د پاکستاني طالبانو پخوانی ویاند ریښتیا هم له پوځ تښتېدلی؟
د پاکستان خواله رسنیو کې ویډیو پیغام چلېږي چې د پاکستاني طالبانو د پخواني ویاند احسان الله احسان بلل کېږي او نوموړی دعوه کوي چې له پوځ تښتېدلی.
تراوسه ازادو سرچینو دا نه ده تایید کړې چې دا پیغام د احسان الله احسان دی او که نه.
بي بي سي چې د پاکستان د پوځ له عامه اړیکو ادارې سره تماس ونیو، نو دې ادارې هم وویل، چې په دې هکله څه نشي ویلی.
اول ځل د هند ورځپاڼې سنډې ګارجین تېره میاشت دا خبر خپور کړ، خو په ځواب کې یې چارواکو څه ونه ویل.
احسان الله احسان ته منسوب ویډیو پیغام کې نوموړی وايي: د ۲۰۱۷ کال د یوه تړون له مخې یې ځان د پاکستان څارګرې ادارې ته سپارلی و.
هغه زیاتوي، درې کاله په دې تړون ودرېد، خو امنیتي ادارو له مېرمنې او بچیانو سره بندي کړی و.
د عکس سرچینه، AFP
نوموړی دعوه کوي چې دې دریو کلونو کې د پاکستان پوځ له ده سره په ژمنو ونه درېد او د تړون خلاف ورزي یې وکړه، ځکه مجبور شو چې د ځان اېستلو لپاره پر پلان کار و کړي.
د دوو دقیقو ویډیو کې احسان الله احسان دا هم وايي، چې د جنورۍ په ۱۱ په تېښته بریالی شو.
دې ویډیو کې دا هم راغلي چې د پاکستان د پوځ او ادارو او د ځان سپارلو او بیا تښتېدلو په هکله نور مالومات به وروسته خپاره کړي.
د ۲۰۱۷ کال په اپرېل کې د پاکستان پوځ د احسان الله احسان د اعتراف پیغام وړاندې کړ، چې پکې یې ویل د هند څارګرې ادارې ته یې کار کاوه.
د پوځ د عامه اړیکو ادارې له خوا په هغه خپاره شوي بیان کې نوموړي ویلي وو، چې اصلي نوم یې لیاقت علي دی او د مومند ایجنسۍ اوسېدونکی دی.
هغه دا هم وویل، چې له دې ډلې سره د لسو کلونو د تجربې له مخې طالبان د اسلام په نوم خلک په تېره ځوانان بې لارې او له ځان سره ملګري کوي:
طالب مشران په خپلو خبرو او دعوو پوره نه درېږي.
د عکس سرچینه، facebook
هغه په دغه پیغام کې- چې د پاکستان پوځ خپور کړـ دا هم ویلي و چې د افغانستان ملي امنیت او د هند را دې ډلې ته موخې ټاکي او چې کله یې ترلاسه کړي نو بیه یې هم ور کوي.
احسان الله احسان د پاکستاني طالبانو د ویاند په توګه پر ملاله یوسفزۍ د برید مسوولیت هم منلی و.
د ۲۰۱۷ کال اپرېل کې د پاکستاني پوځ له خوا د احسان الله احسان تر پیغام خپرېدو څو ورځې وروسته نوموړي د پاکستان له جیو نیوز تلوېزون سره هم مرکه کړې وه.
