"پاکستاني ملت ته د مودي پیغام"

د پاکستان لومړي وزیر عمران خان یوه ټوېټر کې ویلي، چې د پاکستان ورځ په مناسبت د هند لومړي وزیر نرېندر مودي د پاکستاني ملت لپاره د نېکو هیلو پیغام استولی دی.

هغه ټوېټ کې زیاتوي د نرېندر مودي پیغام ورته رسېدلی، چې د پاکستان ورځې(یوم پاکستان) په پلمه د پاکستان ولس ته نېکې هیلې او مبارکي پکې ده:

"مودي خپل پیغام کې دا هم زیاته کړې چې اوس وخت د دی چې د هند نیمه وچې خلک له ترهګرۍ او تاوتریخوالي پاک ماحول کې د جمهوریت، امن، پرمختګ او ټیکاو لپاره کار وکړي".

د پاکستان د لوموړي وزیر له خوا د هندي سیال د پیغام شریکولو سره ټوېټر کارنو حیرانتیا او خوښي ښودلې ده.

د ځینې کسانو په اند، د عمراخان د پالیسي له وجې اوس نرېندر مودي هم په سوله ییز انداز خبرې کوي.

خو نور خلک پر دغه پیغام بې باوري ښيي او پوښتنه کوي چې عمران خان ولې د دغه پیغام کاپي نه خپروي.

ځیې یې هم یو ټاکنیز ګوزار بولي.

یوه ټوېټر کارن نجده د عمران خان د ټوېټ ځواب کې ویلي: ځه دا نېکې هیلې ومنه او د انسانیت او امن لپاره دوعا وکړه.

خو ابوصارم لیکي: "اوس اوښ د غره لمنې ته ورسېد".

نورو بیا شک ښودلی او فکر یې کړی چې مودي دا ډول پیغام نه دی استولی.

ګبر او ساجد سني له عمران خان غوښتي چې د مودي د پیغام سکرین شاټ خپور کړي.

فهد امازی لیکي: "ښه خبره ده خو که دا پیغام مو د مودي په ایکاونټ لیدلی وی، لا ډېره ښه خبره وه".

نوموړي عمران خان ته وايي: "ته اوس د مودي ویاندي کوې دا به لا ښه کار و چې مودي ستا د ټلیفون له نه ځوابولو وروسته تاسو ته پیغام استولی وی".

عمران ایوب هم باور نه لري چې د هند لومړي وزیر دا پیغام استولی وي.

"له داسې سړي دا ډول هیله نشي کېدلی، چې د ټاکنو لپاره خپل پوځ وژني".

خو راحیل خان خبرداری ور کړی چې د مودي له پخواني پیغام وروسته پر بالاکوټ برید وشو:

"زموږ ونې یې ووژلې".