وروستی, د پاپ فرانسیس مړی نن 'بازېلېکا' کلیسا ته لېږدول کېږي: شنبه یې د تدفین مراسم دي
د عکس سرچینه، Getty Images
د کاتولیک عیسویانو د مړه شوي مشر پاپ فرانسیس مړی نن چهارشنبه په واتیکان کې د 'سېنټ پيټرز بازېلېکا' کلیسا ته لېږدول کېږي. هلته د شبنې په ورځ خاورو ته سپارل کېږي او تر هغه به یې مړی د ویر لپاره ايښی وي.
وار د مخه یې عام خلک او پلویان څېرمه سیمې ته په ورټولېدو دي.
له وتیکانه په خپرو شوو عکسونه کې ښکاري چې له 'کاسا سانتا مارتا' سیمې چې اوس د پاپ مړی پکې ايښی، تر بازېلېکا پورې ګڼ خلک د هغه د مړي لیدو ته ورټول شوي دي.
د عکس سرچینه، Reuters
د ځايي وخت له مخې به بازېلېکا کلیسا په دې موده کې هره ورځ له سهار وختي د شپې تر ناوخته پورې د خلکو پر مخ پرانیستې وي چې د پاپ مړی وګوري.
د عکس سرچینه، Reuters
پرون د ایټالیا ولسمشر سرجیو ماتاریلا د واتیکان په سانتا مارتا کې د پاپ مړي ته د درناوي په موخه حاضر شو او د دوشنبې په ورځ یې د هغه پر مړینه خواشيني څرګنده کړې وه.
د عکس سرچینه، VATICAN MEDIA/SIMONE RISOLUTI/HANDOUT VIA REUTERS
بازېلېکا ته تر لېږدولو مخکې به کاډېنل کېون فارېل هلته د یوه لمونځ امامت وکړي. دی د پاپ فرانسیس تر مړینې وروسته د رومن کاتولیکې کلیسا مشر شوی او د نوي پاپ تر ټاکل کېدو به دا دنده ور له غاړې وي.
