.
نوموړي په نړيوالو لوبو کې ټولې ۱۱۱۹۶ منډې کړې او ۵۴۱ لوبغاړي يې سوځولي دي.
وړاندې د پاکستان لومړي وزير شهباز شريف د کرېکټ بورډ مشر رميز راجه له دندې ګوښه او پر ځای يې نجم سېټې وټاکه. نجم سېټي چې مخکې يې هم د کرېکټ بورډ د مشرۍ دنده پر غاړه لرله په کرېکټ بورډ کې د يو لړ بدلونونو راوستلو اعلان کړی دی.
دغه بدلونونه وروسته له هغې راځي چې پاکستان روانه مياشت په کور دننه د انګلند پر وړاندې د ټېسټ لوبو لړۍ ۳-۰ وبايلله.
بل پلو د پاکستاني د کورنۍ ليګ يا پي سي اېل راتلونکې سيالۍ د فبرورۍ پر نهمه نېټه پیلېږي.
ټاکل شوې ټولې لوبې په پاکستان کې دننه د کراچۍ، لاهور، ملتان او راولپنډۍ په لوبغالو کې به ترسره شي.
په خیبر پښتونخوا کې د کومې لوبې ترسره کېدو ته ځای نه دی ورکړل شوی خو نجم سېټي وايي هڅه کوي چې په راتلونکي کې پېښور کې هم د کرېکټ لوبې بېرته پيل شي.